| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಪಿಯಾಲಫಲದಾಯಕತ್ಥೇರಅಪದಾನವಣ್ಣನಾ
10. Piyālaphaladāyakattheraapadānavaṇṇanā
ಪರೋಧಕೋ ತದಾ ಆಸಿನ್ತಿಆದಿಕಂ ಆಯಸ್ಮತೋ ಪಿಯಾಲಫಲದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿಖಿಸ್ಸ ಭಗವತೋ ಕಾಲೇ ನೇಸಾದಕುಲೇ ನಿಬ್ಬತ್ತೋ ಹಿಮವನ್ತೇ ಏಕಸ್ಮಿಂ ಪಬ್ಭಾರೇ ಮಿಗೇ ವಧಿತ್ವಾ ಜೀವಿಕಂ ಕಪ್ಪೇತ್ವಾ ವಸತಿ। ತಸ್ಮಿಂ ಕಾಲೇ ತತ್ಥ ಗತಂ ಸಿಖಿಂ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಸಾಯಂ ಪಾತಂ ನಮಸ್ಸಮಾನೋ ಕಞ್ಚಿ ದೇಯ್ಯಧಮ್ಮಂ ಅಪಸ್ಸನ್ತೋ ಮಧುರಾನಿ ಪಿಯಾಲಫಲಾನಿ ಉಚ್ಚಿನಿತ್ವಾ ಅದಾಸಿ। ಭಗವಾ ತಾನಿ ಪರಿಭುಞ್ಜಿ। ಸೋ ನೇಸಾದೋ ಬುದ್ಧಾರಮ್ಮಣಾಯ ಪೀತಿಯಾ ನಿರನ್ತರಂ ಫುಟ್ಠಸರೀರೋ ಪಾಪಕಮ್ಮೇ ವಿರತ್ತಚಿತ್ತೋ ಮೂಲಫಲಾಹಾರೋ ನಚಿರಸ್ಸೇವ ಕಾಲಂ ಕತ್ವಾ ದೇವಲೋಕೇ ನಿಬ್ಬತ್ತಿ।
Parodhakotadā āsintiādikaṃ āyasmato piyālaphaladāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle nesādakule nibbatto himavante ekasmiṃ pabbhāre mige vadhitvā jīvikaṃ kappetvā vasati. Tasmiṃ kāle tattha gataṃ sikhiṃ bhagavantaṃ disvā pasannamānaso sāyaṃ pātaṃ namassamāno kañci deyyadhammaṃ apassanto madhurāni piyālaphalāni uccinitvā adāsi. Bhagavā tāni paribhuñji. So nesādo buddhārammaṇāya pītiyā nirantaraṃ phuṭṭhasarīro pāpakamme virattacitto mūlaphalāhāro nacirasseva kālaṃ katvā devaloke nibbatti.
೬೬. ಸೋ ತತ್ಥ ದಿಬ್ಬಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚ ಅನೇಕವಿಧಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಗಹಪತಿಕುಲೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಘರಾವಾಸಂ ಸಣ್ಠಪೇತ್ವಾ ತತ್ಥ ಅನಭಿರತೋ ಗೇಹಂ ಪಹಾಯ ಸತ್ಥು ಸನ್ತಿಕೇ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ನಚಿರಸ್ಸೇವ ಅರಹತ್ತಂ ಪತ್ತೋ ಅತ್ತನೋ ಕತಫಲದಾನಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪರೋಧಕೋ ತದಾ ಆಸಿನ್ತಿಆದಿಮಾಹ। ತತ್ಥ ಯದಾ ಅಹಂ ಪಿಯಾಲಫಲಂ ದತ್ವಾ ಚಿತ್ತಂ ಪಸಾದೇಸಿಂ, ತದಾ ಅಹಂ ಪರೋಧಕೋ ಆಸಿನ್ತಿ ಸಮ್ಬನ್ಧೋ। ಪರೋಧಕೋತಿ ಪರಸತ್ತರೋಧಕೋ ವಿಹೇಸಕೋ। ‘‘ಪರರೋಧಕೋ’’ತಿ ವತ್ತಬ್ಬೇ ಪುಬ್ಬಸ್ಸ ರ-ಕಾರಸ್ಸ ಲೋಪಂ ಕತ್ವಾ ‘‘ಪರೋಧಕೋ’’ತಿ ವುತ್ತಂ।
66. So tattha dibbasampattiyo anubhavitvā manussesu ca anekavidhasampattiyo anubhavitvā imasmiṃ buddhuppāde gahapatikule nibbatto viññutaṃ patto gharāvāsaṃ saṇṭhapetvā tattha anabhirato gehaṃ pahāya satthu santike pabbajitvā vipassanaṃ vaḍḍhetvā nacirasseva arahattaṃ patto attano kataphaladānakammaṃ saritvā somanassajāto pubbacaritāpadānaṃ pakāsento parodhako tadā āsintiādimāha. Tattha yadā ahaṃ piyālaphalaṃ datvā cittaṃ pasādesiṃ, tadā ahaṃ parodhako āsinti sambandho. Parodhakoti parasattarodhako vihesako. ‘‘Pararodhako’’ti vattabbe pubbassa ra-kārassa lopaṃ katvā ‘‘parodhako’’ti vuttaṃ.
೬೯. ಪರಿಚಾರಿಂ ವಿನಾಯಕನ್ತಿ ತಂ ನಿಬ್ಬಾನಪಾಪಕಂ ಸತ್ಥಾರಂ, ‘‘ಭನ್ತೇ , ಇಮಂ ಫಲಂ ಪರಿಭುಞ್ಜಥಾ’’ತಿ ಪವಾರಿಂ ನಿಮನ್ತೇಸಿಂ ಆರಾಧೇಸಿನ್ತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
69.Paricāriṃ vināyakanti taṃ nibbānapāpakaṃ satthāraṃ, ‘‘bhante , imaṃ phalaṃ paribhuñjathā’’ti pavāriṃ nimantesiṃ ārādhesinti attho. Sesaṃ suviññeyyamevāti.
ಪಿಯಾಲಫಲದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Piyālaphaladāyakattheraapadānavaṇṇanā samattā.
ಚುದ್ದಸಮವಗ್ಗವಣ್ಣನಾ ಸಮತ್ತಾ।
Cuddasamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧೦. ಪಿಯಾಲಫಲದಾಯಕತ್ಥೇರಅಪದಾನಂ • 10. Piyālaphaladāyakattheraapadānaṃ
