| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. පියාලඵලදායකත්‌ථෙරඅපදානවණ්‌ණනා
10. Piyālaphaladāyakattheraapadānavaṇṇanā
පරොධකො තදා ආසින්‌තිආදිකං ආයස්‌මතො පියාලඵලදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිඛිස්‌ස භගවතො කාලෙ නෙසාදකුලෙ නිබ්‌බත්‌තො හිමවන්‌තෙ එකස්‌මිං පබ්‌භාරෙ මිගෙ වධිත්‌වා ජීවිකං කප්‌පෙත්‌වා වසති. තස්‌මිං කාලෙ තත්‌ථ ගතං සිඛිං භගවන්‌තං දිස්‌වා පසන්‌නමානසො සායං පාතං නමස්‌සමානො කඤ්‌චි දෙය්‍යධම්‌මං අපස්‌සන්‌තො මධුරානි පියාලඵලානි උච්‌චිනිත්‌වා අදාසි. භගවා තානි පරිභුඤ්‌ජි. සො නෙසාදො බුද්‌ධාරම්‌මණාය පීතියා නිරන්‌තරං ඵුට්‌ඨසරීරො පාපකම්‌මෙ විරත්‌තචිත්‌තො මූලඵලාහාරො නචිරස්‌සෙව කාලං කත්‌වා දෙවලොකෙ නිබ්‌බත්‌ති.
Parodhakotadā āsintiādikaṃ āyasmato piyālaphaladāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle nesādakule nibbatto himavante ekasmiṃ pabbhāre mige vadhitvā jīvikaṃ kappetvā vasati. Tasmiṃ kāle tattha gataṃ sikhiṃ bhagavantaṃ disvā pasannamānaso sāyaṃ pātaṃ namassamāno kañci deyyadhammaṃ apassanto madhurāni piyālaphalāni uccinitvā adāsi. Bhagavā tāni paribhuñji. So nesādo buddhārammaṇāya pītiyā nirantaraṃ phuṭṭhasarīro pāpakamme virattacitto mūlaphalāhāro nacirasseva kālaṃ katvā devaloke nibbatti.
66. සො තත්‌ථ දිබ්‌බසම්‌පත්‌තියො අනුභවිත්‌වා මනුස්‌සෙසු ච අනෙකවිධසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ ගහපතිකුලෙ නිබ්‌බත්‌තො විඤ්‌ඤුතං පත්‌තො ඝරාවාසං සණ්‌ඨපෙත්‌වා තත්‌ථ අනභිරතො ගෙහං පහාය සත්‌ථු සන්‌තිකෙ පබ්‌බජිත්‌වා විපස්‌සනං වඩ්‌ඪෙත්‌වා නචිරස්‌සෙව අරහත්‌තං පත්‌තො අත්‌තනො කතඵලදානකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පරොධකො තදා ආසින්‌තිආදිමාහ. තත්‌ථ යදා අහං පියාලඵලං දත්‌වා චිත්‌තං පසාදෙසිං, තදා අහං පරොධකො ආසින්‌ති සම්‌බන්‌ධො. පරොධකොති පරසත්‌තරොධකො විහෙසකො. ‘‘පරරොධකො’’ති වත්‌තබ්‌බෙ පුබ්‌බස්‌ස ර-කාරස්‌ස ලොපං කත්‌වා ‘‘පරොධකො’’ති වුත්‌තං.
66. So tattha dibbasampattiyo anubhavitvā manussesu ca anekavidhasampattiyo anubhavitvā imasmiṃ buddhuppāde gahapatikule nibbatto viññutaṃ patto gharāvāsaṃ saṇṭhapetvā tattha anabhirato gehaṃ pahāya satthu santike pabbajitvā vipassanaṃ vaḍḍhetvā nacirasseva arahattaṃ patto attano kataphaladānakammaṃ saritvā somanassajāto pubbacaritāpadānaṃ pakāsento parodhako tadā āsintiādimāha. Tattha yadā ahaṃ piyālaphalaṃ datvā cittaṃ pasādesiṃ, tadā ahaṃ parodhako āsinti sambandho. Parodhakoti parasattarodhako vihesako. ‘‘Pararodhako’’ti vattabbe pubbassa ra-kārassa lopaṃ katvā ‘‘parodhako’’ti vuttaṃ.
69. පරිචාරිං විනායකන්‌ති තං නිබ්‌බානපාපකං සත්‌ථාරං, ‘‘භන්‌තෙ , ඉමං ඵලං පරිභුඤ්‌ජථා’’ති පවාරිං නිමන්‌තෙසිං ආරාධෙසින්‌ති අත්‌ථො. සෙසං සුවිඤ්‌ඤෙය්‍යමෙවාති.
69.Paricāriṃ vināyakanti taṃ nibbānapāpakaṃ satthāraṃ, ‘‘bhante , imaṃ phalaṃ paribhuñjathā’’ti pavāriṃ nimantesiṃ ārādhesinti attho. Sesaṃ suviññeyyamevāti.
පියාලඵලදායකත්‌ථෙරඅපදානවණ්‌ණනා සමත්‌තා.
Piyālaphaladāyakattheraapadānavaṇṇanā samattā.
චුද්‌දසමවග්‌ගවණ්‌ණනා සමත්‌තා.
Cuddasamavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 10. පියාලඵලදායකත්‌ථෙරඅපදානං • 10. Piyālaphaladāyakattheraapadānaṃ
