| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. பியங்கரஸுத்தவண்ணனா
6. Piyaṅkarasuttavaṇṇanā
240. ச²ட்டே² ஜேதவனேதி ஜேதவனஸ்ஸ பச்சந்தே கோஸம்ப³ககுடி நாம அத்தி², தத்த² விஹரதி. த⁴ம்மபதா³னீதி இத⁴ பாடியேக்கங் ஸங்க³ஹங் ஆருள்ஹா ச²ப்³பீ³ஸதிவக்³கா³ தந்தி அதி⁴ப்பேதா . தத்ர தே²ரோ தஸ்மிங் ஸமயே அந்தோவிஹாரே நிஸின்னோ மது⁴ரஸ்ஸரேன ஸரப⁴ஞ்ஞங் கத்வா அப்பமாத³வக்³க³ங் பா⁴ஸதி. ஏவங் தோஸேஸீதி ஸா கிர புத்தங் பியங்கரங் அங்கேனாதா³ய ஜேதவனஸ்ஸ பச்சி²மபா⁴க³தோ பட்டா²ய கோ³சரங் பரியேஸந்தீ அனுபுப்³பே³ன நக³ராபி⁴முகீ² ஹுத்வா உச்சாரபஸ்ஸாவகே²ளஸிங்கா⁴ணிகது³ப்³போ⁴ஜனானி பரியேஸமானா தே²ரஸ்ஸ வஸனட்டா²னங் பத்வா மது⁴ரஸ்ஸரங் அஸ்ஸோஸி. தஸ்ஸா ஸோ ஸத்³தோ³ ச²விஆதீ³னி செ²த்வா அட்டி²மிஞ்ஜங் ஆஹச்ச ஹத³யங்க³மனீயோ ஹுத்வா அட்டா²ஸி. அத²ஸ்ஸா கோ³சரபரியேஸனே சித்தம்பி ந உப்பஜ்ஜி, ஓஹிதஸோதா த⁴ம்மமேவ ஸுணந்தீ டி²தா. யக்க²தா³ரகஸ்ஸ பன த³ஹரதாய த⁴ம்மஸ்ஸவனே சித்தங் நத்தி². ஸோ ஜிக⁴ச்சா²ய பீளிதத்தா, ‘‘கஸ்மா அம்மா க³தக³தட்டா²னே கா²ணுகோ விய திட்ட²ஸி? ந மய்ஹங் கா²த³னீயங் வா போ⁴ஜனீயங் வா பரியேஸஸீ’’தி புனப்புனங் மாதரங் சோதே³தி. ஸா ‘‘த⁴ம்மஸ்ஸவனஸ்ஸ மே அந்தராயங் கரோதீ’’தி புத்தகங் ‘‘மா ஸத்³த³ங் கரி, பியங்கரா’’தி ஏவங் தோஸேஸி. தத்த² மா ஸத்³த³ங் கரீதி ஸத்³த³ங் மா கரி.
240. Chaṭṭhe jetavaneti jetavanassa paccante kosambakakuṭi nāma atthi, tattha viharati. Dhammapadānīti idha pāṭiyekkaṃ saṅgahaṃ āruḷhā chabbīsativaggā tanti adhippetā . Tatra thero tasmiṃ samaye antovihāre nisinno madhurassarena sarabhaññaṃ katvā appamādavaggaṃ bhāsati. Evaṃ tosesīti sā kira puttaṃ piyaṅkaraṃ aṅkenādāya jetavanassa pacchimabhāgato paṭṭhāya gocaraṃ pariyesantī anupubbena nagarābhimukhī hutvā uccārapassāvakheḷasiṅghāṇikadubbhojanāni pariyesamānā therassa vasanaṭṭhānaṃ patvā madhurassaraṃ assosi. Tassā so saddo chaviādīni chetvā aṭṭhimiñjaṃ āhacca hadayaṅgamanīyo hutvā aṭṭhāsi. Athassā gocarapariyesane cittampi na uppajji, ohitasotā dhammameva suṇantī ṭhitā. Yakkhadārakassa pana daharatāya dhammassavane cittaṃ natthi. So jighacchāya pīḷitattā, ‘‘kasmā ammā gatagataṭṭhāne khāṇuko viya tiṭṭhasi? Na mayhaṃ khādanīyaṃ vā bhojanīyaṃ vā pariyesasī’’ti punappunaṃ mātaraṃ codeti. Sā ‘‘dhammassavanassa me antarāyaṃ karotī’’ti puttakaṃ ‘‘mā saddaṃ kari, piyaṅkarā’’ti evaṃ tosesi. Tattha mā saddaṃ karīti saddaṃ mā kari.
பாணேஸு சாதி கா³தா²ய ஸா அத்தனோ த⁴ம்மதாய ஸமாதி³ண்ணங் பஞ்சஸீலங் த³ஸ்ஸேதி. தத்த² ஸங்யமாமஸேதி ஸங்யமாம ஸங்யதா ஹோம. இமினா பாணாதிபாதா விரதி க³ஹிதா, து³தியபதே³ன முஸாவாதா³ விரதி, ததியபதே³ன ஸேஸா திஸ்ஸோ விரதியோ. அபி முச்சேம பிஸாசயோனியாதி அபி நாம யக்க²லோகே உப்பன்னானி பஞ்ச வேரானி பஹாய, யோனிஸோ படிபஜ்ஜித்வா இமாய சா²தகது³ப்³பி⁴க்கா²ய பிஸாசயக்க²யோனியா முச்சேம, தாதாதி வத³தி. ச²ட்ட²ங்.
Pāṇesu cāti gāthāya sā attano dhammatāya samādiṇṇaṃ pañcasīlaṃ dasseti. Tattha saṃyamāmaseti saṃyamāma saṃyatā homa. Iminā pāṇātipātā virati gahitā, dutiyapadena musāvādā virati, tatiyapadena sesā tisso viratiyo. Api muccema pisācayoniyāti api nāma yakkhaloke uppannāni pañca verāni pahāya, yoniso paṭipajjitvā imāya chātakadubbhikkhāya pisācayakkhayoniyā muccema, tātāti vadati. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பியங்கரஸுத்தங் • 6. Piyaṅkarasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. பியங்கரஸுத்தவண்ணனா • 6. Piyaṅkarasuttavaṇṇanā
