| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পিযসুত্তং
4. Piyasuttaṃ
১১৫. সাৰত্থিনিদানং । একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘কেসং নু খো পিযো অত্তা, কেসং অপ্পিযো অত্তা’তি? তস্স ময্হং, ভন্তে, এতদহোসি – ‘যে চ খো কেচি কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অপ্পিযো অত্তা’। কিঞ্চাপি তে এৰং ৰদেয্যুং – ‘পিযো নো অত্তা’তি, অথ খো তেসং অপ্পিযো অত্তা। তং কিস্স হেতু? যঞ্হি অপ্পিযো অপ্পিযস্স করেয্য, তং তে অত্তনাৰ অত্তনো করোন্তি; তস্মা তেসং অপ্পিযো অত্তা। যে চ খো কেচি কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং পিযো অত্তা। কিঞ্চাপি তে এৰং ৰদেয্যুং – ‘অপ্পিযো নো অত্তা’তি; অথ খো তেসং পিযো অত্তা। তং কিস্স হেতু? যঞ্হি পিযো পিযস্স করেয্য, তং তে অত্তনাৰ অত্তনো করোন্তি; তস্মা তেসং পিযো অত্তা’’তি।
115. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘kesaṃ nu kho piyo attā, kesaṃ appiyo attā’ti? Tassa mayhaṃ, bhante, etadahosi – ‘ye ca kho keci kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ appiyo attā’. Kiñcāpi te evaṃ vadeyyuṃ – ‘piyo no attā’ti, atha kho tesaṃ appiyo attā. Taṃ kissa hetu? Yañhi appiyo appiyassa kareyya, taṃ te attanāva attano karonti; tasmā tesaṃ appiyo attā. Ye ca kho keci kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ piyo attā. Kiñcāpi te evaṃ vadeyyuṃ – ‘appiyo no attā’ti; atha kho tesaṃ piyo attā. Taṃ kissa hetu? Yañhi piyo piyassa kareyya, taṃ te attanāva attano karonti; tasmā tesaṃ piyo attā’’ti.
‘‘এৰমেতং, মহারাজ, এৰমেতং, মহারাজ! যে হি কেচি, মহারাজ, কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অপ্পিযো অত্তা। কিঞ্চাপি তে এৰং ৰদেয্যুং – ‘পিযো নো অত্তা’তি, অথ খো তেসং অপ্পিযো অত্তা। তং কিস্স হেতু? যঞ্হি, মহারাজ, অপ্পিযো অপ্পিযস্স করেয্য, তং তে অত্তনাৰ অত্তনো করোন্তি; তস্মা তেসং অপ্পিযো অত্তা। যে চ খো কেচি, মহারাজ , কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং পিযো অত্তা। কিঞ্চাপি তে এৰং ৰদেয্যুং – ‘অপ্পিযো নো অত্তা’তি; অথ খো তেসং পিযো অত্তা। তং কিস্স হেতু? যঞ্হি মহারাজ, পিযো পিযস্স করেয্য, তং তে অত্তনাৰ অত্তনো করোন্তি; তস্মা তেসং পিযো অত্তা’’তি। ইদমৰোচ…পে॰…
‘‘Evametaṃ, mahārāja, evametaṃ, mahārāja! Ye hi keci, mahārāja, kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ appiyo attā. Kiñcāpi te evaṃ vadeyyuṃ – ‘piyo no attā’ti, atha kho tesaṃ appiyo attā. Taṃ kissa hetu? Yañhi, mahārāja, appiyo appiyassa kareyya, taṃ te attanāva attano karonti; tasmā tesaṃ appiyo attā. Ye ca kho keci, mahārāja , kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ piyo attā. Kiñcāpi te evaṃ vadeyyuṃ – ‘appiyo no attā’ti; atha kho tesaṃ piyo attā. Taṃ kissa hetu? Yañhi mahārāja, piyo piyassa kareyya, taṃ te attanāva attano karonti; tasmā tesaṃ piyo attā’’ti. Idamavoca…pe…
‘‘অত্তানঞ্চে পিযং জঞ্ঞা, ন নং পাপেন সংযুজে।
‘‘Attānañce piyaṃ jaññā, na naṃ pāpena saṃyuje;
ন হি তং সুলভং হোতি, সুখং দুক্কটকারিনা॥
Na hi taṃ sulabhaṃ hoti, sukhaṃ dukkaṭakārinā.
‘‘অন্তকেনাধিপন্নস্স, জহতো মানুসং ভৰং।
‘‘Antakenādhipannassa, jahato mānusaṃ bhavaṃ;
কিঞ্হি তস্স সকং হোতি, কিঞ্চ আদায গচ্ছতি।
Kiñhi tassa sakaṃ hoti, kiñca ādāya gacchati;
‘‘উভো পুঞ্ঞঞ্চ পাপঞ্চ, যং মচ্চো কুরুতে ইধ।
‘‘Ubho puññañca pāpañca, yaṃ macco kurute idha;
‘‘তস্মা করেয্য কল্যাণং, নিচযং সম্পরাযিকং।
‘‘Tasmā kareyya kalyāṇaṃ, nicayaṃ samparāyikaṃ;
পুঞ্ঞানি পরলোকস্মিং, পতিট্ঠা হোন্তি পাণিন’’ন্ত্ন্ত্তি॥
Puññāni paralokasmiṃ, patiṭṭhā honti pāṇina’’ntntti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পিযসুত্তৰণ্ণনা • 4. Piyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পিযসুত্তৰণ্ণনা • 4. Piyasuttavaṇṇanā
