| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පියසුත්‌තං
4. Piyasuttaṃ
115. සාවත්‌ථිනිදානං . එකමන්‌තං නිසින්‌නො ඛො රාජා පසෙනදි කොසලො භගවන්‌තං එතදවොච – ‘‘ඉධ මය්‌හං, භන්‌තෙ, රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘කෙසං නු ඛො පියො අත්‌තා, කෙසං අප්‌පියො අත්‌තා’ති? තස්‌ස මය්‌හං, භන්‌තෙ, එතදහොසි – ‘යෙ ච ඛො කෙචි කායෙන දුච්‌චරිතං චරන්‌ති, වාචාය දුච්‌චරිතං චරන්‌ති, මනසා දුච්‌චරිතං චරන්‌ති; තෙසං අප්‌පියො අත්‌තා’. කිඤ්‌චාපි තෙ එවං වදෙය්‍යුං – ‘පියො නො අත්‌තා’ති, අථ ඛො තෙසං අප්‌පියො අත්‌තා. තං කිස්‌ස හෙතු? යඤ්‌හි අප්‌පියො අප්‌පියස්‌ස කරෙය්‍ය, තං තෙ අත්‌තනාව අත්‌තනො කරොන්‌ති; තස්‌මා තෙසං අප්‌පියො අත්‌තා. යෙ ච ඛො කෙචි කායෙන සුචරිතං චරන්‌ති, වාචාය සුචරිතං චරන්‌ති, මනසා සුචරිතං චරන්‌ති; තෙසං පියො අත්‌තා. කිඤ්‌චාපි තෙ එවං වදෙය්‍යුං – ‘අප්‌පියො නො අත්‌තා’ති; අථ ඛො තෙසං පියො අත්‌තා. තං කිස්‌ස හෙතු? යඤ්‌හි පියො පියස්‌ස කරෙය්‍ය, තං තෙ අත්‌තනාව අත්‌තනො කරොන්‌ති; තස්‌මා තෙසං පියො අත්‌තා’’ති.
115. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘kesaṃ nu kho piyo attā, kesaṃ appiyo attā’ti? Tassa mayhaṃ, bhante, etadahosi – ‘ye ca kho keci kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ appiyo attā’. Kiñcāpi te evaṃ vadeyyuṃ – ‘piyo no attā’ti, atha kho tesaṃ appiyo attā. Taṃ kissa hetu? Yañhi appiyo appiyassa kareyya, taṃ te attanāva attano karonti; tasmā tesaṃ appiyo attā. Ye ca kho keci kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ piyo attā. Kiñcāpi te evaṃ vadeyyuṃ – ‘appiyo no attā’ti; atha kho tesaṃ piyo attā. Taṃ kissa hetu? Yañhi piyo piyassa kareyya, taṃ te attanāva attano karonti; tasmā tesaṃ piyo attā’’ti.
‘‘එවමෙතං, මහාරාජ, එවමෙතං, මහාරාජ! යෙ හි කෙචි, මහාරාජ, කායෙන දුච්‌චරිතං චරන්‌ති, වාචාය දුච්‌චරිතං චරන්‌ති, මනසා දුච්‌චරිතං චරන්‌ති; තෙසං අප්‌පියො අත්‌තා. කිඤ්‌චාපි තෙ එවං වදෙය්‍යුං – ‘පියො නො අත්‌තා’ති, අථ ඛො තෙසං අප්‌පියො අත්‌තා. තං කිස්‌ස හෙතු? යඤ්‌හි, මහාරාජ, අප්‌පියො අප්‌පියස්‌ස කරෙය්‍ය, තං තෙ අත්‌තනාව අත්‌තනො කරොන්‌ති; තස්‌මා තෙසං අප්‌පියො අත්‌තා. යෙ ච ඛො කෙචි, මහාරාජ , කායෙන සුචරිතං චරන්‌ති, වාචාය සුචරිතං චරන්‌ති, මනසා සුචරිතං චරන්‌ති; තෙසං පියො අත්‌තා. කිඤ්‌චාපි තෙ එවං වදෙය්‍යුං – ‘අප්‌පියො නො අත්‌තා’ති; අථ ඛො තෙසං පියො අත්‌තා. තං කිස්‌ස හෙතු? යඤ්‌හි මහාරාජ, පියො පියස්‌ස කරෙය්‍ය, තං තෙ අත්‌තනාව අත්‌තනො කරොන්‌ති; තස්‌මා තෙසං පියො අත්‌තා’’ති. ඉදමවොච…පෙ.…
‘‘Evametaṃ, mahārāja, evametaṃ, mahārāja! Ye hi keci, mahārāja, kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ appiyo attā. Kiñcāpi te evaṃ vadeyyuṃ – ‘piyo no attā’ti, atha kho tesaṃ appiyo attā. Taṃ kissa hetu? Yañhi, mahārāja, appiyo appiyassa kareyya, taṃ te attanāva attano karonti; tasmā tesaṃ appiyo attā. Ye ca kho keci, mahārāja , kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ piyo attā. Kiñcāpi te evaṃ vadeyyuṃ – ‘appiyo no attā’ti; atha kho tesaṃ piyo attā. Taṃ kissa hetu? Yañhi mahārāja, piyo piyassa kareyya, taṃ te attanāva attano karonti; tasmā tesaṃ piyo attā’’ti. Idamavoca…pe…
‘‘අත්‌තානඤ්‌චෙ පියං ජඤ්‌ඤා, න නං පාපෙන සංයුජෙ;
‘‘Attānañce piyaṃ jaññā, na naṃ pāpena saṃyuje;
න හි තං සුලභං හොති, සුඛං දුක්‌කටකාරිනා.
Na hi taṃ sulabhaṃ hoti, sukhaṃ dukkaṭakārinā.
‘‘අන්‌තකෙනාධිපන්‌නස්‌ස, ජහතො මානුසං භවං;
‘‘Antakenādhipannassa, jahato mānusaṃ bhavaṃ;
කිඤ්‌හි තස්‌ස සකං හොති, කිඤ්‌ච ආදාය ගච්‌ඡති;
Kiñhi tassa sakaṃ hoti, kiñca ādāya gacchati;
‘‘උභො පුඤ්‌ඤඤ්‌ච පාපඤ්‌ච, යං මච්‌චො කුරුතෙ ඉධ;
‘‘Ubho puññañca pāpañca, yaṃ macco kurute idha;
‘‘තස්‌මා කරෙය්‍ය කල්‍යාණං, නිචයං සම්‌පරායිකං;
‘‘Tasmā kareyya kalyāṇaṃ, nicayaṃ samparāyikaṃ;
පුඤ්‌ඤානි පරලොකස්‌මිං, පතිට්‌ඨා හොන්‌ති පාණින’’න්‌ත්‌න්‌ත්‌ති.
Puññāni paralokasmiṃ, patiṭṭhā honti pāṇina’’ntntti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. පියසුත්‌තවණ්‌ණනා • 4. Piyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පියසුත්‌තවණ්‌ණනා • 4. Piyasuttavaṇṇanā
