| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பொக்க²ரணீஸுத்தங்
2. Pokkharaṇīsuttaṃ
75. ஸாவத்தி²யங் விஹரதி…பே॰… ‘‘ஸெய்யதா²பி, பி⁴க்க²வே, பொக்க²ரணீ பஞ்ஞாஸயோஜனானி ஆயாமேன பஞ்ஞாஸயோஜனானி வித்தா²ரேன பஞ்ஞாஸயோஜனானி உப்³பே³தே⁴ன, புண்ணா உத³கஸ்ஸ ஸமதித்திகா காகபெய்யா. ததோ புரிஸோ குஸக்³கே³ன உத³கங் உத்³த⁴ரெய்ய. தங் கிங் மஞ்ஞத², பி⁴க்க²வே , கதமங் நு கோ² ப³ஹுதரங், யங் வா குஸக்³கே³ன உத³கங் உப்³ப⁴தங் யங் வா பொக்க²ரணியா உத³க’’ந்தி?
75. Sāvatthiyaṃ viharati…pe… ‘‘seyyathāpi, bhikkhave, pokkharaṇī paññāsayojanāni āyāmena paññāsayojanāni vitthārena paññāsayojanāni ubbedhena, puṇṇā udakassa samatittikā kākapeyyā. Tato puriso kusaggena udakaṃ uddhareyya. Taṃ kiṃ maññatha, bhikkhave , katamaṃ nu kho bahutaraṃ, yaṃ vā kusaggena udakaṃ ubbhataṃ yaṃ vā pokkharaṇiyā udaka’’nti?
‘‘ஏததே³வ, ப⁴ந்தே, ப³ஹுதரங், யதி³த³ங் பொக்க²ரணியா உத³கங். அப்பமத்தகங் குஸக்³கே³ன உத³கங் உப்³ப⁴தங். நேவ ஸதிமங் கலங் உபேதி ந ஸஹஸ்ஸிமங் கலங் உபேதி ந ஸதஸஹஸ்ஸிமங் கலங் உபேதி பொக்க²ரணியா உத³கங் உபனிதா⁴ய குஸக்³கே³ன உத³கங் உப்³ப⁴த’’ந்தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரங் து³க்க²ங் யதி³த³ங் பரிக்கீ²ணங் பரியாதி³ண்ணங்; அப்பமத்தகங் அவஸிட்ட²ங். நேவ ஸதிமங் கலங் உபேதி ந ஸஹஸ்ஸிமங் கலங் உபேதி ந ஸதஸஹஸ்ஸிமங் கலங் உபேதி புரிமங் து³க்க²க்க²ந்த⁴ங் பரிக்கீ²ணங் பரியாதி³ண்ணங் உபனிதா⁴ய, யதி³த³ங் ஸத்தக்க²த்துங்பரமதா. ஏவங் மஹத்தி²யோ கோ², பி⁴க்க²வே, த⁴ம்மாபி⁴ஸமயோ; ஏவங் மஹத்தி²யோ த⁴ம்மசக்கு²படிலாபோ⁴’’தி. து³தியங்.
‘‘Etadeva, bhante, bahutaraṃ, yadidaṃ pokkharaṇiyā udakaṃ. Appamattakaṃ kusaggena udakaṃ ubbhataṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti pokkharaṇiyā udakaṃ upanidhāya kusaggena udakaṃ ubbhata’’nti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya, yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo; evaṃ mahatthiyo dhammacakkhupaṭilābho’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. பொக்க²ரணீஸுத்தவண்ணனா • 2. Pokkharaṇīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பொக்க²ரணீஸுத்தவண்ணனா • 2. Pokkharaṇīsuttavaṇṇanā
