| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
14. போஸாலஸுத்தவண்ணனா
14. Posālasuttavaṇṇanā
1119-20. யோ அதீதந்தி போஸாலஸுத்தங். தத்த² யோ அதீதங் ஆதி³ஸதீதி யோ ப⁴க³வா அத்தனோ ச பரேஸஞ்ச ‘‘ஏகம்பி ஜாதி’’ந்திஆதி³பே⁴த³ங் அதீதங் ஆதி³ஸதி. விபூ⁴தரூபஸஞ்ஞிஸ்ஸாதி ஸமதிக்கந்தரூபஸஞ்ஞிஸ்ஸ. ஸப்³ப³காயப்பஹாயினோதி தத³ங்க³விக்க²ம்ப⁴னவஸேன ஸப்³ப³ரூபகாயப்பஹாயினோ, பஹீனரூபப⁴வபடிஸந்தி⁴கஸ்ஸாதி அதி⁴ப்பாயோ. நத்தி² கிஞ்சீதி பஸ்ஸதோதி விஞ்ஞாணாபா⁴வவிபஸ்ஸனேன ‘‘நத்தி² கிஞ்சீ’’தி பஸ்ஸதோ, ஆகிஞ்சஞ்ஞாயதனலாபி⁴னோதி வுத்தங் ஹோதி. ஞாணங் ஸக்கானுபுச்சா²மீதி ஸக்காதி ப⁴க³வந்தங் ஆலபந்தோ ஆஹ. தஸ்ஸ புக்³க³லஸ்ஸ ஞாணங் புச்சா²மி, கீதி³ஸங் புச்சி²தப்³ப³ந்தி. கத²ங் நெய்யோதி கத²ங் ஸோ நேதப்³போ³, கத²மஸ்ஸ உத்தரிஞாணங் உப்பாதே³தப்³ப³ந்தி.
1119-20.Yoatītanti posālasuttaṃ. Tattha yo atītaṃ ādisatīti yo bhagavā attano ca paresañca ‘‘ekampi jāti’’ntiādibhedaṃ atītaṃ ādisati. Vibhūtarūpasaññissāti samatikkantarūpasaññissa. Sabbakāyappahāyinoti tadaṅgavikkhambhanavasena sabbarūpakāyappahāyino, pahīnarūpabhavapaṭisandhikassāti adhippāyo. Natthi kiñcīti passatoti viññāṇābhāvavipassanena ‘‘natthi kiñcī’’ti passato, ākiñcaññāyatanalābhinoti vuttaṃ hoti. Ñāṇaṃ sakkānupucchāmīti sakkāti bhagavantaṃ ālapanto āha. Tassa puggalassa ñāṇaṃ pucchāmi, kīdisaṃ pucchitabbanti. Kathaṃ neyyoti kathaṃ so netabbo, kathamassa uttariñāṇaṃ uppādetabbanti.
1121. அத²ஸ்ஸ ப⁴க³வா தாதி³ஸே புக்³க³லே அத்தனோ அப்படிஹதஞாணதங் பகாஸெத்வா தங் ஞாணங் ப்³யாகாதுங் கா³தா²த்³வயமாஹ. தத்த² விஞ்ஞாணட்டி²தியோ ஸப்³பா³, அபி⁴ஜானங் ததா²க³தோதி அபி⁴ஸங்கா²ரவஸேன சதஸ்ஸோ படிஸந்தி⁴வஸேன ஸத்தாதி ஏவங் ஸப்³பா³ விஞ்ஞாணட்டி²தியோ அபி⁴ஜானந்தோ ததா²க³தோ. திட்ட²ந்தமேனங் ஜானாதீதி கம்மாபி⁴ஸங்கா²ரவஸேன திட்ட²ந்தங் ஏதங் புக்³க³லங் ஜானாதி ‘‘ஆயதிங் அயங் ஏவங்க³திகோ ப⁴விஸ்ஸதீ’’தி. விமுத்தந்தி ஆகிஞ்சஞ்ஞாயதனாதீ³ஸு அதி⁴முத்தங். தப்பராயணந்தி தம்மயங்.
1121. Athassa bhagavā tādise puggale attano appaṭihatañāṇataṃ pakāsetvā taṃ ñāṇaṃ byākātuṃ gāthādvayamāha. Tattha viññāṇaṭṭhitiyo sabbā, abhijānaṃ tathāgatoti abhisaṅkhāravasena catasso paṭisandhivasena sattāti evaṃ sabbā viññāṇaṭṭhitiyo abhijānanto tathāgato. Tiṭṭhantamenaṃ jānātīti kammābhisaṅkhāravasena tiṭṭhantaṃ etaṃ puggalaṃ jānāti ‘‘āyatiṃ ayaṃ evaṃgatiko bhavissatī’’ti. Vimuttanti ākiñcaññāyatanādīsu adhimuttaṃ. Tapparāyaṇanti tammayaṃ.
1122. ஆகிஞ்சஞ்ஞஸம்ப⁴வங் ஞத்வாதி ஆகிஞ்சஞ்ஞாயதனஜனகங் கம்மாபி⁴ஸங்கா²ரங் ஞத்வா ‘‘கிந்தி பலிபோ³தோ⁴ அய’’ந்தி. நந்தீ³ ஸங்யோஜனங் இதீதி யா ச தத்த² அரூபராக³ஸங்கா²தா நந்தீ³, தஞ்ச ஸங்யோஜனங் இதி ஞத்வா. ததோ தத்த² விபஸ்ஸதீதி ததோ ஆகிஞ்சஞ்ஞாயதனஸமாபத்திதோ வுட்ட²ஹித்வா தங் ஸமாபத்திங் அனிச்சாதி³வஸேன விபஸ்ஸதி. ஏதங் ஞாணங் தத²ங் தஸ்ஸாதி ஏதங் தஸ்ஸ புக்³க³லஸ்ஸ ஏவங் விபஸ்ஸதோ அனுக்கமேனேவ உப்பன்னங் அரஹத்தஞாணங் அவிபரீதங். வுஸீமதோதி வுஸிதவந்தஸ்ஸ. ஸேஸங் ஸப்³ப³த்த² பாகடமேவ.
1122.Ākiñcaññasambhavaṃ ñatvāti ākiñcaññāyatanajanakaṃ kammābhisaṅkhāraṃ ñatvā ‘‘kinti palibodho aya’’nti. Nandī saṃyojanaṃ itīti yā ca tattha arūparāgasaṅkhātā nandī, tañca saṃyojanaṃ iti ñatvā. Tato tattha vipassatīti tato ākiñcaññāyatanasamāpattito vuṭṭhahitvā taṃ samāpattiṃ aniccādivasena vipassati. Etaṃ ñāṇaṃ tathaṃ tassāti etaṃ tassa puggalassa evaṃ vipassato anukkameneva uppannaṃ arahattañāṇaṃ aviparītaṃ. Vusīmatoti vusitavantassa. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச புப்³ப³ஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய போஸாலஸுத்தவண்ணனா நிட்டி²தா.
Suttanipāta-aṭṭhakathāya posālasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 14. போஸாலமாணவபுச்சா² • 14. Posālamāṇavapucchā
