| Library / Tipiṭaka / ਤਿਪਿਟਕ • Tipiṭaka / ਸੁਤ੍ਤਨਿਪਾਤ-ਅਟ੍ਠਕਥਾ • Suttanipāta-aṭṭhakathā |
੧੪. ਪੋਸਾਲਸੁਤ੍ਤવਣ੍ਣਨਾ
14. Posālasuttavaṇṇanā
੧੧੧੯-੨੦. ਯੋ ਅਤੀਤਨ੍ਤਿ ਪੋਸਾਲਸੁਤ੍ਤਂ। ਤਤ੍ਥ ਯੋ ਅਤੀਤਂ ਆਦਿਸਤੀਤਿ ਯੋ ਭਗવਾ ਅਤ੍ਤਨੋ ਚ ਪਰੇਸਞ੍ਚ ‘‘ਏਕਮ੍ਪਿ ਜਾਤਿ’’ਨ੍ਤਿਆਦਿਭੇਦਂ ਅਤੀਤਂ ਆਦਿਸਤਿ। વਿਭੂਤਰੂਪਸਞ੍ਞਿਸ੍ਸਾਤਿ ਸਮਤਿਕ੍ਕਨ੍ਤਰੂਪਸਞ੍ਞਿਸ੍ਸ। ਸਬ੍ਬਕਾਯਪ੍ਪਹਾਯਿਨੋਤਿ ਤਦਙ੍ਗવਿਕ੍ਖਮ੍ਭਨવਸੇਨ ਸਬ੍ਬਰੂਪਕਾਯਪ੍ਪਹਾਯਿਨੋ, ਪਹੀਨਰੂਪਭવਪਟਿਸਨ੍ਧਿਕਸ੍ਸਾਤਿ ਅਧਿਪ੍ਪਾਯੋ। ਨਤ੍ਥਿ ਕਿਞ੍ਚੀਤਿ ਪਸ੍ਸਤੋਤਿ વਿਞ੍ਞਾਣਾਭਾવવਿਪਸ੍ਸਨੇਨ ‘‘ਨਤ੍ਥਿ ਕਿਞ੍ਚੀ’’ਤਿ ਪਸ੍ਸਤੋ, ਆਕਿਞ੍ਚਞ੍ਞਾਯਤਨਲਾਭਿਨੋਤਿ વੁਤ੍ਤਂ ਹੋਤਿ। ਞਾਣਂ ਸਕ੍ਕਾਨੁਪੁਚ੍ਛਾਮੀਤਿ ਸਕ੍ਕਾਤਿ ਭਗવਨ੍ਤਂ ਆਲਪਨ੍ਤੋ ਆਹ। ਤਸ੍ਸ ਪੁਗ੍ਗਲਸ੍ਸ ਞਾਣਂ ਪੁਚ੍ਛਾਮਿ, ਕੀਦਿਸਂ ਪੁਚ੍ਛਿਤਬ੍ਬਨ੍ਤਿ। ਕਥਂ ਨੇਯ੍ਯੋਤਿ ਕਥਂ ਸੋ ਨੇਤਬ੍ਬੋ, ਕਥਮਸ੍ਸ ਉਤ੍ਤਰਿਞਾਣਂ ਉਪ੍ਪਾਦੇਤਬ੍ਬਨ੍ਤਿ।
1119-20.Yoatītanti posālasuttaṃ. Tattha yo atītaṃ ādisatīti yo bhagavā attano ca paresañca ‘‘ekampi jāti’’ntiādibhedaṃ atītaṃ ādisati. Vibhūtarūpasaññissāti samatikkantarūpasaññissa. Sabbakāyappahāyinoti tadaṅgavikkhambhanavasena sabbarūpakāyappahāyino, pahīnarūpabhavapaṭisandhikassāti adhippāyo. Natthi kiñcīti passatoti viññāṇābhāvavipassanena ‘‘natthi kiñcī’’ti passato, ākiñcaññāyatanalābhinoti vuttaṃ hoti. Ñāṇaṃ sakkānupucchāmīti sakkāti bhagavantaṃ ālapanto āha. Tassa puggalassa ñāṇaṃ pucchāmi, kīdisaṃ pucchitabbanti. Kathaṃ neyyoti kathaṃ so netabbo, kathamassa uttariñāṇaṃ uppādetabbanti.
੧੧੨੧. ਅਥਸ੍ਸ ਭਗવਾ ਤਾਦਿਸੇ ਪੁਗ੍ਗਲੇ ਅਤ੍ਤਨੋ ਅਪ੍ਪਟਿਹਤਞਾਣਤਂ ਪਕਾਸੇਤ੍વਾ ਤਂ ਞਾਣਂ ਬ੍ਯਾਕਾਤੁਂ ਗਾਥਾਦ੍વਯਮਾਹ। ਤਤ੍ਥ વਿਞ੍ਞਾਣਟ੍ਠਿਤਿਯੋ ਸਬ੍ਬਾ, ਅਭਿਜਾਨਂ ਤਥਾਗਤੋਤਿ ਅਭਿਸਙ੍ਖਾਰવਸੇਨ ਚਤਸ੍ਸੋ ਪਟਿਸਨ੍ਧਿવਸੇਨ ਸਤ੍ਤਾਤਿ ਏવਂ ਸਬ੍ਬਾ વਿਞ੍ਞਾਣਟ੍ਠਿਤਿਯੋ ਅਭਿਜਾਨਨ੍ਤੋ ਤਥਾਗਤੋ। ਤਿਟ੍ਠਨ੍ਤਮੇਨਂ ਜਾਨਾਤੀਤਿ ਕਮ੍ਮਾਭਿਸਙ੍ਖਾਰવਸੇਨ ਤਿਟ੍ਠਨ੍ਤਂ ਏਤਂ ਪੁਗ੍ਗਲਂ ਜਾਨਾਤਿ ‘‘ਆਯਤਿਂ ਅਯਂ ਏવਂਗਤਿਕੋ ਭવਿਸ੍ਸਤੀ’’ਤਿ। વਿਮੁਤ੍ਤਨ੍ਤਿ ਆਕਿਞ੍ਚਞ੍ਞਾਯਤਨਾਦੀਸੁ ਅਧਿਮੁਤ੍ਤਂ। ਤਪ੍ਪਰਾਯਣਨ੍ਤਿ ਤਮ੍ਮਯਂ।
1121. Athassa bhagavā tādise puggale attano appaṭihatañāṇataṃ pakāsetvā taṃ ñāṇaṃ byākātuṃ gāthādvayamāha. Tattha viññāṇaṭṭhitiyo sabbā, abhijānaṃ tathāgatoti abhisaṅkhāravasena catasso paṭisandhivasena sattāti evaṃ sabbā viññāṇaṭṭhitiyo abhijānanto tathāgato. Tiṭṭhantamenaṃ jānātīti kammābhisaṅkhāravasena tiṭṭhantaṃ etaṃ puggalaṃ jānāti ‘‘āyatiṃ ayaṃ evaṃgatiko bhavissatī’’ti. Vimuttanti ākiñcaññāyatanādīsu adhimuttaṃ. Tapparāyaṇanti tammayaṃ.
੧੧੨੨. ਆਕਿਞ੍ਚਞ੍ਞਸਮ੍ਭવਂ ਞਤ੍વਾਤਿ ਆਕਿਞ੍ਚਞ੍ਞਾਯਤਨਜਨਕਂ ਕਮ੍ਮਾਭਿਸਙ੍ਖਾਰਂ ਞਤ੍વਾ ‘‘ਕਿਨ੍ਤਿ ਪਲਿਬੋਧੋ ਅਯ’’ਨ੍ਤਿ। ਨਨ੍ਦੀ ਸਂਯੋਜਨਂ ਇਤੀਤਿ ਯਾ ਚ ਤਤ੍ਥ ਅਰੂਪਰਾਗਸਙ੍ਖਾਤਾ ਨਨ੍ਦੀ, ਤਞ੍ਚ ਸਂਯੋਜਨਂ ਇਤਿ ਞਤ੍વਾ। ਤਤੋ ਤਤ੍ਥ વਿਪਸ੍ਸਤੀਤਿ ਤਤੋ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਤੋ વੁਟ੍ਠਹਿਤ੍વਾ ਤਂ ਸਮਾਪਤ੍ਤਿਂ ਅਨਿਚ੍ਚਾਦਿવਸੇਨ વਿਪਸ੍ਸਤਿ। ਏਤਂ ਞਾਣਂ ਤਥਂ ਤਸ੍ਸਾਤਿ ਏਤਂ ਤਸ੍ਸ ਪੁਗ੍ਗਲਸ੍ਸ ਏવਂ વਿਪਸ੍ਸਤੋ ਅਨੁਕ੍ਕਮੇਨੇવ ਉਪ੍ਪਨ੍ਨਂ ਅਰਹਤ੍ਤਞਾਣਂ ਅવਿਪਰੀਤਂ। વੁਸੀਮਤੋਤਿ વੁਸਿਤવਨ੍ਤਸ੍ਸ। ਸੇਸਂ ਸਬ੍ਬਤ੍ਥ ਪਾਕਟਮੇવ।
1122.Ākiñcaññasambhavaṃ ñatvāti ākiñcaññāyatanajanakaṃ kammābhisaṅkhāraṃ ñatvā ‘‘kinti palibodho aya’’nti. Nandī saṃyojanaṃ itīti yā ca tattha arūparāgasaṅkhātā nandī, tañca saṃyojanaṃ iti ñatvā. Tato tattha vipassatīti tato ākiñcaññāyatanasamāpattito vuṭṭhahitvā taṃ samāpattiṃ aniccādivasena vipassati. Etaṃ ñāṇaṃ tathaṃ tassāti etaṃ tassa puggalassa evaṃ vipassato anukkameneva uppannaṃ arahattañāṇaṃ aviparītaṃ. Vusīmatoti vusitavantassa. Sesaṃ sabbattha pākaṭameva.
ਏવਂ ਭਗવਾ ਇਮਮ੍ਪਿ ਸੁਤ੍ਤਂ ਅਰਹਤ੍ਤਨਿਕੂਟੇਨੇવ ਦੇਸੇਸਿ। ਦੇਸਨਾਪਰਿਯੋਸਾਨੇ ਚ ਪੁਬ੍ਬਸਦਿਸੋ ਏવ ਧਮ੍ਮਾਭਿਸਮਯੋ ਅਹੋਸੀਤਿ।
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ
Paramatthajotikāya khuddaka-aṭṭhakathāya
ਸੁਤ੍ਤਨਿਪਾਤ-ਅਟ੍ਠਕਥਾਯ ਪੋਸਾਲਸੁਤ੍ਤવਣ੍ਣਨਾ ਨਿਟ੍ਠਿਤਾ।
Suttanipāta-aṭṭhakathāya posālasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਸੁਤ੍ਤਨਿਪਾਤਪਾਲ਼ਿ • Suttanipātapāḷi / ੧੪. ਪੋਸਾਲਮਾਣવਪੁਚ੍ਛਾ • 14. Posālamāṇavapucchā
