| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. པོཏྠཀསུཏྟཾ
8. Potthakasuttaṃ
༡༠༠. ‘‘ནཝོཔི , བྷིཀྑཝེ, པོཏྠཀོ དུབྦཎྞོ ཙ ཧོཏི དུཀྑསམྥསྶོ ཙ ཨཔྤགྒྷོ ཙ; མཛ྄ཛྷིམོཔི, བྷིཀྑཝེ, པོཏྠཀོ དུབྦཎྞོ ཙ ཧོཏི དུཀྑསམྥསྶོ ཙ ཨཔྤགྒྷོ ཙ; ཛིཎྞོཔི, བྷིཀྑཝེ, པོཏྠཀོ དུབྦཎྞོ ཙ ཧོཏི དུཀྑསམྥསྶོ ཙ ཨཔྤགྒྷོ ཙ། ཛིཎྞམྤི, བྷིཀྑཝེ, པོཏྠཀཾ ཨུཀྑལིཔརིམཛྫནཾ ཝཱ ཀརོནྟི སངྐཱརཀཱུཊེ ཝཱ ནཾ 1 ཚཌྜེནྟི།
100. ‘‘Navopi , bhikkhave, potthako dubbaṇṇo ca hoti dukkhasamphasso ca appaggho ca; majjhimopi, bhikkhave, potthako dubbaṇṇo ca hoti dukkhasamphasso ca appaggho ca; jiṇṇopi, bhikkhave, potthako dubbaṇṇo ca hoti dukkhasamphasso ca appaggho ca. Jiṇṇampi, bhikkhave, potthakaṃ ukkhaliparimajjanaṃ vā karonti saṅkārakūṭe vā naṃ 2 chaḍḍenti.
‘‘ཨེཝམེཝཾ ཁོ, བྷིཀྑཝེ, ནཝོ ཙེཔི བྷིཀྑུ ཧོཏི དུསྶཱིལོ པཱཔདྷམྨོ། ཨིདམསྶ དུབྦཎྞཏཱཡ ཝདཱམི། སེཡྻཐཱཔི སོ, བྷིཀྑཝེ, པོཏྠཀོ དུབྦཎྞོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེ ཁོ པནསྶ སེཝནྟི བྷཛནྟི པཡིརུཔཱསནྟི དིཊྛཱནུགཏིཾ ཨཱཔཛྫནྟི, ཏེསཾ ཏཾ ཧོཏི དཱིགྷརཏྟཾ ཨཧིཏཱཡ དུཀྑཱཡ། ཨིདམསྶ དུཀྑསམྥསྶཏཱཡ ཝདཱམི། སེཡྻཐཱཔི སོ, བྷིཀྑཝེ, པོཏྠཀོ དུཀྑསམྥསྶོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེསཾ ཁོ པན སོ 3 པཊིགྒཎྷཱཏི ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཾ, ཏེསཾ ཏཾ ན མཧཔྥལཾ ཧོཏི ན མཧཱནིསཾསཾ། ཨིདམསྶ ཨཔྤགྒྷཏཱཡ ཝདཱམི ། སེཡྻཐཱཔི སོ, བྷིཀྑཝེ, པོཏྠཀོ ཨཔྤགྒྷོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། མཛ྄ཛྷིམོ ཙེཔི, བྷིཀྑཝེ, བྷིཀྑུ ཧོཏི…པེ॰… ཐེརོ ཙེཔི, བྷིཀྑཝེ, བྷིཀྑུ ཧོཏི དུསྶཱིལོ པཱཔདྷམྨོ, ཨིདམསྶ དུབྦཎྞཏཱཡ ཝདཱམི། སེཡྻཐཱཔི སོ, བྷིཀྑཝེ, པོཏྠཀོ དུབྦཎྞོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེ ཁོ པནསྶ སེཝནྟི བྷཛནྟི པཡིརུཔཱསནྟི དིཊྛཱནུགཏིཾ ཨཱཔཛྫནྟི, ཏེསཾ ཏཾ ཧོཏི དཱིགྷརཏྟཾ ཨཧིཏཱཡ དུཀྑཱཡ། ཨིདམསྶ དུཀྑསམྥསྶཏཱཡ ཝདཱམི། སེཡྻཐཱཔི སོ, བྷིཀྑཝེ, པོཏྠཀོ དུཀྑསམྥསྶོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེསཾ ཁོ པན སོ པཊིགྒཎྷཱཏི ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཾ, ཏེསཾ ཏཾ ན མཧཔྥལཾ ཧོཏི ན མཧཱནིསཾསཾ། ཨིདམསྶ ཨཔྤགྒྷཏཱཡ ཝདཱམི། སེཡྻཐཱཔི སོ, བྷིཀྑཝེ, པོཏྠཀོ ཨཔྤགྒྷོ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི།
‘‘Evamevaṃ kho, bhikkhave, navo cepi bhikkhu hoti dussīlo pāpadhammo. Idamassa dubbaṇṇatāya vadāmi. Seyyathāpi so, bhikkhave, potthako dubbaṇṇo tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ ahitāya dukkhāya. Idamassa dukkhasamphassatāya vadāmi. Seyyathāpi so, bhikkhave, potthako dukkhasamphasso tathūpamāhaṃ, bhikkhave, imaṃ puggalaṃ vadāmi. Yesaṃ kho pana so 4 paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ, tesaṃ taṃ na mahapphalaṃ hoti na mahānisaṃsaṃ. Idamassa appagghatāya vadāmi . Seyyathāpi so, bhikkhave, potthako appaggho tathūpamāhaṃ, bhikkhave, imaṃ puggalaṃ vadāmi. Majjhimo cepi, bhikkhave, bhikkhu hoti…pe… thero cepi, bhikkhave, bhikkhu hoti dussīlo pāpadhammo, idamassa dubbaṇṇatāya vadāmi. Seyyathāpi so, bhikkhave, potthako dubbaṇṇo tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ ahitāya dukkhāya. Idamassa dukkhasamphassatāya vadāmi. Seyyathāpi so, bhikkhave, potthako dukkhasamphasso tathūpamāhaṃ, bhikkhave, imaṃ puggalaṃ vadāmi. Yesaṃ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ, tesaṃ taṃ na mahapphalaṃ hoti na mahānisaṃsaṃ. Idamassa appagghatāya vadāmi. Seyyathāpi so, bhikkhave, potthako appaggho tathūpamāhaṃ, bhikkhave, imaṃ puggalaṃ vadāmi.
‘‘ཨེཝརཱུཔོ ཙཱཡཾ, བྷིཀྑཝེ, ཐེརོ བྷིཀྑུ སངྒྷམཛ྄ཛྷེ བྷཎཏི། ཏམེནཾ བྷིཀྑཱུ ཨེཝམཱཧཾསུ – ‘ཀིཾ ནུ ཁོ ཏུཡ྄ཧཾ བཱལསྶ ཨབྱཏྟསྶ བྷཎིཏེན, ཏྭམྤི ནཱམ བྷཎིཏབྦཾ མཉྙསཱི’ཏི! སོ ཀུཔིཏོ ཨནཏྟམནོ ཏཐཱརཱུཔིཾ ཝཱཙཾ ནིཙྪཱརེཏི ཡཐཱརཱུཔཱཡ ཝཱཙཱཡ སངྒྷོ ཏཾ ཨུཀྑིཔཏི, སངྐཱརཀཱུཊེཝ ནཾ པོཏྠཀཾ།
‘‘Evarūpo cāyaṃ, bhikkhave, thero bhikkhu saṅghamajjhe bhaṇati. Tamenaṃ bhikkhū evamāhaṃsu – ‘kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññasī’ti! So kupito anattamano tathārūpiṃ vācaṃ nicchāreti yathārūpāya vācāya saṅgho taṃ ukkhipati, saṅkārakūṭeva naṃ potthakaṃ.
‘‘ནཝམྤི, བྷིཀྑཝེ, ཀཱསིཀཾ ཝཏྠཾ ཝཎྞཝནྟཉྩེཝ ཧོཏི སུཁསམྥསྶཉྩ མཧགྒྷཉྩ; མཛ྄ཛྷིམམྤི, བྷིཀྑཝེ , ཀཱསིཀཾ ཝཏྠཾ ཝཎྞཝནྟཉྩེཝ ཧོཏི སུཁསམྥསྶཉྩ མཧགྒྷཉྩ; ཛིཎྞམྤི, བྷིཀྑཝེ, ཀཱསིཀཾ ཝཏྠཾ ཝཎྞཝནྟཉྩེཝ ཧོཏི སུཁསམྥསྶཉྩ མཧགྒྷཉྩ། ཛིཎྞམྤི, བྷིཀྑཝེ, ཀཱསིཀཾ ཝཏྠཾ རཏནཔལིཝེཋནཾ ཝཱ ཀརོཏི གནྡྷཀརཎྜཀེ ཝཱ ནཾ པཀྑིཔནྟི།
‘‘Navampi, bhikkhave, kāsikaṃ vatthaṃ vaṇṇavantañceva hoti sukhasamphassañca mahagghañca; majjhimampi, bhikkhave , kāsikaṃ vatthaṃ vaṇṇavantañceva hoti sukhasamphassañca mahagghañca; jiṇṇampi, bhikkhave, kāsikaṃ vatthaṃ vaṇṇavantañceva hoti sukhasamphassañca mahagghañca. Jiṇṇampi, bhikkhave, kāsikaṃ vatthaṃ ratanapaliveṭhanaṃ vā karoti gandhakaraṇḍake vā naṃ pakkhipanti.
‘‘ཨེཝམེཝཾ ཁོ, བྷིཀྑཝེ, ནཝོ ཙེཔི བྷིཀྑུ ཧོཏི སཱིལཝཱ ཀལྱཱཎདྷམྨོ, ཨིདམསྶ སུཝཎྞཏཱཡ ཝདཱམི། སེཡྻཐཱཔི ཏཾ, བྷིཀྑཝེ, ཀཱསིཀཾ ཝཏྠཾ ཝཎྞཝནྟཾ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེ ཁོ པནསྶ སེཝནྟི བྷཛནྟི པཡིརུཔཱསནྟི དིཊྛཱནུགཏིཾ ཨཱཔཛྫནྟི, ཏེསཾ ཏཾ ཧོཏི དཱིགྷརཏྟཾ ཧིཏཱཡ སུཁཱཡ། ཨིདམསྶ སུཁསམྥསྶཏཱཡ ཝདཱམི། སེཡྻཐཱཔི ཏཾ, བྷིཀྑཝེ, ཀཱསིཀཾ ཝཏྠཾ སུཁསམྥསྶཾ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཡེསཾ ཁོ པན སོ པཊིགྒཎྷཱཏི ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཾ , ཏེསཾ ཏཾ མཧཔྥལཾ ཧོཏི མཧཱནིསཾསཾ། ཨིདམསྶ མཧགྒྷཏཱཡ ཝདཱམི། སེཡྻཐཱཔི ཏཾ, བྷིཀྑཝེ, ཀཱསིཀཾ ཝཏྠཾ མཧགྒྷཾ ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། མཛ྄ཛྷིམོ ཙེཔི, བྷིཀྑཝེ, བྷིཀྑུ ཧོཏི…པེ॰… ཐེརོ ཙེཔི, བྷིཀྑཝེ, བྷིཀྑུ ཧོཏི…པེ॰… པུགྒལཾ ཝདཱམི།
‘‘Evamevaṃ kho, bhikkhave, navo cepi bhikkhu hoti sīlavā kalyāṇadhammo, idamassa suvaṇṇatāya vadāmi. Seyyathāpi taṃ, bhikkhave, kāsikaṃ vatthaṃ vaṇṇavantaṃ tathūpamāhaṃ, bhikkhave, imaṃ puggalaṃ vadāmi. Ye kho panassa sevanti bhajanti payirupāsanti diṭṭhānugatiṃ āpajjanti, tesaṃ taṃ hoti dīgharattaṃ hitāya sukhāya. Idamassa sukhasamphassatāya vadāmi. Seyyathāpi taṃ, bhikkhave, kāsikaṃ vatthaṃ sukhasamphassaṃ tathūpamāhaṃ, bhikkhave, imaṃ puggalaṃ vadāmi. Yesaṃ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṃ , tesaṃ taṃ mahapphalaṃ hoti mahānisaṃsaṃ. Idamassa mahagghatāya vadāmi. Seyyathāpi taṃ, bhikkhave, kāsikaṃ vatthaṃ mahagghaṃ tathūpamāhaṃ, bhikkhave, imaṃ puggalaṃ vadāmi. Majjhimo cepi, bhikkhave, bhikkhu hoti…pe… thero cepi, bhikkhave, bhikkhu hoti…pe… puggalaṃ vadāmi.
‘‘ཨེཝརཱུཔོ ཙཱཡཾ, བྷིཀྑཝེ, ཐེརོ བྷིཀྑུ སངྒྷམཛ྄ཛྷེ བྷཎཏི ། ཏམེནཾ བྷིཀྑཱུ ཨེཝམཱཧཾསུ – ‘ཨཔྤསདྡཱ ཨཱཡསྨནྟོ ཧོཐ, ཐེརོ བྷིཀྑུ དྷམྨཉྩ ཝིནཡཉྩ བྷཎཏཱི’ཏི། ཏསྨཱཏིཧ, བྷིཀྑཝེ, ཨེཝཾ སིཀྑིཏབྦཾ – ‘ཀཱསིཀཝཏྠཱུཔམཱ བྷཝིསྶཱམ, ན པོཏྠཀཱུཔམཱ’ཏི 5། ཨེཝཉྷི ཝོ, བྷིཀྑཝེ, སིཀྑིཏབྦ’’ནྟི། ཨཊྛམཾ།
‘‘Evarūpo cāyaṃ, bhikkhave, thero bhikkhu saṅghamajjhe bhaṇati . Tamenaṃ bhikkhū evamāhaṃsu – ‘appasaddā āyasmanto hotha, thero bhikkhu dhammañca vinayañca bhaṇatī’ti. Tasmātiha, bhikkhave, evaṃ sikkhitabbaṃ – ‘kāsikavatthūpamā bhavissāma, na potthakūpamā’ti 6. Evañhi vo, bhikkhave, sikkhitabba’’nti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. པོཏྠཀསུཏྟཝཎྞནཱ • 8. Potthakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨. པོཏྠཀསུཏྟཝཎྞནཱ • 8. Potthakasuttavaṇṇanā
