| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. பொத்த²கஸுத்தவண்ணனா
8. Potthakasuttavaṇṇanā
100. அட்ட²மே நவோதி நவவாயிமோ. தேனாஹ ‘‘கரணங் உபாதா³ய வுச்சதீ’’தி. வாகமயவத்த²ந்தி ஸாணாதி³வாகஸாடகங். து³ப்³ப³ண்ணோதி விவண்ணோ. து³க்க²ஸம்ப²ஸ்ஸோதி க²ரஸம்ப²ஸ்ஸோ. அப்பங் அக்³க⁴தீதி அப்பக்³கோ⁴. அதிப³ஹுங் அக்³க⁴ந்தோ கஹாபணக்³க⁴னகோ ஹோதி. பரிபோ⁴க³மஜ்ஜி²மோதி பரிபோ⁴க³காலவஸேன மஜ்ஜி²மோ. ஸோ ஹி நவபா⁴வங் அதிக்கமித்வா ஜிண்ணபா⁴வங் அப்பத்தோ மஜ்ஜே² பரிபோ⁴க³காலேபி து³ப்³ப³ண்ணோ ச து³க்க²ஸம்ப²ஸ்ஸோ ச அப்பக்³கோ⁴யேவ ஹோதி. அதிப³ஹுங் அக்³க⁴ந்தோ அட்³ட⁴ங் அக்³க⁴தி, ஜிண்ணகாலே பன அட்³ட⁴மாஸகங் வா காகணிகங் வா அக்³க⁴தி. உக்க²லிபரிபுஞ்ச²னந்தி காளுக்க²லிபரிபுஞ்ச²னங். நவோதிபி உபஸம்பதா³ய பஞ்சவஸ்ஸகாலதோ ஹெட்டா² ஜாதியா ஸட்டி²வஸ்ஸோபி நவோயேவ. து³ப்³ப³ண்ணதாயாதி ஸரீரவண்ணேனபி கு³ணவண்ணேனபி து³ப்³ப³ண்ணதாய. து³ஸ்ஸீலஸ்ஸ ஹி பரிஸமஜ்ஜே² நித்தேஜதாய ஸரீரவண்ணோபி ந ஸம்பஜ்ஜதி, கு³ணவண்ணேன வத்தப்³ப³மேவ நத்தி². அட்ட²கதா²யங் பன ஸரீரவண்ணேன து³ப்³ப³ண்ணதாபி கு³ணவண்ணஸ்ஸ அபா⁴வேன து³ப்³ப³ண்ணதாயாதி வுத்தங்.
100. Aṭṭhame navoti navavāyimo. Tenāha ‘‘karaṇaṃ upādāya vuccatī’’ti. Vākamayavatthanti sāṇādivākasāṭakaṃ. Dubbaṇṇoti vivaṇṇo. Dukkhasamphassoti kharasamphasso. Appaṃ agghatīti appaggho. Atibahuṃ agghanto kahāpaṇagghanako hoti. Paribhogamajjhimoti paribhogakālavasena majjhimo. So hi navabhāvaṃ atikkamitvā jiṇṇabhāvaṃ appatto majjhe paribhogakālepi dubbaṇṇo ca dukkhasamphasso ca appagghoyeva hoti. Atibahuṃ agghanto aḍḍhaṃ agghati, jiṇṇakāle pana aḍḍhamāsakaṃ vā kākaṇikaṃ vā agghati. Ukkhaliparipuñchananti kāḷukkhaliparipuñchanaṃ. Navotipi upasampadāya pañcavassakālato heṭṭhā jātiyā saṭṭhivassopi navoyeva. Dubbaṇṇatāyāti sarīravaṇṇenapi guṇavaṇṇenapi dubbaṇṇatāya. Dussīlassa hi parisamajjhe nittejatāya sarīravaṇṇopi na sampajjati, guṇavaṇṇena vattabbameva natthi. Aṭṭhakathāyaṃ pana sarīravaṇṇena dubbaṇṇatāpi guṇavaṇṇassa abhāvena dubbaṇṇatāyāti vuttaṃ.
யே கோ² பனஸ்ஸாதி யே கோ² பன தஸ்ஸ உபட்டா²கா வா ஞாதிமித்தாத³யோ வா ஏதங் புக்³க³லங் ஸேவந்தி. தேஸந்தி தேஸங் புக்³க³லானங் ச² ஸத்தா²ரே ஸேவந்தானங் மிச்சா²தி³ட்டி²கானங் விய. தே³வத³த்தே ஸேவந்தானங் கோகாலிகாதீ³னங் விய ச தங் ஸேவனங் தீ³க⁴ரத்தங் அஹிதாய து³க்கா²ய ஹோதி. மஜ்ஜி²மோதி பஞ்சவஸ்ஸகாலதோ பட்டா²ய யாவ நவவஸ்ஸகாலா மஜ்ஜி²மோ நாம. தே²ரோதி த³ஸவஸ்ஸதோ பட்டா²ய தே²ரோ நாம. ஏவமாஹங்ஸூதி ஏவங் வத³ந்தி. கிங் நு கோ² துய்ஹந்தி துய்ஹங் பா³லஸ்ஸ ப⁴ணிதேன கோ அத்தோ²தி வுத்தங் ஹோதி. ததா²ரூபந்தி ததா²ஜாதிகங் ததா²ஸபா⁴வங் உக்கே²பனீயகம்மஸ்ஸ காரணபூ⁴தங்.
Ye kho panassāti ye kho pana tassa upaṭṭhākā vā ñātimittādayo vā etaṃ puggalaṃ sevanti. Tesanti tesaṃ puggalānaṃ cha satthāre sevantānaṃ micchādiṭṭhikānaṃ viya. Devadatte sevantānaṃ kokālikādīnaṃ viya ca taṃ sevanaṃ dīgharattaṃ ahitāya dukkhāya hoti. Majjhimoti pañcavassakālato paṭṭhāya yāva navavassakālā majjhimo nāma. Theroti dasavassato paṭṭhāya thero nāma. Evamāhaṃsūti evaṃ vadanti. Kiṃ nu kho tuyhanti tuyhaṃ bālassa bhaṇitena ko atthoti vuttaṃ hoti. Tathārūpanti tathājātikaṃ tathāsabhāvaṃ ukkhepanīyakammassa kāraṇabhūtaṃ.
தீஹி கப்பாஸஅங்ஸூஹி ஸுத்தங் கந்தித்வா கதவத்த²ந்தி தயோ கப்பாஸஅங்ஸூ க³ஹெத்வா கந்திதஸுத்தேன வாயிதங் ஸுகு²மவத்த²ங், தங் நவவாயிமங் அனக்³க⁴ங் ஹோதி, பரிபோ⁴க³மஜ்ஜி²மங் வீஸம்பி திங்ஸம்பி ஸஹஸ்ஸானி அக்³க⁴தி, ஜிண்ணகாலே, அட்ட²பி த³ஸபி ஸஹஸ்ஸானி அக்³க⁴தி.
Tīhi kappāsaaṃsūhi suttaṃ kantitvā katavatthanti tayo kappāsaaṃsū gahetvā kantitasuttena vāyitaṃ sukhumavatthaṃ, taṃ navavāyimaṃ anagghaṃ hoti, paribhogamajjhimaṃ vīsampi tiṃsampi sahassāni agghati, jiṇṇakāle, aṭṭhapi dasapi sahassāni agghati.
தேஸங் தங் ஹோதீதி தேஸங் ஸம்மாஸம்பு³த்³தா⁴த³யோ ஸேவந்தா விய தங் ஸேவனங் தீ³க⁴ரத்தங் ஹிதாய ஸுகா²ய ஹோதி. ஸம்மாஸம்பு³த்³த⁴ஞ்ஹி ஏகங் நிஸ்ஸாய யாவஜ்ஜகாலா முச்சனகஸத்தானங் பமாணங் நத்தி², ததா² ஸாரிபுத்தத்தே²ரமஹாமொக்³க³ல்லானத்தே²ரே அவஸேஸே ச அஸீதி மஹாஸாவகே நிஸ்ஸாய ஸக்³க³க³தஸத்தானங் பமாணங் நத்தி², யாவஜ்ஜகாலா தேஸங் தி³ட்டா²னுக³திங் படிபன்னஸத்தானம்பி பமாணங் நத்தி²யேவ. ஆதெ⁴ய்யங் க³ச்ச²தீதி தஸ்ஸ மஹாதே²ரஸ்ஸ தங் அத்த²னிஸ்ஸிதங் வசனங் யதா² க³ந்த⁴கரண்ட³கே காஸிகவத்த²ங் ஆதா⁴தப்³ப³தங் ட²பேதப்³ப³தங் க³ச்ச²தி, ஏவங் உத்தமங்கே³ ஸிரஸ்மிங் ஹத³யே ச ஆதா⁴தப்³ப³தங் ட²பேதப்³ப³தங் க³ச்ச²தி.
Tesaṃtaṃ hotīti tesaṃ sammāsambuddhādayo sevantā viya taṃ sevanaṃ dīgharattaṃ hitāya sukhāya hoti. Sammāsambuddhañhi ekaṃ nissāya yāvajjakālā muccanakasattānaṃ pamāṇaṃ natthi, tathā sāriputtattheramahāmoggallānatthere avasese ca asīti mahāsāvake nissāya saggagatasattānaṃ pamāṇaṃ natthi, yāvajjakālā tesaṃ diṭṭhānugatiṃ paṭipannasattānampi pamāṇaṃ natthiyeva. Ādheyyaṃ gacchatīti tassa mahātherassa taṃ atthanissitaṃ vacanaṃ yathā gandhakaraṇḍake kāsikavatthaṃ ādhātabbataṃ ṭhapetabbataṃ gacchati, evaṃ uttamaṅge sirasmiṃ hadaye ca ādhātabbataṃ ṭhapetabbataṃ gacchati.
பொத்த²கஸுத்தவண்ணனா நிட்டி²தா.
Potthakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. பொத்த²கஸுத்தங் • 8. Potthakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. பொத்த²கஸுத்தவண்ணனா • 8. Potthakasuttavaṇṇanā
