| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၈. ပောတ္ထကသုတ္တဝဏ္ဏနာ
8. Potthakasuttavaṇṇanā
၁၀၀. အဋ္ဌမေ နဝောတိ နဝဝာယိမော။ တေနာဟ ‘‘ကရဏံ ဥပာဒာယ ဝုစ္စတီ’’တိ။ ဝာကမယဝတ္ထန္တိ သာဏာဒိဝာကသာဋကံ။ ဒုဗ္ဗဏ္ဏောတိ ဝိဝဏ္ဏော။ ဒုက္ခသမ္ဖသ္သောတိ ခရသမ္ဖသ္သော။ အပ္ပံ အဂ္ဃတီတိ အပ္ပဂ္ဃော။ အတိဗဟုံ အဂ္ဃန္တော ကဟာပဏဂ္ဃနကော ဟောတိ။ ပရိဘောဂမဇ္ဈိမောတိ ပရိဘောဂကာလဝသေန မဇ္ဈိမော။ သော ဟိ နဝဘာဝံ အတိက္ကမိတ္ဝာ ဇိဏ္ဏဘာဝံ အပ္ပတ္တော မဇ္ဈေ ပရိဘောဂကာလေပိ ဒုဗ္ဗဏ္ဏော စ ဒုက္ခသမ္ဖသ္သော စ အပ္ပဂ္ဃောယေဝ ဟောတိ။ အတိဗဟုံ အဂ္ဃန္တော အဍ္ဎံ အဂ္ဃတိ, ဇိဏ္ဏကာလေ ပန အဍ္ဎမာသကံ ဝာ ကာကဏိကံ ဝာ အဂ္ဃတိ။ ဥက္ခလိပရိပုဉ္ဆနန္တိ ကာဠုက္ခလိပရိပုဉ္ဆနံ။ နဝောတိပိ ဥပသမ္ပဒာယ ပဉ္စဝသ္သကာလတော ဟေဋ္ဌာ ဇာတိယာ သဋ္ဌိဝသ္သောပိ နဝောယေဝ။ ဒုဗ္ဗဏ္ဏတာယာတိ သရီရဝဏ္ဏေနပိ ဂုဏဝဏ္ဏေနပိ ဒုဗ္ဗဏ္ဏတာယ။ ဒုသ္သီလသ္သ ဟိ ပရိသမဇ္ဈေ နိတ္တေဇတာယ သရီရဝဏ္ဏောပိ န သမ္ပဇ္ဇတိ, ဂုဏဝဏ္ဏေန ဝတ္တဗ္ဗမေဝ နတ္ထိ။ အဋ္ဌကထာယံ ပန သရီရဝဏ္ဏေန ဒုဗ္ဗဏ္ဏတာပိ ဂုဏဝဏ္ဏသ္သ အဘာဝေန ဒုဗ္ဗဏ္ဏတာယာတိ ဝုတ္တံ။
100. Aṭṭhame navoti navavāyimo. Tenāha ‘‘karaṇaṃ upādāya vuccatī’’ti. Vākamayavatthanti sāṇādivākasāṭakaṃ. Dubbaṇṇoti vivaṇṇo. Dukkhasamphassoti kharasamphasso. Appaṃ agghatīti appaggho. Atibahuṃ agghanto kahāpaṇagghanako hoti. Paribhogamajjhimoti paribhogakālavasena majjhimo. So hi navabhāvaṃ atikkamitvā jiṇṇabhāvaṃ appatto majjhe paribhogakālepi dubbaṇṇo ca dukkhasamphasso ca appagghoyeva hoti. Atibahuṃ agghanto aḍḍhaṃ agghati, jiṇṇakāle pana aḍḍhamāsakaṃ vā kākaṇikaṃ vā agghati. Ukkhaliparipuñchananti kāḷukkhaliparipuñchanaṃ. Navotipi upasampadāya pañcavassakālato heṭṭhā jātiyā saṭṭhivassopi navoyeva. Dubbaṇṇatāyāti sarīravaṇṇenapi guṇavaṇṇenapi dubbaṇṇatāya. Dussīlassa hi parisamajjhe nittejatāya sarīravaṇṇopi na sampajjati, guṇavaṇṇena vattabbameva natthi. Aṭṭhakathāyaṃ pana sarīravaṇṇena dubbaṇṇatāpi guṇavaṇṇassa abhāvena dubbaṇṇatāyāti vuttaṃ.
ယေ ခော ပနသ္သာတိ ယေ ခော ပန တသ္သ ဥပဋ္ဌာကာ ဝာ ဉာတိမိတ္တာဒယော ဝာ ဧတံ ပုဂ္ဂလံ သေဝန္တိ။ တေသန္တိ တေသံ ပုဂ္ဂလာနံ ဆ သတ္ထာရေ သေဝန္တာနံ မိစ္ဆာဒိဋ္ဌိကာနံ ဝိယ။ ဒေဝဒတ္တေ သေဝန္တာနံ ကောကာလိကာဒီနံ ဝိယ စ တံ သေဝနံ ဒီဃရတ္တံ အဟိတာယ ဒုက္ခာယ ဟောတိ။ မဇ္ဈိမောတိ ပဉ္စဝသ္သကာလတော ပဋ္ဌာယ ယာဝ နဝဝသ္သကာလာ မဇ္ဈိမော နာမ။ ထေရောတိ ဒသဝသ္သတော ပဋ္ဌာယ ထေရော နာမ။ ဧဝမာဟံသူတိ ဧဝံ ဝဒန္တိ။ ကိံ နု ခော တုယ္ဟန္တိ တုယ္ဟံ ဗာလသ္သ ဘဏိတေန ကော အတ္ထောတိ ဝုတ္တံ ဟောတိ။ တထာရူပန္တိ တထာဇာတိကံ တထာသဘာဝံ ဥက္ခေပနီယကမ္မသ္သ ကာရဏဘူတံ။
Ye kho panassāti ye kho pana tassa upaṭṭhākā vā ñātimittādayo vā etaṃ puggalaṃ sevanti. Tesanti tesaṃ puggalānaṃ cha satthāre sevantānaṃ micchādiṭṭhikānaṃ viya. Devadatte sevantānaṃ kokālikādīnaṃ viya ca taṃ sevanaṃ dīgharattaṃ ahitāya dukkhāya hoti. Majjhimoti pañcavassakālato paṭṭhāya yāva navavassakālā majjhimo nāma. Theroti dasavassato paṭṭhāya thero nāma. Evamāhaṃsūti evaṃ vadanti. Kiṃ nu kho tuyhanti tuyhaṃ bālassa bhaṇitena ko atthoti vuttaṃ hoti. Tathārūpanti tathājātikaṃ tathāsabhāvaṃ ukkhepanīyakammassa kāraṇabhūtaṃ.
တီဟိ ကပ္ပာသအံသူဟိ သုတ္တံ ကန္တိတ္ဝာ ကတဝတ္ထန္တိ တယော ကပ္ပာသအံသူ ဂဟေတ္ဝာ ကန္တိတသုတ္တေန ဝာယိတံ သုခုမဝတ္ထံ, တံ နဝဝာယိမံ အနဂ္ဃံ ဟောတိ, ပရိဘောဂမဇ္ဈိမံ ဝီသမ္ပိ တိံသမ္ပိ သဟသ္သာနိ အဂ္ဃတိ, ဇိဏ္ဏကာလေ, အဋ္ဌပိ ဒသပိ သဟသ္သာနိ အဂ္ဃတိ။
Tīhi kappāsaaṃsūhi suttaṃ kantitvā katavatthanti tayo kappāsaaṃsū gahetvā kantitasuttena vāyitaṃ sukhumavatthaṃ, taṃ navavāyimaṃ anagghaṃ hoti, paribhogamajjhimaṃ vīsampi tiṃsampi sahassāni agghati, jiṇṇakāle, aṭṭhapi dasapi sahassāni agghati.
တေသံ တံ ဟောတီတိ တေသံ သမ္မာသမ္ဗုဒ္ဓာဒယော သေဝန္တာ ဝိယ တံ သေဝနံ ဒီဃရတ္တံ ဟိတာယ သုခာယ ဟောတိ။ သမ္မာသမ္ဗုဒ္ဓဉ္ဟိ ဧကံ နိသ္သာယ ယာဝဇ္ဇကာလာ မုစ္စနကသတ္တာနံ ပမာဏံ နတ္ထိ, တထာ သာရိပုတ္တတ္ထေရမဟာမောဂ္ဂလ္လာနတ္ထေရေ အဝသေသေ စ အသီတိ မဟာသာဝကေ နိသ္သာယ သဂ္ဂဂတသတ္တာနံ ပမာဏံ နတ္ထိ, ယာဝဇ္ဇကာလာ တေသံ ဒိဋ္ဌာနုဂတိံ ပဋိပန္နသတ္တာနမ္ပိ ပမာဏံ နတ္ထိယေဝ။ အာဓေယ္ယံ ဂစ္ဆတီတိ တသ္သ မဟာထေရသ္သ တံ အတ္ထနိသ္သိတံ ဝစနံ ယထာ ဂန္ဓကရဏ္ဍကေ ကာသိကဝတ္ထံ အာဓာတဗ္ဗတံ ဌပေတဗ္ဗတံ ဂစ္ဆတိ, ဧဝံ ဥတ္တမင္ဂေ သိရသ္မိံ ဟဒယေ စ အာဓာတဗ္ဗတံ ဌပေတဗ္ဗတံ ဂစ္ဆတိ။
Tesaṃtaṃ hotīti tesaṃ sammāsambuddhādayo sevantā viya taṃ sevanaṃ dīgharattaṃ hitāya sukhāya hoti. Sammāsambuddhañhi ekaṃ nissāya yāvajjakālā muccanakasattānaṃ pamāṇaṃ natthi, tathā sāriputtattheramahāmoggallānatthere avasese ca asīti mahāsāvake nissāya saggagatasattānaṃ pamāṇaṃ natthi, yāvajjakālā tesaṃ diṭṭhānugatiṃ paṭipannasattānampi pamāṇaṃ natthiyeva. Ādheyyaṃ gacchatīti tassa mahātherassa taṃ atthanissitaṃ vacanaṃ yathā gandhakaraṇḍake kāsikavatthaṃ ādhātabbataṃ ṭhapetabbataṃ gacchati, evaṃ uttamaṅge sirasmiṃ hadaye ca ādhātabbataṃ ṭhapetabbataṃ gacchati.
ပောတ္ထကသုတ္တဝဏ္ဏနာ နိဋ္ဌိတာ။
Potthakasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ပောတ္ထကသုတ္တံ • 8. Potthakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ပောတ္ထကသုတ္တဝဏ္ဏနာ • 8. Potthakasuttavaṇṇanā
