| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. புப்³ப³கம்மபிலோதிகபு³த்³த⁴அபதா³னவண்ணனா
10. Pubbakammapilotikabuddhaapadānavaṇṇanā
64. த³ஸமாபதா³னே அனோதத்தஸராஸன்னேதி பப்³ப³தகூடேஹி படிச்ச²ன்னத்தா சந்தி³மஸூரியானங் ஸந்தாபேஹி ஓதத்தங் உண்ஹங் உத³கங் எத்த² நத்தீ²தி அனோதத்தோ. ஸரந்தி க³ச்ச²ந்தி பப⁴வந்தி ஸந்த³ந்தி ஏதஸ்மா மஹானதி³யோதி ஸரோ. ஸீஹமுகா²தீ³ஹி நிக்க²ந்தா மஹானதி³யோ திக்க²த்துங் திக்க²த்துங் பத³க்கி²ணங் கத்வா நிக்க²ந்தனிக்க²ந்ததி³ஸாபா⁴கே³ன ஸரந்தி க³ச்ச²ந்தீதி அத்தோ². அனோதத்தோ ச ஸோ ஸரோ சாதி அனோதத்தஸரோ . தஸ்ஸ ஆஸன்னங் ஸமீபட்டா²னந்தி அனோதத்தஸராஸன்னங், தஸ்மிங் அனோதத்தஸராஸன்னே, ஸமீபேதி அத்தோ². ரமணீயேதி தே³வதா³னவக³ந்த⁴ப்³ப³கின்னரோரக³பு³த்³த⁴பச்சேகபு³த்³தா⁴தீ³ஹி ரமிதப்³ப³ங் அல்லீயிதப்³ப³ந்தி ரமணீயங், தஸ்மிங் ரமணீயே. ஸிலாதலேதி ஏகக்³க⁴னபப்³ப³தஸிலாதலேதி அத்தோ². நானாரதனபஜ்ஜோதேதி பது³மராக³வேளுரியாதி³னானாஅனேகேஹி ரதனேஹி பஜ்ஜோதே பகாரேன ஜோதமானே. நானாக³ந்த⁴வனந்தரேதி நானப்பகாரேஹி சந்த³னாக³ருகப்பூரதமாலதிலகாஸோகனாக³புன்னாக³கேதகாதீ³ஹி அனேகேஹி ஸுக³ந்த⁴புப்பே²ஹி க³ஹனீபூ⁴தவனந்தரே ஸிலாதலேதி ஸம்ப³ந்தோ⁴.
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
65. கு³ணமஹந்ததாய ஸங்க்²யாமஹந்ததாய ச மஹதா பி⁴க்கு²ஸங்கே⁴ன, பரேதோ பரிவுதோ லோகனாயகோ லோகத்தயஸாமிஸம்மாஸம்பு³த்³தோ⁴ தத்த² ஸிலாஸனே நிஸின்னோ அத்தனோ புப்³பா³னி கம்மானி ப்³யாகரீ விஸேஸேன பாகடமகாஸீதி அத்தோ². ஸேஸமெத்த² ஹெட்டா² பு³த்³தா⁴பதா³னே (அப॰ தே²ர 1.1.1 ஆத³யோ) வுத்தத்தா உத்தானத்த²த்தா ச ஸுவிஞ்ஞெய்யமேவ. பு³த்³தா⁴பதா³னே அந்தோக³த⁴ம்பி இதா⁴பதா³னே குஸலாகுஸலங் கம்மஸங்ஸூசகத்தா வக்³க³ஸங்க³ஹவஸேன த⁴ம்மஸங்கா³ஹகத்தே²ரா ஸங்கா³யிங்ஸூதி.
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
புப்³ப³கம்மபிலோதிகபு³த்³த⁴அபதா³னவண்ணனா ஸமத்தா.
Pubbakammapilotikabuddhaapadānavaṇṇanā samattā.
ஏகூனசத்தாலீஸமவக்³க³வண்ணனா ஸமத்தா.
Ekūnacattālīsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. புப்³ப³கம்மபிலோதிகபு³த்³த⁴அபதா³னங் • 10. Pubbakammapilotikabuddhaapadānaṃ
