| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. পুব্বকম্মপিলোতিকবুদ্ধঅপদানৰণ্ণনা
10. Pubbakammapilotikabuddhaapadānavaṇṇanā
৬৪. দসমাপদানে অনোতত্তসরাসন্নেতি পব্বতকূটেহি পটিচ্ছন্নত্তা চন্দিমসূরিযানং সন্তাপেহি ওতত্তং উণ্হং উদকং এত্থ নত্থীতি অনোতত্তো। সরন্তি গচ্ছন্তি পভৰন্তি সন্দন্তি এতস্মা মহানদিযোতি সরো। সীহমুখাদীহি নিক্খন্তা মহানদিযো তিক্খত্তুং তিক্খত্তুং পদক্খিণং কত্ৰা নিক্খন্তনিক্খন্তদিসাভাগেন সরন্তি গচ্ছন্তীতি অত্থো। অনোতত্তো চ সো সরো চাতি অনোতত্তসরো । তস্স আসন্নং সমীপট্ঠানন্তি অনোতত্তসরাসন্নং, তস্মিং অনোতত্তসরাসন্নে, সমীপেতি অত্থো। রমণীযেতি দেৰদানৰগন্ধব্বকিন্নরোরগবুদ্ধপচ্চেকবুদ্ধাদীহি রমিতব্বং অল্লীযিতব্বন্তি রমণীযং, তস্মিং রমণীযে। সিলাতলেতি একগ্ঘনপব্বতসিলাতলেতি অত্থো। নানারতনপজ্জোতেতি পদুমরাগৰেল়ুরিযাদিনানাঅনেকেহি রতনেহি পজ্জোতে পকারেন জোতমানে। নানাগন্ধৰনন্তরেতি নানপ্পকারেহি চন্দনাগরুকপ্পূরতমালতিলকাসোকনাগপুন্নাগকেতকাদীহি অনেকেহি সুগন্ধপুপ্ফেহি গহনীভূতৰনন্তরে সিলাতলেতি সম্বন্ধো।
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
৬৫. গুণমহন্ততায সঙ্খ্যামহন্ততায চ মহতা ভিক্খুসঙ্ঘেন, পরেতো পরিৰুতো লোকনাযকো লোকত্তযসামিসম্মাসম্বুদ্ধো তত্থ সিলাসনে নিসিন্নো অত্তনো পুব্বানি কম্মানি ব্যাকরী ৰিসেসেন পাকটমকাসীতি অত্থো। সেসমেত্থ হেট্ঠা বুদ্ধাপদানে (অপ॰ থের ১.১.১ আদযো) ৰুত্তত্তা উত্তানত্থত্তা চ সুৰিঞ্ঞেয্যমেৰ। বুদ্ধাপদানে অন্তোগধম্পি ইধাপদানে কুসলাকুসলং কম্মসংসূচকত্তা ৰগ্গসঙ্গহৰসেন ধম্মসঙ্গাহকত্থেরা সঙ্গাযিংসূতি।
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
পুব্বকম্মপিলোতিকবুদ্ধঅপদানৰণ্ণনা সমত্তা।
Pubbakammapilotikabuddhaapadānavaṇṇanā samattā.
একূনচত্তালীসমৰগ্গৰণ্ণনা সমত্তা।
Ekūnacattālīsamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. পুব্বকম্মপিলোতিকবুদ্ধঅপদানং • 10. Pubbakammapilotikabuddhaapadānaṃ
