| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಪುಬ್ಬಕಮ್ಮಪಿಲೋತಿಕಬುದ್ಧಅಪದಾನವಣ್ಣನಾ
10. Pubbakammapilotikabuddhaapadānavaṇṇanā
೬೪. ದಸಮಾಪದಾನೇ ಅನೋತತ್ತಸರಾಸನ್ನೇತಿ ಪಬ್ಬತಕೂಟೇಹಿ ಪಟಿಚ್ಛನ್ನತ್ತಾ ಚನ್ದಿಮಸೂರಿಯಾನಂ ಸನ್ತಾಪೇಹಿ ಓತತ್ತಂ ಉಣ್ಹಂ ಉದಕಂ ಏತ್ಥ ನತ್ಥೀತಿ ಅನೋತತ್ತೋ। ಸರನ್ತಿ ಗಚ್ಛನ್ತಿ ಪಭವನ್ತಿ ಸನ್ದನ್ತಿ ಏತಸ್ಮಾ ಮಹಾನದಿಯೋತಿ ಸರೋ। ಸೀಹಮುಖಾದೀಹಿ ನಿಕ್ಖನ್ತಾ ಮಹಾನದಿಯೋ ತಿಕ್ಖತ್ತುಂ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ನಿಕ್ಖನ್ತನಿಕ್ಖನ್ತದಿಸಾಭಾಗೇನ ಸರನ್ತಿ ಗಚ್ಛನ್ತೀತಿ ಅತ್ಥೋ। ಅನೋತತ್ತೋ ಚ ಸೋ ಸರೋ ಚಾತಿ ಅನೋತತ್ತಸರೋ । ತಸ್ಸ ಆಸನ್ನಂ ಸಮೀಪಟ್ಠಾನನ್ತಿ ಅನೋತತ್ತಸರಾಸನ್ನಂ, ತಸ್ಮಿಂ ಅನೋತತ್ತಸರಾಸನ್ನೇ, ಸಮೀಪೇತಿ ಅತ್ಥೋ। ರಮಣೀಯೇತಿ ದೇವದಾನವಗನ್ಧಬ್ಬಕಿನ್ನರೋರಗಬುದ್ಧಪಚ್ಚೇಕಬುದ್ಧಾದೀಹಿ ರಮಿತಬ್ಬಂ ಅಲ್ಲೀಯಿತಬ್ಬನ್ತಿ ರಮಣೀಯಂ, ತಸ್ಮಿಂ ರಮಣೀಯೇ। ಸಿಲಾತಲೇತಿ ಏಕಗ್ಘನಪಬ್ಬತಸಿಲಾತಲೇತಿ ಅತ್ಥೋ। ನಾನಾರತನಪಜ್ಜೋತೇತಿ ಪದುಮರಾಗವೇಳುರಿಯಾದಿನಾನಾಅನೇಕೇಹಿ ರತನೇಹಿ ಪಜ್ಜೋತೇ ಪಕಾರೇನ ಜೋತಮಾನೇ। ನಾನಾಗನ್ಧವನನ್ತರೇತಿ ನಾನಪ್ಪಕಾರೇಹಿ ಚನ್ದನಾಗರುಕಪ್ಪೂರತಮಾಲತಿಲಕಾಸೋಕನಾಗಪುನ್ನಾಗಕೇತಕಾದೀಹಿ ಅನೇಕೇಹಿ ಸುಗನ್ಧಪುಪ್ಫೇಹಿ ಗಹನೀಭೂತವನನ್ತರೇ ಸಿಲಾತಲೇತಿ ಸಮ್ಬನ್ಧೋ।
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
೬೫. ಗುಣಮಹನ್ತತಾಯ ಸಙ್ಖ್ಯಾಮಹನ್ತತಾಯ ಚ ಮಹತಾ ಭಿಕ್ಖುಸಙ್ಘೇನ, ಪರೇತೋ ಪರಿವುತೋ ಲೋಕನಾಯಕೋ ಲೋಕತ್ತಯಸಾಮಿಸಮ್ಮಾಸಮ್ಬುದ್ಧೋ ತತ್ಥ ಸಿಲಾಸನೇ ನಿಸಿನ್ನೋ ಅತ್ತನೋ ಪುಬ್ಬಾನಿ ಕಮ್ಮಾನಿ ಬ್ಯಾಕರೀ ವಿಸೇಸೇನ ಪಾಕಟಮಕಾಸೀತಿ ಅತ್ಥೋ। ಸೇಸಮೇತ್ಥ ಹೇಟ್ಠಾ ಬುದ್ಧಾಪದಾನೇ (ಅಪ॰ ಥೇರ ೧.೧.೧ ಆದಯೋ) ವುತ್ತತ್ತಾ ಉತ್ತಾನತ್ಥತ್ತಾ ಚ ಸುವಿಞ್ಞೇಯ್ಯಮೇವ। ಬುದ್ಧಾಪದಾನೇ ಅನ್ತೋಗಧಮ್ಪಿ ಇಧಾಪದಾನೇ ಕುಸಲಾಕುಸಲಂ ಕಮ್ಮಸಂಸೂಚಕತ್ತಾ ವಗ್ಗಸಙ್ಗಹವಸೇನ ಧಮ್ಮಸಙ್ಗಾಹಕತ್ಥೇರಾ ಸಙ್ಗಾಯಿಂಸೂತಿ।
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
ಪುಬ್ಬಕಮ್ಮಪಿಲೋತಿಕಬುದ್ಧಅಪದಾನವಣ್ಣನಾ ಸಮತ್ತಾ।
Pubbakammapilotikabuddhaapadānavaṇṇanā samattā.
ಏಕೂನಚತ್ತಾಲೀಸಮವಗ್ಗವಣ್ಣನಾ ಸಮತ್ತಾ।
Ekūnacattālīsamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧೦. ಪುಬ್ಬಕಮ್ಮಪಿಲೋತಿಕಬುದ್ಧಅಪದಾನಂ • 10. Pubbakammapilotikabuddhaapadānaṃ
