| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. පුබ්‌බකම්‌මපිලොතිකබුද්‌ධඅපදානවණ්‌ණනා
10. Pubbakammapilotikabuddhaapadānavaṇṇanā
64. දසමාපදානෙ අනොතත්‌තසරාසන්‌නෙති පබ්‌බතකූටෙහි පටිච්‌ඡන්‌නත්‌තා චන්‌දිමසූරියානං සන්‌තාපෙහි ඔතත්‌තං උණ්‌හං උදකං එත්‌ථ නත්‌ථීති අනොතත්‌තො. සරන්‌ති ගච්‌ඡන්‌ති පභවන්‌ති සන්‌දන්‌ති එතස්‌මා මහානදියොති සරො. සීහමුඛාදීහි නික්‌ඛන්‌තා මහානදියො තික්‌ඛත්‌තුං තික්‌ඛත්‌තුං පදක්‌ඛිණං කත්‌වා නික්‌ඛන්‌තනික්‌ඛන්‌තදිසාභාගෙන සරන්‌ති ගච්‌ඡන්‌තීති අත්‌ථො. අනොතත්‌තො ච සො සරො චාති අනොතත්‌තසරො . තස්‌ස ආසන්‌නං සමීපට්‌ඨානන්‌ති අනොතත්‌තසරාසන්‌නං, තස්‌මිං අනොතත්‌තසරාසන්‌නෙ, සමීපෙති අත්‌ථො. රමණීයෙති දෙවදානවගන්‌ධබ්‌බකින්‌නරොරගබුද්‌ධපච්‌චෙකබුද්‌ධාදීහි රමිතබ්‌බං අල්‌ලීයිතබ්‌බන්‌ති රමණීයං, තස්‌මිං රමණීයෙ. සිලාතලෙති එකග්‌ඝනපබ්‌බතසිලාතලෙති අත්‌ථො. නානාරතනපජ්‌ජොතෙති පදුමරාගවෙළුරියාදිනානාඅනෙකෙහි රතනෙහි පජ්‌ජොතෙ පකාරෙන ජොතමානෙ. නානාගන්‌ධවනන්‌තරෙති නානප්‌පකාරෙහි චන්‌දනාගරුකප්‌පූරතමාලතිලකාසොකනාගපුන්‌නාගකෙතකාදීහි අනෙකෙහි සුගන්‌ධපුප්‌ඵෙහි ගහනීභූතවනන්‌තරෙ සිලාතලෙති සම්‌බන්‌ධො.
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
65. ගුණමහන්‌තතාය සඞ්‌ඛ්‍යාමහන්‌තතාය ච මහතා භික්‌ඛුසඞ්‌ඝෙන, පරෙතො පරිවුතො ලොකනායකො ලොකත්‌තයසාමිසම්‌මාසම්‌බුද්‌ධො තත්‌ථ සිලාසනෙ නිසින්‌නො අත්‌තනො පුබ්‌බානි කම්‌මානි බ්‍යාකරී විසෙසෙන පාකටමකාසීති අත්‌ථො. සෙසමෙත්‌ථ හෙට්‌ඨා බුද්‌ධාපදානෙ (අප. ථෙර 1.1.1 ආදයො) වුත්‌තත්‌තා උත්‌තානත්‌ථත්‌තා ච සුවිඤ්‌ඤෙය්‍යමෙව. බුද්‌ධාපදානෙ අන්‌තොගධම්‌පි ඉධාපදානෙ කුසලාකුසලං කම්‌මසංසූචකත්‌තා වග්‌ගසඞ්‌ගහවසෙන ධම්‌මසඞ්‌ගාහකත්‌ථෙරා සඞ්‌ගායිංසූති.
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
පුබ්‌බකම්‌මපිලොතිකබුද්‌ධඅපදානවණ්‌ණනා සමත්‌තා.
Pubbakammapilotikabuddhaapadānavaṇṇanā samattā.
එකූනචත්‌තාලීසමවග්‌ගවණ්‌ණනා සමත්‌තා.
Ekūnacattālīsamavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 10. පුබ්‌බකම්‌මපිලොතිකබුද්‌ධඅපදානං • 10. Pubbakammapilotikabuddhaapadānaṃ
