| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
3. புப்³ப³கரணனிதா³னாதி³விபா⁴கோ³
3. Pubbakaraṇanidānādivibhāgo
405. புப்³ப³கரணங் கிங்னிதா³னங், கிங்ஸமுத³யங், கிங்ஜாதிகங், கிங்பப⁴வங், கிங்ஸம்பா⁴ரங், கிங்ஸமுட்டா²னங் ? பச்சுத்³தா⁴ரோ கிங்னிதா³னோ, கிங்ஸமுத³யோ, கிங்ஜாதிகோ, கிங்பப⁴வோ, கிங்ஸம்பா⁴ரோ, கிங்ஸமுட்டா²னோ? அதி⁴ட்டா²னங் கிங்னிதா³னங், கிங்ஸமுத³யங், கிங்ஜாதிகங், கிங்பப⁴வங், கிங்ஸம்பா⁴ரங், கிங்ஸமுட்டா²னங்? அத்தா²ரோ கிங்னிதா³னோ, கிங்ஸமுத³யோ, கிங்ஜாதிகோ, கிங்பப⁴வோ, கிங்ஸம்பா⁴ரோ, கிங்ஸமுட்டா²னோ? மாதிகா ச பலிபோ³தா⁴ ச கிங்னிதா³னா, கிங்ஸமுத³யா, கிங்ஜாதிகா, கிங்பப⁴வா, கிங்ஸம்பா⁴ரா கிங்ஸமுட்டா²னா? ஆஸா ச அனாஸா ச கிங்னிதா³னா, கிங்ஸமுத³யா, கிங்ஜாதிகா, கிங்பப⁴வா, கிங்ஸம்பா⁴ரா, கிங்ஸமுட்டா²னா?
405. Pubbakaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ ? Paccuddhāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Adhiṭṭhānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ? Atthāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Mātikā ca palibodhā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā kiṃsamuṭṭhānā? Āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
புப்³ப³கரணங் பயோக³னிதா³னங், பயோக³ஸமுத³யங், பயோக³ஜாதிகங், பயோக³பப⁴வங், பயோக³ஸம்பா⁴ரங், பயோக³ஸமுட்டா²னங். பச்சுத்³தா⁴ரோ புப்³ப³கரணனிதா³னோ, புப்³ப³கரணஸமுத³யோ, புப்³ப³கரணஜாதிகோ, புப்³ப³கரணபப⁴வோ, புப்³ப³கரணஸம்பா⁴ரோ, புப்³ப³கரணஸமுட்டா²னோ. அதி⁴ட்டா²னங் பச்சுத்³தா⁴ரனிதா³னங், பச்சுத்³தா⁴ரஸமுத³யங், பச்சுத்³தா⁴ரஜாதிகங், பச்சுத்³தா⁴ரபப⁴வங், பச்சுத்³தா⁴ரஸம்பா⁴ரங், பச்சுத்³தா⁴ரஸமுட்டா²னங். அத்தா²ரோ அதி⁴ட்டா²னநிதா³னோ, அதி⁴ட்டா²னஸமுத³யோ, அதி⁴ட்டா²னஜாதிகோ, அதி⁴ட்டா²னபப⁴வோ, அதி⁴ட்டா²னஸம்பா⁴ரோ, அதி⁴ட்டா²னஸமுட்டா²னோ. மாதிகா ச பலிபோ³தா⁴ ச அத்தா²ரனிதா³னா, அத்தா²ரஸமுத³யா, அத்தா²ரஜாதிகா, அத்தா²ரபப⁴வா, அத்தா²ரஸம்பா⁴ரா, அத்தா²ரஸமுட்டா²னா. ஆஸா ச அனாஸா ச வத்து²னிதா³னா, வத்து²ஸமுத³யா, வத்து²ஜாதிகா, வத்து²பப⁴வா, வத்து²ஸம்பா⁴ரா, வத்து²ஸமுட்டா²னா.
Pubbakaraṇaṃ payoganidānaṃ, payogasamudayaṃ, payogajātikaṃ, payogapabhavaṃ, payogasambhāraṃ, payogasamuṭṭhānaṃ. Paccuddhāro pubbakaraṇanidāno, pubbakaraṇasamudayo, pubbakaraṇajātiko, pubbakaraṇapabhavo, pubbakaraṇasambhāro, pubbakaraṇasamuṭṭhāno. Adhiṭṭhānaṃ paccuddhāranidānaṃ, paccuddhārasamudayaṃ, paccuddhārajātikaṃ, paccuddhārapabhavaṃ, paccuddhārasambhāraṃ, paccuddhārasamuṭṭhānaṃ. Atthāro adhiṭṭhānanidāno, adhiṭṭhānasamudayo, adhiṭṭhānajātiko, adhiṭṭhānapabhavo, adhiṭṭhānasambhāro, adhiṭṭhānasamuṭṭhāno. Mātikā ca palibodhā ca atthāranidānā, atthārasamudayā, atthārajātikā, atthārapabhavā, atthārasambhārā, atthārasamuṭṭhānā. Āsā ca anāsā ca vatthunidānā, vatthusamudayā, vatthujātikā, vatthupabhavā, vatthusambhārā, vatthusamuṭṭhānā.
406. பயோகோ³ கிங்னிதா³னோ, கிங்ஸமுத³யோ, கிங்ஜாதிகோ, கிங்பப⁴வோ, கிங்ஸம்பா⁴ரோ, கிங்ஸமுட்டா²னோ, புப்³ப³கரணங்…பே॰… பச்சுத்³தா⁴ரோ… அதி⁴ட்டா²னங்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச கிங்னிதா³னா, கிங்ஸமுத³யா, கிங்ஜாதிகா, கிங்பப⁴வா, கிங்ஸம்பா⁴ரா, கிங்ஸமுட்டா²னா?
406. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno, pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
பயோகோ³ ஹேதுனிதா³னோ, ஹேதுஸமுத³யோ, ஹேதுஜாதிகோ, ஹேதுபப⁴வோ, ஹேதுஸம்பா⁴ரோ, ஹேதுஸமுட்டா²னோ. புப்³ப³கரணங்…பே॰… பச்சுத்³தா⁴ரோ… அதி⁴ட்டா²னங்… அத்தா²ரோ … மாதிகா ச பலிபோ³தா⁴ ச… வத்து²… ஆஸா ச அனாஸா ச ஹேதுனிதா³னா, ஹேதுஸமுத³யா, ஹேதுஜாதிகா, ஹேதுபப⁴வா, ஹேதுஸம்பா⁴ரா, ஹேதுஸமுட்டா²னா.
Payogo hetunidāno, hetusamudayo, hetujātiko, hetupabhavo, hetusambhāro, hetusamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro … mātikā ca palibodhā ca… vatthu… āsā ca anāsā ca hetunidānā, hetusamudayā, hetujātikā, hetupabhavā, hetusambhārā, hetusamuṭṭhānā.
407. பயோகோ³ கிங்னிதா³னோ, கிங்ஸமுத³யோ, கிங்ஜாதிகோ, கிங்பப⁴வோ, கிங்ஸம்பா⁴ரோ, கிங்ஸமுட்டா²னோ? புப்³ப³கரணங்…பே॰… பச்சுத்³தா⁴ரோ… அதி⁴ட்டா²னங்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச கிங்னிதா³னா, கிங்ஸமுத³யா, கிங்ஜாதிகா, கிங்பப⁴வா, கிங்ஸம்பா⁴ரா, கிங்ஸமுட்டா²னா?
407. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
பயோகோ³ பச்சயனிதா³னோ, பச்சயஸமுத³யோ, பச்சயஜாதிகோ, பச்சயபப⁴வோ, பச்சயஸம்பா⁴ரோ, பச்சயஸமுட்டா²னோ. புப்³ப³கரணங்…பே॰… பச்சுத்³தா⁴ரோ… அதி⁴ட்டா²னங்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச பச்சயனிதா³னா, பச்சயஸமுத³யா, பச்சயஜாதிகா, பச்சயபப⁴வா, பச்சயஸம்பா⁴ரா, பச்சயஸமுட்டா²னா.
Payogo paccayanidāno, paccayasamudayo, paccayajātiko, paccayapabhavo, paccayasambhāro, paccayasamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca paccayanidānā, paccayasamudayā, paccayajātikā, paccayapabhavā, paccayasambhārā, paccayasamuṭṭhānā.
408. புப்³ப³கரணங் கதிஹி த⁴ம்மேஹி ஸங்க³ஹிதங்? புப்³ப³கரணங் ஸத்தஹி த⁴ம்மேஹி ஸங்க³ஹிதங். தோ⁴வனேன, விசாரணேன, சே²த³னேன, ப³ந்த⁴னேன, ஸிப்³ப³னேன, ரஜனேன, கப்பகரணேன – புப்³ப³கரணங் இமேஹி ஸத்தஹி த⁴ம்மேஹி ஸங்க³ஹிதங்.
408. Pubbakaraṇaṃ katihi dhammehi saṅgahitaṃ? Pubbakaraṇaṃ sattahi dhammehi saṅgahitaṃ. Dhovanena, vicāraṇena, chedanena, bandhanena, sibbanena, rajanena, kappakaraṇena – pubbakaraṇaṃ imehi sattahi dhammehi saṅgahitaṃ.
பச்சுத்³தா⁴ரோ கதிஹி த⁴ம்மேஹி ஸங்க³ஹிதோ? பச்சுத்³தா⁴ரோ தீஹி த⁴ம்மேஹி ஸங்க³ஹிதோ – ஸங்கா⁴டியா, உத்தராஸங்கே³ன, அந்தரவாஸகேன.
Paccuddhāro katihi dhammehi saṅgahito? Paccuddhāro tīhi dhammehi saṅgahito – saṅghāṭiyā, uttarāsaṅgena, antaravāsakena.
அதி⁴ட்டா²னங் கதிஹி த⁴ம்மேஹி ஸங்க³ஹிதங்? அதி⁴ட்டா²னங் தீஹி த⁴ம்மேஹி ஸங்க³ஹிதங் – ஸங்கா⁴டியா, உத்தராஸங்கே³ன, அந்தரவாஸகேன.
Adhiṭṭhānaṃ katihi dhammehi saṅgahitaṃ? Adhiṭṭhānaṃ tīhi dhammehi saṅgahitaṃ – saṅghāṭiyā, uttarāsaṅgena, antaravāsakena.
அத்தா²ரோ கதிஹி த⁴ம்மேஹி ஸங்க³ஹிதோ? அத்தா²ரோ ஏகேன த⁴ம்மேன ஸங்க³ஹிதோ – வசீபே⁴தே³ன.
Atthāro katihi dhammehi saṅgahito? Atthāro ekena dhammena saṅgahito – vacībhedena.
கதி²னஸ்ஸ கதி மூலானி, கதி வத்தூ²னி, கதி பூ⁴மியோ? கதி²னஸ்ஸ ஏகங் மூலங் – ஸங்கோ⁴; தீணி வத்தூ²னி – ஸங்கா⁴டி, உத்தராஸங்கோ³, அந்தரவாஸகோ, ச² பூ⁴மியோ – கோ²மங், கப்பாஸிகங், கோஸெய்யங், கம்ப³லங், ஸாணங், ப⁴ங்க³ங்.
Kathinassa kati mūlāni, kati vatthūni, kati bhūmiyo? Kathinassa ekaṃ mūlaṃ – saṅgho; tīṇi vatthūni – saṅghāṭi, uttarāsaṅgo, antaravāsako, cha bhūmiyo – khomaṃ, kappāsikaṃ, koseyyaṃ, kambalaṃ, sāṇaṃ, bhaṅgaṃ.
கதி²னஸ்ஸ கோ ஆதி³, கிங் மஜ்ஜே², கிங் பரியோஸானங்? கதி²னஸ்ஸ புப்³ப³கரணங் ஆதி³, க்ரியா மஜ்ஜே², அத்தா²ரோ பரியோஸானங்.
Kathinassa ko ādi, kiṃ majjhe, kiṃ pariyosānaṃ? Kathinassa pubbakaraṇaṃ ādi, kriyā majjhe, atthāro pariyosānaṃ.
409. கதிஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னங் அத்த²ரிதுங்? கதிஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னங் அத்த²ரிதுங்? அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னங் அத்த²ரிதுங். அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னங் அத்த²ரிதுங். கதமேஹி அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னங் அத்த²ரிதுங்? புப்³ப³கரணங் ந ஜானாதி, பச்சுத்³தா⁴ரங் ந ஜானாதி, அதி⁴ட்டா²னங் ந ஜானாதி, அத்தா²ரங் ந ஜானாதி, மாதிகங் ந ஜானாதி, பலிபோ³த⁴ங் ந ஜானாதி, உத்³தா⁴ரங் ந ஜானாதி, ஆனிஸங்ஸங் ந ஜானாதி – இமேஹி அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னங் அத்த²ரிதுங். கதமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னங் அத்த²ரிதுங்? புப்³ப³கரணங் ஜானாதி, பச்சுத்³தா⁴ரங் ஜானாதி, அதி⁴ட்டா²னங் ஜானாதி, அத்தா²ரங் ஜானாதி, மாதிகங் ஜானாதி, பலிபோ³த⁴ங் ஜானாதி, உத்³தா⁴ரங் ஜானாதி, ஆனிஸங்ஸங் ஜானாதி – இமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னங் அத்த²ரிதுங்.
409. Katihaṅgehi samannāgato puggalo abhabbo kathinaṃ attharituṃ? Katihaṅgehi samannāgato puggalo bhabbo kathinaṃ attharituṃ? Aṭṭhahaṅgehi samannāgato puggalo abhabbo kathinaṃ attharituṃ. Aṭṭhahaṅgehi samannāgato puggalo bhabbo kathinaṃ attharituṃ. Katamehi aṭṭhahaṅgehi samannāgato puggalo abhabbo kathinaṃ attharituṃ? Pubbakaraṇaṃ na jānāti, paccuddhāraṃ na jānāti, adhiṭṭhānaṃ na jānāti, atthāraṃ na jānāti, mātikaṃ na jānāti, palibodhaṃ na jānāti, uddhāraṃ na jānāti, ānisaṃsaṃ na jānāti – imehi aṭṭhahaṅgehi samannāgato puggalo abhabbo kathinaṃ attharituṃ. Katamehi aṭṭhahaṅgehi samannāgato puggalo bhabbo kathinaṃ attharituṃ? Pubbakaraṇaṃ jānāti, paccuddhāraṃ jānāti, adhiṭṭhānaṃ jānāti, atthāraṃ jānāti, mātikaṃ jānāti, palibodhaṃ jānāti, uddhāraṃ jānāti, ānisaṃsaṃ jānāti – imehi aṭṭhahaṅgehi samannāgato puggalo bhabbo kathinaṃ attharituṃ.
410. கதினங் புக்³க³லானங் கதி²னத்தா²ரா ந ருஹந்தி? கதினங் புக்³க³லானங் கதி²னத்தா²ரா ருஹந்தி? திண்ணங் புக்³க³லானங் கதி²னத்தா²ரா ந ருஹந்தி. திண்ணங் புக்³க³லானங் கதி²னத்தா²ரா ருஹந்தி. கதமேஸங் திண்ணங் புக்³க³லானங் கதி²னத்தா²ரா ந ருஹந்தி? நிஸ்ஸீமட்டோ² அனுமோத³தி, அனுமோதெ³ந்தோ ந வாசங் பி⁴ந்த³தி, வாசங் பி⁴ந்த³ந்தோ ந பரங் விஞ்ஞாபேதி – இமேஸங் திண்ணங் புக்³க³லானங் கதி²னத்தா²ரா ந ருஹந்தி. கதமேஸங் திண்ணங் புக்³க³லானங் கதி²னத்தா²ரா ருஹந்தி? ஸீமட்டோ² அனுமோத³தி, அனுமோதெ³ந்தோ வாசங் பி⁴ந்த³தி, வாசங் பி⁴ந்த³ந்தோ பரங் விஞ்ஞாபேதி – இமேஸங் திண்ணங் புக்³க³லானங் கதி²னத்தா²ரா ருஹந்தி.
410. Katinaṃ puggalānaṃ kathinatthārā na ruhanti? Katinaṃ puggalānaṃ kathinatthārā ruhanti? Tiṇṇaṃ puggalānaṃ kathinatthārā na ruhanti. Tiṇṇaṃ puggalānaṃ kathinatthārā ruhanti. Katamesaṃ tiṇṇaṃ puggalānaṃ kathinatthārā na ruhanti? Nissīmaṭṭho anumodati, anumodento na vācaṃ bhindati, vācaṃ bhindanto na paraṃ viññāpeti – imesaṃ tiṇṇaṃ puggalānaṃ kathinatthārā na ruhanti. Katamesaṃ tiṇṇaṃ puggalānaṃ kathinatthārā ruhanti? Sīmaṭṭho anumodati, anumodento vācaṃ bhindati, vācaṃ bhindanto paraṃ viññāpeti – imesaṃ tiṇṇaṃ puggalānaṃ kathinatthārā ruhanti.
411. கதி கதி²னத்தா²ரா ந ருஹந்தி? கதி கதி²னத்தா²ரா ருஹந்தி? தயோ கதி²னத்தா²ரா ந ருஹந்தி. தயோ கதி²னத்தா²ரா ருஹந்தி. கதமே தயோ கதி²னத்தா²ரா ந ருஹந்தி? வத்து²விபன்னஞ்சேவ ஹோதி, காலவிபன்னஞ்ச, கரணவிபன்னஞ்ச – இமே தயோ கதி²னத்தா²ரா ந ருஹந்தி. கதமே தயோ கதி²னத்தா²ரா ருஹந்தி? வத்து²ஸம்பன்னஞ்சேவ ஹோதி, காலஸம்பன்னஞ்ச, கரணஸம்பன்னஞ்ச – இமே தயோ கதி²னத்தா²ரா ருஹந்தி.
411. Kati kathinatthārā na ruhanti? Kati kathinatthārā ruhanti? Tayo kathinatthārā na ruhanti. Tayo kathinatthārā ruhanti. Katame tayo kathinatthārā na ruhanti? Vatthuvipannañceva hoti, kālavipannañca, karaṇavipannañca – ime tayo kathinatthārā na ruhanti. Katame tayo kathinatthārā ruhanti? Vatthusampannañceva hoti, kālasampannañca, karaṇasampannañca – ime tayo kathinatthārā ruhanti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / புப்³ப³கரணனிதா³னாதி³விபா⁴க³வண்ணனா • Pubbakaraṇanidānādivibhāgavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / புப்³ப³கரணனிதா³னாதி³விபா⁴க³வண்ணனா • Pubbakaraṇanidānādivibhāgavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / புப்³ப³கரணனிதா³னாதி³விபா⁴க³வண்ணனா • Pubbakaraṇanidānādivibhāgavaṇṇanā
