| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
3. පුබ්‌බකරණනිදානාදිවිභාගො
3. Pubbakaraṇanidānādivibhāgo
405. පුබ්‌බකරණං කිංනිදානං, කිංසමුදයං, කිංජාතිකං, කිංපභවං, කිංසම්‌භාරං, කිංසමුට්‌ඨානං ? පච්‌චුද්‌ධාරො කිංනිදානො, කිංසමුදයො, කිංජාතිකො, කිංපභවො, කිංසම්‌භාරො, කිංසමුට්‌ඨානො? අධිට්‌ඨානං කිංනිදානං, කිංසමුදයං, කිංජාතිකං, කිංපභවං, කිංසම්‌භාරං, කිංසමුට්‌ඨානං? අත්‌ථාරො කිංනිදානො, කිංසමුදයො, කිංජාතිකො, කිංපභවො, කිංසම්‌භාරො, කිංසමුට්‌ඨානො? මාතිකා ච පලිබොධා ච කිංනිදානා, කිංසමුදයා, කිංජාතිකා, කිංපභවා, කිංසම්‌භාරා කිංසමුට්‌ඨානා? ආසා ච අනාසා ච කිංනිදානා, කිංසමුදයා, කිංජාතිකා, කිංපභවා, කිංසම්‌භාරා, කිංසමුට්‌ඨානා?
405. Pubbakaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ ? Paccuddhāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Adhiṭṭhānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ? Atthāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Mātikā ca palibodhā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā kiṃsamuṭṭhānā? Āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
පුබ්‌බකරණං පයොගනිදානං, පයොගසමුදයං, පයොගජාතිකං, පයොගපභවං, පයොගසම්‌භාරං, පයොගසමුට්‌ඨානං. පච්‌චුද්‌ධාරො පුබ්‌බකරණනිදානො, පුබ්‌බකරණසමුදයො, පුබ්‌බකරණජාතිකො, පුබ්‌බකරණපභවො, පුබ්‌බකරණසම්‌භාරො, පුබ්‌බකරණසමුට්‌ඨානො. අධිට්‌ඨානං පච්‌චුද්‌ධාරනිදානං, පච්‌චුද්‌ධාරසමුදයං, පච්‌චුද්‌ධාරජාතිකං, පච්‌චුද්‌ධාරපභවං, පච්‌චුද්‌ධාරසම්‌භාරං, පච්‌චුද්‌ධාරසමුට්‌ඨානං. අත්‌ථාරො අධිට්‌ඨානනිදානො, අධිට්‌ඨානසමුදයො, අධිට්‌ඨානජාතිකො, අධිට්‌ඨානපභවො, අධිට්‌ඨානසම්‌භාරො, අධිට්‌ඨානසමුට්‌ඨානො. මාතිකා ච පලිබොධා ච අත්‌ථාරනිදානා, අත්‌ථාරසමුදයා, අත්‌ථාරජාතිකා, අත්‌ථාරපභවා, අත්‌ථාරසම්‌භාරා, අත්‌ථාරසමුට්‌ඨානා. ආසා ච අනාසා ච වත්‌ථුනිදානා, වත්‌ථුසමුදයා, වත්‌ථුජාතිකා, වත්‌ථුපභවා, වත්‌ථුසම්‌භාරා, වත්‌ථුසමුට්‌ඨානා.
Pubbakaraṇaṃ payoganidānaṃ, payogasamudayaṃ, payogajātikaṃ, payogapabhavaṃ, payogasambhāraṃ, payogasamuṭṭhānaṃ. Paccuddhāro pubbakaraṇanidāno, pubbakaraṇasamudayo, pubbakaraṇajātiko, pubbakaraṇapabhavo, pubbakaraṇasambhāro, pubbakaraṇasamuṭṭhāno. Adhiṭṭhānaṃ paccuddhāranidānaṃ, paccuddhārasamudayaṃ, paccuddhārajātikaṃ, paccuddhārapabhavaṃ, paccuddhārasambhāraṃ, paccuddhārasamuṭṭhānaṃ. Atthāro adhiṭṭhānanidāno, adhiṭṭhānasamudayo, adhiṭṭhānajātiko, adhiṭṭhānapabhavo, adhiṭṭhānasambhāro, adhiṭṭhānasamuṭṭhāno. Mātikā ca palibodhā ca atthāranidānā, atthārasamudayā, atthārajātikā, atthārapabhavā, atthārasambhārā, atthārasamuṭṭhānā. Āsā ca anāsā ca vatthunidānā, vatthusamudayā, vatthujātikā, vatthupabhavā, vatthusambhārā, vatthusamuṭṭhānā.
406. පයොගො කිංනිදානො, කිංසමුදයො, කිංජාතිකො, කිංපභවො, කිංසම්‌භාරො, කිංසමුට්‌ඨානො, පුබ්‌බකරණං…පෙ.… පච්‌චුද්‌ධාරො… අධිට්‌ඨානං… අත්‌ථාරො… මාතිකා ච පලිබොධා ච… වත්‌ථු… ආසා ච අනාසා ච කිංනිදානා, කිංසමුදයා, කිංජාතිකා, කිංපභවා, කිංසම්‌භාරා, කිංසමුට්‌ඨානා?
406. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno, pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
පයොගො හෙතුනිදානො, හෙතුසමුදයො, හෙතුජාතිකො, හෙතුපභවො, හෙතුසම්‌භාරො, හෙතුසමුට්‌ඨානො. පුබ්‌බකරණං…පෙ.… පච්‌චුද්‌ධාරො… අධිට්‌ඨානං… අත්‌ථාරො … මාතිකා ච පලිබොධා ච… වත්‌ථු… ආසා ච අනාසා ච හෙතුනිදානා, හෙතුසමුදයා, හෙතුජාතිකා, හෙතුපභවා, හෙතුසම්‌භාරා, හෙතුසමුට්‌ඨානා.
Payogo hetunidāno, hetusamudayo, hetujātiko, hetupabhavo, hetusambhāro, hetusamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro … mātikā ca palibodhā ca… vatthu… āsā ca anāsā ca hetunidānā, hetusamudayā, hetujātikā, hetupabhavā, hetusambhārā, hetusamuṭṭhānā.
407. පයොගො කිංනිදානො, කිංසමුදයො, කිංජාතිකො, කිංපභවො, කිංසම්‌භාරො, කිංසමුට්‌ඨානො? පුබ්‌බකරණං…පෙ.… පච්‌චුද්‌ධාරො… අධිට්‌ඨානං… අත්‌ථාරො… මාතිකා ච පලිබොධා ච… වත්‌ථු… ආසා ච අනාසා ච කිංනිදානා, කිංසමුදයා, කිංජාතිකා, කිංපභවා, කිංසම්‌භාරා, කිංසමුට්‌ඨානා?
407. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
පයොගො පච්‌චයනිදානො, පච්‌චයසමුදයො, පච්‌චයජාතිකො, පච්‌චයපභවො, පච්‌චයසම්‌භාරො, පච්‌චයසමුට්‌ඨානො. පුබ්‌බකරණං…පෙ.… පච්‌චුද්‌ධාරො… අධිට්‌ඨානං… අත්‌ථාරො… මාතිකා ච පලිබොධා ච… වත්‌ථු… ආසා ච අනාසා ච පච්‌චයනිදානා, පච්‌චයසමුදයා, පච්‌චයජාතිකා, පච්‌චයපභවා, පච්‌චයසම්‌භාරා, පච්‌චයසමුට්‌ඨානා.
Payogo paccayanidāno, paccayasamudayo, paccayajātiko, paccayapabhavo, paccayasambhāro, paccayasamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca paccayanidānā, paccayasamudayā, paccayajātikā, paccayapabhavā, paccayasambhārā, paccayasamuṭṭhānā.
408. පුබ්‌බකරණං කතිහි ධම්‌මෙහි සඞ්‌ගහිතං? පුබ්‌බකරණං සත්‌තහි ධම්‌මෙහි සඞ්‌ගහිතං. ධොවනෙන, විචාරණෙන, ඡෙදනෙන, බන්‌ධනෙන, සිබ්‌බනෙන, රජනෙන, කප්‌පකරණෙන – පුබ්‌බකරණං ඉමෙහි සත්‌තහි ධම්‌මෙහි සඞ්‌ගහිතං.
408. Pubbakaraṇaṃ katihi dhammehi saṅgahitaṃ? Pubbakaraṇaṃ sattahi dhammehi saṅgahitaṃ. Dhovanena, vicāraṇena, chedanena, bandhanena, sibbanena, rajanena, kappakaraṇena – pubbakaraṇaṃ imehi sattahi dhammehi saṅgahitaṃ.
පච්‌චුද්‌ධාරො කතිහි ධම්‌මෙහි සඞ්‌ගහිතො? පච්‌චුද්‌ධාරො තීහි ධම්‌මෙහි සඞ්‌ගහිතො – සඞ්‌ඝාටියා, උත්‌තරාසඞ්‌ගෙන, අන්‌තරවාසකෙන.
Paccuddhāro katihi dhammehi saṅgahito? Paccuddhāro tīhi dhammehi saṅgahito – saṅghāṭiyā, uttarāsaṅgena, antaravāsakena.
අධිට්‌ඨානං කතිහි ධම්‌මෙහි සඞ්‌ගහිතං? අධිට්‌ඨානං තීහි ධම්‌මෙහි සඞ්‌ගහිතං – සඞ්‌ඝාටියා, උත්‌තරාසඞ්‌ගෙන, අන්‌තරවාසකෙන.
Adhiṭṭhānaṃ katihi dhammehi saṅgahitaṃ? Adhiṭṭhānaṃ tīhi dhammehi saṅgahitaṃ – saṅghāṭiyā, uttarāsaṅgena, antaravāsakena.
අත්‌ථාරො කතිහි ධම්‌මෙහි සඞ්‌ගහිතො? අත්‌ථාරො එකෙන ධම්‌මෙන සඞ්‌ගහිතො – වචීභෙදෙන.
Atthāro katihi dhammehi saṅgahito? Atthāro ekena dhammena saṅgahito – vacībhedena.
කථිනස්‌ස කති මූලානි, කති වත්‌ථූනි, කති භූමියො? කථිනස්‌ස එකං මූලං – සඞ්‌ඝො; තීණි වත්‌ථූනි – සඞ්‌ඝාටි, උත්‌තරාසඞ්‌ගො, අන්‌තරවාසකො, ඡ භූමියො – ඛොමං, කප්‌පාසිකං, කොසෙය්‍යං, කම්‌බලං, සාණං, භඞ්‌ගං.
Kathinassa kati mūlāni, kati vatthūni, kati bhūmiyo? Kathinassa ekaṃ mūlaṃ – saṅgho; tīṇi vatthūni – saṅghāṭi, uttarāsaṅgo, antaravāsako, cha bhūmiyo – khomaṃ, kappāsikaṃ, koseyyaṃ, kambalaṃ, sāṇaṃ, bhaṅgaṃ.
කථිනස්‌ස කො ආදි, කිං මජ්‌ඣෙ, කිං පරියොසානං? කථිනස්‌ස පුබ්‌බකරණං ආදි, ක්‍රියා මජ්‌ඣෙ, අත්‌ථාරො පරියොසානං.
Kathinassa ko ādi, kiṃ majjhe, kiṃ pariyosānaṃ? Kathinassa pubbakaraṇaṃ ādi, kriyā majjhe, atthāro pariyosānaṃ.
409. කතිහඞ්‌ගෙහි සමන්‌නාගතො පුග්‌ගලො අභබ්‌බො කථිනං අත්‌ථරිතුං? කතිහඞ්‌ගෙහි සමන්‌නාගතො පුග්‌ගලො භබ්‌බො කථිනං අත්‌ථරිතුං? අට්‌ඨහඞ්‌ගෙහි සමන්‌නාගතො පුග්‌ගලො අභබ්‌බො කථිනං අත්‌ථරිතුං. අට්‌ඨහඞ්‌ගෙහි සමන්‌නාගතො පුග්‌ගලො භබ්‌බො කථිනං අත්‌ථරිතුං. කතමෙහි අට්‌ඨහඞ්‌ගෙහි සමන්‌නාගතො පුග්‌ගලො අභබ්‌බො කථිනං අත්‌ථරිතුං? පුබ්‌බකරණං න ජානාති, පච්‌චුද්‌ධාරං න ජානාති, අධිට්‌ඨානං න ජානාති, අත්‌ථාරං න ජානාති, මාතිකං න ජානාති, පලිබොධං න ජානාති, උද්‌ධාරං න ජානාති, ආනිසංසං න ජානාති – ඉමෙහි අට්‌ඨහඞ්‌ගෙහි සමන්‌නාගතො පුග්‌ගලො අභබ්‌බො කථිනං අත්‌ථරිතුං. කතමෙහි අට්‌ඨහඞ්‌ගෙහි සමන්‌නාගතො පුග්‌ගලො භබ්‌බො කථිනං අත්‌ථරිතුං? පුබ්‌බකරණං ජානාති, පච්‌චුද්‌ධාරං ජානාති, අධිට්‌ඨානං ජානාති, අත්‌ථාරං ජානාති, මාතිකං ජානාති, පලිබොධං ජානාති, උද්‌ධාරං ජානාති, ආනිසංසං ජානාති – ඉමෙහි අට්‌ඨහඞ්‌ගෙහි සමන්‌නාගතො පුග්‌ගලො භබ්‌බො කථිනං අත්‌ථරිතුං.
409. Katihaṅgehi samannāgato puggalo abhabbo kathinaṃ attharituṃ? Katihaṅgehi samannāgato puggalo bhabbo kathinaṃ attharituṃ? Aṭṭhahaṅgehi samannāgato puggalo abhabbo kathinaṃ attharituṃ. Aṭṭhahaṅgehi samannāgato puggalo bhabbo kathinaṃ attharituṃ. Katamehi aṭṭhahaṅgehi samannāgato puggalo abhabbo kathinaṃ attharituṃ? Pubbakaraṇaṃ na jānāti, paccuddhāraṃ na jānāti, adhiṭṭhānaṃ na jānāti, atthāraṃ na jānāti, mātikaṃ na jānāti, palibodhaṃ na jānāti, uddhāraṃ na jānāti, ānisaṃsaṃ na jānāti – imehi aṭṭhahaṅgehi samannāgato puggalo abhabbo kathinaṃ attharituṃ. Katamehi aṭṭhahaṅgehi samannāgato puggalo bhabbo kathinaṃ attharituṃ? Pubbakaraṇaṃ jānāti, paccuddhāraṃ jānāti, adhiṭṭhānaṃ jānāti, atthāraṃ jānāti, mātikaṃ jānāti, palibodhaṃ jānāti, uddhāraṃ jānāti, ānisaṃsaṃ jānāti – imehi aṭṭhahaṅgehi samannāgato puggalo bhabbo kathinaṃ attharituṃ.
410. කතිනං පුග්‌ගලානං කථිනත්‌ථාරා න රුහන්‌ති? කතිනං පුග්‌ගලානං කථිනත්‌ථාරා රුහන්‌ති? තිණ්‌ණං පුග්‌ගලානං කථිනත්‌ථාරා න රුහන්‌ති. තිණ්‌ණං පුග්‌ගලානං කථිනත්‌ථාරා රුහන්‌ති. කතමෙසං තිණ්‌ණං පුග්‌ගලානං කථිනත්‌ථාරා න රුහන්‌ති? නිස්‌සීමට්‌ඨො අනුමොදති, අනුමොදෙන්‌තො න වාචං භින්‌දති, වාචං භින්‌දන්‌තො න පරං විඤ්‌ඤාපෙති – ඉමෙසං තිණ්‌ණං පුග්‌ගලානං කථිනත්‌ථාරා න රුහන්‌ති. කතමෙසං තිණ්‌ණං පුග්‌ගලානං කථිනත්‌ථාරා රුහන්‌ති? සීමට්‌ඨො අනුමොදති, අනුමොදෙන්‌තො වාචං භින්‌දති, වාචං භින්‌දන්‌තො පරං විඤ්‌ඤාපෙති – ඉමෙසං තිණ්‌ණං පුග්‌ගලානං කථිනත්‌ථාරා රුහන්‌ති.
410. Katinaṃ puggalānaṃ kathinatthārā na ruhanti? Katinaṃ puggalānaṃ kathinatthārā ruhanti? Tiṇṇaṃ puggalānaṃ kathinatthārā na ruhanti. Tiṇṇaṃ puggalānaṃ kathinatthārā ruhanti. Katamesaṃ tiṇṇaṃ puggalānaṃ kathinatthārā na ruhanti? Nissīmaṭṭho anumodati, anumodento na vācaṃ bhindati, vācaṃ bhindanto na paraṃ viññāpeti – imesaṃ tiṇṇaṃ puggalānaṃ kathinatthārā na ruhanti. Katamesaṃ tiṇṇaṃ puggalānaṃ kathinatthārā ruhanti? Sīmaṭṭho anumodati, anumodento vācaṃ bhindati, vācaṃ bhindanto paraṃ viññāpeti – imesaṃ tiṇṇaṃ puggalānaṃ kathinatthārā ruhanti.
411. කති කථිනත්‌ථාරා න රුහන්‌ති? කති කථිනත්‌ථාරා රුහන්‌ති? තයො කථිනත්‌ථාරා න රුහන්‌ති. තයො කථිනත්‌ථාරා රුහන්‌ති. කතමෙ තයො කථිනත්‌ථාරා න රුහන්‌ති? වත්‌ථුවිපන්‌නඤ්‌චෙව හොති, කාලවිපන්‌නඤ්‌ච, කරණවිපන්‌නඤ්‌ච – ඉමෙ තයො කථිනත්‌ථාරා න රුහන්‌ති. කතමෙ තයො කථිනත්‌ථාරා රුහන්‌ති? වත්‌ථුසම්‌පන්‌නඤ්‌චෙව හොති, කාලසම්‌පන්‌නඤ්‌ච, කරණසම්‌පන්‌නඤ්‌ච – ඉමෙ තයො කථිනත්‌ථාරා රුහන්‌ති.
411. Kati kathinatthārā na ruhanti? Kati kathinatthārā ruhanti? Tayo kathinatthārā na ruhanti. Tayo kathinatthārā ruhanti. Katame tayo kathinatthārā na ruhanti? Vatthuvipannañceva hoti, kālavipannañca, karaṇavipannañca – ime tayo kathinatthārā na ruhanti. Katame tayo kathinatthārā ruhanti? Vatthusampannañceva hoti, kālasampannañca, karaṇasampannañca – ime tayo kathinatthārā ruhanti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / පුබ්‌බකරණනිදානාදිවිභාගවණ්‌ණනා • Pubbakaraṇanidānādivibhāgavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පුබ්‌බකරණනිදානාදිවිභාගවණ්‌ණනා • Pubbakaraṇanidānādivibhāgavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / පුබ්‌බකරණනිදානාදිවිභාගවණ්‌ණනා • Pubbakaraṇanidānādivibhāgavaṇṇanā
