| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൩. പുബ്ബകരണനിദാനാദിവിഭാഗോ
3. Pubbakaraṇanidānādivibhāgo
൪൦൫. പുബ്ബകരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം ? പച്ചുദ്ധാരോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? അധിട്ഠാനം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? അത്ഥാരോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? മാതികാ ച പലിബോധാ ച കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ കിംസമുട്ഠാനാ? ആസാ ച അനാസാ ച കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ, കിംസമുട്ഠാനാ?
405. Pubbakaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ ? Paccuddhāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Adhiṭṭhānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavaṃ, kiṃsambhāraṃ, kiṃsamuṭṭhānaṃ? Atthāro kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Mātikā ca palibodhā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā kiṃsamuṭṭhānā? Āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
പുബ്ബകരണം പയോഗനിദാനം, പയോഗസമുദയം, പയോഗജാതികം, പയോഗപഭവം, പയോഗസമ്ഭാരം, പയോഗസമുട്ഠാനം. പച്ചുദ്ധാരോ പുബ്ബകരണനിദാനോ, പുബ്ബകരണസമുദയോ, പുബ്ബകരണജാതികോ, പുബ്ബകരണപഭവോ, പുബ്ബകരണസമ്ഭാരോ, പുബ്ബകരണസമുട്ഠാനോ. അധിട്ഠാനം പച്ചുദ്ധാരനിദാനം, പച്ചുദ്ധാരസമുദയം, പച്ചുദ്ധാരജാതികം, പച്ചുദ്ധാരപഭവം, പച്ചുദ്ധാരസമ്ഭാരം, പച്ചുദ്ധാരസമുട്ഠാനം. അത്ഥാരോ അധിട്ഠാനനിദാനോ, അധിട്ഠാനസമുദയോ, അധിട്ഠാനജാതികോ, അധിട്ഠാനപഭവോ, അധിട്ഠാനസമ്ഭാരോ, അധിട്ഠാനസമുട്ഠാനോ. മാതികാ ച പലിബോധാ ച അത്ഥാരനിദാനാ, അത്ഥാരസമുദയാ, അത്ഥാരജാതികാ, അത്ഥാരപഭവാ, അത്ഥാരസമ്ഭാരാ, അത്ഥാരസമുട്ഠാനാ. ആസാ ച അനാസാ ച വത്ഥുനിദാനാ, വത്ഥുസമുദയാ, വത്ഥുജാതികാ, വത്ഥുപഭവാ, വത്ഥുസമ്ഭാരാ, വത്ഥുസമുട്ഠാനാ.
Pubbakaraṇaṃ payoganidānaṃ, payogasamudayaṃ, payogajātikaṃ, payogapabhavaṃ, payogasambhāraṃ, payogasamuṭṭhānaṃ. Paccuddhāro pubbakaraṇanidāno, pubbakaraṇasamudayo, pubbakaraṇajātiko, pubbakaraṇapabhavo, pubbakaraṇasambhāro, pubbakaraṇasamuṭṭhāno. Adhiṭṭhānaṃ paccuddhāranidānaṃ, paccuddhārasamudayaṃ, paccuddhārajātikaṃ, paccuddhārapabhavaṃ, paccuddhārasambhāraṃ, paccuddhārasamuṭṭhānaṃ. Atthāro adhiṭṭhānanidāno, adhiṭṭhānasamudayo, adhiṭṭhānajātiko, adhiṭṭhānapabhavo, adhiṭṭhānasambhāro, adhiṭṭhānasamuṭṭhāno. Mātikā ca palibodhā ca atthāranidānā, atthārasamudayā, atthārajātikā, atthārapabhavā, atthārasambhārā, atthārasamuṭṭhānā. Āsā ca anāsā ca vatthunidānā, vatthusamudayā, vatthujātikā, vatthupabhavā, vatthusambhārā, vatthusamuṭṭhānā.
൪൦൬. പയോഗോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ, പുബ്ബകരണം…പേ॰… പച്ചുദ്ധാരോ… അധിട്ഠാനം… അത്ഥാരോ… മാതികാ ച പലിബോധാ ച… വത്ഥു… ആസാ ച അനാസാ ച കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ, കിംസമുട്ഠാനാ?
406. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno, pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
പയോഗോ ഹേതുനിദാനോ, ഹേതുസമുദയോ, ഹേതുജാതികോ, ഹേതുപഭവോ, ഹേതുസമ്ഭാരോ, ഹേതുസമുട്ഠാനോ. പുബ്ബകരണം…പേ॰… പച്ചുദ്ധാരോ… അധിട്ഠാനം… അത്ഥാരോ … മാതികാ ച പലിബോധാ ച… വത്ഥു… ആസാ ച അനാസാ ച ഹേതുനിദാനാ, ഹേതുസമുദയാ, ഹേതുജാതികാ, ഹേതുപഭവാ, ഹേതുസമ്ഭാരാ, ഹേതുസമുട്ഠാനാ.
Payogo hetunidāno, hetusamudayo, hetujātiko, hetupabhavo, hetusambhāro, hetusamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro … mātikā ca palibodhā ca… vatthu… āsā ca anāsā ca hetunidānā, hetusamudayā, hetujātikā, hetupabhavā, hetusambhārā, hetusamuṭṭhānā.
൪൦൭. പയോഗോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? പുബ്ബകരണം…പേ॰… പച്ചുദ്ധാരോ… അധിട്ഠാനം… അത്ഥാരോ… മാതികാ ച പലിബോധാ ച… വത്ഥു… ആസാ ച അനാസാ ച കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ, കിംസമുട്ഠാനാ?
407. Payogo kiṃnidāno, kiṃsamudayo, kiṃjātiko, kiṃpabhavo, kiṃsambhāro, kiṃsamuṭṭhāno? Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca kiṃnidānā, kiṃsamudayā, kiṃjātikā, kiṃpabhavā, kiṃsambhārā, kiṃsamuṭṭhānā?
പയോഗോ പച്ചയനിദാനോ, പച്ചയസമുദയോ, പച്ചയജാതികോ, പച്ചയപഭവോ, പച്ചയസമ്ഭാരോ, പച്ചയസമുട്ഠാനോ. പുബ്ബകരണം…പേ॰… പച്ചുദ്ധാരോ… അധിട്ഠാനം… അത്ഥാരോ… മാതികാ ച പലിബോധാ ച… വത്ഥു… ആസാ ച അനാസാ ച പച്ചയനിദാനാ, പച്ചയസമുദയാ, പച്ചയജാതികാ, പച്ചയപഭവാ, പച്ചയസമ്ഭാരാ, പച്ചയസമുട്ഠാനാ.
Payogo paccayanidāno, paccayasamudayo, paccayajātiko, paccayapabhavo, paccayasambhāro, paccayasamuṭṭhāno. Pubbakaraṇaṃ…pe… paccuddhāro… adhiṭṭhānaṃ… atthāro… mātikā ca palibodhā ca… vatthu… āsā ca anāsā ca paccayanidānā, paccayasamudayā, paccayajātikā, paccayapabhavā, paccayasambhārā, paccayasamuṭṭhānā.
൪൦൮. പുബ്ബകരണം കതിഹി ധമ്മേഹി സങ്ഗഹിതം? പുബ്ബകരണം സത്തഹി ധമ്മേഹി സങ്ഗഹിതം. ധോവനേന, വിചാരണേന, ഛേദനേന, ബന്ധനേന, സിബ്ബനേന, രജനേന, കപ്പകരണേന – പുബ്ബകരണം ഇമേഹി സത്തഹി ധമ്മേഹി സങ്ഗഹിതം.
408. Pubbakaraṇaṃ katihi dhammehi saṅgahitaṃ? Pubbakaraṇaṃ sattahi dhammehi saṅgahitaṃ. Dhovanena, vicāraṇena, chedanena, bandhanena, sibbanena, rajanena, kappakaraṇena – pubbakaraṇaṃ imehi sattahi dhammehi saṅgahitaṃ.
പച്ചുദ്ധാരോ കതിഹി ധമ്മേഹി സങ്ഗഹിതോ? പച്ചുദ്ധാരോ തീഹി ധമ്മേഹി സങ്ഗഹിതോ – സങ്ഘാടിയാ, ഉത്തരാസങ്ഗേന, അന്തരവാസകേന.
Paccuddhāro katihi dhammehi saṅgahito? Paccuddhāro tīhi dhammehi saṅgahito – saṅghāṭiyā, uttarāsaṅgena, antaravāsakena.
അധിട്ഠാനം കതിഹി ധമ്മേഹി സങ്ഗഹിതം? അധിട്ഠാനം തീഹി ധമ്മേഹി സങ്ഗഹിതം – സങ്ഘാടിയാ, ഉത്തരാസങ്ഗേന, അന്തരവാസകേന.
Adhiṭṭhānaṃ katihi dhammehi saṅgahitaṃ? Adhiṭṭhānaṃ tīhi dhammehi saṅgahitaṃ – saṅghāṭiyā, uttarāsaṅgena, antaravāsakena.
അത്ഥാരോ കതിഹി ധമ്മേഹി സങ്ഗഹിതോ? അത്ഥാരോ ഏകേന ധമ്മേന സങ്ഗഹിതോ – വചീഭേദേന.
Atthāro katihi dhammehi saṅgahito? Atthāro ekena dhammena saṅgahito – vacībhedena.
കഥിനസ്സ കതി മൂലാനി, കതി വത്ഥൂനി, കതി ഭൂമിയോ? കഥിനസ്സ ഏകം മൂലം – സങ്ഘോ; തീണി വത്ഥൂനി – സങ്ഘാടി, ഉത്തരാസങ്ഗോ, അന്തരവാസകോ, ഛ ഭൂമിയോ – ഖോമം, കപ്പാസികം, കോസേയ്യം, കമ്ബലം, സാണം, ഭങ്ഗം.
Kathinassa kati mūlāni, kati vatthūni, kati bhūmiyo? Kathinassa ekaṃ mūlaṃ – saṅgho; tīṇi vatthūni – saṅghāṭi, uttarāsaṅgo, antaravāsako, cha bhūmiyo – khomaṃ, kappāsikaṃ, koseyyaṃ, kambalaṃ, sāṇaṃ, bhaṅgaṃ.
കഥിനസ്സ കോ ആദി, കിം മജ്ഝേ, കിം പരിയോസാനം? കഥിനസ്സ പുബ്ബകരണം ആദി, ക്രിയാ മജ്ഝേ, അത്ഥാരോ പരിയോസാനം.
Kathinassa ko ādi, kiṃ majjhe, kiṃ pariyosānaṃ? Kathinassa pubbakaraṇaṃ ādi, kriyā majjhe, atthāro pariyosānaṃ.
൪൦൯. കതിഹങ്ഗേഹി സമന്നാഗതോ പുഗ്ഗലോ അഭബ്ബോ കഥിനം അത്ഥരിതും? കതിഹങ്ഗേഹി സമന്നാഗതോ പുഗ്ഗലോ ഭബ്ബോ കഥിനം അത്ഥരിതും? അട്ഠഹങ്ഗേഹി സമന്നാഗതോ പുഗ്ഗലോ അഭബ്ബോ കഥിനം അത്ഥരിതും. അട്ഠഹങ്ഗേഹി സമന്നാഗതോ പുഗ്ഗലോ ഭബ്ബോ കഥിനം അത്ഥരിതും. കതമേഹി അട്ഠഹങ്ഗേഹി സമന്നാഗതോ പുഗ്ഗലോ അഭബ്ബോ കഥിനം അത്ഥരിതും? പുബ്ബകരണം ന ജാനാതി, പച്ചുദ്ധാരം ന ജാനാതി, അധിട്ഠാനം ന ജാനാതി, അത്ഥാരം ന ജാനാതി, മാതികം ന ജാനാതി, പലിബോധം ന ജാനാതി, ഉദ്ധാരം ന ജാനാതി, ആനിസംസം ന ജാനാതി – ഇമേഹി അട്ഠഹങ്ഗേഹി സമന്നാഗതോ പുഗ്ഗലോ അഭബ്ബോ കഥിനം അത്ഥരിതും. കതമേഹി അട്ഠഹങ്ഗേഹി സമന്നാഗതോ പുഗ്ഗലോ ഭബ്ബോ കഥിനം അത്ഥരിതും? പുബ്ബകരണം ജാനാതി, പച്ചുദ്ധാരം ജാനാതി, അധിട്ഠാനം ജാനാതി, അത്ഥാരം ജാനാതി, മാതികം ജാനാതി, പലിബോധം ജാനാതി, ഉദ്ധാരം ജാനാതി, ആനിസംസം ജാനാതി – ഇമേഹി അട്ഠഹങ്ഗേഹി സമന്നാഗതോ പുഗ്ഗലോ ഭബ്ബോ കഥിനം അത്ഥരിതും.
409. Katihaṅgehi samannāgato puggalo abhabbo kathinaṃ attharituṃ? Katihaṅgehi samannāgato puggalo bhabbo kathinaṃ attharituṃ? Aṭṭhahaṅgehi samannāgato puggalo abhabbo kathinaṃ attharituṃ. Aṭṭhahaṅgehi samannāgato puggalo bhabbo kathinaṃ attharituṃ. Katamehi aṭṭhahaṅgehi samannāgato puggalo abhabbo kathinaṃ attharituṃ? Pubbakaraṇaṃ na jānāti, paccuddhāraṃ na jānāti, adhiṭṭhānaṃ na jānāti, atthāraṃ na jānāti, mātikaṃ na jānāti, palibodhaṃ na jānāti, uddhāraṃ na jānāti, ānisaṃsaṃ na jānāti – imehi aṭṭhahaṅgehi samannāgato puggalo abhabbo kathinaṃ attharituṃ. Katamehi aṭṭhahaṅgehi samannāgato puggalo bhabbo kathinaṃ attharituṃ? Pubbakaraṇaṃ jānāti, paccuddhāraṃ jānāti, adhiṭṭhānaṃ jānāti, atthāraṃ jānāti, mātikaṃ jānāti, palibodhaṃ jānāti, uddhāraṃ jānāti, ānisaṃsaṃ jānāti – imehi aṭṭhahaṅgehi samannāgato puggalo bhabbo kathinaṃ attharituṃ.
൪൧൦. കതിനം പുഗ്ഗലാനം കഥിനത്ഥാരാ ന രുഹന്തി? കതിനം പുഗ്ഗലാനം കഥിനത്ഥാരാ രുഹന്തി? തിണ്ണം പുഗ്ഗലാനം കഥിനത്ഥാരാ ന രുഹന്തി. തിണ്ണം പുഗ്ഗലാനം കഥിനത്ഥാരാ രുഹന്തി. കതമേസം തിണ്ണം പുഗ്ഗലാനം കഥിനത്ഥാരാ ന രുഹന്തി? നിസ്സീമട്ഠോ അനുമോദതി, അനുമോദേന്തോ ന വാചം ഭിന്ദതി, വാചം ഭിന്ദന്തോ ന പരം വിഞ്ഞാപേതി – ഇമേസം തിണ്ണം പുഗ്ഗലാനം കഥിനത്ഥാരാ ന രുഹന്തി. കതമേസം തിണ്ണം പുഗ്ഗലാനം കഥിനത്ഥാരാ രുഹന്തി? സീമട്ഠോ അനുമോദതി, അനുമോദേന്തോ വാചം ഭിന്ദതി, വാചം ഭിന്ദന്തോ പരം വിഞ്ഞാപേതി – ഇമേസം തിണ്ണം പുഗ്ഗലാനം കഥിനത്ഥാരാ രുഹന്തി.
410. Katinaṃ puggalānaṃ kathinatthārā na ruhanti? Katinaṃ puggalānaṃ kathinatthārā ruhanti? Tiṇṇaṃ puggalānaṃ kathinatthārā na ruhanti. Tiṇṇaṃ puggalānaṃ kathinatthārā ruhanti. Katamesaṃ tiṇṇaṃ puggalānaṃ kathinatthārā na ruhanti? Nissīmaṭṭho anumodati, anumodento na vācaṃ bhindati, vācaṃ bhindanto na paraṃ viññāpeti – imesaṃ tiṇṇaṃ puggalānaṃ kathinatthārā na ruhanti. Katamesaṃ tiṇṇaṃ puggalānaṃ kathinatthārā ruhanti? Sīmaṭṭho anumodati, anumodento vācaṃ bhindati, vācaṃ bhindanto paraṃ viññāpeti – imesaṃ tiṇṇaṃ puggalānaṃ kathinatthārā ruhanti.
൪൧൧. കതി കഥിനത്ഥാരാ ന രുഹന്തി? കതി കഥിനത്ഥാരാ രുഹന്തി? തയോ കഥിനത്ഥാരാ ന രുഹന്തി. തയോ കഥിനത്ഥാരാ രുഹന്തി. കതമേ തയോ കഥിനത്ഥാരാ ന രുഹന്തി? വത്ഥുവിപന്നഞ്ചേവ ഹോതി, കാലവിപന്നഞ്ച, കരണവിപന്നഞ്ച – ഇമേ തയോ കഥിനത്ഥാരാ ന രുഹന്തി. കതമേ തയോ കഥിനത്ഥാരാ രുഹന്തി? വത്ഥുസമ്പന്നഞ്ചേവ ഹോതി, കാലസമ്പന്നഞ്ച, കരണസമ്പന്നഞ്ച – ഇമേ തയോ കഥിനത്ഥാരാ രുഹന്തി.
411. Kati kathinatthārā na ruhanti? Kati kathinatthārā ruhanti? Tayo kathinatthārā na ruhanti. Tayo kathinatthārā ruhanti. Katame tayo kathinatthārā na ruhanti? Vatthuvipannañceva hoti, kālavipannañca, karaṇavipannañca – ime tayo kathinatthārā na ruhanti. Katame tayo kathinatthārā ruhanti? Vatthusampannañceva hoti, kālasampannañca, karaṇasampannañca – ime tayo kathinatthārā ruhanti.
Related texts:
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / പരിവാര-അട്ഠകഥാ • Parivāra-aṭṭhakathā / പുബ്ബകരണനിദാനാദിവിഭാഗവണ്ണനാ • Pubbakaraṇanidānādivibhāgavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / പുബ്ബകരണനിദാനാദിവിഭാഗവണ്ണനാ • Pubbakaraṇanidānādivibhāgavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / പുബ്ബകരണനിദാനാദിവിഭാഗവണ്ണനാ • Pubbakaraṇanidānādivibhāgavaṇṇanā
