| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༨༥. པུབྦཀརཎཱནུཛཱནནཱ
85. Pubbakaraṇānujānanā
༡༥༩. ཏེན ཁོ པན སམཡེན ཨཉྙཏརསྨིཾ ཨཱཝཱསེ ཨུཔོསཐཱགཱརཾ ཨུཀླཱཔཾ ཧོཏི། ཨཱགནྟུཀཱ བྷིཀྑཱུ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཝཱསིཀཱ བྷིཀྑཱུ ཨུཔོསཐཱགཱརཾ ན སམྨཛྫིསྶནྟཱི’’ཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨུཔོསཐཱགཱརཾ སམྨཛྫིཏུནྟི།
159. Tena kho pana samayena aññatarasmiṃ āvāse uposathāgāraṃ uklāpaṃ hoti. Āgantukā bhikkhū ujjhāyanti khiyyanti vipācenti – ‘‘kathañhi nāma āvāsikā bhikkhū uposathāgāraṃ na sammajjissantī’’ti. Bhagavato etamatthaṃ ārocesuṃ. Anujānāmi, bhikkhave, uposathāgāraṃ sammajjitunti.
ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ ཨུཔོསཐཱགཱརཾ སམྨཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཐེརེན བྷིཀྑུནཱ ནཝཾ བྷིཀྑུཾ ཨཱཎཱཔེཏུནྟི།
Atha kho bhikkhūnaṃ etadahosi – ‘‘kena nu kho uposathāgāraṃ sammajjitabba’’nti? Bhagavato etamatthaṃ ārocesuṃ. Anujānāmi, bhikkhave, therena bhikkhunā navaṃ bhikkhuṃ āṇāpetunti.
ཐེརེན ཨཱཎཏྟཱ ནཝཱ བྷིཀྑཱུ ན སམྨཛྫནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཐེརེན ཨཱཎཏྟེན ཨགིལཱནེན ན སམྨཛྫིཏབྦཾ། ཡོ ན སམྨཛྫེཡྻ, ཨཱཔཏྟི དུཀྐཊསྶཱཏི།
Therena āṇattā navā bhikkhū na sammajjanti. Bhagavato etamatthaṃ ārocesuṃ. Na, bhikkhave, therena āṇattena agilānena na sammajjitabbaṃ. Yo na sammajjeyya, āpatti dukkaṭassāti.
༡༦༠. ཏེན ཁོ པན སམཡེན ཨུཔོསཐཱགཱརེ ཨཱསནཾ ཨཔཉྙཏྟཾ ཧོཏི། བྷིཀྑཱུ ཚམཱཡཾ ནིསཱིདནྟི, གཏྟཱནིཔི ཙཱིཝརཱནིཔི པཾསུཀིཏཱནི ཧོནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨུཔོསཐཱགཱརེ ཨཱསནཾ པཉྙཔེཏུནྟི།
160. Tena kho pana samayena uposathāgāre āsanaṃ apaññattaṃ hoti. Bhikkhū chamāyaṃ nisīdanti, gattānipi cīvarānipi paṃsukitāni honti. Bhagavato etamatthaṃ ārocesuṃ. Anujānāmi, bhikkhave, uposathāgāre āsanaṃ paññapetunti.
ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ ཨུཔོསཐཱགཱརེ ཨཱསནཾ པཉྙཔེཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཐེརེན བྷིཀྑུནཱ ནཝཾ བྷིཀྑུཾ ཨཱཎཱཔེཏུནྟི།
Atha kho bhikkhūnaṃ etadahosi – ‘‘kena nu kho uposathāgāre āsanaṃ paññapetabba’’nti? Bhagavato etamatthaṃ ārocesuṃ. Anujānāmi, bhikkhave, therena bhikkhunā navaṃ bhikkhuṃ āṇāpetunti.
ཐེརེན ཨཱཎཏྟཱ ནཝཱ བྷིཀྑཱུ ན པཉྙཔེནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཐེརེན ཨཱཎཏྟེན ཨགིལཱནེན ན པཉྙཔེཏབྦཾ། ཡོ ན པཉྙཔེཡྻ, ཨཱཔཏྟི དུཀྐཊསྶཱཏི།
Therena āṇattā navā bhikkhū na paññapenti. Bhagavato etamatthaṃ ārocesuṃ. Na, bhikkhave, therena āṇattena agilānena na paññapetabbaṃ. Yo na paññapeyya, āpatti dukkaṭassāti.
༡༦༡. ཏེན ཁོ པན སམཡེན ཨུཔོསཐཱགཱརེ པདཱིཔོ ན ཧོཏི། བྷིཀྑཱུ ཨནྡྷཀཱརེ ཀཱཡམྤི ཙཱིཝརམྤི ཨཀྐམནྟི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨུཔོསཐཱགཱརེ པདཱིཔཾ ཀཱཏུནྟི།
161. Tena kho pana samayena uposathāgāre padīpo na hoti. Bhikkhū andhakāre kāyampi cīvarampi akkamanti. Bhagavato etamatthaṃ ārocesuṃ. Anujānāmi, bhikkhave, uposathāgāre padīpaṃ kātunti.
ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ ཨུཔོསཐཱགཱརེ པདཱིཔོ ཀཱཏབྦོ’’ཏི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཐེརེན བྷིཀྑུནཱ ནཝཾ བྷིཀྑུཾ ཨཱཎཱཔེཏུནྟི།
Atha kho bhikkhūnaṃ etadahosi – ‘‘kena nu kho uposathāgāre padīpo kātabbo’’ti? Bhagavato etamatthaṃ ārocesuṃ. Anujānāmi, bhikkhave, therena bhikkhunā navaṃ bhikkhuṃ āṇāpetunti.
ཐེརེན ཨཱཎཏྟཱ ནཝཱ བྷིཀྑཱུ ན པདཱིཔེནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཐེརེན ཨཱཎཏྟེན ཨགིལཱནེན ན པདཱིཔེཏབྦོ། ཡོ ན པདཱིཔེཡྻ, ཨཱཔཏྟི དུཀྐཊསྶཱཏི།
Therena āṇattā navā bhikkhū na padīpenti. Bhagavato etamatthaṃ ārocesuṃ. Na, bhikkhave, therena āṇattena agilānena na padīpetabbo. Yo na padīpeyya, āpatti dukkaṭassāti.
༡༦༢. ཏེན ཁོ པན སམཡེན ཨཉྙཏརསྨིཾ ཨཱཝཱསེ ཨཱཝཱསིཀཱ བྷིཀྑཱུ ནེཝ པཱནཱིཡཾ ཨུཔཊྛཱཔེནྟི, ན པརིབྷོཛནཱིཡཾ ཨུཔཊྛཱཔེནྟི། ཨཱགནྟུཀཱ བྷིཀྑཱུ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཝཱསིཀཱ བྷིཀྑཱུ ནེཝ པཱནཱིཡཾ ཨུཔཊྛཱཔེསྶནྟི, ན པརིབྷོཛནཱིཡཾ ཨུཔཊྛཱཔེསྶནྟཱི’’ཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ , པཱནཱིཡཾ པརིབྷོཛནཱིཡཾ ཨུཔཊྛཱཔེཏུནྟི།
162. Tena kho pana samayena aññatarasmiṃ āvāse āvāsikā bhikkhū neva pānīyaṃ upaṭṭhāpenti, na paribhojanīyaṃ upaṭṭhāpenti. Āgantukā bhikkhū ujjhāyanti khiyyanti vipācenti – ‘‘kathañhi nāma āvāsikā bhikkhū neva pānīyaṃ upaṭṭhāpessanti, na paribhojanīyaṃ upaṭṭhāpessantī’’ti. Bhagavato etamatthaṃ ārocesuṃ. Anujānāmi, bhikkhave , pānīyaṃ paribhojanīyaṃ upaṭṭhāpetunti.
ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ པཱནཱིཡཾ པརིབྷོཛནཱིཡཾ ཨུཔཊྛཱཔེཏབྦ’’ནྟི ? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཐེརེན བྷིཀྑུནཱ ནཝཾ བྷིཀྑུཾ ཨཱཎཱཔེཏུནྟི།
Atha kho bhikkhūnaṃ etadahosi – ‘‘kena nu kho pānīyaṃ paribhojanīyaṃ upaṭṭhāpetabba’’nti ? Bhagavato etamatthaṃ ārocesuṃ. Anujānāmi, bhikkhave, therena bhikkhunā navaṃ bhikkhuṃ āṇāpetunti.
ཐེརེན ཨཱཎཏྟཱ ནཝཱ བྷིཀྑཱུ ན ཨུཔཊྛཱཔེནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཐེརེན ཨཱཎཏྟེན ཨགིལཱནེན ན ཨུཔཊྛཱཔེཏབྦཾ། ཡོ ན ཨུཔཊྛཱཔེཡྻ, ཨཱཔཏྟི དུཀྐཊསྶཱཏི།
Therena āṇattā navā bhikkhū na upaṭṭhāpenti. Bhagavato etamatthaṃ ārocesuṃ. Na, bhikkhave, therena āṇattena agilānena na upaṭṭhāpetabbaṃ. Yo na upaṭṭhāpeyya, āpatti dukkaṭassāti.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཀྑགཎནཱདིཨུགྒཧཎཱནུཛཱནནཀཐཱ • Pakkhagaṇanādiuggahaṇānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཀྑགཎནཱདིཨུགྒཧཎཱནུཛཱནནཀཐཱཝཎྞནཱ • Pakkhagaṇanādiuggahaṇānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༨༤. པཀྑགཎནཱདིཨུགྒཧཎཱནུཛཱནནཀཐཱ • 84. Pakkhagaṇanādiuggahaṇānujānanakathā
