| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. புப்³ப³கொட்ட²கஸுத்தங்
4. Pubbakoṭṭhakasuttaṃ
514. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி புப்³ப³கொட்ட²கே. தத்ர கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘ஸத்³த³ஹஸி 1 த்வங், ஸாரிபுத்த – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி?
514. Evaṃ me sutaṃ – ekaṃ samayaṃ bhagavā sāvatthiyaṃ viharati pubbakoṭṭhake. Tatra kho bhagavā āyasmantaṃ sāriputtaṃ āmantesi – ‘‘saddahasi 2 tvaṃ, sāriputta – saddhindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosāna’’nti?
‘‘ந க்²வாஹங் எத்த², ப⁴ந்தே, ப⁴க³வதோ ஸத்³தா⁴ய க³ச்சா²மி – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ஹேதங், ப⁴ந்தே, அஞ்ஞாதங் அஸ்ஸ அதி³ட்ட²ங் அவிதி³தங் அஸச்சி²கதங் அப²ஸ்ஸிதங் 3 பஞ்ஞாய, தே தத்த² பரேஸங் ஸத்³தா⁴ய க³ச்செ²ய்யுங் – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ச கோ² ஏதங், ப⁴ந்தே, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய, நிக்கங்கா² தே தத்த² நிப்³பி³சிகிச்சா² – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். மய்ஹஞ்ச கோ² ஏதங், ப⁴ந்தே, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய. நிக்கங்க²வாஹங் தத்த² நிப்³பி³சிகிச்சோ² ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி.
‘‘Na khvāhaṃ ettha, bhante, bhagavato saddhāya gacchāmi – saddhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Yesañhetaṃ, bhante, aññātaṃ assa adiṭṭhaṃ aviditaṃ asacchikataṃ aphassitaṃ 4 paññāya, te tattha paresaṃ saddhāya gaccheyyuṃ – saddhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Yesañca kho etaṃ, bhante, ñātaṃ diṭṭhaṃ viditaṃ sacchikataṃ phassitaṃ paññāya, nikkaṅkhā te tattha nibbicikicchā – saddhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Mayhañca kho etaṃ, bhante, ñātaṃ diṭṭhaṃ viditaṃ sacchikataṃ phassitaṃ paññāya. Nikkaṅkhavāhaṃ tattha nibbicikiccho saddhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosāna’’nti.
‘‘ஸாது⁴ ஸாது⁴, ஸாரிபுத்த! யேஸஞ்ஹேதங், ஸாரிபுத்த, அஞ்ஞாதங் அஸ்ஸ அதி³ட்ட²ங் அவிதி³தங் அஸச்சி²கதங் அப²ஸ்ஸிதங் பஞ்ஞாய, தே தத்த² பரேஸங் ஸத்³தா⁴ய க³ச்செ²ய்யுங் – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ச கோ² ஏதங், ஸாரிபுத்த, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய, நிக்கங்கா² தே தத்த² நிப்³பி³சிகிச்சா² – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி. சதுத்த²ங்.
‘‘Sādhu sādhu, sāriputta! Yesañhetaṃ, sāriputta, aññātaṃ assa adiṭṭhaṃ aviditaṃ asacchikataṃ aphassitaṃ paññāya, te tattha paresaṃ saddhāya gaccheyyuṃ – saddhindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Yesañca kho etaṃ, sāriputta, ñātaṃ diṭṭhaṃ viditaṃ sacchikataṃ phassitaṃ paññāya, nikkaṅkhā te tattha nibbicikicchā – saddhindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosāna’’nti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. புப்³ப³கொட்ட²கஸுத்தவண்ணனா • 4. Pubbakoṭṭhakasuttavaṇṇanā
