| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. পুব্বণ্হসুত্তৰণ্ণনা
10. Pubbaṇhasuttavaṇṇanā
১৫৬. দসমে সুনক্খত্তন্তিআদীসু যস্মিং দিৰসে তযো সুচরিতধম্মা পূরিতা হোন্তি, সো দিৰসো লদ্ধনক্খত্তযোগো নাম, তেনস্স সদা সুনক্খত্তং নাম হোতীতি ৰুচ্চতি। স্ৰেৰ দিৰসো কতমঙ্গলো নাম হোতি, তেনস্স সদা সুমঙ্গলন্তি ৰুচ্চতি। পভাতম্পিস্স সদা সুপ্পভাতমেৰ, সযনতো উট্ঠানম্পি সুহুট্ঠিতমেৰ, খণোপি সুক্খণোৰ, মুহুত্তোপি সুমুহুত্তোৰ। এত্থ চ দসচ্ছরপমাণো কালো খণো নাম, তেন খণেন দসক্খণো কালো লযো নাম, তেন লযেন চ দসলযো কালো খণলযো নাম, তেন দসগুণো মুহুত্তো নাম, তেন দসগুণো খণমুহুত্তো নামাতি অযং ৰিভাগো ৰেদিতব্বো। সুযিট্ঠং ব্রহ্মচারিসূতি যস্মিং দিৰসে তীণি সুচরিতানি পূরিতানি, তদাস্স সেট্ঠচারীসু দিন্নদানং সুযিট্ঠং নাম হোতি । পদক্খিণং কাযকম্মন্তি তং দিৰসং তেন কতং কাযকম্মং ৰড্ঢিকাযকম্মং নাম হোতি। সেসপদেসুপি এসেৰ নযো। পদক্খিণানি কত্ৰানাতি ৰড্ঢিযুত্তানি কাযকম্মাদীনি কত্ৰা। লভন্তত্থে পদক্খিণেতি পদক্খিণে ৰড্ঢিঅত্থেযেৰ লভতি। সেসং উত্তানমেৰাতি।
156. Dasame sunakkhattantiādīsu yasmiṃ divase tayo sucaritadhammā pūritā honti, so divaso laddhanakkhattayogo nāma, tenassa sadā sunakkhattaṃ nāma hotīti vuccati. Sveva divaso katamaṅgalo nāma hoti, tenassa sadā sumaṅgalanti vuccati. Pabhātampissa sadā suppabhātameva, sayanato uṭṭhānampi suhuṭṭhitameva, khaṇopi sukkhaṇova, muhuttopi sumuhuttova. Ettha ca dasaccharapamāṇo kālo khaṇo nāma, tena khaṇena dasakkhaṇo kālo layo nāma, tena layena ca dasalayo kālo khaṇalayo nāma, tena dasaguṇo muhutto nāma, tena dasaguṇo khaṇamuhutto nāmāti ayaṃ vibhāgo veditabbo. Suyiṭṭhaṃ brahmacārisūti yasmiṃ divase tīṇi sucaritāni pūritāni, tadāssa seṭṭhacārīsu dinnadānaṃ suyiṭṭhaṃ nāma hoti . Padakkhiṇaṃ kāyakammanti taṃ divasaṃ tena kataṃ kāyakammaṃ vaḍḍhikāyakammaṃ nāma hoti. Sesapadesupi eseva nayo. Padakkhiṇāni katvānāti vaḍḍhiyuttāni kāyakammādīni katvā. Labhantatthe padakkhiṇeti padakkhiṇe vaḍḍhiattheyeva labhati. Sesaṃ uttānamevāti.
মঙ্গলৰগ্গো পঞ্চমো।
Maṅgalavaggo pañcamo.
ততিযপণ্ণাসকং নিট্ঠিতং।
Tatiyapaṇṇāsakaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. পুব্বণ্হসুত্তং • 10. Pubbaṇhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১১-১৩. পঠমমোরনিৰাপসুত্তাদিৰণ্ণনা • 11-13. Paṭhamamoranivāpasuttādivaṇṇanā
