| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
8. புப்³ப³ந்தானுதி³ட்டி²னித்³தே³ஸவண்ணனா
8. Pubbantānudiṭṭhiniddesavaṇṇanā
141. புப்³ப³ந்தாபரந்தானுதி³ட்டீ²ஸு ஸஸ்ஸதங் வத³ந்தீதி ஸஸ்ஸதவாதா³. அத² வா வத³ந்தி ஏதேனாதி வாதோ³, தி³ட்டி²க³தஸ்ஸேதங் அதி⁴வசனங். ஸஸ்ஸதந்தி வாதோ³பி ஸஸ்ஸதயோகே³ன ஸஸ்ஸதோ, ஸஸ்ஸதோ வாதோ³ ஏதேஸந்தி ஸஸ்ஸதவாதா³. ததா² ஏகச்சங் ஸஸ்ஸதந்தி வாதோ³ ஏகச்சஸஸ்ஸதோ, ஸோ ஏதேஸங் அத்தீ²தி ஏகச்சஸஸ்ஸதிகா. ததா² அந்தவா, அனந்தவா, அந்தவா ச அனந்தவா ச, நேவந்தவா நானந்தவாதி பவத்தோ வாதோ³ அந்தானந்தோ, ஸோ ஏதேஸங் அத்தீ²தி அந்தானந்திகா. ந மரதீதி அமரா. கா ஸா? ‘‘ஏவம்பி மே நோ’’திஆதி³னா (தீ³॰ நி॰ 1.62-63) நயேன பரியந்தரஹிதஸ்ஸ தி³ட்டி²க³திகஸ்ஸ தி³ட்டி² சேவ வாசா ச. விவிதோ⁴ கே²போ விக்கே²போ, அமராய தி³ட்டி²யா, வாசாய வா விக்கே²போ அமராவிக்கே²போ, ஸோ ஏதேஸங் அத்தீ²தி அமராவிக்கே²பிகா. அபரோ நயோ – அமரா நாம மச்ச²ஜாதி , ஸா உம்முஜ்ஜனநிமுஜ்ஜனாதி³வஸேன உத³கே ஸந்தா⁴வமானா க³ஹேதுங் ந ஸக்கா ஹோதி, ஏவமேவங் அயம்பி வாதோ³ இதோ சிதோ ச ஸந்தா⁴வதி, கா³ஹங் ந உபக³ச்ச²தீதி அமராவிக்கே²போதி வுச்சதி, ஸோ ஏதேஸங் அத்தீ²தி அமராவிக்கே²பிகா. அதி⁴ச்சஸமுப்பன்னோதி அகாரணஸமுப்பன்னோ அத்தா ச லோகோ சாதி த³ஸ்ஸனங் அதி⁴ச்சஸமுப்பன்னங், தங் ஏதேஸங் அத்தீ²தி அதி⁴ச்சஸமுப்பன்னிகா.
141. Pubbantāparantānudiṭṭhīsu sassataṃ vadantīti sassatavādā. Atha vā vadanti etenāti vādo, diṭṭhigatassetaṃ adhivacanaṃ. Sassatanti vādopi sassatayogena sassato, sassato vādo etesanti sassatavādā. Tathā ekaccaṃ sassatanti vādo ekaccasassato, so etesaṃ atthīti ekaccasassatikā. Tathā antavā, anantavā, antavā ca anantavā ca, nevantavā nānantavāti pavatto vādo antānanto, so etesaṃ atthīti antānantikā. Na maratīti amarā. Kā sā? ‘‘Evampi me no’’tiādinā (dī. ni. 1.62-63) nayena pariyantarahitassa diṭṭhigatikassa diṭṭhi ceva vācā ca. Vividho khepo vikkhepo, amarāya diṭṭhiyā, vācāya vā vikkhepo amarāvikkhepo, so etesaṃ atthīti amarāvikkhepikā. Aparo nayo – amarā nāma macchajāti , sā ummujjananimujjanādivasena udake sandhāvamānā gahetuṃ na sakkā hoti, evamevaṃ ayampi vādo ito cito ca sandhāvati, gāhaṃ na upagacchatīti amarāvikkhepoti vuccati, so etesaṃ atthīti amarāvikkhepikā. Adhiccasamuppannoti akāraṇasamuppanno attā ca loko cāti dassanaṃ adhiccasamuppannaṃ, taṃ etesaṃ atthīti adhiccasamuppannikā.
புப்³ப³ந்தானுதி³ட்டி²னித்³தே³ஸவண்ணனா நிட்டி²தா.
Pubbantānudiṭṭhiniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 8. புப்³ப³ந்தானுதி³ட்டி²னித்³தே³ஸோ • 8. Pubbantānudiṭṭhiniddeso
