| Library / Tipiṭaka / තිපිටක • Tipiṭaka / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā |
8. පුබ්‌බන්‌තානුදිට්‌ඨිනිද්‌දෙසවණ්‌ණනා
8. Pubbantānudiṭṭhiniddesavaṇṇanā
141. පුබ්‌බන්‌තාපරන්‌තානුදිට්‌ඨීසු සස්‌සතං වදන්‌තීති සස්‌සතවාදා. අථ වා වදන්‌ති එතෙනාති වාදො, දිට්‌ඨිගතස්‌සෙතං අධිවචනං. සස්‌සතන්‌ති වාදොපි සස්‌සතයොගෙන සස්‌සතො, සස්‌සතො වාදො එතෙසන්‌ති සස්‌සතවාදා. තථා එකච්‌චං සස්‌සතන්‌ති වාදො එකච්‌චසස්‌සතො, සො එතෙසං අත්‌ථීති එකච්‌චසස්‌සතිකා. තථා අන්‌තවා, අනන්‌තවා, අන්‌තවා ච අනන්‌තවා ච, නෙවන්‌තවා නානන්‌තවාති පවත්‌තො වාදො අන්‌තානන්‌තො, සො එතෙසං අත්‌ථීති අන්‌තානන්‌තිකා. න මරතීති අමරා. කා සා? ‘‘එවම්‌පි මෙ නො’’තිආදිනා (දී. නි. 1.62-63) නයෙන පරියන්‌තරහිතස්‌ස දිට්‌ඨිගතිකස්‌ස දිට්‌ඨි චෙව වාචා ච. විවිධො ඛෙපො වික්‌ඛෙපො, අමරාය දිට්‌ඨියා, වාචාය වා වික්‌ඛෙපො අමරාවික්‌ඛෙපො, සො එතෙසං අත්‌ථීති අමරාවික්‌ඛෙපිකා. අපරො නයො – අමරා නාම මච්‌ඡජාති , සා උම්‌මුජ්‌ජනනිමුජ්‌ජනාදිවසෙන උදකෙ සන්‌ධාවමානා ගහෙතුං න සක්‌කා හොති, එවමෙවං අයම්‌පි වාදො ඉතො චිතො ච සන්‌ධාවති, ගාහං න උපගච්‌ඡතීති අමරාවික්‌ඛෙපොති වුච්‌චති, සො එතෙසං අත්‌ථීති අමරාවික්‌ඛෙපිකා. අධිච්‌චසමුප්‌පන්‌නොති අකාරණසමුප්‌පන්‌නො අත්‌තා ච ලොකො චාති දස්‌සනං අධිච්‌චසමුප්‌පන්‌නං, තං එතෙසං අත්‌ථීති අධිච්‌චසමුප්‌පන්‌නිකා.
141. Pubbantāparantānudiṭṭhīsu sassataṃ vadantīti sassatavādā. Atha vā vadanti etenāti vādo, diṭṭhigatassetaṃ adhivacanaṃ. Sassatanti vādopi sassatayogena sassato, sassato vādo etesanti sassatavādā. Tathā ekaccaṃ sassatanti vādo ekaccasassato, so etesaṃ atthīti ekaccasassatikā. Tathā antavā, anantavā, antavā ca anantavā ca, nevantavā nānantavāti pavatto vādo antānanto, so etesaṃ atthīti antānantikā. Na maratīti amarā. Kā sā? ‘‘Evampi me no’’tiādinā (dī. ni. 1.62-63) nayena pariyantarahitassa diṭṭhigatikassa diṭṭhi ceva vācā ca. Vividho khepo vikkhepo, amarāya diṭṭhiyā, vācāya vā vikkhepo amarāvikkhepo, so etesaṃ atthīti amarāvikkhepikā. Aparo nayo – amarā nāma macchajāti , sā ummujjananimujjanādivasena udake sandhāvamānā gahetuṃ na sakkā hoti, evamevaṃ ayampi vādo ito cito ca sandhāvati, gāhaṃ na upagacchatīti amarāvikkhepoti vuccati, so etesaṃ atthīti amarāvikkhepikā. Adhiccasamuppannoti akāraṇasamuppanno attā ca loko cāti dassanaṃ adhiccasamuppannaṃ, taṃ etesaṃ atthīti adhiccasamuppannikā.
පුබ්‌බන්‌තානුදිට්‌ඨිනිද්‌දෙසවණ්‌ණනා නිට්‌ඨිතා.
Pubbantānudiṭṭhiniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / පටිසම්‌භිදාමග්‌ගපාළි • Paṭisambhidāmaggapāḷi / 8. පුබ්‌බන්‌තානුදිට්‌ඨිනිද්‌දෙසො • 8. Pubbantānudiṭṭhiniddeso
