| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༤. པུབྦཔེཏཱདིསཔཉྷོ
4. Pubbapetādisapañho
༤. ‘‘བྷནྟེ ནཱགསེན, ཨིམེ དཱཡཀཱ དཱནཾ དཏྭཱ པུབྦཔེཏཱནཾ ཨཱདིསནྟི 1 ‘ཨིདཾ ཏེསཾ པཱཔུཎཱཏཱུ’ཏི, ཨཔི ནུ ཏེ ཀིཉྩི ཏཏོནིདཱནཾ ཝིཔཱཀཾ པཊིལབྷནྟཱི’’ཏི? ‘‘ཀེཙི, མཧཱརཱཛ, པཊིལབྷནྟི, ཀེཙི ནཔྤཊིལབྷནྟཱི’’ཏི། ‘‘ཀེ, བྷནྟེ, པཊིལབྷནྟི, ཀེ ནཔྤཊིལབྷནྟཱི’’ཏི? ‘‘ནིརཡཱུཔཔནྣཱ, མཧཱརཱཛ, ནཔྤཊིལབྷནྟི, སགྒགཏཱ ནཔྤཊིལབྷནྟི, ཏིརཙྪཱནཡོནིགཏཱ ནཔྤཊིལབྷནྟི, ཙཏུནྣཾ པེཏཱནཾ ཏཡོ པེཏཱ ནཔྤཊིལབྷནྟི ཝནྟཱསིཀཱ ཁུཔྤིཔཱསིནོ ནིཛ྄ཛྷཱམཏཎྷིཀཱ, ལབྷནྟི པེཏཱ པརདཏྟཱུཔཛཱིཝིནོ, ཏེཔི སརམཱནཱ ཡེཝ ལབྷནྟཱི’’ཏི།
4. ‘‘Bhante nāgasena, ime dāyakā dānaṃ datvā pubbapetānaṃ ādisanti 2 ‘idaṃ tesaṃ pāpuṇātū’ti, api nu te kiñci tatonidānaṃ vipākaṃ paṭilabhantī’’ti? ‘‘Keci, mahārāja, paṭilabhanti, keci nappaṭilabhantī’’ti. ‘‘Ke, bhante, paṭilabhanti, ke nappaṭilabhantī’’ti? ‘‘Nirayūpapannā, mahārāja, nappaṭilabhanti, saggagatā nappaṭilabhanti, tiracchānayonigatā nappaṭilabhanti, catunnaṃ petānaṃ tayo petā nappaṭilabhanti vantāsikā khuppipāsino nijjhāmataṇhikā, labhanti petā paradattūpajīvino, tepi saramānā yeva labhantī’’ti.
‘‘ཏེན ཧི, བྷནྟེ ནཱགསེན, དཱཡཀཱནཾ དཱནཾ ཝིསོསིཏཾ 3 ཧོཏི ཨཕལཾ, ཡེསཾ ཨུདྡིསྶ ཀཏཾ ཡདི ཏེ ནཔྤཊིལབྷནྟཱི’’ཏི? ‘‘ན ཧི ཏཾ, མཧཱརཱཛ, དཱནཾ ཨཕལཾ ཧོཏི ཨཝིཔཱཀཾ, དཱཡཀཱ ཡེཝ ཏསྶ ཕལཾ ཨནུབྷཝནྟཱི’’ཏི། ‘‘ཏེན ཧི, བྷནྟེ ནཱགསེན, ཀཱརཎེན མཾ སཉྙཱཔེཧཱི’’ཏི། ‘‘ཨིདྷ, མཧཱརཱཛ, ཀེཙི མནུསྶཱ མཙྪམཾསསུརཱབྷཏྟཁཛྫཀཱནི པཊིཡཱདེཏྭཱ ཉཱཏིཀུལཾ གཙྪནྟི, ཡདི ཏེ ཉཱཏཀཱ ཏཾ ཨུཔཱཡནཾ ན སམྤཊིཙྪེཡྻུཾ, ཨཔི ནུ ཏཾ ཨུཔཱཡནཾ ཝིསོསིཏཾ གཙྪེཡྻ ཝིནསྶེཡྻ ཝཱ’’ཏི? ‘‘ན ཧི, བྷནྟེ, སཱམིཀཱནཾ ཡེཝ ཏཾ ཧོཏཱི’’ཏི། ‘‘ཨེཝམེཝ ཁོ, མཧཱརཱཛ, དཱཡཀཱ ཡེཝ ཏསྶ ཕལཾ ཨནུབྷཝནྟི། ཡཐཱ པན , མཧཱརཱཛ, པུརིསོ གབྦྷཾ པཝིཊྛོ ཨསཏི པུརཏོ ནིཀྑམནམུཁེ ཀེན ནིཀྑམེཡྻཱ’’ཏི། ‘‘པཝིཊྛེནེཝ བྷནྟེ’’ཏི། ‘‘ཨེཝམེཝ ཁོ, མཧཱརཱཛ, དཱཡཀཱ ཡེཝ ཏསྶ ཕལཾ ཨནུབྷཝནྟཱི’’ཏི། ‘‘ཧོཏུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམི, དཱཡཀཱ ཡེཝ ཏསྶ ཕལཾ ཨནུབྷཝནྟི, ན མཡཾ ཏཾ ཀཱརཎཾ ཝིལོམེམཱཏི།
‘‘Tena hi, bhante nāgasena, dāyakānaṃ dānaṃ visositaṃ 4 hoti aphalaṃ, yesaṃ uddissa kataṃ yadi te nappaṭilabhantī’’ti? ‘‘Na hi taṃ, mahārāja, dānaṃ aphalaṃ hoti avipākaṃ, dāyakā yeva tassa phalaṃ anubhavantī’’ti. ‘‘Tena hi, bhante nāgasena, kāraṇena maṃ saññāpehī’’ti. ‘‘Idha, mahārāja, keci manussā macchamaṃsasurābhattakhajjakāni paṭiyādetvā ñātikulaṃ gacchanti, yadi te ñātakā taṃ upāyanaṃ na sampaṭiccheyyuṃ, api nu taṃ upāyanaṃ visositaṃ gaccheyya vinasseyya vā’’ti? ‘‘Na hi, bhante, sāmikānaṃ yeva taṃ hotī’’ti. ‘‘Evameva kho, mahārāja, dāyakā yeva tassa phalaṃ anubhavanti. Yathā pana , mahārāja, puriso gabbhaṃ paviṭṭho asati purato nikkhamanamukhe kena nikkhameyyā’’ti. ‘‘Paviṭṭheneva bhante’’ti. ‘‘Evameva kho, mahārāja, dāyakā yeva tassa phalaṃ anubhavantī’’ti. ‘‘Hotu, bhante nāgasena, evametaṃ tathā sampaṭicchāmi, dāyakā yeva tassa phalaṃ anubhavanti, na mayaṃ taṃ kāraṇaṃ vilomemāti.
‘‘བྷནྟེ ནཱགསེན, ཡདི ཨིམེསཾ དཱཡཀཱནཾ དིནྣདཱནཾ པུབྦཔེཏཱནཾ པཱཔུཎཱཏི, ཏེ ཙ ཏསྶ ཝིཔཱཀཾ ཨནུབྷཝནྟི། ཏེན ཧི ཡོ པཱཎཱཏིཔཱཏཱི ལུདྡོ ལོཧིཏཔཱཎཱི པདུཊྛམནསངྐཔྤོ མནུསྶེ གྷཱཏེཏྭཱ དཱརུཎཾ ཀམྨཾ ཀཏྭཱ པུབྦཔེཏཱནཾ ཨཱདིསེཡྻ ‘ཨིམསྶ མེ ཀམྨསྶ ཝིཔཱཀོ པུབྦཔེཏཱནཾ པཱཔུཎཱཏཱུ’ཏི, ཨཔི ནུ ཏསྶ ཝིཔཱཀོ པུབྦཔེཏཱནཾ པཱཔུཎཱཏཱི’’ཏི? ‘‘ན ཧི, མཧཱརཱཛཱ’’ཏི།
‘‘Bhante nāgasena, yadi imesaṃ dāyakānaṃ dinnadānaṃ pubbapetānaṃ pāpuṇāti, te ca tassa vipākaṃ anubhavanti. Tena hi yo pāṇātipātī luddo lohitapāṇī paduṭṭhamanasaṅkappo manusse ghātetvā dāruṇaṃ kammaṃ katvā pubbapetānaṃ ādiseyya ‘imassa me kammassa vipāko pubbapetānaṃ pāpuṇātū’ti, api nu tassa vipāko pubbapetānaṃ pāpuṇātī’’ti? ‘‘Na hi, mahārājā’’ti.
‘‘བྷནྟེ ནཱགསེན, ཀོ ཏཏྠ ཧེཏུ ཀིཾ ཀཱརཎཾ, ཡེན ཀུསལཾ པཱཔུཎཱཏི ཨཀུསལཾ ན པཱཔུཎཱཏཱི’’ཏི? ‘‘ནེསོ, མཧཱརཱཛ, པཉྷོ པུཙྪིཏབྦོ, མཱ ཙ ཏྭཾ, མཧཱརཱཛ, ‘ཝིསཛྫཀོ ཨཏྠཱི’ཏི ཨཔུཙྪིཏབྦཾ པུཙྪི, ‘ཀིསྶ ཨཱཀཱསོ ནིརཱལམྦོ, ཀིསྶ གངྒཱ ཨུདྡྷམྨུཁཱ ན སནྡཏི, ཀིསྶ ཨིམེ མནུསྶཱ ཙ དིཛཱ ཙ དྭིཔདཱ མིགཱ ཙཏུཔྤདཱ’ཏི ཏམྤི མཾ ཏྭཾ པུཙྪིསྶསཱི’’ཏི། ‘‘ནཱཧཾ ཏཾ, བྷནྟེ ནཱགསེན, ཝིཧེསཱཔེཀྑོ པུཙྪཱམི, ཨཔི ཙ ནིབྦཱཧནཏྠཱཡ 5 སནྡེཧསྶ པུཙྪཱམི, བཧཱུ མནུསྶཱ ལོཀེ ཝཱམགཱམིནོ 6 ཝིཙཀྑུཀཱ, ‘ཀིནྟི ཏེ ཨོཏཱརཾ ན ལབྷེཡྻུ’ནྟི ཨེཝཱཧཾ ཏཾ པུཙྪཱམཱི’’ཏི། ‘‘ན སཀྐཱ, མཧཱརཱཛ, སཧ ཨཀཏེན ཨནནུམཏེན སཧ པཱཔཾ ཀམྨཾ སཾཝིབྷཛིཏུཾ།
‘‘Bhante nāgasena, ko tattha hetu kiṃ kāraṇaṃ, yena kusalaṃ pāpuṇāti akusalaṃ na pāpuṇātī’’ti? ‘‘Neso, mahārāja, pañho pucchitabbo, mā ca tvaṃ, mahārāja, ‘visajjako atthī’ti apucchitabbaṃ pucchi, ‘kissa ākāso nirālambo, kissa gaṅgā uddhammukhā na sandati, kissa ime manussā ca dijā ca dvipadā migā catuppadā’ti tampi maṃ tvaṃ pucchissasī’’ti. ‘‘Nāhaṃ taṃ, bhante nāgasena, vihesāpekkho pucchāmi, api ca nibbāhanatthāya 7 sandehassa pucchāmi, bahū manussā loke vāmagāmino 8 vicakkhukā, ‘kinti te otāraṃ na labheyyu’nti evāhaṃ taṃ pucchāmī’’ti. ‘‘Na sakkā, mahārāja, saha akatena ananumatena saha pāpaṃ kammaṃ saṃvibhajituṃ.
‘‘ཡཐཱ, མཧཱརཱཛ, མནུསྶཱ ཨུདཀནིབྦཱཧནེན ཨུདཀཾ སུཝིདཱུརམྤི ཧརནྟི, ཨཔི ནུ, མཧཱརཱཛ, སཀྐཱ གྷནམཧཱསེལཔབྦཏོ 9 ནིབྦཱཧནེན ཡཐིཙྪིཏཾ ཧརིཏུ’’ནྟི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, སཀྐཱ ཀུསལཾ སཾཝིབྷཛིཏུཾ, ན སཀྐཱ ཨཀུསལཾ སཾཝིབྷཛིཏུཾ། ཡཐཱ ཝཱ པན, མཧཱརཱཛ, སཀྐཱ ཏེལེན པདཱིཔོ ཛཱལེཏུཾ, ཨཔི ནུ, མཧཱརཱཛ, སཀྐཱ ཨུདཀེན པདཱིཔོ ཛཱལེཏུ’’ནྟི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, སཀྐཱ ཀུསལཾ སཾཝིབྷཛིཏུཾ, ན སཀྐཱ ཨཀུསལཾ སཾཝིབྷཛིཏུཾ། ཡཐཱ ཝཱ པན, མཧཱརཱཛ, ཀསྶཀཱ ཏལཱ༹ཀཏོ ཨུདཀཾ ནཱིཧརིཏྭཱ དྷཉྙཾ པརིཔཱཙེནྟི, ཨཔི ནུ ཁོ, མཧཱརཱཛ, སཀྐཱ མཧཱསམུདྡཏོ ཨུདཀཾ ནཱིཧརིཏྭཱ དྷཉྙཾ པརིཔཱཙེཏུ’’ནྟི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, སཀྐཱ ཀུསལཾ སཾཝིབྷཛིཏུཾ, ན སཀྐཱ ཨཀུསལཾ སཾཝིབྷཛིཏུ’’ནྟི།
‘‘Yathā, mahārāja, manussā udakanibbāhanena udakaṃ suvidūrampi haranti, api nu, mahārāja, sakkā ghanamahāselapabbato 10 nibbāhanena yathicchitaṃ haritu’’nti? ‘‘Na hi, bhante’’ti. ‘‘Evameva kho, mahārāja, sakkā kusalaṃ saṃvibhajituṃ, na sakkā akusalaṃ saṃvibhajituṃ. Yathā vā pana, mahārāja, sakkā telena padīpo jāletuṃ, api nu, mahārāja, sakkā udakena padīpo jāletu’’nti? ‘‘Na hi, bhante’’ti. ‘‘Evameva kho, mahārāja, sakkā kusalaṃ saṃvibhajituṃ, na sakkā akusalaṃ saṃvibhajituṃ. Yathā vā pana, mahārāja, kassakā taḷākato udakaṃ nīharitvā dhaññaṃ paripācenti, api nu kho, mahārāja, sakkā mahāsamuddato udakaṃ nīharitvā dhaññaṃ paripācetu’’nti? ‘‘Na hi, bhante’’ti. ‘‘Evameva kho, mahārāja, sakkā kusalaṃ saṃvibhajituṃ, na sakkā akusalaṃ saṃvibhajitu’’nti.
‘‘བྷནྟེ ནཱགསེན, ཀེན ཀཱརཎེན སཀྐཱ ཀུསལཾ སཾཝིབྷཛིཏུཾ, ན སཀྐཱ ཨཀུསལཾ སཾཝིབྷཛིཏུཾ། ཀཱརཎེན མཾ སཉྙཱཔེཧི, ནཱཧཾ ཨནྡྷོ ཨནཱལོཀོ སུཏྭཱ ཝེདིསྶཱམཱི’’ཏི། ‘‘ཨཀུསལཾ, མཧཱརཱཛ, ཐོཀཾ, ཀུསལཾ བཧུཀཾ, ཐོཀཏྟཱ ཨཀུསལཾ ཀཏྟཱརཾ ཡེཝ པརིཡཱདིཡཏི, བཧུཀཏྟཱ ཀུསལཾ སདེཝཀཾ ལོཀཾ ཨཛ྄ཛྷོཏྠརཏཱི’’ཏི། ‘‘ཨོཔམྨཾ ཀརོཧཱི’’ཏི།
‘‘Bhante nāgasena, kena kāraṇena sakkā kusalaṃ saṃvibhajituṃ, na sakkā akusalaṃ saṃvibhajituṃ. Kāraṇena maṃ saññāpehi, nāhaṃ andho anāloko sutvā vedissāmī’’ti. ‘‘Akusalaṃ, mahārāja, thokaṃ, kusalaṃ bahukaṃ, thokattā akusalaṃ kattāraṃ yeva pariyādiyati, bahukattā kusalaṃ sadevakaṃ lokaṃ ajjhottharatī’’ti. ‘‘Opammaṃ karohī’’ti.
‘‘ཡཐཱ, མཧཱརཱཛ, པརིཏྟཾ ཨེཀཾ ཨུདཀབིནྡུ པཐཝིཡཾ ནིཔཏེཡྻ, ཨཔི ནུ ཁོ ཏཾ, མཧཱརཱཛ, ཨུདཀབིནྡུ དསཔི དྭཱདསཔི ཡོཛནཱནི ཨཛ྄ཛྷོཏྠརེཡྻཱ’’ཏི? ‘‘ན ཧི, བྷནྟེ, ཡཏྠ ཏཾ ཨུདཀབིནྡུ ནིཔཏིཏཾ, ཏཏྠེཝ པརིཡཱདིཡཏཱི’’ཏི། ‘‘ཀེན ཀཱརཎེན, མཧཱརཱཛཱ’’ཏི? ‘‘པརིཏྟཏྟཱ, བྷནྟེ, ཨུདཀབིནྡུསྶཱ’’ཏི། ‘‘ཨེཝམེཝ ཁོ, མཧཱརཱཛ, པརིཏྟཾ ཨཀུསལཾ པརིཏྟཏྟཱ ཀཏྟཱརཾ ཡེཝ པརིཡཱདིཡཏི, ན སཀྐཱ སཾཝིབྷཛིཏུཾ།
‘‘Yathā, mahārāja, parittaṃ ekaṃ udakabindu pathaviyaṃ nipateyya, api nu kho taṃ, mahārāja, udakabindu dasapi dvādasapi yojanāni ajjhotthareyyā’’ti? ‘‘Na hi, bhante, yattha taṃ udakabindu nipatitaṃ, tattheva pariyādiyatī’’ti. ‘‘Kena kāraṇena, mahārājā’’ti? ‘‘Parittattā, bhante, udakabindussā’’ti. ‘‘Evameva kho, mahārāja, parittaṃ akusalaṃ parittattā kattāraṃ yeva pariyādiyati, na sakkā saṃvibhajituṃ.
‘‘ཡཐཱ ཝཱ པན, མཧཱརཱཛ, མཧཏིམཧཱམེགྷོ ཨབྷིཝསྶེཡྻ ཏཔྤཡནྟོ དྷརཎིཏལཾ, ཨཔི ནུ ཁོ སོ, མཧཱརཱཛ, མཧཱམེགྷོ སམནྟཏོ ཨོཏྠརེཡྻཱ’’ཏི། ‘‘ཨཱམ, བྷནྟེ, པཱུརཡིཏྭཱ སོ མཧཱམེགྷོ སོབྦྷསར སརིཏསཱཁཱཀནྡརཔདརདཧཏལཱ༹ཀ 11 ཨུདཔཱནཔོཀྑརཎིཡོ དསཔི དྭཱདསཔི ཡོཛནཱནི ཨཛ྄ཛྷོཏྠརེཡྻཱ’’ཏི། ‘‘ཀེན ཀཱརཎེན, མཧཱརཱཛཱ’’ཏི? ‘‘མཧནྟཏྟཱ, བྷནྟེ, མེགྷསྶཱ’’ཏི། ‘‘ཨེཝམེཝ ཁོ, མཧཱརཱཛ, ཀུསལཾ བཧུཀཾ, བཧུཀཏྟཱ སཀྐཱ དེཝམནུསྶེཧིཔི སཾཝིབྷཛིཏུ’’ནྟི།
‘‘Yathā vā pana, mahārāja, mahatimahāmegho abhivasseyya tappayanto dharaṇitalaṃ, api nu kho so, mahārāja, mahāmegho samantato otthareyyā’’ti. ‘‘Āma, bhante, pūrayitvā so mahāmegho sobbhasara saritasākhākandarapadaradahataḷāka 12 udapānapokkharaṇiyo dasapi dvādasapi yojanāni ajjhotthareyyā’’ti. ‘‘Kena kāraṇena, mahārājā’’ti? ‘‘Mahantattā, bhante, meghassā’’ti. ‘‘Evameva kho, mahārāja, kusalaṃ bahukaṃ, bahukattā sakkā devamanussehipi saṃvibhajitu’’nti.
‘‘བྷནྟེ ནཱགསེན, ཀེན ཀཱརཎེན ཨཀུསལཾ ཐོཀཾ ཀུསལཾ བཧུཏར’’ནྟི? ‘‘ཨིདྷ, མཧཱརཱཛ, ཡོ ཀོཙི དཱནཾ དེཏི, སཱིལཾ སམཱདིཡཏི, ཨུཔོསཐཀམྨཾ ཀརོཏི, སོ ཧཊྛོ པཧཊྛོ ཧསིཏོ པམུདིཏོ པསནྣམཱནསོ ཝེདཛཱཏོ ཧོཏི, ཏསྶ ཨཔརཱཔརཾ པཱིཏི ཨུཔྤཛྫཏི, པཱིཏིམནསྶ བྷིཡྻོ བྷིཡྻོ ཀུསལཾ པཝཌྜྷཏི།
‘‘Bhante nāgasena, kena kāraṇena akusalaṃ thokaṃ kusalaṃ bahutara’’nti? ‘‘Idha, mahārāja, yo koci dānaṃ deti, sīlaṃ samādiyati, uposathakammaṃ karoti, so haṭṭho pahaṭṭho hasito pamudito pasannamānaso vedajāto hoti, tassa aparāparaṃ pīti uppajjati, pītimanassa bhiyyo bhiyyo kusalaṃ pavaḍḍhati.
‘‘ཡཐཱ, མཧཱརཱཛ, ཨུདཔཱནེ བཧུསལིལསམྤུཎྞེ ཨེཀེན དེསེན ཨུདཀཾ པཝིསེཡྻ, ཨེཀེན ནིཀྑམེཡྻ, ནིཀྑམནྟེཔི ཨཔརཱཔརཾ ཨུཔྤཛྫཏི, ན སཀྐཱ ཧོཏི ཁཡཾ པཱཔེཏུཾ། ཨེཝམེཝ ཁོ , མཧཱརཱཛ, ཀུསལཾ བྷིཡྻོ བྷིཡྻོ པཝཌྜྷཏི། ཝསྶསཏེཔི ཙེ, མཧཱརཱཛ, པུརིསོ ཀཏཾ ཀུསལཾ ཨཱཝཛྫེཡྻ, ཨཱཝཛྫིཏེ ཨཱཝཛྫིཏེ བྷིཡྻོ བྷིཡྻོ ཀུསལཾ པཝཌྜྷཏི། ཏསྶ ཏཾ ཀུསལཾ སཀྐཱ ཧོཏི ཡཐིཙྪཀེཧི སདྡྷིཾ སཾཝིབྷཛིཏུཾ, ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན ཀུསལཾ བཧུཏརཾ།
‘‘Yathā, mahārāja, udapāne bahusalilasampuṇṇe ekena desena udakaṃ paviseyya, ekena nikkhameyya, nikkhamantepi aparāparaṃ uppajjati, na sakkā hoti khayaṃ pāpetuṃ. Evameva kho , mahārāja, kusalaṃ bhiyyo bhiyyo pavaḍḍhati. Vassasatepi ce, mahārāja, puriso kataṃ kusalaṃ āvajjeyya, āvajjite āvajjite bhiyyo bhiyyo kusalaṃ pavaḍḍhati. Tassa taṃ kusalaṃ sakkā hoti yathicchakehi saddhiṃ saṃvibhajituṃ, idamettha, mahārāja, kāraṇaṃ, yena kāraṇena kusalaṃ bahutaraṃ.
‘‘ཨཀུསལཾ པན, མཧཱརཱཛ, ཀརོནྟོ པཙྪཱ ཝིཔྤཊིསཱརཱི ཧོཏི, ཝིཔྤཊིསཱརིནོ ཙིཏྟཾ པཊིལཱིཡཏི པཊིཀུཊཏི པཊིཝཏྟཏི ན སམྤསཱརཱིཡཏི སོཙཏི ཏཔྤཏི ཧཱཡཏི ཁཱིཡཏི ན པརིཝཌྜྷཏི ཏཏྠེཝ པརིཡཱདིཡཏི། ཡཐཱ, མཧཱརཱཛ, སུཀྑཱཡ ནདིཡཱ མཧཱཔུལི༹ནཱཡ ཨུནྣཏཱཝནཏཱཡ ཀུཊིལསངྐུཊིལཱཡ ཨུཔརིཏོ པརིཏྟཾ ཨུདཀཾ ཨཱགཙྪནྟཾ ཧཱཡཏི ཁཱིཡཏི ན པརིཝཌྜྷཏི ཏཏྠེཝ པརིཡཱདིཡཏི། ཨེཝམེཝ ཁོ, མཧཱརཱཛ, ཨཀུསལཾ ཀརོནྟསྶ ཙིཏྟཾ པཊིལཱིཡཏི པཊིཀུཊཏི པཊིཝཏྟཏི ན སམྤསཱརཱིཡཏི སོཙཏི ཏཔྤཏི ཧཱཡཏི ཁཱིཡཏི ན པརིཝཌྜྷཏི ཏཏྠེཝ པརིཡཱདིཡཏི, ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན ཨཀུསལཾ ཐོཀ’’ནྟི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Akusalaṃ pana, mahārāja, karonto pacchā vippaṭisārī hoti, vippaṭisārino cittaṃ paṭilīyati paṭikuṭati paṭivattati na sampasārīyati socati tappati hāyati khīyati na parivaḍḍhati tattheva pariyādiyati. Yathā, mahārāja, sukkhāya nadiyā mahāpuḷināya unnatāvanatāya kuṭilasaṅkuṭilāya uparito parittaṃ udakaṃ āgacchantaṃ hāyati khīyati na parivaḍḍhati tattheva pariyādiyati. Evameva kho, mahārāja, akusalaṃ karontassa cittaṃ paṭilīyati paṭikuṭati paṭivattati na sampasārīyati socati tappati hāyati khīyati na parivaḍḍhati tattheva pariyādiyati, idamettha, mahārāja, kāraṇaṃ, yena kāraṇena akusalaṃ thoka’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
པུབྦཔེཏཱདིསཔཉྷོ ཙཏུཏྠོ།
Pubbapetādisapañho catuttho.
Footnotes:
