| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
পুব্বেনিৰাসকথা
Pubbenivāsakathā
১২. ইতি ইমানি চত্তারি ঝানানি কেসঞ্চি চিত্তেকগ্গতত্থানি হোন্তি, কেসঞ্চি ৰিপস্সনাপাদকানি, কেসঞ্চি অভিঞ্ঞাপাদকানি, কেসঞ্চি নিরোধপাদকানি, কেসঞ্চি ভৰোক্কমনত্থানি। তত্থ খীণাসৰানং চিত্তেকগ্গতত্থানি হোন্তি, তে হি সমাপজ্জিত্ৰা ‘‘একগ্গচিত্তা সুখং দিৰসং ৰিহরিস্সামা’’তি ইচ্চেৰং কসিণপরিকম্মং কত্ৰা অট্ঠ সমাপত্তিযো নিব্বত্তেন্তি। সেক্খপুথুজ্জনানং ‘‘সমাপত্তিতো ৰুট্ঠায সমাহিতেন চিত্তেন ৰিপস্সিস্সামা’’তি নিব্বত্তেন্তানং ৰিপস্সনাপাদকানি হোন্তি। যে পন অট্ঠ সমাপত্তিযো নিব্বত্তেত্ৰা অভিঞ্ঞাপাদকং ঝানং সমাপজ্জিত্ৰা সমাপত্তিতো ৰুট্ঠায ‘‘একোপি হুত্ৰা বহুধা হোতী’’তি ৰুত্তনযা অভিঞ্ঞাযো পত্থেন্তা নিব্বত্তেন্তি, তেসং অভিঞ্ঞাপাদকানি হোন্তি। যে পন অট্ঠ সমাপত্তিযো নিব্বত্তেত্ৰা ‘‘নিরোধসমাপত্তিং সমাপজ্জিত্ৰা সত্তাহং অচিত্তকা হুত্ৰা দিট্ঠেৰ ধম্মে নিরোধং নিব্বানং পত্ৰা সুখং ৰিহরিস্সামা’’তি নিব্বত্তেন্তি, তেসং নিরোধপাদকানি হোন্তি। যে পন অট্ঠ সমাপত্তিযো নিব্বত্তেত্ৰা ‘‘অপরিহীনজ্ঝানা হুত্ৰা ব্রহ্মলোকে উপ্পজ্জিস্সামা’’তি নিব্বত্তেন্তি, তেসং ভৰোক্কমনত্থানি হোন্তি।
12. Iti imāni cattāri jhānāni kesañci cittekaggatatthāni honti, kesañci vipassanāpādakāni, kesañci abhiññāpādakāni, kesañci nirodhapādakāni, kesañci bhavokkamanatthāni. Tattha khīṇāsavānaṃ cittekaggatatthāni honti, te hi samāpajjitvā ‘‘ekaggacittā sukhaṃ divasaṃ viharissāmā’’ti iccevaṃ kasiṇaparikammaṃ katvā aṭṭha samāpattiyo nibbattenti. Sekkhaputhujjanānaṃ ‘‘samāpattito vuṭṭhāya samāhitena cittena vipassissāmā’’ti nibbattentānaṃ vipassanāpādakāni honti. Ye pana aṭṭha samāpattiyo nibbattetvā abhiññāpādakaṃ jhānaṃ samāpajjitvā samāpattito vuṭṭhāya ‘‘ekopi hutvā bahudhā hotī’’ti vuttanayā abhiññāyo patthentā nibbattenti, tesaṃ abhiññāpādakāni honti. Ye pana aṭṭha samāpattiyo nibbattetvā ‘‘nirodhasamāpattiṃ samāpajjitvā sattāhaṃ acittakā hutvā diṭṭheva dhamme nirodhaṃ nibbānaṃ patvā sukhaṃ viharissāmā’’ti nibbattenti, tesaṃ nirodhapādakāni honti. Ye pana aṭṭha samāpattiyo nibbattetvā ‘‘aparihīnajjhānā hutvā brahmaloke uppajjissāmā’’ti nibbattenti, tesaṃ bhavokkamanatthāni honti.
ভগৰতা পনিদং চতুত্থজ্ঝানং বোধিরুক্খমূলে নিব্বত্তিতং, তং তস্স ৰিপস্সনাপাদকঞ্চেৰ অহোসি অভিঞ্ঞাপাদকঞ্চ নিরোধপাদকঞ্চ সব্বকিচ্চসাধকঞ্চ সব্বলোকিযলোকুত্তরগুণদাযকন্তি ৰেদিতব্বং। যেসঞ্চ গুণানং দাযকং অহোসি, তেসং একদেসং দস্সেন্তো ‘‘সো এৰং সমাহিতে চিত্তে’’তিআদিমাহ।
Bhagavatā panidaṃ catutthajjhānaṃ bodhirukkhamūle nibbattitaṃ, taṃ tassa vipassanāpādakañceva ahosi abhiññāpādakañca nirodhapādakañca sabbakiccasādhakañca sabbalokiyalokuttaraguṇadāyakanti veditabbaṃ. Yesañca guṇānaṃ dāyakaṃ ahosi, tesaṃ ekadesaṃ dassento ‘‘so evaṃ samāhite citte’’tiādimāha.
তত্থ সোতি সো অহং। এৰন্তি চতুত্থজ্ঝানক্কমনিদস্সনমেতং। ইমিনা কমেন চতুত্থজ্ঝানং পটিলভিত্ৰাতি ৰুত্তং হোতি। সমাহিতেতি ইমিনা চতুত্থজ্ঝানসমাধিনা সমাহিতে। পরিসুদ্ধেতিআদীসু পন উপেক্খাসতিপারিসুদ্ধিভাৰেন পরিসুদ্ধে। পরিসুদ্ধত্তাযেৰ পরিযোদাতে, পভস্সরেতি ৰুত্তং হোতি। সুখাদীনং পচ্চযানং ঘাতেন ৰিহতরাগাদিঅঙ্গণত্তা অনঙ্গণে। অনঙ্গণত্তাযেৰ চ ৰিগতূপক্কিলেসে; অঙ্গণেন হি চিত্তং উপক্কিলিস্সতি। সুভাৰিতত্তা মুদুভূতে, ৰসীভাৰপ্পত্তেতি ৰুত্তং হোতি। ৰসে ৰত্তমানঞ্হি চিত্তং মুদূতি ৰুচ্চতি। মুদুত্তাযেৰ চ কম্মনিযে, কম্মক্খমে কম্মযোগ্গেতি ৰুত্তং হোতি। মুদু হি চিত্তং কম্মনিযং হোতি সুধন্তমিৰ সুৰণ্ণং, তদুভযম্পি চ সুভাৰিতত্তা এৰ। যথাহ – ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং ভাৰিতং বহুলীকতং মুদু চ হোতি কম্মনিযঞ্চ, যথযিদং, ভিক্খৰে, চিত্ত’’ন্তি (অ॰ নি॰ ১.২২)।
Tattha soti so ahaṃ. Evanti catutthajjhānakkamanidassanametaṃ. Iminā kamena catutthajjhānaṃ paṭilabhitvāti vuttaṃ hoti. Samāhiteti iminā catutthajjhānasamādhinā samāhite. Parisuddhetiādīsu pana upekkhāsatipārisuddhibhāvena parisuddhe. Parisuddhattāyeva pariyodāte, pabhassareti vuttaṃ hoti. Sukhādīnaṃ paccayānaṃ ghātena vihatarāgādiaṅgaṇattā anaṅgaṇe. Anaṅgaṇattāyeva ca vigatūpakkilese; aṅgaṇena hi cittaṃ upakkilissati. Subhāvitattā mudubhūte, vasībhāvappatteti vuttaṃ hoti. Vase vattamānañhi cittaṃ mudūti vuccati. Muduttāyeva ca kammaniye, kammakkhame kammayoggeti vuttaṃ hoti. Mudu hi cittaṃ kammaniyaṃ hoti sudhantamiva suvaṇṇaṃ, tadubhayampi ca subhāvitattā eva. Yathāha – ‘‘nāhaṃ, bhikkhave, aññaṃ ekadhammampi samanupassāmi, yaṃ evaṃ bhāvitaṃ bahulīkataṃ mudu ca hoti kammaniyañca, yathayidaṃ, bhikkhave, citta’’nti (a. ni. 1.22).
এতেসু পরিসুদ্ধভাৰাদীসু ঠিতত্তা ঠিতে। ঠিতত্তাযেৰ আনেঞ্জপ্পত্তে, অচলে নিরিঞ্জনেতি ৰুত্তং হোতি। মুদুকম্মঞ্ঞভাৰেন ৰা অত্তনো ৰসে ঠিতত্তা ঠিতে, সদ্ধাদীহি পরিগ্গহিতত্তা আনেঞ্জপ্পত্তে। সদ্ধাপরিগ্গহিতঞ্হি চিত্তং অস্সদ্ধিযেন ন ইঞ্জতি, ৰীরিযপরিগ্গহিতং কোসজ্জেন ন ইঞ্জতি, সতিপরিগ্গহিতং পমাদেন ন ইঞ্জতি, সমাধিপরিগ্গহিতং উদ্ধচ্চেন ন ইঞ্জতি, পঞ্ঞাপরিগ্গহিতং অৰিজ্জায ন ইঞ্জতি, ওভাসগতং কিলেসন্ধকারেন ন ইঞ্জতি। ইমেহি ছহি ধম্মেহি পরিগ্গহিতং আনেঞ্জপ্পত্তং চিত্তং হোতি। এৰং অট্ঠঙ্গসমন্নাগতং চিত্তং অভিনীহারক্খমং হোতি অভিঞ্ঞাসচ্ছিকরণীযানং ধম্মানং অভিঞ্ঞাসচ্ছিকিরিযায।
Etesu parisuddhabhāvādīsu ṭhitattā ṭhite. Ṭhitattāyeva āneñjappatte, acale niriñjaneti vuttaṃ hoti. Mudukammaññabhāvena vā attano vase ṭhitattā ṭhite, saddhādīhi pariggahitattā āneñjappatte. Saddhāpariggahitañhi cittaṃ assaddhiyena na iñjati, vīriyapariggahitaṃ kosajjena na iñjati, satipariggahitaṃ pamādena na iñjati, samādhipariggahitaṃ uddhaccena na iñjati, paññāpariggahitaṃ avijjāya na iñjati, obhāsagataṃ kilesandhakārena na iñjati. Imehi chahi dhammehi pariggahitaṃ āneñjappattaṃ cittaṃ hoti. Evaṃ aṭṭhaṅgasamannāgataṃ cittaṃ abhinīhārakkhamaṃ hoti abhiññāsacchikaraṇīyānaṃ dhammānaṃ abhiññāsacchikiriyāya.
অপরো নযো – চতুত্থজ্ঝানসমাধিনা সমাহিতে। নীৰরণদূরীভাৰেন পরিসুদ্ধে। ৰিতক্কাদিসমতিক্কমেন পরিযোদাতে। ঝানপ্পটিলাভপচ্চযানং পাপকানং ইচ্ছাৰচরানং অভাৰেন অনঙ্গণে। অভিজ্ঝাদীনং চিত্তূপক্কিলেসানং ৰিগমেন ৰিগতূপক্কিলেসে। উভযম্পি চেতং অনঙ্গণৰত্থসুত্তানুসারেন (ম॰ নি॰ ১.৫৭ আদযো) ৰেদিতব্বং। ৰসিপ্পত্তিযা মুদুভূতে। ইদ্ধিপাদভাৰূপগমেন কম্মনিযে। ভাৰনাপারিপূরিযা পণীতভাৰূপগমেন ঠিতে আনেঞ্জপ্পত্তে । যথা আনেঞ্জপ্পত্তং হোতি; এৰং ঠিতেতি অত্থো। এৰম্পি অট্ঠঙ্গসমন্নাগতং চিত্তং অভিনীহারক্খমং হোতি অভিঞ্ঞাসচ্ছিকরণীযানং ধম্মানং অভিঞ্ঞাসচ্ছিকিরিযায, পাদকং পদট্ঠানভূতন্তি অত্থো।
Aparo nayo – catutthajjhānasamādhinā samāhite. Nīvaraṇadūrībhāvena parisuddhe. Vitakkādisamatikkamena pariyodāte. Jhānappaṭilābhapaccayānaṃ pāpakānaṃ icchāvacarānaṃ abhāvena anaṅgaṇe. Abhijjhādīnaṃ cittūpakkilesānaṃ vigamena vigatūpakkilese. Ubhayampi cetaṃ anaṅgaṇavatthasuttānusārena (ma. ni. 1.57 ādayo) veditabbaṃ. Vasippattiyā mudubhūte. Iddhipādabhāvūpagamena kammaniye. Bhāvanāpāripūriyā paṇītabhāvūpagamena ṭhiteāneñjappatte. Yathā āneñjappattaṃ hoti; evaṃ ṭhiteti attho. Evampi aṭṭhaṅgasamannāgataṃ cittaṃ abhinīhārakkhamaṃ hoti abhiññāsacchikaraṇīyānaṃ dhammānaṃ abhiññāsacchikiriyāya, pādakaṃ padaṭṭhānabhūtanti attho.
পুব্বেনিৰাসানুস্সতিঞাণাযাতি এৰং অভিঞ্ঞাপাদকে জাতে এতস্মিং চিত্তে পুব্বেনিৰাসানুস্সতিম্হি যং ঞাণং তদত্থায। তত্থ পুব্বেনিৰাসোতি পুব্বে অতীতজাতীসু নিৰুত্থক্খন্ধা। নিৰুত্থাতি অজ্ঝাৰুত্থা অনুভূতা অত্তনো সন্তানে উপ্পজ্জিত্ৰা নিরুদ্ধা নিৰুত্থধম্মা ৰা নিৰুত্থা, গোচরনিৰাসেন নিৰুত্থা, অত্তনো ৰিঞ্ঞাণেন ৰিঞ্ঞাতা পরিচ্ছিন্না, পরৰিঞ্ঞাণৰিঞ্ঞাতাপি ৰা ছিন্নৰটুমকানুস্সরণাদীসু। পুব্বেনিৰাসানুস্সতীতি যায সতিযা পুব্বেনিৰাসং অনুস্সরতি, সা পুব্বেনিৰাসানুস্সতি। ঞাণন্তি তায সতিযা সম্পযুত্তঞাণং। এৰমিমস্স পুব্বেনিৰাসানুস্সতিঞাণস্স অত্থায পুব্বেনিৰাসানুস্সতিঞাণায এতস্স ঞাণস্স অধিগমায পত্তিযাতি ৰুত্তং হোতি। অভিনিন্নামেসিন্তি অভিনীহরিং।
Pubbenivāsānussatiñāṇāyāti evaṃ abhiññāpādake jāte etasmiṃ citte pubbenivāsānussatimhi yaṃ ñāṇaṃ tadatthāya. Tattha pubbenivāsoti pubbe atītajātīsu nivutthakkhandhā. Nivutthāti ajjhāvutthā anubhūtā attano santāne uppajjitvā niruddhā nivutthadhammā vā nivutthā, gocaranivāsena nivutthā, attano viññāṇena viññātā paricchinnā, paraviññāṇaviññātāpi vā chinnavaṭumakānussaraṇādīsu. Pubbenivāsānussatīti yāya satiyā pubbenivāsaṃ anussarati, sā pubbenivāsānussati. Ñāṇanti tāya satiyā sampayuttañāṇaṃ. Evamimassa pubbenivāsānussatiñāṇassa atthāya pubbenivāsānussatiñāṇāya etassa ñāṇassa adhigamāya pattiyāti vuttaṃ hoti. Abhininnāmesinti abhinīhariṃ.
সোতি সো অহং। অনেকৰিহিতন্তি অনেকৰিধং, অনেকেহি ৰা পকারেহি পৰত্তিতং সংৰণ্ণিতন্তি অত্থো। পুব্বেনিৰাসন্তি সমনন্তরাতীতং ভৰং আদিং কত্ৰা তত্থ তত্থ নিৰুত্থসন্তানং। অনুস্সরামীতি ‘‘একম্পি জাতিং দ্ৰেপি জাতিযো’’তি এৰং জাতিপটিপাটিযা অনুগন্ত্ৰা অনুগন্ত্ৰা সরামি, অনুদেৰ ৰা সরামি, চিত্তে অভিনিন্নামিতমত্তে এৰ সরামীতি দস্সেতি। পূরিতপারমীনঞ্হি মহাপুরিসানং পরিকম্মকরণং নত্থি, তেন তে চিত্তং অভিনিন্নামেত্ৰাৰ সরন্তি। আদিকম্মিককুলপুত্তা পন পরিকম্মং কত্ৰাৰ সরন্তি, তস্মা তেসং ৰসেন পরিকম্মং ৰত্তব্বং সিযা। তং পন ৰুচ্চমানং অতিভারিযং ৰিনযনিদানং করোতি, তস্মা তং ন ৰদাম। অত্থিকেহি পন ৰিসুদ্ধিমগ্গে (ৰিসুদ্ধি॰ ২.৪০২ আদযো) ৰুত্তনযেনেৰ গহেতব্বং। ইধ পন পাল়িমেৰ ৰণ্ণযিস্সাম।
Soti so ahaṃ. Anekavihitanti anekavidhaṃ, anekehi vā pakārehi pavattitaṃ saṃvaṇṇitanti attho. Pubbenivāsanti samanantarātītaṃ bhavaṃ ādiṃ katvā tattha tattha nivutthasantānaṃ. Anussarāmīti ‘‘ekampi jātiṃ dvepi jātiyo’’ti evaṃ jātipaṭipāṭiyā anugantvā anugantvā sarāmi, anudeva vā sarāmi, citte abhininnāmitamatte eva sarāmīti dasseti. Pūritapāramīnañhi mahāpurisānaṃ parikammakaraṇaṃ natthi, tena te cittaṃ abhininnāmetvāva saranti. Ādikammikakulaputtā pana parikammaṃ katvāva saranti, tasmā tesaṃ vasena parikammaṃ vattabbaṃ siyā. Taṃ pana vuccamānaṃ atibhāriyaṃ vinayanidānaṃ karoti, tasmā taṃ na vadāma. Atthikehi pana visuddhimagge (visuddhi. 2.402 ādayo) vuttanayeneva gahetabbaṃ. Idha pana pāḷimeva vaṇṇayissāma.
সেয্যথিদন্তি আরদ্ধপ্পকারদস্সনত্থে নিপাতো। তেনেৰ য্ৰাযং পুব্বেনিৰাসো আরদ্ধো, তস্স পকারপ্পভেদং দস্সেন্তো একম্পি জাতিন্তিআদিমাহ। তত্থ একম্পি জাতিন্তি একম্পি পটিসন্ধিমূলং চুতিপরিযোসানং একভৰপরিযাপন্নং খন্ধসন্তানং। এস নযো দ্ৰেপি জাতিযোতিআদীসু। অনেকেপি সংৰট্টকপ্পেতিআদীসু পন পরিহাযমানো কপ্পো সংৰট্টকপ্পো, ৰড্ঢমানো ৰিৰট্টকপ্পোতি ৰেদিতব্বো। তত্থ চ সংৰট্টেন সংৰট্টট্ঠাযী গহিতো হোতি তম্মূলকত্তা। ৰিৰট্টেন চ ৰিৰট্টট্ঠাযী। এৰঞ্হি সতি যানি তানি ‘‘চত্তারিমানি, ভিক্খৰে, কপ্পস্স অসঙ্খ্যেয্যানি । কতমানি চত্তারি? সংৰট্টো সংৰট্টট্ঠাযী, ৰিৰট্টো ৰিৰট্টট্ঠাযী’’তি ৰুত্তানি তানি সব্বানি পরিগ্গহিতানি হোন্তি।
Seyyathidanti āraddhappakāradassanatthe nipāto. Teneva yvāyaṃ pubbenivāso āraddho, tassa pakārappabhedaṃ dassento ekampi jātintiādimāha. Tattha ekampi jātinti ekampi paṭisandhimūlaṃ cutipariyosānaṃ ekabhavapariyāpannaṃ khandhasantānaṃ. Esa nayo dvepi jātiyotiādīsu. Anekepi saṃvaṭṭakappetiādīsu pana parihāyamāno kappo saṃvaṭṭakappo, vaḍḍhamāno vivaṭṭakappoti veditabbo. Tattha ca saṃvaṭṭena saṃvaṭṭaṭṭhāyī gahito hoti tammūlakattā. Vivaṭṭena ca vivaṭṭaṭṭhāyī. Evañhi sati yāni tāni ‘‘cattārimāni, bhikkhave, kappassa asaṅkhyeyyāni . Katamāni cattāri? Saṃvaṭṭo saṃvaṭṭaṭṭhāyī, vivaṭṭo vivaṭṭaṭṭhāyī’’ti vuttāni tāni sabbāni pariggahitāni honti.
তত্থ তযো সংৰট্টা – তেজোসংৰট্টো, আপোসংৰট্টো, ৰাযোসংৰট্টোতি। তিস্সো সংৰট্টসীমা – আভস্সরা, সুভকিণ্হা, ৰেহপ্ফলাতি। যদা কপ্পো তেজেন সংৰট্টতি, আভস্সরতো হেট্ঠা অগ্গিনা ডয্হতি। যদা উদকেন সংৰট্টতি, সুভকিণ্হতো হেট্ঠা উদকেন ৰিলীযতি। যদা ৰাতেন সংৰট্টতি, ৰেহপ্ফলতো হেট্ঠা ৰাতেন ৰিদ্ধংসিযতি। ৰিত্থারতো পন সদাপি একং বুদ্ধক্খেত্তং ৰিনস্সতি।
Tattha tayo saṃvaṭṭā – tejosaṃvaṭṭo, āposaṃvaṭṭo, vāyosaṃvaṭṭoti. Tisso saṃvaṭṭasīmā – ābhassarā, subhakiṇhā, vehapphalāti. Yadā kappo tejena saṃvaṭṭati, ābhassarato heṭṭhā agginā ḍayhati. Yadā udakena saṃvaṭṭati, subhakiṇhato heṭṭhā udakena vilīyati. Yadā vātena saṃvaṭṭati, vehapphalato heṭṭhā vātena viddhaṃsiyati. Vitthārato pana sadāpi ekaṃ buddhakkhettaṃ vinassati.
বুদ্ধক্খেত্তং নাম তিৰিধং হোতি – জাতিক্খেত্তং, আণাক্খেত্তং, ৰিসযক্খেত্তঞ্চ। তত্থ জাতিক্খেত্তং দসসহস্সচক্কৰাল়পরিযন্তং হোতি, যং তথাগতস্স পটিসন্ধিআদীসু কম্পতি। আণাক্খেত্তং কোটিসতসহস্সচক্কৰাল়পরিযন্তং হোতি। যত্থ রতনপরিত্তং, খন্ধপরিত্তং, ধজগ্গপরিত্তং, আটানাটিযপরিত্তং, মোরপরিত্তন্তি ইমেসং পরিত্তানং আনুভাৰো পৰত্ততি। ৰিসযক্খেত্তং পন অনন্তং অপরিমাণং, ‘‘যং যাৰতা ৰা পন আকঙ্খেয্যা’’তি (অ॰ নি॰ ৩.৮১) ৰুত্তং যত্থ যং যং আকঙ্খতি তং তং অনুস্সরতি। এৰমেতেসু তীসু বুদ্ধক্খেত্তেসু একং আণাক্খেত্তং ৰিনস্সতি। তস্মিং পন ৰিনস্সন্তে জাতিক্খেত্তম্পি ৰিনট্ঠমেৰ হোতি; ৰিনস্সন্তঞ্চ একতোৰ ৰিনস্সতি, সণ্ঠহন্তম্পি একতোৰ সণ্ঠহতি। তস্স ৰিনাসো চ সণ্ঠহনঞ্চ ৰিসুদ্ধিমগ্গে (ৰিসুদ্ধি॰ ২.৪০৪) ৰুত্তং। অত্থিকেহি ততো গহেতব্বং।
Buddhakkhettaṃ nāma tividhaṃ hoti – jātikkhettaṃ, āṇākkhettaṃ, visayakkhettañca. Tattha jātikkhettaṃ dasasahassacakkavāḷapariyantaṃ hoti, yaṃ tathāgatassa paṭisandhiādīsu kampati. Āṇākkhettaṃ koṭisatasahassacakkavāḷapariyantaṃ hoti. Yattha ratanaparittaṃ, khandhaparittaṃ, dhajaggaparittaṃ, āṭānāṭiyaparittaṃ, moraparittanti imesaṃ parittānaṃ ānubhāvo pavattati. Visayakkhettaṃ pana anantaṃ aparimāṇaṃ, ‘‘yaṃ yāvatā vā pana ākaṅkheyyā’’ti (a. ni. 3.81) vuttaṃ yattha yaṃ yaṃ ākaṅkhati taṃ taṃ anussarati. Evametesu tīsu buddhakkhettesu ekaṃ āṇākkhettaṃ vinassati. Tasmiṃ pana vinassante jātikkhettampi vinaṭṭhameva hoti; vinassantañca ekatova vinassati, saṇṭhahantampi ekatova saṇṭhahati. Tassa vināso ca saṇṭhahanañca visuddhimagge (visuddhi. 2.404) vuttaṃ. Atthikehi tato gahetabbaṃ.
যে পনেতে সংৰট্টৰিৰট্টা ৰুত্তা, এতেসু ভগৰা বোধিমণ্ডে সম্মাসম্বোধিং অভিসম্বুজ্ঝনত্থায নিসিন্নো অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে সরি। কথং? ‘‘অমুত্রাসি’’ন্তিআদিনা নযেন। তত্থ অমুত্রাসিন্তি অমুম্হি সংৰট্টকপ্পে অহং অমুম্হি ভৰে ৰা যোনিযা ৰা গতিযা ৰা ৰিঞ্ঞাণট্ঠিতিযা ৰা সত্তাৰাসে ৰা সত্তনিকাযে ৰা অহোসিং। এৰংনামোতি ৰেস্সন্তরো ৰা জোতিপালো ৰা। এৰংগোত্তোতি ভগ্গৰো ৰা গোতমো ৰা। এৰংৰণ্ণোতি ওদাতো ৰা সামো ৰা। এৰমাহারোতি সালিমংসোদনাহারো ৰা পৰত্তফলভোজনো ৰা। এৰংসুখদুক্খপ্পটিসংৰেদীতি অনেকপ্পকারেন কাযিকচেতসিকানং সামিসনিরামিসাদিপ্পভেদানং ৰা সুখদুক্খানং পটিসংৰেদী। এৰমাযুপরিযন্তোতি এৰং ৰস্সসতপরমাযুপরিযন্তো ৰা চতুরাসীতিকপ্পসহস্সপরমাযুপরিযন্তো ৰা।
Ye panete saṃvaṭṭavivaṭṭā vuttā, etesu bhagavā bodhimaṇḍe sammāsambodhiṃ abhisambujjhanatthāya nisinno anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe sari. Kathaṃ? ‘‘Amutrāsi’’ntiādinā nayena. Tattha amutrāsinti amumhi saṃvaṭṭakappe ahaṃ amumhi bhave vā yoniyā vā gatiyā vā viññāṇaṭṭhitiyā vā sattāvāse vā sattanikāye vā ahosiṃ. Evaṃnāmoti vessantaro vā jotipālo vā. Evaṃgottoti bhaggavo vā gotamo vā. Evaṃvaṇṇoti odāto vā sāmo vā. Evamāhāroti sālimaṃsodanāhāro vā pavattaphalabhojano vā. Evaṃsukhadukkhappaṭisaṃvedīti anekappakārena kāyikacetasikānaṃ sāmisanirāmisādippabhedānaṃ vā sukhadukkhānaṃ paṭisaṃvedī. Evamāyupariyantoti evaṃ vassasataparamāyupariyanto vā caturāsītikappasahassaparamāyupariyanto vā.
সো ততো চুতো অমুত্র উদপাদিন্তি সো অহং ততো ভৰতো যোনিতো গতিতো ৰিঞ্ঞাণট্ঠিতিতো সত্তাৰাসতো সত্তনিকাযতো ৰা চুতো, পুন অমুকস্মিং নাম ভৰে যোনিযা গতিযা ৰিঞ্ঞাণট্ঠিতিযা সত্তাৰাসে সত্তনিকাযে ৰা উদপাদিং। তত্রাপাসিন্তি অথ তত্রাপি ভৰে যোনিযা গতিযা ৰিঞ্ঞাণট্ঠিতিযা সত্তাৰাসে সত্তনিকাযে ৰা পুন অহোসিং। এৰংনামোতিআদি ৰুত্তনযমেৰ।
Sotato cuto amutra udapādinti so ahaṃ tato bhavato yonito gatito viññāṇaṭṭhitito sattāvāsato sattanikāyato vā cuto, puna amukasmiṃ nāma bhave yoniyā gatiyā viññāṇaṭṭhitiyā sattāvāse sattanikāye vā udapādiṃ. Tatrāpāsinti atha tatrāpi bhave yoniyā gatiyā viññāṇaṭṭhitiyā sattāvāse sattanikāye vā puna ahosiṃ. Evaṃnāmotiādi vuttanayameva.
অথ ৰা যস্মা অমুত্রাসিন্তি ইদং অনুপুব্বেন আরোহন্তস্স যাৰদিচ্ছকং সরণং। সো ততো চুতোতি পটিনিৰত্তন্তস্স পচ্চৰেক্খণং। তস্মা ইধূপপন্নোতি ইমিস্সা ইধূপপত্তিযা অনন্তরং অমুত্র উদপাদিন্তি তুসিতভৰনং সন্ধাযাহাতি ৰেদিতব্বং। তত্রাপাসিং এৰংনামোতি তত্রাপি তুসিতভৰনে সেতকেতু নাম দেৰপুত্তো অহোসিং। এৰংগোত্তোতি তাহি দেৰতাহি সদ্ধিং একগোত্তো। এৰংৰণ্ণোতি সুৰণ্ণৰণ্ণো। এৰমাহারোতি দিব্বসুধাহারো। এৰংসুখদুক্খপ্পটিসংৰেদীতি এৰং দিব্বসুখপ্পটিসংৰেদী। দুক্খং পন সঙ্খারদুক্খমত্তমেৰ। এৰমাযুপরিযন্তোতি এৰং সত্তপঞ্ঞাসৰস্সকোটিসট্ঠিৰস্সসতসহস্সাযুপরিযন্তো। সো ততো চুতোতি সো অহং ততো তুসিতভৰনতো চুতো। ইধূপপন্নোতি ইধ মহামাযায দেৰিযা কুচ্ছিম্হি নিব্বত্তো।
Atha vā yasmā amutrāsinti idaṃ anupubbena ārohantassa yāvadicchakaṃ saraṇaṃ. So tato cutoti paṭinivattantassa paccavekkhaṇaṃ. Tasmā idhūpapannoti imissā idhūpapattiyā anantaraṃ amutra udapādinti tusitabhavanaṃ sandhāyāhāti veditabbaṃ. Tatrāpāsiṃ evaṃnāmoti tatrāpi tusitabhavane setaketu nāma devaputto ahosiṃ. Evaṃgottoti tāhi devatāhi saddhiṃ ekagotto. Evaṃvaṇṇoti suvaṇṇavaṇṇo. Evamāhāroti dibbasudhāhāro. Evaṃsukhadukkhappaṭisaṃvedīti evaṃ dibbasukhappaṭisaṃvedī. Dukkhaṃ pana saṅkhāradukkhamattameva. Evamāyupariyantoti evaṃ sattapaññāsavassakoṭisaṭṭhivassasatasahassāyupariyanto. So tato cutoti so ahaṃ tato tusitabhavanato cuto. Idhūpapannoti idha mahāmāyāya deviyā kucchimhi nibbatto.
ইতীতি এৰং। সাকারং সউদ্দেসন্তি নামগোত্তৰসেন সউদ্দেসং, ৰণ্ণাদিৰসেন সাকারং। নামগোত্তৰসেন হি সত্তো ‘‘দত্তো, তিস্সো, গোতমো’’তি উদ্দিসীযতি; ৰণ্ণাদীহি ওদাতো, সামোতি নানত্ততো পঞ্ঞাযতি; তস্মা নামগোত্তং উদ্দেসো, ইতরে আকারা। কিং পন বুদ্ধাযেৰ পুব্বেনিৰাসং সরন্তীতি? ৰুচ্চতে – ন বুদ্ধাযেৰ, পচ্চেকবুদ্ধ-বুদ্ধসাৰক-তিত্থিযাপি, নো চ খো অৰিসেসেন। তিত্থিযা হি চত্তালীসংযেৰ কপ্পে সরন্তি, ন ততো পরং। কস্মা? দুব্বলপঞ্ঞত্তা। তেসঞ্হি নামরূপপরিচ্ছেদৰিরহতো দুব্বলা পঞ্ঞা হোতি। সাৰকেসু পন অসীতিমহাসাৰকা কপ্পসতসহস্সং সরন্তি; দ্ৰে অগ্গসাৰকা একমসঙ্খ্যেয্যং সতসহস্সঞ্চ। পচ্চেকবুদ্ধা দ্ৰে অসঙ্খ্যেয্যানি সতসহস্সঞ্চ। এত্তকো হি তেসং অভিনীহারো। বুদ্ধানং পন পরিচ্ছেদো নত্থি, যাৰ ইচ্ছন্তি তাৰ সরন্তি। তিত্থিযা চ খন্ধপটিপাটিমেৰ সরন্তি। পটিপাটিং মুঞ্চিত্ৰা চুতিপটিসন্ধিৰসেন সরিতুং ন সক্কোন্তি। তেসঞ্হি অন্ধানং ৰিয ইচ্ছিতপ্পদেসোক্কমনং নত্থি। সাৰকা উভযথাপি সরন্তি; তথা পচ্চেকবুদ্ধা। বুদ্ধা পন খন্ধপটিপাটিযাপি চুতিপটিসন্ধিৰসেনপি সীহোক্কন্তৰসেনপি অনেকাসু কপ্পকোটীসু হেট্ঠা ৰা উপরি ৰা যং যং ঠানং আকঙ্খন্তি, তং সব্বং সরন্তিযেৰ।
Itīti evaṃ. Sākāraṃ sauddesanti nāmagottavasena sauddesaṃ, vaṇṇādivasena sākāraṃ. Nāmagottavasena hi satto ‘‘datto, tisso, gotamo’’ti uddisīyati; vaṇṇādīhi odāto, sāmoti nānattato paññāyati; tasmā nāmagottaṃ uddeso, itare ākārā. Kiṃ pana buddhāyeva pubbenivāsaṃ sarantīti? Vuccate – na buddhāyeva, paccekabuddha-buddhasāvaka-titthiyāpi, no ca kho avisesena. Titthiyā hi cattālīsaṃyeva kappe saranti, na tato paraṃ. Kasmā? Dubbalapaññattā. Tesañhi nāmarūpaparicchedavirahato dubbalā paññā hoti. Sāvakesu pana asītimahāsāvakā kappasatasahassaṃ saranti; dve aggasāvakā ekamasaṅkhyeyyaṃ satasahassañca. Paccekabuddhā dve asaṅkhyeyyāni satasahassañca. Ettako hi tesaṃ abhinīhāro. Buddhānaṃ pana paricchedo natthi, yāva icchanti tāva saranti. Titthiyā ca khandhapaṭipāṭimeva saranti. Paṭipāṭiṃ muñcitvā cutipaṭisandhivasena sarituṃ na sakkonti. Tesañhi andhānaṃ viya icchitappadesokkamanaṃ natthi. Sāvakā ubhayathāpi saranti; tathā paccekabuddhā. Buddhā pana khandhapaṭipāṭiyāpi cutipaṭisandhivasenapi sīhokkantavasenapi anekāsu kappakoṭīsu heṭṭhā vā upari vā yaṃ yaṃ ṭhānaṃ ākaṅkhanti, taṃ sabbaṃ sarantiyeva.
অযং খো মে ব্রাহ্মণাতিআদীসু মেতি মযা। ৰিজ্জাতি ৰিদিতকরণট্ঠেন ৰিজ্জা। কিং ৰিদিতং করোতি? পুব্বেনিৰাসং। অৰিজ্জাতি তস্সেৰ পুব্বেনিৰাসস্স অৰিদিতকরণট্ঠেন তপ্পটিচ্ছাদকমোহো ৰুচ্চতি। তমোতি স্ৰেৰ মোহো তপ্পটিচ্ছাদকট্ঠেন ‘‘তমো’’তি ৰুচ্চতি। আলোকোতি সাযেৰৰিজ্জা ওভাসকরণট্ঠেন ‘‘আলোকো’’তি ৰুচ্চতি। এত্থ চ ৰিজ্জা অধিগতাতি অযং অত্থো, সেসং পসংসাৰচনং। যোজনা পনেত্থ – অযং খো মে ৰিজ্জা অধিগতা, তস্স মে অধিগতৰিজ্জস্স অৰিজ্জা ৰিহতা, ৰিনট্ঠাতি অত্থো। কস্মা? যস্মা ৰিজ্জা উপ্পন্না। এস নযো ইতরস্মিম্পি পদদ্ৰযে।
Ayaṃ kho me brāhmaṇātiādīsu meti mayā. Vijjāti viditakaraṇaṭṭhena vijjā. Kiṃ viditaṃ karoti? Pubbenivāsaṃ. Avijjāti tasseva pubbenivāsassa aviditakaraṇaṭṭhena tappaṭicchādakamoho vuccati. Tamoti sveva moho tappaṭicchādakaṭṭhena ‘‘tamo’’ti vuccati. Ālokoti sāyevavijjā obhāsakaraṇaṭṭhena ‘‘āloko’’ti vuccati. Ettha ca vijjā adhigatāti ayaṃ attho, sesaṃ pasaṃsāvacanaṃ. Yojanā panettha – ayaṃ kho me vijjā adhigatā, tassa me adhigatavijjassa avijjā vihatā, vinaṭṭhāti attho. Kasmā? Yasmā vijjā uppannā. Esa nayo itarasmimpi padadvaye.
যথা তন্তি এত্থ যথাতি ওপম্মত্থে। তন্তি নিপাতো। সতিযা অৰিপ্পৰাসেন অপ্পমত্তস্স। ৰীরিযাতাপেন আতাপিনো। কাযে চ জীৰিতে চ অনপেক্খতায পহিতত্তস্স, পেসিতচিত্তস্সাতি অত্থো। ইদং ৰুত্তং হোতি – যথা অপ্পমত্তস্স আতাপিনো পহিতত্তস্স ৰিহরতো অৰিজ্জা ৰিহঞ্ঞেয্য ৰিজ্জা উপ্পজ্জেয্য, তমো ৰিহঞ্ঞেয্য আলোকো উপ্পজ্জেয্য; এৰমেৰ মম অৰিজ্জা ৰিহতা ৰিজ্জা উপ্পন্না, তমো ৰিহতো আলোকো উপ্পন্নো। এতস্স মে পধানানুযোগস্স অনুরূপমেৰ ফলং লদ্ধন্তি।
Yathā tanti ettha yathāti opammatthe. Tanti nipāto. Satiyā avippavāsena appamattassa. Vīriyātāpena ātāpino. Kāye ca jīvite ca anapekkhatāya pahitattassa, pesitacittassāti attho. Idaṃ vuttaṃ hoti – yathā appamattassa ātāpino pahitattassa viharato avijjā vihaññeyya vijjā uppajjeyya, tamo vihaññeyya āloko uppajjeyya; evameva mama avijjā vihatā vijjā uppannā, tamo vihato āloko uppanno. Etassa me padhānānuyogassa anurūpameva phalaṃ laddhanti.
অযং খো মে ব্রাহ্মণ পঠমা অভিনিব্ভিদা অহোসি কুক্কুটচ্ছাপকস্সেৰ অণ্ডকোসম্হাতি অযং খো মম ব্রাহ্মণ পুব্বেনিৰাসানুস্সতিঞাণমুখতুণ্ডকেন পুব্বে নিৰুত্থক্খন্ধপটিচ্ছাদকং অৰিজ্জণ্ডকোসং পদালেত্ৰা পঠমা অভিনিব্ভিদা পঠমা নিক্খন্তি পঠমা অরিযাজাতি অহোসি, কুক্কুটচ্ছাপকস্সেৰ মুখতুণ্ডকেন ৰা পাদনখসিখায ৰা অণ্ডকোসং পদালেত্ৰা তম্হা অণ্ডকোসম্হা অভিনিব্ভিদা নিক্খন্তি কুক্কুটনিকাযে পচ্চাজাতীতি।
Ayaṃ kho me brāhmaṇa paṭhamā abhinibbhidā ahosi kukkuṭacchāpakasseva aṇḍakosamhāti ayaṃ kho mama brāhmaṇa pubbenivāsānussatiñāṇamukhatuṇḍakena pubbe nivutthakkhandhapaṭicchādakaṃ avijjaṇḍakosaṃ padāletvā paṭhamā abhinibbhidā paṭhamā nikkhanti paṭhamā ariyājāti ahosi, kukkuṭacchāpakasseva mukhatuṇḍakena vā pādanakhasikhāya vā aṇḍakosaṃ padāletvā tamhā aṇḍakosamhā abhinibbhidā nikkhanti kukkuṭanikāye paccājātīti.
পুব্বেনিৰাসকথা নিট্ঠিতা।
Pubbenivāsakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৰেরঞ্জকণ্ডং • Verañjakaṇḍaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পুব্বেনিৰাসকথাৰণ্ণনা • Pubbenivāsakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পুব্বেনিৰাসকথাৰণ্ণনা • Pubbenivāsakathāvaṇṇanā
