| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
புப்³பே³னிவாஸகதா²வண்ணனா
Pubbenivāsakathāvaṇṇanā
12. அரூபஜ்ஜா²னானம்பி அங்க³ஸமதாய சதுத்த²ஜ்ஜா²னே ஸங்க³ஹோதி ஆஹ கேஸஞ்சி அபி⁴ஞ்ஞாபாத³கானீதிஆதி³, தேனேவ வக்க²தி ‘‘அட்ட² ஸமாபத்தியோ நிப்³ப³த்தெத்வா’’திஆதி³ (பாரா॰ அட்ட²॰ 1.12). தேஸு ச சதுத்த²ஜ்ஜா²னமேவ அபி⁴ஞ்ஞாபாத³கங் நிரோத⁴பாத³கங் ஹோதி, ந இதரானி. தூ³ரகாரணதங் பன ஸந்தா⁴ய ‘‘சத்தாரி ஜா²னானீ’’தி நேஸம்பி ஏகதோ க³ஹணங் கதந்தி த³ட்ட²ப்³ப³ங். சித்தேகக்³க³தத்தா²னீதி இத³ங் தி³ட்ட²த⁴ம்மஸுக²விஹாரங் ஸந்தா⁴ய வுத்தந்தி ஆஹ கீ²ணாஸவானந்திஆதி³. ஸப்³ப³கிச்சஸாத⁴கந்தி தி³ப்³ப³விஹாராதி³ஸப்³ப³பு³த்³த⁴கிச்சஸாத⁴கங். ஸப்³ப³லோகியலோகுத்தரகு³ணதா³யகந்தி இமினா யதா²வுத்தங் விபஸ்ஸனாபாத³கத்தாதி³ஸப்³ப³ங் ஸம்பிண்டே³தி. இத³ஞ்ஹி ஜா²னங் ப⁴க³வதோ ஸப்³ப³பு³த்³த⁴கு³ணதா³யகஸ்ஸ மக்³க³ஞாணஸ்ஸ பத³ட்டா²னத்தா ஏவங் வுத்தந்தி த³ட்ட²ப்³ப³ங். யத²யித³ந்தி யதா² இத³ங். அபி⁴னீஹாரக்க²மந்தி இத்³தி⁴விதா⁴தி³அத்த²ங் தத³பி⁴முக²ங் நீஹரணயொக்³க³ங்.
12. Arūpajjhānānampi aṅgasamatāya catutthajjhāne saṅgahoti āha kesañci abhiññāpādakānītiādi, teneva vakkhati ‘‘aṭṭha samāpattiyo nibbattetvā’’tiādi (pārā. aṭṭha. 1.12). Tesu ca catutthajjhānameva abhiññāpādakaṃ nirodhapādakaṃ hoti, na itarāni. Dūrakāraṇataṃ pana sandhāya ‘‘cattāri jhānānī’’ti nesampi ekato gahaṇaṃ katanti daṭṭhabbaṃ. Cittekaggatatthānīti idaṃ diṭṭhadhammasukhavihāraṃ sandhāya vuttanti āha khīṇāsavānantiādi. Sabbakiccasādhakanti dibbavihārādisabbabuddhakiccasādhakaṃ. Sabbalokiyalokuttaraguṇadāyakanti iminā yathāvuttaṃ vipassanāpādakattādisabbaṃ sampiṇḍeti. Idañhi jhānaṃ bhagavato sabbabuddhaguṇadāyakassa maggañāṇassa padaṭṭhānattā evaṃ vuttanti daṭṭhabbaṃ. Yathayidanti yathā idaṃ. Abhinīhārakkhamanti iddhividhādiatthaṃ tadabhimukhaṃ nīharaṇayoggaṃ.
ஜா²னப்படிலாப⁴பச்சயானந்தி ஜா²னப்படிலாப⁴ஹேதுகானங் ஜா²னப்படிலாப⁴ங் நிஸ்ஸாய உப்பஜ்ஜனகானங். பாபகானந்தி லாமகானங். இச்சா²வசரானந்தி இச்சா²ய வஸேன ஓதிண்ணானங் நீவரணபா⁴வங் ததே³கட்ட²தஞ்ச அப்பத்தானங் அத்துக்கங்ஸனாதி³வஸப்பவத்தானங் அஹோ வத மமேவ ஸத்தா² படிபுச்சி²த்வா பி⁴க்கூ²னங் ஏவரூபங் த⁴ம்மங் தே³ஸெய்யாதிஆதி³னயப்பவத்தானங் மானாதீ³னங். பொத்த²கேஸு பன ‘‘ஜா²னப்படிலாப⁴பச்சனீகான’’ந்திபி பாட²ங் லிக²ந்தி, ஸோ பமாத³பாடோ²தி க³ஹேதப்³போ³ ‘‘ஜா²னப்படிலாப⁴பச்சனீகானங் நீவரணானங் அபா⁴வஸ்ஸ நீவரணதூ³ரீபா⁴வேன பரிஸுத்³தோ⁴’’தி ஏவங் புப்³பே³ பரிஸுத்³த⁴பதே³யேவ வுத்தத்தா. ஸாரத்த²தீ³பனியங் (ஸாரத்த²॰ டீ॰ 1.12) பன ‘‘இச்சா²வசரானந்தி இச்சா²ய அவசரானங் இச்சா²வஸேன ஓதிண்ணானங் பவத்தானங் நானப்பகாரானங் கோபஅப்பச்சயானந்தி அத்தோ²தி அயம்பி பாடோ² அயுத்தோ ஏவாதி க³ஹேதப்³ப³ங். ததோ ஏவ ச விஸுத்³தி⁴மக்³கே³ அயங் பாடோ² ஸப்³பே³ன ஸப்³ப³ங் ந த³ஸ்ஸிதோ’’தி வுத்தங். தத்த² ச நானப்பகாரானங் கோபஅப்பச்சயானந்தி ஏவங் நீவரணபா⁴வப்பத்ததோ³ஸானங் பராமட்ட²த்தா அயங் பாடோ² படிக்கி²த்தோதி வேதி³தப்³போ³.
Jhānappaṭilābhapaccayānanti jhānappaṭilābhahetukānaṃ jhānappaṭilābhaṃ nissāya uppajjanakānaṃ. Pāpakānanti lāmakānaṃ. Icchāvacarānanti icchāya vasena otiṇṇānaṃ nīvaraṇabhāvaṃ tadekaṭṭhatañca appattānaṃ attukkaṃsanādivasappavattānaṃ aho vata mameva satthā paṭipucchitvā bhikkhūnaṃ evarūpaṃ dhammaṃ deseyyātiādinayappavattānaṃ mānādīnaṃ. Potthakesu pana ‘‘jhānappaṭilābhapaccanīkāna’’ntipi pāṭhaṃ likhanti, so pamādapāṭhoti gahetabbo ‘‘jhānappaṭilābhapaccanīkānaṃ nīvaraṇānaṃ abhāvassa nīvaraṇadūrībhāvena parisuddho’’ti evaṃ pubbe parisuddhapadeyeva vuttattā. Sāratthadīpaniyaṃ (sārattha. ṭī. 1.12) pana ‘‘icchāvacarānanti icchāya avacarānaṃ icchāvasena otiṇṇānaṃ pavattānaṃ nānappakārānaṃ kopaappaccayānanti atthoti ayampi pāṭho ayutto evāti gahetabbaṃ. Tato eva ca visuddhimagge ayaṃ pāṭho sabbena sabbaṃ na dassito’’ti vuttaṃ. Tattha ca nānappakārānaṃ kopaappaccayānanti evaṃ nīvaraṇabhāvappattadosānaṃ parāmaṭṭhattā ayaṃ pāṭho paṭikkhittoti veditabbo.
அபி⁴ஜ்ஜா²தீ³னந்தி எத்த² அபி⁴ஜ்ஜா²-ஸத்³தே³ன ச அனீவரணஸபா⁴வஸ்ஸேவ லோப⁴ஸ்ஸ மானாதீ³னஞ்ச க³ஹணங் ஜா²னப்படிலாப⁴பச்சயானந்தி அனுவத்தமானத்தா. உப⁴யம்பீதி அனங்க³ணத்தங் விக³தூபக்கிலேஸத்தஞ்சாதி ஏதங் உப⁴யம்பி யதா²க்கமங் அனங்க³ணஸுத்தவத்த²ஸுத்தாநுஸாரேனேவ வேதி³தப்³ப³ங். தேஸு ச ஸுத்தேஸு கிஞ்சாபி நீவரணஸபா⁴வப்பத்தா தூ²லதோ³ஸாபி வுத்தா, ததா²பி அதி⁴க³தசதஉத்த²ஜ்ஜா²னஸ்ஸ வஸேன வுத்தத்தா இத⁴ ஸுகு²மா ஏவ தே க³ஹிதா. அங்க³ணுபக்கிலேஸஸாமஞ்ஞேன பனெத்த² ஸுத்தானங் அபதி³ஸனங். ததா² ஹி ‘‘ஸுத்தானுஸாரேனா’’தி வுத்தங், ந பன ஸுத்தவஸேனாதி.
Abhijjhādīnanti ettha abhijjhā-saddena ca anīvaraṇasabhāvasseva lobhassa mānādīnañca gahaṇaṃ jhānappaṭilābhapaccayānanti anuvattamānattā. Ubhayampīti anaṅgaṇattaṃ vigatūpakkilesattañcāti etaṃ ubhayampi yathākkamaṃ anaṅgaṇasuttavatthasuttānusāreneva veditabbaṃ. Tesu ca suttesu kiñcāpi nīvaraṇasabhāvappattā thūladosāpi vuttā, tathāpi adhigatacatautthajjhānassa vasena vuttattā idha sukhumā eva te gahitā. Aṅgaṇupakkilesasāmaññena panettha suttānaṃ apadisanaṃ. Tathā hi ‘‘suttānusārenā’’ti vuttaṃ, na pana suttavasenāti.
புப்³பே³னிவாஸானுஸ்ஸதியங் ஞாணங் புப்³பே³னிவாஸானுஸ்ஸதிஞாணந்தி நிப்³ப³சனங் த³ஸ்ஸெந்தோ ஆஹ புப்³பே³னிவாஸானுஸ்ஸதிம்ஹீதிஆதி³. இதா³னி புப்³பே³னிவாஸங் புப்³பே³னிவாஸானுஸ்ஸதிங் தத்த² ஞாணஞ்ச விபா⁴க³தோ த³ஸ்ஸேதுங் தத்தா²திஆதி³ வுத்தங். புப்³ப³-ஸத்³தோ³ அதீதப⁴வவிஸயோ, நிவாஸ-ஸத்³தோ³ ச கம்மஸாத⁴னோதி ஆஹ ‘‘புப்³பே³ அதீதஜாதீஸு நிவுத்த²க்க²ந்தா⁴’’தி. நிவுத்த²தா செத்த² ஸகஸந்தானே பவத்ததா, தேனாஹ அனுபூ⁴தாதிஆதி³. இதா³னி ஸபரஸந்தானஸாத⁴னவஸேன நிவாஸ-ஸத்³த³ஸ்ஸ அத்த²ங் த³ஸ்ஸேதுங் ‘‘நிவுத்த²த⁴ம்மா வா நிவுத்தா²’’தி வத்வா தங் விவரிதுங் கோ³சரனிவாஸேனாதிஆதி³ வுத்தங். கோ³சரபூ⁴தாபி ஹி த⁴ம்மா ஞாணேன நிவுத்தா² நாம ஹொந்தி, தே பன ஸபரவிஞ்ஞாணகோ³சரதாய து³விதா⁴தி த³ஸ்ஸேதுங் அத்தனோதிஆதி³ வுத்தங். பரவிஞ்ஞாணவிஞ்ஞாதாபி வா நிவுத்தா²தி ஸம்ப³ந்தோ⁴. இதா⁴பி பரிச்சி²ன்னாதி பத³ங் ஆனெத்வா ஸம்ப³ந்தி⁴தப்³ப³ங். அனமதக்³கே³பி ஹி ஸங்ஸாரே அத்தனா அவிஞ்ஞாதபுப்³பா³னங் ஸத்தானங் க²ந்தா⁴ பரேஹேவ கேஹிசி விஞ்ஞாதத்தா பரவிஞ்ஞாணவிஞ்ஞாதா நாம வுத்தா, தேஸங் அனுஸ்ஸரணங் புரிமதோ து³க்கரங் யேஹி பரேஹி விஞ்ஞாததாய தே பரவிஞ்ஞாணவிஞ்ஞாதா நாம ஜாதா, தேஸங் வத்தமானஸந்தானானுஸாரேன விஞ்ஞாதப்³ப³தோ. தே ச பரவிஞ்ஞாணவிஞ்ஞாதா து³விதா⁴ பரினிப்³பு³தா அபரினிப்³பு³தாதி. தேஸு ச பரினிப்³பு³தானுஸ்ஸரணங் து³க்கரங் ஸப்³ப³ஸோ ஸுஸமுச்சி²ன்னஸந்தானத்தா. தங் பன ஸிகா²ப்பத்தபரவிஞ்ஞாதங் புப்³பே³னிவாஸங் த³ஸ்ஸேதுங் ‘‘சி²ன்னவடுமகானுஸ்ஸரணாதீ³ஸூ’’தி வுத்தங். தத்த² சி²ன்னவடுமகா அதீதே பரினிப்³பு³தா கீ²ணாஸவா சி²ன்னஸங்ஸாரமக்³க³த்தா . ஆதி³-ஸத்³தே³ன அபரினிப்³பு³தானங் பரவிஞ்ஞாணவிஞ்ஞாதானம்பி ஸீஹோக்கந்திகவஸஏன அனுஸ்ஸரணங் க³ஹிதங். யாய ஸதியா புப்³பே³னிவாஸங் அனுஸ்ஸரதி, ஸா புப்³பே³னிவாஸானுஸ்ஸதீதி ஆனெத்வா ஸம்ப³ந்தி⁴தப்³ப³ங்.
Pubbenivāsānussatiyaṃ ñāṇaṃ pubbenivāsānussatiñāṇanti nibbacanaṃ dassento āha pubbenivāsānussatimhītiādi. Idāni pubbenivāsaṃ pubbenivāsānussatiṃ tattha ñāṇañca vibhāgato dassetuṃ tatthātiādi vuttaṃ. Pubba-saddo atītabhavavisayo, nivāsa-saddo ca kammasādhanoti āha ‘‘pubbe atītajātīsu nivutthakkhandhā’’ti. Nivutthatā cettha sakasantāne pavattatā, tenāha anubhūtātiādi. Idāni saparasantānasādhanavasena nivāsa-saddassa atthaṃ dassetuṃ ‘‘nivutthadhammā vā nivutthā’’ti vatvā taṃ vivarituṃ gocaranivāsenātiādi vuttaṃ. Gocarabhūtāpi hi dhammā ñāṇena nivutthā nāma honti, te pana saparaviññāṇagocaratāya duvidhāti dassetuṃ attanotiādi vuttaṃ. Paraviññāṇaviññātāpi vā nivutthāti sambandho. Idhāpi paricchinnāti padaṃ ānetvā sambandhitabbaṃ. Anamataggepi hi saṃsāre attanā aviññātapubbānaṃ sattānaṃ khandhā pareheva kehici viññātattā paraviññāṇaviññātā nāma vuttā, tesaṃ anussaraṇaṃ purimato dukkaraṃ yehi parehi viññātatāya te paraviññāṇaviññātā nāma jātā, tesaṃ vattamānasantānānusārena viññātabbato. Te ca paraviññāṇaviññātā duvidhā parinibbutā aparinibbutāti. Tesu ca parinibbutānussaraṇaṃ dukkaraṃ sabbaso susamucchinnasantānattā. Taṃ pana sikhāppattaparaviññātaṃ pubbenivāsaṃ dassetuṃ ‘‘chinnavaṭumakānussaraṇādīsū’’ti vuttaṃ. Tattha chinnavaṭumakā atīte parinibbutā khīṇāsavā chinnasaṃsāramaggattā . Ādi-saddena aparinibbutānaṃ paraviññāṇaviññātānampi sīhokkantikavasaena anussaraṇaṃ gahitaṃ. Yāya satiyā pubbenivāsaṃ anussarati, sā pubbenivāsānussatīti ānetvā sambandhitabbaṃ.
விஹித-ஸத்³தோ³ வித⁴-ஸத்³த³பரியாயோதி ஆஹ ‘‘அனேகவித⁴’’ந்தி, ப⁴வயோனிஆதி³வஸேன ப³ஹுவித⁴ந்தி அத்தோ². விஹிதந்தி வா பயுத்தங் வண்ணிதந்தி அத்த²ங் க³ஹெத்வா ‘‘அனேகேஹி பகாரேஹி விஹித’’ந்தி வத்தப்³பே³ மஜ்ஜே²பத³லோபங் கத்வா நித்³தி³ட்ட²ந்தி ஆஹ ‘‘அனேகேஹி…பே॰… ஸங்வண்ணித’’ந்தி. பகாரேஹீதி நாமகொ³த்தாதி³பகாரேஹி. ஸங்வண்ணிதந்தி பு³த்³தா⁴தீ³ஹி கதி²தங். அனு-ஸத்³தோ³ அனந்தரத்த²தீ³பகோதி ஆஹ ‘‘அபி⁴னின்னாமிதமத்தே ஏவா’’தி, ஏதேன ச பரிகம்மஸ்ஸ ஆரத்³த⁴தங் த³ஸ்ஸேதி. பூரிதபாரமீனஞ்ஹீதிஆதி³னா பரிகம்மங் வினாபி ஸித்³தி⁴ங் த³ஸ்ஸேதி.
Vihita-saddo vidha-saddapariyāyoti āha ‘‘anekavidha’’nti, bhavayoniādivasena bahuvidhanti attho. Vihitanti vā payuttaṃ vaṇṇitanti atthaṃ gahetvā ‘‘anekehi pakārehi vihita’’nti vattabbe majjhepadalopaṃ katvā niddiṭṭhanti āha ‘‘anekehi…pe… saṃvaṇṇita’’nti. Pakārehīti nāmagottādipakārehi. Saṃvaṇṇitanti buddhādīhi kathitaṃ. Anu-saddo anantaratthadīpakoti āha ‘‘abhininnāmitamatte evā’’ti, etena ca parikammassa āraddhataṃ dasseti. Pūritapāramīnañhītiādinā parikammaṃ vināpi siddhiṃ dasseti.
ஆரத்³த⁴ப்பகாரத³ஸ்ஸனத்தே²தி அனுஸ்ஸரிதுங் ஆரத்³தா⁴னங் புப்³பே³ நிவுத்த²க்க²ந்தா⁴னங் த³ஸ்ஸனத்தே². ஜாயதீதி ஜாதி, ப⁴வோ. ஸோ ஏககம்மமூலகோ ஆதா³னநிக்கே²பபரிச்சி²ன்னோ க²ந்த⁴ப்பப³ந்தோ⁴ இத⁴ ‘‘ஜாதீ’’தி அதி⁴ப்பேதோதி ஆஹ ஏகம்பீதிஆதி³. கப்போதி அஸங்க்²யெய்யகப்போ, ஸோ பன அத்த²தோ காலோ ததா²பவத்தத⁴ம்மமுபாதா³ய பஞ்ஞத்தோ, தேஸங் வஸேனஸ்ஸ பரிஹானி ச வட்³டி⁴ ச வேதி³தப்³பா³. ஸங்வட்டோ ஸங்வட்டனங் வினாஸோ அஸ்ஸ அத்தீ²தி ஸங்வட்டோ, அஸங்க்²யெய்யகப்போ. ஸங்வட்டேன வினாஸேன ஸஹ திட்ட²தி ஸீலேனாதி ஸங்வட்டட்டா²யீ. ஏவங் விவட்டோதிஆதீ³ஸுபி. தத்த² விவட்டனங் விவட்டோ, உப்பத்தி, வட்³டி⁴ வா. தேஜேன வினாஸோ தேஜோஸங்வட்டோ. வித்தா²ரதோ பனாதி புது²லதோ பன ஸங்வட்டஸீமாபே⁴தோ³ நத்தி², தேனாஹ ‘‘ஸதா³பீ’’தி. ஏகனக³ரியா விய அஸ்ஸ ஜாதக்க²ணே விகாராபஜ்ஜனதோ ஜாதிக்கெ²த்தவோஹாரோதி த³ஸ்ஸேதுங் ‘‘படிஸந்தி⁴ஆதீ³ஸு கம்பதீ’’தி வுத்தங். ஆனுபா⁴வோ பவத்ததீதி தத³ந்தோக³தா⁴னங் ஸப்³பே³ஸங் ஸத்தானங் ரோகா³தி³உபத்³த³வோ வூபஸம்மதீதி அதி⁴ப்பாயோ. யங் யாவதா வா பன ஆகங்கெ²ய்யாதி வுத்தந்தி யங் விஸயக்கெ²த்தங் ஸந்தா⁴ய ஏகஸ்மிங் ஏவ க²ணே ஸப்³ப³த்த² ஸரேன அபி⁴விஞ்ஞாபனங், அத்தனோ ரூபகாயத³ஸ்ஸனஞ்ச படிஜானந்தேன ப⁴க³வதா ‘‘யாவதா வா பன ஆகங்கெ²ய்யா’’தி வுத்தங்.
Āraddhappakāradassanattheti anussarituṃ āraddhānaṃ pubbe nivutthakkhandhānaṃ dassanatthe. Jāyatīti jāti, bhavo. So ekakammamūlako ādānanikkhepaparicchinno khandhappabandho idha ‘‘jātī’’ti adhippetoti āha ekampītiādi. Kappoti asaṅkhyeyyakappo, so pana atthato kālo tathāpavattadhammamupādāya paññatto, tesaṃ vasenassa parihāni ca vaḍḍhi ca veditabbā. Saṃvaṭṭo saṃvaṭṭanaṃ vināso assa atthīti saṃvaṭṭo, asaṅkhyeyyakappo. Saṃvaṭṭena vināsena saha tiṭṭhati sīlenāti saṃvaṭṭaṭṭhāyī. Evaṃ vivaṭṭotiādīsupi. Tattha vivaṭṭanaṃ vivaṭṭo, uppatti, vaḍḍhi vā. Tejena vināso tejosaṃvaṭṭo. Vitthārato panāti puthulato pana saṃvaṭṭasīmābhedo natthi, tenāha ‘‘sadāpī’’ti. Ekanagariyā viya assa jātakkhaṇe vikārāpajjanato jātikkhettavohāroti dassetuṃ ‘‘paṭisandhiādīsu kampatī’’ti vuttaṃ. Ānubhāvo pavattatīti tadantogadhānaṃ sabbesaṃ sattānaṃ rogādiupaddavo vūpasammatīti adhippāyo. Yaṃ yāvatā vā pana ākaṅkheyyāti vuttanti yaṃ visayakkhettaṃ sandhāya ekasmiṃ eva khaṇe sabbattha sarena abhiviññāpanaṃ, attano rūpakāyadassanañca paṭijānantena bhagavatā ‘‘yāvatā vā pana ākaṅkheyyā’’ti vuttaṃ.
ஏதேஸூதி நித்³தா⁴ரணே பு⁴ம்மங். பவத்தப²லபோ⁴ஜனோதி ஸயங்பதிதப²லாஹாரோ, இத³ஞ்ச தாபஸகாலங் ஸந்தா⁴ய வுத்தங். இதூ⁴பபத்தியாதி இத⁴ சரிமப⁴வே உபபத்தியா. ஏககொ³த்தோதி துஸிதகொ³த்தேன ஏககொ³த்தோ. இதரேதி வண்ணாத³யோ. தித்தி²யாதி கம்மப²லவாதி³னோ. அபி⁴னீஹாரோதி அபி⁴னீஹாரோபலக்கி²தோ புஞ்ஞஞாணஸம்ப⁴ரணகாலோ வுத்தோ. சுதிபடிஸந்தி⁴வஸேனாதி அத்தனோ பரஸ்ஸ வா தஸ்மிங் தஸ்மிங் அத்தபா⁴வே சுதிங் தி³ஸ்வா அந்தரா கிஞ்சி அனாமஸித்வா படிஸந்தி⁴யா ஏவ க³ஹணவஸேன ஏவங் ஜானநங் இச்சி²தப்பதே³ஸோக்கமனந்தி ஆஹ தேஸஞ்ஹீதிஆதி³. உப⁴யதா²பீதி க²ந்த⁴படிபாடியாபி சுதிபடிஸந்தி⁴வஸேனபி. ஸீஹோக்கந்தவஸேனபீதி ஸீஹனிபாதவஸேனபி. கிலேஸானங் ஆதாபனபரிதாபனட்டே²ன வீரியங் ஆதாபோதி ஆஹ ‘‘வீரியாதாபேனா’’தி.
Etesūti niddhāraṇe bhummaṃ. Pavattaphalabhojanoti sayaṃpatitaphalāhāro, idañca tāpasakālaṃ sandhāya vuttaṃ. Idhūpapattiyāti idha carimabhave upapattiyā. Ekagottoti tusitagottena ekagotto. Itareti vaṇṇādayo. Titthiyāti kammaphalavādino. Abhinīhāroti abhinīhāropalakkhito puññañāṇasambharaṇakālo vutto. Cutipaṭisandhivasenāti attano parassa vā tasmiṃ tasmiṃ attabhāve cutiṃ disvā antarā kiñci anāmasitvā paṭisandhiyā eva gahaṇavasena evaṃ jānanaṃ icchitappadesokkamananti āha tesañhītiādi. Ubhayathāpīti khandhapaṭipāṭiyāpi cutipaṭisandhivasenapi. Sīhokkantavasenapīti sīhanipātavasenapi. Kilesānaṃ ātāpanaparitāpanaṭṭhena vīriyaṃ ātāpoti āha ‘‘vīriyātāpenā’’ti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / வேரஞ்ஜகண்ட³ங் • Verañjakaṇḍaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / புப்³பே³னிவாஸகதா² • Pubbenivāsakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
புப்³பே³னிவாஸகதா² • Pubbenivāsakathā
1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / புப்³பே³னிவாஸகதா²வண்ணனா • Pubbenivāsakathāvaṇṇanā
