| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
буб̣б̣зниваасагат̇ааван̣н̣анаа
Pubbenivāsakathāvaṇṇanā
12. жид̇д̇згаг̇г̇ад̇аасабхааг̇ад̇д̇аа жхаанаанам̣ ‘‘гзсан̃жи жид̇д̇згаг̇г̇ад̇ад̇т̇ааний’’д̇и ааха. гусалаанам̣ бхавоггаманасабхааг̇ад̇д̇аа ‘‘гзсан̃жи бхавоггаманад̇т̇ааний’’д̇и. асабхааг̇ад̇д̇аа сзсадтаанзсу ‘‘баад̣̇агад̇т̇ааний’’д̇и авад̇ваа ‘‘баад̣̇агааний’’д̇и ааха. д̇зна баад̣̇агабхууд̇аанамби яат̇аасамбхавам̣ жид̇д̇згаг̇г̇ад̇аа бхавоггаманад̇аавахад̇ам̣, ид̇арзсам̣ яат̇аасамбхавам̣ баад̣̇агад̇аавахад̇ан̃жа д̣̇ийбзд̇и. асабхааг̇ад̇д̇аа ж̇аванавибассанаабаад̣̇агаани самаанаани абхин̃н̃аабаад̣̇агаани жа хонд̇и, абхин̃н̃аабаад̣̇агаани жа вибассанаабаад̣̇агаани хонд̇ийд̇иби д̣̇ийбзд̇и, д̇ат̇аа баад̣̇агаабхаавам̣ д̣̇ийбзд̇и. абхин̃н̃ааяа хи жад̇уд̇т̇амзва баад̣̇агам̣, на ид̇араани. д̇зсу жад̇уд̇т̇асса д̇ад̇ияам̣ баад̣̇агам̣, д̇ад̇ияасса д̣̇уд̇ияам̣, д̣̇уд̇ияасса батаманд̇и. ат̇а ваа ‘‘жад̇д̇аари жхаанааний’’д̇и яат̇аалаабхад̇о вуд̇д̇ам̣.
12. Cittekaggatāsabhāgattā jhānānaṃ ‘‘kesañci cittekaggatatthānī’’ti āha. Kusalānaṃ bhavokkamanasabhāgattā ‘‘kesañci bhavokkamanatthānī’’ti. Asabhāgattā sesaṭṭhānesu ‘‘pādakatthānī’’ti avatvā ‘‘pādakānī’’ti āha. Tena pādakabhūtānampi yathāsambhavaṃ cittekaggatā bhavokkamanatāvahataṃ, itaresaṃ yathāsambhavaṃ pādakatāvahatañca dīpeti. Asabhāgattā javanavipassanāpādakāni samānāni abhiññāpādakāni ca honti, abhiññāpādakāni ca vipassanāpādakāni hontītipi dīpeti, tathā pādakābhāvaṃ dīpeti. Abhiññāya hi catutthameva pādakaṃ, na itarāni. Tesu catutthassa tatiyaṃ pādakaṃ, tatiyassa dutiyaṃ, dutiyassa paṭhamanti. Atha vā ‘‘cattāri jhānānī’’ti yathālābhato vuttaṃ.
винаяанид̣̇аананимид̇д̇ам̣, взран̃ж̇аниваасагаббанам̣;
Vinayanidānanimittaṃ, verañjanivāsakappanaṃ;
сад̇т̇у яасмаа д̇асмаа бхаг̇аваа, виж̇ж̇ад̇д̇аяамааха взран̃ж̇з.
Satthu yasmā tasmā bhagavā, vijjattayamāha verañje.
вуд̇д̇ан̃хзд̇ам̣ ‘‘винаяз суббадибанно бхигку сийласамбад̇д̇им̣ ниссааяаа’’д̇иаад̣̇и (баараа. адта. 1.батамамахаасан̇г̇ийд̇игат̇аа). сийлавад̇о хи сийлабажжавзгкан̣ад̇т̇ам̣ рад̇д̇идтаанад̣̇иваатаанзсу нисиннасса нисаж̇ж̇анад̇о бадтааяа ад̇д̇ано ад̇ийд̇агирияаануссаран̣аб̣ахулад̇ааяа буб̣б̣зниваасаануссад̇ивиж̇ж̇аа аббагасирзна самиж̇жхад̇и. д̇ат̇аа ад̇д̇аанам̣ бадижжа сад̇д̇аанам̣ жуд̇ибариг̇г̇ахан̣асийлад̇ааяа жуд̇уубабаад̇ан̃аан̣ам̣ аббагасирзна самиж̇жхад̇и, уд̣̇агаад̣̇ийсу сукумад̇д̇а д̣̇ассанасийлад̇ааяа д̣̇иб̣б̣ажагкун̃аан̣ам̣ самиж̇жхад̇и. яасмаа сад̇д̇авид̇хамзт̇унасам̣яог̇абариваж̇ж̇анзна, гаамаасаваад̣̇ибариваж̇ж̇анзна ваа б̣рахмажарияам̣ акан̣д̣аад̣̇ибхаавам̣ баабун̣аад̇и, д̇асмаасса аасавагкаяан̃аан̣ам̣ аббагасирзна самиж̇жхад̇ийд̇и зд̇т̇а винаяанид̣̇аанз виж̇ж̇ад̇д̇аяамзва д̣̇ассид̇ам̣, д̇асмаа ааха ‘‘язсан̃жа г̇ун̣аанам̣ д̣̇ааяагам̣ ахоси, д̇зсам̣ згад̣̇зсам̣ д̣̇ассзнд̇о’’д̇и, ан̃н̃ат̇аа виж̇ж̇ад̇д̇аяабадилаабхамад̇д̇аббасан̇г̇о сияаад̇и.
Vuttañhetaṃ ‘‘vinaye suppaṭipanno bhikkhu sīlasampattiṃ nissāyā’’tiādi (pārā. aṭṭha. 1.paṭhamamahāsaṅgītikathā). Sīlavato hi sīlapaccavekkhaṇatthaṃ rattiṭṭhānadivāṭhānesu nisinnassa nisajjanato paṭṭhāya attano atītakiriyānussaraṇabahulatāya pubbenivāsānussativijjā appakasirena samijjhati. Tathā attānaṃ paṭicca sattānaṃ cutipariggahaṇasīlatāya cutūpapātañāṇaṃ appakasirena samijjhati, udakādīsu sukhumatta dassanasīlatāya dibbacakkhuñāṇaṃ samijjhati. Yasmā sattavidhamethunasaṃyogaparivajjanena, kāmāsavādiparivajjanena vā brahmacariyaṃ akhaṇḍādibhāvaṃ pāpuṇāti, tasmāssa āsavakkhayañāṇaṃ appakasirena samijjhatīti ettha vinayanidāne vijjattayameva dassitaṃ, tasmā āha ‘‘yesañca guṇānaṃ dāyakaṃ ahosi, tesaṃ ekadesaṃ dassento’’ti, aññathā vijjattayapaṭilābhamattappasaṅgo siyāti.
со званд̇и иминаа гин̃жааби жад̇уннам̣ жхаанаанам̣ буб̣б̣абхааг̇абадибад̣̇ааби сан̇г̇ахам̣ г̇ажчад̇и, на гзвалам̣ буримаж̇жхаанад̇д̇игамзва, д̇ат̇ааби гзвалам̣ буримаж̇жхаанад̇д̇игамзва г̇ан̣ханд̇о ‘‘званд̇и жад̇уд̇т̇аж̇жхаанаггаманид̣̇ассанамзд̇ам̣, иминаа батамаж̇жхаанаад̇хиг̇амаад̣̇инаа гамзна жад̇уд̇т̇аж̇жхаанам̣ бадилабхид̇ваад̇и вуд̇д̇ам̣ ход̇ий’’д̇и ааха, д̇ам̣ гасмаад̇и жз? самбхаарабхуумид̇д̇аа. вуд̇д̇ан̃хзд̇ам̣ адтагат̇ааяам̣ (висуд̣̇д̇хи. 2.381) ‘‘зд̇т̇а жа буримаани д̇ийн̣и жхаанаани яасмаа бийд̇ипаран̣зна жа сукапаран̣зна жа сукасан̃н̃ан̃жа лахусан̃н̃ан̃жа оггамид̇ваа лахумуд̣̇угамман̃н̃агааяо худ̇ваа ид̣̇д̇хим̣ баабун̣аад̇и, д̇асмаа иминаа барияааязна ид̣̇д̇хилаабхааяа сам̣вад̇д̇анад̇о самбхаарабхуумияод̇и взд̣̇ид̇аб̣б̣аани. жад̇уд̇т̇аж̇жхаанам̣ бана ид̣̇д̇хилаабхааяа багад̇ибхууми зваа’’д̇и. ид̣̇амзва ваа ад̇т̇ам̣ санд̇хааяааха ‘‘буб̣б̣з имаани жад̇д̇аари жхаанаани гзсан̃жи абхин̃н̃аабаад̣̇агааний’’д̇и. яад̣̇и звам̣ жад̇уд̇т̇аж̇жхаанамби анд̇огад̇ваа званд̇и гимад̇т̇ам̣ на вуд̇д̇ам̣. д̇ан̃хи багад̇ибхуумийд̇и жз? на вад̇д̇аб̣б̣ам̣, жад̇уд̇т̇аж̇жхаанад̇о барасса самаахид̇аад̣̇ибхааваббад̇д̇асса жид̇д̇асса ад̇т̇ибхааваббасан̇г̇ад̇о. яасмаа яасмим̣ сад̇и ‘‘буб̣б̣зниваасаануссад̇ин̃аан̣ааяа жид̇д̇ам̣ абхининнаамзси’’нд̇и вуд̇д̇ам̣, д̇асмаа д̇асмим̣ жад̇уд̇т̇аж̇жхаанажид̇д̇з багад̇ибхуумибхааваббад̇д̇з абхин̃н̃аабаад̣̇агз ж̇аад̇з баригаммажид̇д̇ам̣ ‘‘буб̣б̣зниваасаануссад̇ин̃аан̣ааяа абхининнаамзси’’нд̇и ааха. абхинийхаарагкамам̣ ход̇ийд̇и зд̇т̇а д̇ам̣ ид̣̇д̇хивид̇хаад̇хиг̇амад̇т̇ааяа баригаммажид̇д̇ам̣ абхинийхарад̇и. гасин̣аарамман̣ад̇о абанзд̇ваа ид̣̇д̇хивид̇хаабхимукам̣ бзсзси. г̇ан̣тибад̣̇з бана ‘‘абхин̃н̃аабаад̣̇агаж̇жхаанад̇о ид̣̇д̇хивид̇хан̃аан̣аад̣̇ийнам̣ нийхаран̣ад̇т̇а’’нд̇и вуд̇д̇ад̇д̇аа абхинийхаарагкаманд̇и ад̇т̇о багаббид̇о.
So evanti iminā kiñcāpi catunnaṃ jhānānaṃ pubbabhāgapaṭipadāpi saṅgahaṃ gacchati, na kevalaṃ purimajjhānattikameva, tathāpi kevalaṃ purimajjhānattikameva gaṇhanto ‘‘evanti catutthajjhānakkamanidassanametaṃ, iminā paṭhamajjhānādhigamādinā kamena catutthajjhānaṃ paṭilabhitvāti vuttaṃ hotī’’ti āha, taṃ kasmāti ce? Sambhārabhūmittā. Vuttañhetaṃ aṭṭhakathāyaṃ (visuddhi. 2.381) ‘‘ettha ca purimāni tīṇi jhānāni yasmā pītipharaṇena ca sukhapharaṇena ca sukhasaññañca lahusaññañca okkamitvā lahumudukammaññakāyo hutvā iddhiṃ pāpuṇāti, tasmā iminā pariyāyena iddhilābhāya saṃvattanato sambhārabhūmiyoti veditabbāni. Catutthajjhānaṃ pana iddhilābhāya pakatibhūmi evā’’ti. Idameva vā atthaṃ sandhāyāha ‘‘pubbe imāni cattāri jhānāni kesañci abhiññāpādakānī’’ti. Yadi evaṃ catutthajjhānampi antokatvā evanti kimatthaṃ na vuttaṃ. Tañhi pakatibhūmīti ce? Na vattabbaṃ, catutthajjhānato parassa samāhitādibhāvappattassa cittassa atthibhāvappasaṅgato. Yasmā yasmiṃ sati ‘‘pubbenivāsānussatiñāṇāya cittaṃ abhininnāmesi’’nti vuttaṃ, tasmā tasmiṃ catutthajjhānacitte pakatibhūmibhāvappatte abhiññāpādake jāte parikammacittaṃ ‘‘pubbenivāsānussatiñāṇāya abhininnāmesi’’nti āha. Abhinīhārakkhamaṃ hotīti ettha taṃ iddhividhādhigamatthāya parikammacittaṃ abhinīharati. Kasiṇārammaṇato apanetvā iddhividhābhimukhaṃ pesesi. Gaṇṭhipade pana ‘‘abhiññāpādakajjhānato iddhividhañāṇādīnaṃ nīharaṇattha’’nti vuttattā abhinīhārakkhamanti attho pakappito.
со звам̣ самаахид̇з звам̣ аанзн̃ж̇аббад̇д̇зд̇и яож̇анаа взд̣̇ид̇аб̣б̣аа д̣̇уд̇ияавигаббз, нийваран̣ад̣̇уурийбхаавзна вид̇аггаад̣̇исамад̇иггамзнаад̇и батамаж̇жхаанаад̣̇ийнам̣ гижжасан̇г̇ан̣ханад̇о. аяам̣ яож̇анаа батамавигаббз на самбхавад̇и ‘‘барисуд̣̇д̇хзд̇иаад̣̇ийсу банаа’’д̇и важанзна ‘‘зва’’нд̇и бад̣̇асса ануббаб̣анд̇ханивааран̣ад̇о. д̇знзва ‘‘убзгкаасад̇ибаарисуд̣̇д̇хибхаавзна барисуд̣̇д̇хз’’д̇иаад̣̇имааха. ижчааважараананд̇и ‘‘ахо вад̇аахам̣ аабад̇д̇ин̃жзва аабанно ассам̣, на жа мам̣ бхигкуу ж̇аанзяяу’’нд̇иаад̣̇инаа (ма. ни. 1.60) наязна уббаннаижчаавасзна бавад̇д̇аанам̣ гобаабажжаяаанам̣ абхаавзна анан̇г̇ан̣зд̇и ад̇т̇о. зд̇т̇а жа бана яат̇аавуд̇д̇аббагаараа ижчааби батамаж̇жхаанаад̣̇ийнам̣ ад̇хиг̇амааяа анд̇арааяигаа ‘‘самбаж̇аанамусааваад̣̇о ко банааяасманд̇о анд̇арааяиго д̇хаммо’’д̇и (махаава. 134) вуд̇д̇ад̇д̇аа, баг̇зва ижчааважараа гобаабажжаяаа, д̇асмаа вуд̇д̇ам̣ ‘‘жхаанабадилаабхабажжанийгаанам̣ баабагаанам̣ ижчааважараана’’нд̇иаад̣̇и. гад̇т̇ажи бана ‘‘жхаанабадилаабхабажжаяаанам̣ ижчааважараана’’нд̇и бод̇т̇агзсу баато д̣̇иссад̇и, со бамаад̣̇алзко, г̇ан̣тибад̣̇з жа ‘‘ахо вад̇а сад̇т̇аа маман̃н̃зва бадибужчид̇ваа д̇хаммам̣ д̣̇зсзяяаа’’д̇и яо д̇ад̣̇ад̇т̇о ликид̇о, со д̣̇улликид̇о. на хи жхаанабадилаабхабажжаяаа гобаад̣̇аяо анан̇г̇ан̣асуд̇д̇з (ма. ни. 1.57 аад̣̇аяо) вуд̇д̇аа, ‘‘на жа яуд̇д̇ид̇о самбхаванд̇и жхааналаабхино д̇ад̣̇абхааваа’’д̇и аажарияо вад̣̇ад̇и, д̇ам̣ виймам̣сид̇аб̣б̣ам̣. зд̇т̇а виж̇ж̇ад̇д̇аяасса уд̇д̇аруд̇д̇арависзсад̣̇ассанад̇т̇ам̣ ‘‘со звам̣ самаахид̇з жид̇д̇з’’д̇иаад̣̇инаа бунаббунам̣ адтан̇г̇анид̣̇ассанам̣ гад̇анд̇и взд̣̇ид̇аб̣б̣ам̣. уд̇д̇аруд̇д̇арависзсаа жзбхаасам̣ ад̇д̇ад̣̇угкабарад̣̇угкад̣̇ассанад̇ад̣̇убасамад̇д̇ад̣̇ийбанад̇о взд̣̇ид̇аб̣б̣аа. бхаг̇аваа хи буб̣б̣зниваасаануссад̇ин̃аан̣зна ад̇д̇ано ананд̇асам̣саарад̣̇угкам̣ бассид̇ваа, жуд̇уубабаад̇ан̃аан̣зна барасса жа логасса аасавагкаяан̃аан̣зна д̇ад̣̇убхаяавуубасамад̇д̇ан̃жа бассид̇ваа д̇ам̣ д̣̇зсзд̇и, батамзна ваа ад̇д̇ад̣̇угкад̣̇ассанад̇о ад̇д̇асинзхабарижжааг̇ам̣ д̣̇ийбзд̇и. д̣̇уд̇иязна барад̣̇угкад̣̇ассанад̇о барзсу гобабарижжааг̇ам̣, д̇ад̇иязна арияамаг̇г̇ад̣̇ассанад̇о мохабарижжааг̇ан̃жа д̣̇ийбзд̇и. звам̣ наанааг̇ун̣ависзсад̣̇ийбанад̇о имассзва логияаабхин̃н̃аад̣̇ваяасса ид̇ха г̇ахан̣ам̣ гад̇анд̇и взд̣̇ид̇аб̣б̣ам̣.
So evaṃ samāhite evaṃ āneñjappatteti yojanā veditabbā dutiyavikappe, nīvaraṇadūrībhāvena vitakkādisamatikkamenāti paṭhamajjhānādīnaṃ kiccasaṅgaṇhanato. Ayaṃ yojanā paṭhamavikappe na sambhavati ‘‘parisuddhetiādīsu panā’’ti vacanena ‘‘eva’’nti padassa anuppabandhanivāraṇato. Teneva ‘‘upekkhāsatipārisuddhibhāvena parisuddhe’’tiādimāha. Icchāvacarānanti ‘‘aho vatāhaṃ āpattiñceva āpanno assaṃ, na ca maṃ bhikkhū jāneyyu’’ntiādinā (ma. ni. 1.60) nayena uppannaicchāvasena pavattānaṃ kopaapaccayānaṃ abhāvena anaṅgaṇeti attho. Ettha ca pana yathāvuttappakārā icchāpi paṭhamajjhānādīnaṃ adhigamāya antarāyikā ‘‘sampajānamusāvādo kho panāyasmanto antarāyiko dhammo’’ti (mahāva. 134) vuttattā, pageva icchāvacarā kopaapaccayā, tasmā vuttaṃ ‘‘jhānapaṭilābhapaccanīkānaṃ pāpakānaṃ icchāvacarāna’’ntiādi. Katthaci pana ‘‘jhānapaṭilābhapaccayānaṃ icchāvacarāna’’nti potthakesu pāṭho dissati, so pamādalekho, gaṇṭhipade ca ‘‘aho vata satthā mamaññeva paṭipucchitvā dhammaṃ deseyyā’’ti yo tadattho likhito, so dullikhito. Na hi jhānapaṭilābhapaccayā kopādayo anaṅgaṇasutte (ma. ni. 1.57 ādayo) vuttā, ‘‘na ca yuttito sambhavanti jhānalābhino tadabhāvā’’ti ācariyo vadati, taṃ vīmaṃsitabbaṃ. Ettha vijjattayassa uttaruttaravisesadassanatthaṃ ‘‘so evaṃ samāhite citte’’tiādinā punappunaṃ aṭṭhaṅganidassanaṃ katanti veditabbaṃ. Uttaruttaravisesā cebhāsaṃ attadukkhaparadukkhadassanatadupasamattadīpanato veditabbā. Bhagavā hi pubbenivāsānussatiñāṇena attano anantasaṃsāradukkhaṃ passitvā, cutūpapātañāṇena parassa ca lokassa āsavakkhayañāṇena tadubhayavūpasamattañca passitvā taṃ deseti, paṭhamena vā attadukkhadassanato attasinehapariccāgaṃ dīpeti. Dutiyena paradukkhadassanato paresu kopapariccāgaṃ, tatiyena ariyamaggadassanato mohapariccāgañca dīpeti. Evaṃ nānāguṇavisesadīpanato imasseva lokiyābhiññādvayassa idha gahaṇaṃ katanti veditabbaṃ.
яасмаа ад̇ийд̇аж̇аад̇и зва ниваасо, д̇асмаа ‘‘ад̇ийд̇аж̇аад̇ийсуу’’д̇и на вад̇д̇аб̣б̣анд̇и жз? на, ж̇аад̇ияаа згад̣̇зсзби ниваасавохаарасид̣̇д̇хид̣̇ассанад̇о. баал̣ияам̣ гин̃жааби ‘‘згамби ж̇аад̇им̣ д̣̇взби ж̇аад̇ияо’’д̇иаад̣̇иважанзна сагалаж̇аад̇ияаа ануссаран̣амзва буб̣б̣зниваасаануссад̇и вияа д̣̇иссад̇и, на звам̣ д̣̇адтаб̣б̣ам̣. д̇ад̣̇згад̣̇зсаануссаран̣амби буб̣б̣зниваасаануссад̇и зваад̇и д̣̇ассанад̇т̇ам̣, бхуммаважанам̣ гад̇ам̣ огаасаад̣̇исан̇г̇ахад̇т̇ан̃жа. ‘‘чиннавадумагаануссаран̣аад̣̇ийсуу’’д̇и аад̣̇и-сад̣̇д̣̇зна анивуд̇т̇алогад̇хаад̇уд̣̇ийбарадтанаг̇араг̇аамаад̣̇иг̇г̇ахан̣ам̣ взд̣̇ид̇аб̣б̣ам̣. г̇ан̣тибад̣̇з бана ‘‘д̇зсам̣ чиннавадумагаанам̣ логуд̇д̇арасийлаад̣̇ийни на бхаг̇авад̇аа б̣од̇хисад̇д̇агаалз вин̃н̃аад̇ааний’’д̇и вуд̇д̇ам̣. ад̇т̇аабад̇д̇ид̇о логияаани вин̃н̃аад̇аанийд̇и аабаж̇ж̇ад̇и, д̇ам̣ д̣̇иб̣б̣ажагкун̃аан̣аад̇хигаарз ‘‘арияаанам̣ убаваад̣̇агаа’’д̇и важанзна самзнд̇ам̣ вияа д̣̇иссад̇и. на хи арияз абассанд̇асса звам̣ ход̇и. гимад̇т̇ам̣ банзд̇т̇а ануссад̇и вуд̇д̇аа, нану зса виж̇ж̇аад̇хигаарод̇и жз? аад̣̇игаммигасса сад̇ивасзна ниб̣б̣ад̇д̇ид̇о, ад̇ийд̇ад̇хаммаанам̣ сад̇ияаа висзсаад̇хигаарад̇д̇аа жа. вуд̇д̇ан̃хи ‘‘ануссараамий’’д̇и.
Yasmā atītajāti eva nivāso, tasmā ‘‘atītajātīsū’’ti na vattabbanti ce? Na, jātiyā ekadesepi nivāsavohārasiddhidassanato. Pāḷiyaṃ kiñcāpi ‘‘ekampi jātiṃ dvepi jātiyo’’tiādivacanena sakalajātiyā anussaraṇameva pubbenivāsānussati viya dissati, na evaṃ daṭṭhabbaṃ. Tadekadesānussaraṇampi pubbenivāsānussati evāti dassanatthaṃ, bhummavacanaṃ kataṃ okāsādisaṅgahatthañca. ‘‘Chinnavaṭumakānussaraṇādīsū’’ti ādi-saddena anivutthalokadhātudīparaṭṭhanagaragāmādiggahaṇaṃ veditabbaṃ. Gaṇṭhipade pana ‘‘tesaṃ chinnavaṭumakānaṃ lokuttarasīlādīni na bhagavatā bodhisattakāle viññātānī’’ti vuttaṃ. Atthāpattito lokiyāni viññātānīti āpajjati, taṃ dibbacakkhuñāṇādhikāre ‘‘ariyānaṃ upavādakā’’ti vacanena samentaṃ viya dissati. Na hi ariye apassantassa evaṃ hoti. Kimatthaṃ panettha anussati vuttā, nanu esa vijjādhikāroti ce? Ādikammikassa sativasena nibbattito, atītadhammānaṃ satiyā visesādhikārattā ca. Vuttañhi ‘‘anussarāmī’’ti.
‘‘вад̇д̇амаанзсу виж̇ж̇аана-мад̇ийд̇зсвасса сарад̇и;
‘‘Vattamānesu vijjāna-matītesvassa sarati;
анааг̇ад̇зсу д̇хаммзсу, сарад̇и виж̇ж̇аана бан̣ид̇хий’’д̇и.
Anāgatesu dhammesu, sarati vijjāna paṇidhī’’ti.
аажарияагумаарид̇зна силогоби вуд̇д̇о.
Ācariyakumāritena silokopi vutto.
д̇ад̇т̇а рааг̇з уссаннад̇арз д̇зж̇осам̣ваддо. д̣̇осз аабосам̣ваддо. мохз вааяосам̣ваддо. гзжи ‘‘д̣̇осз д̇зж̇осам̣ваддо, рааг̇з аабосам̣ваддо, мохз вааяосам̣ваддо’’д̇и вад̣̇анд̇и. яасмаа амуд̇раад̇и жид̇д̇ам̣, важанам̣ ваа бхаваад̣̇инияамзна ход̇и, д̇асмаа ‘‘бхавз ваа’’д̇иаад̣̇и. звам̣наамо звам̣г̇од̇д̇од̇и бад̣̇ад̣̇ваязна аж̇жхад̇д̇аб̣ахид̣̇д̇хаамуулагам̣ бан̃н̃ад̇д̇исан̇каад̇ам̣ г̇ожараниваасам̣ д̣̇ийбзд̇и. бавад̇д̇апалабхож̇ано саяам̣бад̇ид̇апалаахааро. жад̇ураасийд̇игаббасахассабарамааяубарияанд̇о ваад̇и бан̣ид̇хаанад̇о буб̣б̣з. бадинивад̇д̇анд̇асса бажжавзгкан̣ам̣ буб̣б̣зниваасаануссад̇ин̃аан̣ам̣ на ход̇и. ‘‘буб̣б̣зниваасаануссад̇ин̃аан̣алаабхийнам̣ банзд̇ам̣ аанубхаавабарид̣̇ийбана’’нд̇и г̇ан̣тибад̣̇з вуд̇д̇ам̣. амуд̇раад̇и зд̇т̇а батамаяож̇анааяам̣ сийхогганд̇авасзна ануссаран̣ам̣ вуд̇д̇ам̣, д̇ан̃жа ко ануломавасзна. ‘‘бадиломавасзнаа’’д̇иби ликанд̇и, д̇ам̣ д̣̇увин̃н̃зяяам̣. сийхогганд̇ам̣ д̣̇ассзд̇ум̣ ‘‘анзгаасу габбагодийсуу’’д̇иаад̣̇и вуд̇д̇ам̣. яат̇аа д̇анд̇и нид̣̇ассанзна бадибад̇д̇исаад̇хааран̣зна паласаад̇хааран̣ад̇ам̣ д̣̇ассзнд̇о б̣раахман̣асса аад̣̇арам̣ ж̇анзд̇и, ад̇д̇аанамзвзгам̣ уггам̣сзд̇ийд̇и важанам̣ ниваарзд̇и. ‘‘саад̇ху ко бана д̇ат̇ааруубаанам̣ арахад̇ам̣ д̣̇ассанам̣ ход̇ий’’д̇и д̇асса буб̣б̣з уббаннажид̇д̇з зва нияож̇зд̇и. батамаа абхиниб̣бхид̣̇аад̇и важанзна авиж̇ж̇ан̣д̣агосасса б̣ахубадалабхаавам̣ д̣̇ассзд̇и, д̇зна адтаг̇ун̣иссарияаад̣̇инаа анабхиниб̣бхид̣̇ам̣ д̣̇ийбзд̇и.
Tattha rāge ussannatare tejosaṃvaṭṭo. Dose āposaṃvaṭṭo. Mohe vāyosaṃvaṭṭo. Keci ‘‘dose tejosaṃvaṭṭo, rāge āposaṃvaṭṭo, mohe vāyosaṃvaṭṭo’’ti vadanti. Yasmā amutrāti cittaṃ, vacanaṃ vā bhavādiniyamena hoti, tasmā ‘‘bhave vā’’tiādi. Evaṃnāmo evaṃgottoti padadvayena ajjhattabahiddhāmūlakaṃ paññattisaṅkhātaṃ gocaranivāsaṃ dīpeti. Pavattaphalabhojano sayaṃpatitaphalāhāro. Caturāsītikappasahassaparamāyupariyanto vāti paṇidhānato pubbe. Paṭinivattantassa paccavekkhaṇaṃ pubbenivāsānussatiñāṇaṃ na hoti. ‘‘Pubbenivāsānussatiñāṇalābhīnaṃ panetaṃ ānubhāvaparidīpana’’nti gaṇṭhipade vuttaṃ. Amutrāti ettha paṭhamayojanāyaṃ sīhokkantavasena anussaraṇaṃ vuttaṃ, tañca kho anulomavasena. ‘‘Paṭilomavasenā’’tipi likhanti, taṃ duviññeyyaṃ. Sīhokkantaṃ dassetuṃ ‘‘anekāsu kappakoṭīsū’’tiādi vuttaṃ. Yathā tanti nidassanena paṭipattisādhāraṇena phalasādhāraṇataṃ dassento brāhmaṇassa ādaraṃ janeti, attānamevekaṃ ukkaṃsetīti vacanaṃ nivāreti. ‘‘Sādhu kho pana tathārūpānaṃ arahataṃ dassanaṃ hotī’’ti tassa pubbe uppannacitte eva niyojeti. Paṭhamā abhinibbhidāti vacanena avijjaṇḍakosassa bahupaṭalabhāvaṃ dasseti, tena aṭṭhaguṇissariyādinā anabhinibbhidaṃ dīpeti.
буб̣б̣зниваасагат̇ааван̣н̣анаа нидтид̇аа.
Pubbenivāsakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / взран̃ж̇аган̣д̣ам̣ • Verañjakaṇḍaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / буб̣б̣зниваасагат̇аа • Pubbenivāsakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / буб̣б̣зниваасагат̇аа • Pubbenivāsakathā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / буб̣б̣зниваасагат̇ааван̣н̣анаа • Pubbenivāsakathāvaṇṇanā
