| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. புப்³பே³ஸம்போ³த⁴ஸுத்தவண்ணனா
2. Pubbesambodhasuttavaṇṇanā
115. து³தியே அயங் பத²வீதா⁴துயா அஸ்ஸாதோ³தி அயங் பத²வீதா⁴துனிஸ்ஸயோ அஸ்ஸாதோ³. ஸ்வாயங் காயங் அப்³பு⁴ன்னாமெத்வா உத³ரங் பஸாரெத்வா, ‘‘இத⁴ மே அங்கு³லங் பவேஸிதுங் வாயமதா²’’தி வா ஹத்த²ங் பஸாரெத்வா, ‘‘இமங் நாமேதுங் வாயமதா²’’தி வா வத³தி, ஏவங் பவத்தானங் வஸேன வேதி³தப்³போ³. அனிச்சாதிஆதீ³ஸு ஹுத்வா அபா⁴வாகாரேன அனிச்சா, படிபீளனாகாரேன து³க்கா², ஸபா⁴வவிக³மாகாரேன விபரிணாமத⁴ம்மா. அயங் பத²வீதா⁴துயா ஆதீ³னவோதி யேன ஆகாரேன ஸா அனிச்சா து³க்கா² விபரிணாமத⁴ம்மா, அயமாகாரோ பத²வீதா⁴துயா ஆதீ³னவோதி அத்தோ². ச²ந்த³ராக³வினயோ ச²ந்த³ராக³ப்பஹானந்தி நிப்³பா³னங் ஆக³ம்ம பத²வீதா⁴துயா ச²ந்த³ராகோ³ வினீயதி சேவ பஹீயதி ச, தஸ்மா நிப்³பா³னமஸ்ஸா நிஸ்ஸரணங்.
115. Dutiye ayaṃ pathavīdhātuyā assādoti ayaṃ pathavīdhātunissayo assādo. Svāyaṃ kāyaṃ abbhunnāmetvā udaraṃ pasāretvā, ‘‘idha me aṅgulaṃ pavesituṃ vāyamathā’’ti vā hatthaṃ pasāretvā, ‘‘imaṃ nāmetuṃ vāyamathā’’ti vā vadati, evaṃ pavattānaṃ vasena veditabbo. Aniccātiādīsu hutvā abhāvākārena aniccā, paṭipīḷanākārena dukkhā, sabhāvavigamākārena vipariṇāmadhammā. Ayaṃ pathavīdhātuyā ādīnavoti yena ākārena sā aniccā dukkhā vipariṇāmadhammā, ayamākāro pathavīdhātuyā ādīnavoti attho. Chandarāgavinayo chandarāgappahānanti nibbānaṃ āgamma pathavīdhātuyā chandarāgo vinīyati ceva pahīyati ca, tasmā nibbānamassā nissaraṇaṃ.
அயங் ஆபோதா⁴துயா அஸ்ஸாதோ³தி அயங் ஆபோதா⁴துனிஸ்ஸயோ அஸ்ஸாதோ³. ஸ்வாயங் அஞ்ஞங் ஆபோதா⁴துயா உபத்³து³தங் தி³ஸ்வா, ‘‘கிங் அயங் நிபன்னகாலதோ பட்டா²ய பஸ்ஸாவட்டா²னாபி⁴முகோ² நிக்க²மதி சேவ பவிஸதி ச, அப்பமத்தகம்பிஸ்ஸ கம்மங் கரொந்தஸ்ஸ ஸேத³திந்தங் வத்த²ங் பீளேதப்³ப³தாகாரங் பாபுணாதி, அனுமோத³னமத்தம்பி கதெ²ந்தஸ்ஸ தாலவண்டங் க³ண்ஹிதப்³ப³ங் ஹோதி, மயங் பன ஸாயங் நிபன்னா பாதோவ உட்ட²ஹாம, மாஸபுண்ணக⁴டோ விய நோ ஸரீரங், மஹாகம்மங் கரொந்தானங் ஸேத³மத்தம்பி நோ ந உப்பஜ்ஜதி, அஸனிஸத்³தே³ன விய த⁴ம்மங் கதெ²ந்தானங் ஸரீரே உஸுமாகாரமத்தம்பி நோ நத்தீ²’’தி ஏவங் பவத்தானங் வஸேன வேதி³தப்³போ³.
Ayaṃ āpodhātuyā assādoti ayaṃ āpodhātunissayo assādo. Svāyaṃ aññaṃ āpodhātuyā upaddutaṃ disvā, ‘‘kiṃ ayaṃ nipannakālato paṭṭhāya passāvaṭṭhānābhimukho nikkhamati ceva pavisati ca, appamattakampissa kammaṃ karontassa sedatintaṃ vatthaṃ pīḷetabbatākāraṃ pāpuṇāti, anumodanamattampi kathentassa tālavaṇṭaṃ gaṇhitabbaṃ hoti, mayaṃ pana sāyaṃ nipannā pātova uṭṭhahāma, māsapuṇṇaghaṭo viya no sarīraṃ, mahākammaṃ karontānaṃ sedamattampi no na uppajjati, asanisaddena viya dhammaṃ kathentānaṃ sarīre usumākāramattampi no natthī’’ti evaṃ pavattānaṃ vasena veditabbo.
அயங் தேஜோதா⁴துயா அஸ்ஸாதோ³தி அயங் தேஜோதா⁴துனிஸ்ஸயோ அஸ்ஸாதோ³. ஸ்வாயங் ஸீதக³ஹணிகே தி³ஸ்வா, ‘‘கிங் இமே கிஞ்சிதே³வ யாகு³ப⁴த்தக²ஜ்ஜமத்தங் அஜ்ஜோ²ஹரித்வா த²த்³த⁴குச்சி²னோ நிஸீதி³த்வா ஸப்³ப³ரத்திங் அங்கா³ரகடாஹங் பரியேஸந்தி, பு²ஸிதமத்தேஸுபி ஸரீரே பதிதேஸு அங்கா³ரகடாஹங் ஒத்த²ரித்வா பாருபித்வாவ நிபஜ்ஜந்தி? மயங் பன அதித²த்³த⁴ம்பி மங்ஸங் வா பூவங் வா கா²தா³ம, குச்சி²பூரங் ப⁴த்தங் பு⁴ஞ்ஜாம, தாவதே³வ நோ ஸப்³ப³ங் பே²ணபிண்டோ³ விய விலீயதி, ஸத்தாஹவத்³த³லிகாய வத்தமானாய ஸரீரே ஸீதானுத³ஹனமத்தம்பி நோ நத்தீ²’’தி ஏவங் பவத்தானங் வஸேன வேதி³தப்³போ³.
Ayaṃtejodhātuyā assādoti ayaṃ tejodhātunissayo assādo. Svāyaṃ sītagahaṇike disvā, ‘‘kiṃ ime kiñcideva yāgubhattakhajjamattaṃ ajjhoharitvā thaddhakucchino nisīditvā sabbarattiṃ aṅgārakaṭāhaṃ pariyesanti, phusitamattesupi sarīre patitesu aṅgārakaṭāhaṃ ottharitvā pārupitvāva nipajjanti? Mayaṃ pana atithaddhampi maṃsaṃ vā pūvaṃ vā khādāma, kucchipūraṃ bhattaṃ bhuñjāma, tāvadeva no sabbaṃ pheṇapiṇḍo viya vilīyati, sattāhavaddalikāya vattamānāya sarīre sītānudahanamattampi no natthī’’ti evaṃ pavattānaṃ vasena veditabbo.
அயங் வாயோதா⁴துயா அஸ்ஸாதோ³தி அயங் வாயோதா⁴துனிஸ்ஸயோ அஸ்ஸாதோ³. ஸ்வாயங் அஞ்ஞே வாதபீ⁴ருகே தி³ஸ்வா, ‘‘இமேஸங் அப்பமத்தகம்பி கம்மங் கரொந்தானங் அனுமோத³னமத்தம்பி கதெ²ந்தானங் ஸரீரங் வாதோ விஜ்ஜ²தி, கா³வுதமத்தம்பி அத்³தா⁴னங் க³தானங் ஹத்த²பாதா³ ஸீத³ந்தி, பிட்டி² ருஜ்ஜதி, குச்சி²வாதஸீஸவாதகண்ணவாதாதீ³ஹி நிச்சுபத்³து³தா தேலபா²ணிதாதீ³னி வாதபே⁴ஸஜ்ஜானேவ கரொந்தா அதினாமெந்தி, அம்ஹாகங் பன மஹாகம்மங் கரொந்தானம்பி தியாமரத்திங் த⁴ம்மங் கதெ²ந்தானம்பி ஏகதி³வஸேனேவ த³ஸ யோஜனானி க³ச்ச²ந்தானம்பி ஹத்த²பாத³ஸங்ஸீத³னமத்தங் வா பிட்டி²ருஜ்ஜனமத்தங் வா ந ஹோதீ’’தி, ஏவங் பவத்தானங் வஸேன வேதி³தப்³போ³. ஏவங் பவத்தா ஹி ஏதா தா⁴துயோ அஸ்ஸாதெ³ந்தி நாம.
Ayaṃvāyodhātuyā assādoti ayaṃ vāyodhātunissayo assādo. Svāyaṃ aññe vātabhīruke disvā, ‘‘imesaṃ appamattakampi kammaṃ karontānaṃ anumodanamattampi kathentānaṃ sarīraṃ vāto vijjhati, gāvutamattampi addhānaṃ gatānaṃ hatthapādā sīdanti, piṭṭhi rujjati, kucchivātasīsavātakaṇṇavātādīhi niccupaddutā telaphāṇitādīni vātabhesajjāneva karontā atināmenti, amhākaṃ pana mahākammaṃ karontānampi tiyāmarattiṃ dhammaṃ kathentānampi ekadivaseneva dasa yojanāni gacchantānampi hatthapādasaṃsīdanamattaṃ vā piṭṭhirujjanamattaṃ vā na hotī’’ti, evaṃ pavattānaṃ vasena veditabbo. Evaṃ pavattā hi etā dhātuyo assādenti nāma.
அப்³ப⁴ஞ்ஞாஸிந்தி அபி⁴விஸிட்டே²ன ஞாணேன அஞ்ஞாஸிங். அனுத்தரங் ஸம்மாஸம்போ³தி⁴ந்தி உத்தரவிரஹிதங் ஸப்³ப³ஸெட்ட²ங் ஸம்மா ஸாமஞ்ச போ³தி⁴ங், அத² வா பஸத்த²ங் ஸுந்த³ரஞ்ச போ³தி⁴ங். போ³தீ⁴தி ருக்கோ²பி மக்³கோ³பி ஸப்³ப³ஞ்ஞுதஞ்ஞாணம்பி நிப்³பா³னம்பி. ‘‘போ³தி⁴ருக்க²மூலே பட²மாபி⁴ஸம்பு³த்³தோ⁴’’தி (மஹாவ॰ 1; உதா³॰ 1) ச ‘‘அந்தரா ச போ³தி⁴ங் அந்தரா ச க³ய’’ந்தி (மஹாவ॰ 11; ம॰நி॰ 1.285) ச ஆக³தட்டா²னேஸு ஹி ருக்கோ² போ³தீ⁴தி வுச்சதி. ‘‘போ³தி⁴ வுச்சதி சதூஸு மக்³கே³ஸு ஞாண’’ந்தி (சூளனி॰ க²க்³க³விஸாணஸுத்தனித்³தே³ஸ 121) ஆக³தட்டா²னே மக்³கோ³. ‘‘பப்போதி போ³தி⁴ங் வரபூ⁴ரிமேத⁴ஸோ’’தி (தீ³॰ நி॰ 3.217) ஆக³தட்டா²னே ஸப்³ப³ஞ்ஞுதஞ்ஞாணங். ‘‘பத்வான போ³தி⁴ங் அமதங் அஸங்க²த’’ந்தி ஆக³தட்டா²னே நிப்³பா³னங். இத⁴ பன ப⁴க³வதோ அரஹத்தமக்³கோ³ அதி⁴ப்பேதோ.
Abbhaññāsinti abhivisiṭṭhena ñāṇena aññāsiṃ. Anuttaraṃ sammāsambodhinti uttaravirahitaṃ sabbaseṭṭhaṃ sammā sāmañca bodhiṃ, atha vā pasatthaṃ sundarañca bodhiṃ. Bodhīti rukkhopi maggopi sabbaññutaññāṇampi nibbānampi. ‘‘Bodhirukkhamūle paṭhamābhisambuddho’’ti (mahāva. 1; udā. 1) ca ‘‘antarā ca bodhiṃ antarā ca gaya’’nti (mahāva. 11; ma.ni. 1.285) ca āgataṭṭhānesu hi rukkho bodhīti vuccati. ‘‘Bodhi vuccati catūsu maggesu ñāṇa’’nti (cūḷani. khaggavisāṇasuttaniddesa 121) āgataṭṭhāne maggo. ‘‘Pappoti bodhiṃ varabhūrimedhaso’’ti (dī. ni. 3.217) āgataṭṭhāne sabbaññutaññāṇaṃ. ‘‘Patvāna bodhiṃ amataṃ asaṅkhata’’nti āgataṭṭhāne nibbānaṃ. Idha pana bhagavato arahattamaggo adhippeto.
ஸாவகானங் அரஹத்தமக்³கோ³ அனுத்தரா போ³தி⁴ ஹோதி, ந ஹோதீதி? ந ஹோதி. கஸ்மா? அஸப்³ப³கு³ணதா³யகத்தா. தேஸஞ்ஹி கஸ்ஸசி அரஹத்தமக்³கோ³ அரஹத்தப²லமேவ தே³தி, கஸ்ஸசி திஸ்ஸோ விஜ்ஜா, கஸ்ஸசி ச² அபி⁴ஞ்ஞா, கஸ்ஸசி சதஸ்ஸோ படிஸம்பி⁴தா³, கஸ்ஸசி ஸாவகபாரமீஞாணங். பச்சேகபு³த்³தா⁴னம்பி பச்சேகபோ³தி⁴ஞாணமேவ தே³தி. பு³த்³தா⁴னங் பன ஸப்³ப³கு³ணஸம்பத்திங் தே³தி அபி⁴ஸேகோ விய ரஞ்ஞோ ஸப்³ப³லோகிஸ்ஸரியபா⁴வங். தஸ்மா அஞ்ஞஸ்ஸ கஸ்ஸசிபி அனுத்தரா போ³தி⁴ ந ஹோதி.
Sāvakānaṃ arahattamaggo anuttarā bodhi hoti, na hotīti? Na hoti. Kasmā? Asabbaguṇadāyakattā. Tesañhi kassaci arahattamaggo arahattaphalameva deti, kassaci tisso vijjā, kassaci cha abhiññā, kassaci catasso paṭisambhidā, kassaci sāvakapāramīñāṇaṃ. Paccekabuddhānampi paccekabodhiñāṇameva deti. Buddhānaṃ pana sabbaguṇasampattiṃ deti abhiseko viya rañño sabbalokissariyabhāvaṃ. Tasmā aññassa kassacipi anuttarā bodhi na hoti.
அபி⁴ஸம்பு³த்³தோ⁴தி பச்சஞ்ஞாஸிந்தி ‘‘அபி⁴ஸம்பு³த்³தோ⁴ அஹங் பத்தோ படிவிஜ்ஜி²த்வா டி²தோ’’தி ஏவங் படிஜானிங். ஞாணஞ்ச பன மே த³ஸ்ஸனங் உத³பாதீ³தி அதி⁴க³தகு³ணத³ஸ்ஸனஸமத்த²ங் பச்சவெக்க²ணஞாணஞ்ச மே உத³பாதி³. அகுப்பா மே விமுத்தீதி ‘‘அயங் மய்ஹங் அரஹத்தப²லவிமுத்தி அகுப்பா’’தி ஏவங் ஞாணங் உத³பாதி³. தத்த² த்³வீஹாகாரேஹி அகுப்பதா வேதி³தப்³பா³ காரணதோ ச ஆரம்மணதோ ச. ஸா ஹி சதூஹி மக்³கே³ஹி ஸமுச்சி²ன்னகிலேஸானங் புன அனிவத்தனதாய காரணதோபி அகுப்பா, அகுப்பத⁴ம்மங் நிப்³பா³னங் ஆரம்மணங் கத்வா பவத்ததாய ஆரம்மணதோபி அகுப்பா. அந்திமாதி பச்சி²மா. நத்தி² தா³னி புனப்³ப⁴வோதி இதா³னி புன அஞ்ஞோ ப⁴வோ நாம நத்தீ²தி.
Abhisambuddhoti paccaññāsinti ‘‘abhisambuddho ahaṃ patto paṭivijjhitvā ṭhito’’ti evaṃ paṭijāniṃ. Ñāṇañca pana me dassanaṃ udapādīti adhigataguṇadassanasamatthaṃ paccavekkhaṇañāṇañca me udapādi. Akuppā me vimuttīti ‘‘ayaṃ mayhaṃ arahattaphalavimutti akuppā’’ti evaṃ ñāṇaṃ udapādi. Tattha dvīhākārehi akuppatā veditabbā kāraṇato ca ārammaṇato ca. Sā hi catūhi maggehi samucchinnakilesānaṃ puna anivattanatāya kāraṇatopi akuppā, akuppadhammaṃ nibbānaṃ ārammaṇaṃ katvā pavattatāya ārammaṇatopi akuppā. Antimāti pacchimā. Natthi dāni punabbhavoti idāni puna añño bhavo nāma natthīti.
இமஸ்மிங் ஸுத்தே சத்தாரி ஸச்சானி கதி²தானி. கத²ங்? சதூஸு ஹி தா⁴தூஸு அஸ்ஸாதோ³ ஸமுத³யஸச்சங், ஆதீ³னவோ து³க்க²ஸச்சங், நிஸ்ஸரணங் நிரோத⁴ஸச்சங், நிரோத⁴ப்பஜானநோ மக்³கோ³ மக்³க³ஸச்சங். வித்தா²ரவஸேனபி கதே²துங் வட்டதியேவ. எத்த² ஹி யங் பத²வீதா⁴துங் படிச்ச உப்பஜ்ஜதி ஸுக²ங் ஸோமனஸ்ஸங், அயங் பத²வீதா⁴துயா அஸ்ஸாதோ³தி பஹானபடிவேதோ⁴ ஸமுத³யஸச்சங். யா பத²வீதா⁴து அனிச்சா து³க்கா² விபரிணாமத⁴ம்மா, அயங் பத²வீதா⁴துயா, ஆதீ³னவோதி பரிஞ்ஞாபடிவேதோ⁴ து³க்க²ஸச்சங். யோ பத²வீதா⁴துயா ச²ந்த³ராக³வினயோ ச²ந்த³ராக³ப்பஹானங், இத³ங் பத²வீதா⁴துயா நிஸ்ஸரணந்தி ஸச்சி²கிரியாபடிவேதோ⁴ நிரோத⁴ஸச்சங். யா இமேஸு தீஸு டா²னேஸு தி³ட்டி² ஸங்கப்போ வாசா கம்மந்தோ ஆஜீவோ வாயாமோ ஸதி ஸமாதி⁴, அயங் பா⁴வனாபடிவேதோ⁴ மக்³க³ஸச்சந்தி. து³தியங்.
Imasmiṃ sutte cattāri saccāni kathitāni. Kathaṃ? Catūsu hi dhātūsu assādo samudayasaccaṃ, ādīnavo dukkhasaccaṃ, nissaraṇaṃ nirodhasaccaṃ, nirodhappajānano maggo maggasaccaṃ. Vitthāravasenapi kathetuṃ vaṭṭatiyeva. Ettha hi yaṃ pathavīdhātuṃ paṭicca uppajjati sukhaṃ somanassaṃ, ayaṃ pathavīdhātuyā assādoti pahānapaṭivedho samudayasaccaṃ. Yā pathavīdhātu aniccā dukkhā vipariṇāmadhammā, ayaṃ pathavīdhātuyā, ādīnavoti pariññāpaṭivedho dukkhasaccaṃ. Yo pathavīdhātuyā chandarāgavinayo chandarāgappahānaṃ, idaṃ pathavīdhātuyā nissaraṇanti sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi, ayaṃ bhāvanāpaṭivedho maggasaccanti. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. புப்³பே³ஸம்போ³த⁴ஸுத்தங் • 2. Pubbesambodhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. புப்³பே³ஸம்போ³த⁴ஸுத்தவண்ணனா • 2. Pubbesambodhasuttavaṇṇanā
