| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. পুব্বেসম্বোধসুত্তৰণ্ণনা
2. Pubbesambodhasuttavaṇṇanā
১১৫. অযং পথৰীধাতুং নিস্সায তং আরব্ভ পৰত্তো অস্সাদো। এৰং পৰত্তানন্তি এৰং কাযে পভাৰস্স পৰেদনৰসেনেৰ পৰত্তানং। হুত্ৰা অভাৰাকারেনাতি পুব্বে অৰিজ্জমানা পচ্চযসামগ্গিযা হুত্ৰা উপ্পজ্জিত্ৰা পুন ভঙ্গুপগমনতো উদ্ধং অভাৰাকারেন। ন নিচ্চাতি অনিচ্চা অদ্ধুৰত্তা, ধুৰং নিচ্চং। পটিপীল়নাকারেনাতি উদযব্বযৰসেন অভিণ্হং পীল়নাকারেন দুক্খট্ঠেন। সভাৰৰিগমাকারেনাতি অত্তনো সভাৰস্স ৰিগচ্ছনাকারেন। সভাৰধম্মা হি অপ্পমত্তং খণং পত্ৰা নিরুজ্ঝন্তি। তস্মা তে ‘‘জরায মরণেন চা’’তি দ্ৰেধা ৰিপরিণমন্তি। তেনাহ ‘‘ৰিপরিণামধম্মা’’তি। আদীনং ৰাতি পৰত্তেতীতি আদীনৰো, পরমকাপঞ্ঞতা। ৰিনীযতীতি ৰূপসমীযতি। অচ্চন্তপ্পহানৰসেন নিস্সরতি এতেনাতি নিস্সরণং।
115. Ayaṃ pathavīdhātuṃ nissāya taṃ ārabbha pavatto assādo. Evaṃ pavattānanti evaṃ kāye pabhāvassa pavedanavaseneva pavattānaṃ. Hutvā abhāvākārenāti pubbe avijjamānā paccayasāmaggiyā hutvā uppajjitvā puna bhaṅgupagamanato uddhaṃ abhāvākārena. Na niccāti aniccā addhuvattā, dhuvaṃ niccaṃ. Paṭipīḷanākārenāti udayabbayavasena abhiṇhaṃ pīḷanākārena dukkhaṭṭhena. Sabhāvavigamākārenāti attano sabhāvassa vigacchanākārena. Sabhāvadhammā hi appamattaṃ khaṇaṃ patvā nirujjhanti. Tasmā te ‘‘jarāya maraṇena cā’’ti dvedhā vipariṇamanti. Tenāha ‘‘vipariṇāmadhammā’’ti. Ādīnaṃ vāti pavattetīti ādīnavo, paramakāpaññatā. Vinīyatīti vūpasamīyati. Accantappahānavasena nissarati etenāti nissaraṇaṃ.
সাযং নিপন্না সব্বরত্তিং খেপেত্ৰা পাতো উট্ঠহাম, মাসপুণ্ণঘটো ৰিয নো সরীরং নিস্সন্দাভাৰতো।
Sāyaṃ nipannā sabbarattiṃ khepetvā pāto uṭṭhahāma, māsapuṇṇaghaṭo viya no sarīraṃ nissandābhāvato.
ফুসিতমত্তেসুপীতি উদকস্স ফুসিতমত্তেসুপি।
Phusitamattesupīti udakassa phusitamattesupi.
অতিনামেন্তি কালং। এৰং ৰুত্তনযেন পৰত্তা পুগ্গলা এতা পথৰীধাতুআদযো অস্সাদেন্তি নাম অভিরতিৰসেন তত্থ আকঙ্খুপ্পাদনতো।
Atināmenti kālaṃ. Evaṃ vuttanayena pavattā puggalā etā pathavīdhātuādayo assādenti nāma abhirativasena tattha ākaṅkhuppādanato.
অভিৰিসিট্ঠেন ঞাণেনাতি অগ্গমগ্গঞাণেন। রুক্খো বোধি ‘‘বুজ্ঝতি এত্থা’’তি কত্ৰা। মগ্গো বোধি ‘‘বুজ্ঝতি এতেনা’’তি কত্ৰা। সব্বঞ্ঞুতঞ্ঞাণং বোধি সম্মা সামঞ্চ সব্বধম্মানং বুজ্ঝনতো। নিব্বানং বোধি বুজ্ঝিতব্বতো। তেসন্তি নিদ্ধারণে সামিৰচনং। সাৰকপারমীঞাণন্তি সাৰকপারমীঞাণং যাথাৰতো দস্সনৰত্থু।
Abhivisiṭṭhena ñāṇenāti aggamaggañāṇena. Rukkho bodhi ‘‘bujjhati etthā’’ti katvā. Maggo bodhi ‘‘bujjhati etenā’’ti katvā. Sabbaññutaññāṇaṃ bodhi sammā sāmañca sabbadhammānaṃ bujjhanato. Nibbānaṃ bodhi bujjhitabbato. Tesanti niddhāraṇe sāmivacanaṃ. Sāvakapāramīñāṇanti sāvakapāramīñāṇaṃ yāthāvato dassanavatthu.
অকুপ্পাতি পটিপক্খেহি অকোপেতব্বো। কারণতোতি অরিযমগ্গতো। ততো হিস্স অকুপ্পতা। তেনাহ ‘‘সা হী’’তিআদী। আরম্মণতোতি নিব্বানারম্মণতো নিব্বানারম্মণানং লোকিযসমাপত্তীনং অভাৰতো।
Akuppāti paṭipakkhehi akopetabbo. Kāraṇatoti ariyamaggato. Tato hissa akuppatā. Tenāha ‘‘sā hī’’tiādī. Ārammaṇatoti nibbānārammaṇato nibbānārammaṇānaṃ lokiyasamāpattīnaṃ abhāvato.
ৰিত্থারৰসেনাতি একেকধাতুৰসেনাতি ৰদন্তি, একেকিস্সা পন ধাতুযা লক্খণৰিভত্তিদস্সনৰসেন। যন্তি হেতুঅত্থে নিপাতো, যং নিমিত্তন্তি অত্থো। অস্সাদেতি এতেনাতি অস্সাদো, তণ্হা। অযং পথৰীধাতুযা অস্সাদোতি এত্থ অযং-সদ্দো ‘‘পহানপটিৰেধো’’তি এত্থাপি আনেত্ৰা সম্বন্ধিতব্বো ‘‘অযং পহানপটিৰেধো পটিৰিজ্ঝিতব্বট্ঠেন সমুদযসচ্চ’’ন্তি। এস নযো সেসসচ্চেসুপি। যাতি যথাৰুত্তেসু অস্সাদো আদীনৰো নিস্সরণন্তি ইমেসু তীসু ঠানেসু পৰত্তা যা দিট্ঠি…পে॰… যো সমাধি, অযং ভাৰনাপটিৰেধো মগ্গসচ্চন্তি ৰুত্তনযেনেৰ যোজেতব্বং।
Vitthāravasenāti ekekadhātuvasenāti vadanti, ekekissā pana dhātuyā lakkhaṇavibhattidassanavasena. Yanti hetuatthe nipāto, yaṃ nimittanti attho. Assādeti etenāti assādo, taṇhā. Ayaṃ pathavīdhātuyā assādoti ettha ayaṃ-saddo ‘‘pahānapaṭivedho’’ti etthāpi ānetvā sambandhitabbo ‘‘ayaṃ pahānapaṭivedho paṭivijjhitabbaṭṭhena samudayasacca’’nti. Esa nayo sesasaccesupi. Yāti yathāvuttesu assādo ādīnavo nissaraṇanti imesu tīsu ṭhānesu pavattā yā diṭṭhi…pe… yo samādhi, ayaṃ bhāvanāpaṭivedho maggasaccanti vuttanayeneva yojetabbaṃ.
পুব্বেসম্বোধসুত্তৰণ্ণনা নিট্ঠিতা।
Pubbesambodhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. পুব্বেসম্বোধসুত্তং • 2. Pubbesambodhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. পুব্বেসম্বোধসুত্তৰণ্ণনা • 2. Pubbesambodhasuttavaṇṇanā
