༡. པུབྦེཝསམྦོདྷསུཏྟཾ

1. Pubbevasambodhasuttaṃ

༡༠༤. ‘‘པུབྦེཝ མེ, བྷིཀྑཝེ, སམྦོདྷཱ ཨནབྷིསམྦུདྡྷསྶ བོདྷིསཏྟསྶེཝ སཏོ ཨེཏདཧོསི – ‘ཀོ ནུ ཁོ ལོཀེ ཨསྶཱདོ, ཀོ ཨཱདཱིནཝོ, ཀིཾ ནིསྶརཎ’ནྟི? ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཡཾ ཁོ ལོཀཾ ¹ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ལོཀེ ཨསྶཱདོ། ཡཾ ལོཀོ ² ཨནིཙྩོ དུཀྑོ ཝིཔརིཎཱམདྷམྨོ, ཨཡཾ ལོཀེ ཨཱདཱིནཝོ། ཡོ ལོཀེ ཚནྡརཱགཝིནཡོ ཚནྡརཱགཔྤཧཱནཾ, ཨིདཾ ལོཀེ ནིསྶརཎ’ནྟི ³། ཡཱཝཀཱིཝཉྩཱཧཾ, བྷིཀྑཝེ, ཨེཝཾ ལོཀསྶ ཨསྶཱདཉྩ ཨསྶཱདཏོ ཨཱདཱིནཝཉྩ ཨཱདཱིནཝཏོ ནིསྶརཎཉྩ ནིསྶརཎཏོ ཡཐཱབྷཱུཏཾ ནཱབྦྷཉྙཱསིཾ, ནེཝ ཏཱཝཱཧཾ, བྷིཀྑཝེ, སདེཝཀེ ལོཀེ སམཱརཀེ སབྲཧྨཀེ སསྶམཎབྲཱཧྨཎིཡཱ པཛཱཡ སདེཝམནུསྶཱཡ ‘ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ’ཏི ⁴ པཙྩཉྙཱསིཾ། ཡཏོ ཙ ཁྭཱཧཾ ⁵, བྷིཀྑཝེ, ཨེཝཾ ལོཀསྶ ཨསྶཱདཉྩ ཨསྶཱདཏོ ཨཱདཱིནཝཉྩ ཨཱདཱིནཝཏོ ནིསྶརཎཉྩ ནིསྶརཎཏོ ཡཐཱབྷཱུཏཾ ཨབྦྷཉྙཱསིཾ, ཨཐཱཧཾ, བྷིཀྑཝེ, སདེཝཀེ ལོཀེ སམཱརཀེ སབྲཧྨཀེ སསྶམཎབྲཱཧྨཎིཡཱ པཛཱཡ སདེཝམནུསྶཱཡ ‘ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ’ཏི པཙྩཉྙཱསིཾ། ཉཱཎཉྩ པན མེ དསྶནཾ ཨུདཔཱདི – ‘ཨཀུཔྤཱ མེ ཝིམུཏྟི ⁶, ཨཡམནྟིམཱ ཛཱཏི, ནཏྠི དཱནི པུནབྦྷཝོ’’’ཏི། པཋམཾ།

104. ‘‘Pubbeva me, bhikkhave, sambodhā anabhisambuddhassa bodhisattasseva sato etadahosi – ‘ko nu kho loke assādo, ko ādīnavo, kiṃ nissaraṇa’nti? Tassa mayhaṃ, bhikkhave, etadahosi – ‘yaṃ kho lokaṃ ⁷ paṭicca uppajjati sukhaṃ somanassaṃ, ayaṃ loke assādo. Yaṃ loko ⁸ anicco dukkho vipariṇāmadhammo, ayaṃ loke ādīnavo. Yo loke chandarāgavinayo chandarāgappahānaṃ, idaṃ loke nissaraṇa’nti ⁹. Yāvakīvañcāhaṃ, bhikkhave, evaṃ lokassa assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ, neva tāvāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti ¹⁰ paccaññāsiṃ. Yato ca khvāhaṃ ¹¹, bhikkhave, evaṃ lokassa assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsiṃ, athāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti paccaññāsiṃ. Ñāṇañca pana me dassanaṃ udapādi – ‘akuppā me vimutti ¹², ayamantimā jāti, natthi dāni punabbhavo’’’ti. Paṭhamaṃ.

Next: ༢. པཋམཨསྶཱདསུཏྟཾ • 2. Paṭhamaassādasuttaṃ

Footnotes:

1. ལོཀེ (སཱི॰ སྱཱ॰ ཀཾ॰ པཱི॰)

2. ལོཀེ (པཱི॰ ཀ॰)

3. ལོཀནིསྶརཎཾ (ཨཊྛ॰) ‘‘ལོཀེ ནིསྶརཎ’’ནྟི པདེན སཾསནྡིཏབྦཾ

4. ཨབྷིསམྦུདྡྷོ (སཱི॰ སྱཱ॰ ཀཾ॰ ཀ॰)

5. ཁོ ཨཧཾ (སཱི॰ པཱི॰), ཁོཧཾ (སྱཱ॰ ཀཾ॰ ཀ॰)

6. ཙེཏོཝིམུཏྟི (སཱི॰ པཱི॰ ཀ॰)

7. loke (sī. syā. kaṃ. pī.)

8. loke (pī. ka.)

9. lokanissaraṇaṃ (aṭṭha.) ‘‘loke nissaraṇa’’nti padena saṃsanditabbaṃ

10. abhisambuddho (sī. syā. kaṃ. ka.)

11. kho ahaṃ (sī. pī.), khohaṃ (syā. kaṃ. ka.)

12. cetovimutti (sī. pī. ka.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. པུབྦེཝསམྦོདྷསུཏྟཝཎྞནཱ • 1. Pubbevasambodhasuttavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༣. པུབྦེཝསམྦོདྷསུཏྟཱདིཝཎྞནཱ • 1-3. Pubbevasambodhasuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact