| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ததியபண்ணாஸகங்
3. Tatiyapaṇṇāsakaṃ
(11) 1. ஸம்போ³த⁴வக்³கோ³
(11) 1. Sambodhavaggo
1. புப்³பே³வஸம்போ³த⁴ஸுத்தவண்ணனா
1. Pubbevasambodhasuttavaṇṇanā
104. ததியஸ்ஸ பட²மே புப்³பே³வ ஸம்போ³தா⁴தி ஸம்போ³தி⁴தோ புப்³பே³வ, அரியமக்³க³ப்பத்திதோ அபரபா⁴கே³யேவாதி வுத்தங் ஹோதி. அனபி⁴ஸம்பு³த்³த⁴ஸ்ஸாதி அப்படிவித்³த⁴சதுஸச்சஸ்ஸ. போ³தி⁴ஸத்தஸ்ஸேவ ஸதோதி பு³ஜ்ஜ²னகஸத்தஸ்ஸேவ ஸதோ, ஸம்மாஸம்போ³தி⁴ங் அதி⁴க³ந்துங் ஆரப⁴ந்தஸ்ஸேவ ஸதோ, ஸம்போ³தி⁴யா வா ஸத்தஸ்ஸேவ லக்³க³ஸ்ஸேவ ஸதோ. தீ³பங்கரஸ்ஸ ஹி ப⁴க³வதோ பாத³மூலே அட்ட²த⁴ம்மஸமோதா⁴னேன அபி⁴னீஹாரஸமித்³தி⁴தோ பபு⁴தி ததா²க³தோ ஸம்மாஸம்போ³தி⁴ங் ஸத்தோ லக்³கோ³ ‘‘பத்தப்³பா³ மயா ஏஸா’’தி தத³தி⁴க³மாய பரக்கமங் அமுஞ்சந்தோயேவ ஆக³தோ, தஸ்மா போ³தி⁴ஸத்தோதி வுச்சதி. கோ நு கோ²தி கதமோ நு கோ². லோகோதி ஸங்கா²ரலோகோ. அஸ்ஸாதோ³தி மது⁴ராகாரோ. ஆதீ³னவோதி அனபி⁴னந்தி³தப்³பா³காரோ. தஸ்ஸ மய்ஹந்தி தஸ்ஸ ஏவங் போ³தி⁴ஸத்தஸ்ஸேவ ஸதோ மய்ஹங். ச²ந்த³ராக³வினயோ ச²ந்த³ராக³ப்பஹானந்தி நிப்³பா³னங் ஆக³ம்ம ஆரப்³ப⁴ படிச்ச ச²ந்த³ராகோ³ வினயங் க³ச்ச²தி பஹீயதி, தஸ்மா நிப்³பா³னங் ‘‘ச²ந்த³ராக³வினயோ ச²ந்த³ராக³ப்பஹான’’ந்தி வுச்சதி. இத³ங் லோகனிஸ்ஸரணந்தி இத³ங் நிப்³பா³னங் லோகதோ நிஸ்ஸடத்தா லோகனிஸ்ஸரணந்தி வுச்சதி. யாவகீவந்தி யத்தகங் பமாணங் காலங். அப்³ப⁴ஞ்ஞாஸிந்தி அபி⁴விஸிட்டே²ன அரியமக்³க³ஞாணேன அஞ்ஞாஸிங். ஞாணஞ்ச பன மே த³ஸ்ஸனந்தி த்³வீஹிபி பதே³ஹி பச்சவெக்க²ணஞாணங் வுத்தங். ஸேஸமெத்த² உத்தானமேவாதி.
104. Tatiyassa paṭhame pubbeva sambodhāti sambodhito pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sato, sammāsambodhiṃ adhigantuṃ ārabhantasseva sato, sambodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato sammāsambodhiṃ satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Ko nu khoti katamo nu kho. Lokoti saṅkhāraloko. Assādoti madhurākāro. Ādīnavoti anabhinanditabbākāro. Tassa mayhanti tassa evaṃ bodhisattasseva sato mayhaṃ. Chandarāgavinayo chandarāgappahānanti nibbānaṃ āgamma ārabbha paṭicca chandarāgo vinayaṃ gacchati pahīyati, tasmā nibbānaṃ ‘‘chandarāgavinayo chandarāgappahāna’’nti vuccati. Idaṃ lokanissaraṇanti idaṃ nibbānaṃ lokato nissaṭattā lokanissaraṇanti vuccati. Yāvakīvanti yattakaṃ pamāṇaṃ kālaṃ. Abbhaññāsinti abhivisiṭṭhena ariyamaggañāṇena aññāsiṃ. Ñāṇañca pana me dassananti dvīhipi padehi paccavekkhaṇañāṇaṃ vuttaṃ. Sesamettha uttānamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. புப்³பே³வஸம்போ³த⁴ஸுத்தங் • 1. Pubbevasambodhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-3. புப்³பே³வஸம்போ³த⁴ஸுத்தாதி³வண்ணனா • 1-3. Pubbevasambodhasuttādivaṇṇanā
