| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৩. ততিযপণ্ণাসকং
3. Tatiyapaṇṇāsakaṃ
(১১) ১. সম্বোধৰগ্গো
(11) 1. Sambodhavaggo
১. পুব্বেৰসম্বোধসুত্তৰণ্ণনা
1. Pubbevasambodhasuttavaṇṇanā
১০৪. ততিযস্স পঠমে পুব্বেৰ সম্বোধাতি সম্বোধিতো পুব্বেৰ, অরিযমগ্গপ্পত্তিতো অপরভাগেযেৰাতি ৰুত্তং হোতি। অনভিসম্বুদ্ধস্সাতি অপ্পটিৰিদ্ধচতুসচ্চস্স। বোধিসত্তস্সেৰ সতোতি বুজ্ঝনকসত্তস্সেৰ সতো, সম্মাসম্বোধিং অধিগন্তুং আরভন্তস্সেৰ সতো, সম্বোধিযা ৰা সত্তস্সেৰ লগ্গস্সেৰ সতো। দীপঙ্করস্স হি ভগৰতো পাদমূলে অট্ঠধম্মসমোধানেন অভিনীহারসমিদ্ধিতো পভুতি তথাগতো সম্মাসম্বোধিং সত্তো লগ্গো ‘‘পত্তব্বা মযা এসা’’তি তদধিগমায পরক্কমং অমুঞ্চন্তোযেৰ আগতো, তস্মা বোধিসত্তোতি ৰুচ্চতি। কো নু খোতি কতমো নু খো। লোকোতি সঙ্খারলোকো। অস্সাদোতি মধুরাকারো। আদীনৰোতি অনভিনন্দিতব্বাকারো। তস্স ময্হন্তি তস্স এৰং বোধিসত্তস্সেৰ সতো ময্হং। ছন্দরাগৰিনযো ছন্দরাগপ্পহানন্তি নিব্বানং আগম্ম আরব্ভ পটিচ্চ ছন্দরাগো ৰিনযং গচ্ছতি পহীযতি, তস্মা নিব্বানং ‘‘ছন্দরাগৰিনযো ছন্দরাগপ্পহান’’ন্তি ৰুচ্চতি। ইদং লোকনিস্সরণন্তি ইদং নিব্বানং লোকতো নিস্সটত্তা লোকনিস্সরণন্তি ৰুচ্চতি। যাৰকীৰন্তি যত্তকং পমাণং কালং। অব্ভঞ্ঞাসিন্তি অভিৰিসিট্ঠেন অরিযমগ্গঞাণেন অঞ্ঞাসিং। ঞাণঞ্চ পন মে দস্সনন্তি দ্ৰীহিপি পদেহি পচ্চৰেক্খণঞাণং ৰুত্তং। সেসমেত্থ উত্তানমেৰাতি।
104. Tatiyassa paṭhame pubbeva sambodhāti sambodhito pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sato, sammāsambodhiṃ adhigantuṃ ārabhantasseva sato, sambodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato sammāsambodhiṃ satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Ko nu khoti katamo nu kho. Lokoti saṅkhāraloko. Assādoti madhurākāro. Ādīnavoti anabhinanditabbākāro. Tassa mayhanti tassa evaṃ bodhisattasseva sato mayhaṃ. Chandarāgavinayo chandarāgappahānanti nibbānaṃ āgamma ārabbha paṭicca chandarāgo vinayaṃ gacchati pahīyati, tasmā nibbānaṃ ‘‘chandarāgavinayo chandarāgappahāna’’nti vuccati. Idaṃ lokanissaraṇanti idaṃ nibbānaṃ lokato nissaṭattā lokanissaraṇanti vuccati. Yāvakīvanti yattakaṃ pamāṇaṃ kālaṃ. Abbhaññāsinti abhivisiṭṭhena ariyamaggañāṇena aññāsiṃ. Ñāṇañca pana me dassananti dvīhipi padehi paccavekkhaṇañāṇaṃ vuttaṃ. Sesamettha uttānamevāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. পুব্বেৰসম্বোধসুত্তং • 1. Pubbevasambodhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৩. পুব্বেৰসম্বোধসুত্তাদিৰণ্ণনা • 1-3. Pubbevasambodhasuttādivaṇṇanā
