| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. තතියපණ්‌ණාසකං
3. Tatiyapaṇṇāsakaṃ
(11) 1. සම්‌බොධවග්‌ගො
(11) 1. Sambodhavaggo
1. පුබ්‌බෙවසම්‌බොධසුත්‌තවණ්‌ණනා
1. Pubbevasambodhasuttavaṇṇanā
104. තතියස්‌ස පඨමෙ පුබ්‌බෙව සම්‌බොධාති සම්‌බොධිතො පුබ්‌බෙව, අරියමග්‌ගප්‌පත්‌තිතො අපරභාගෙයෙවාති වුත්‌තං හොති. අනභිසම්‌බුද්‌ධස්‌සාති අප්‌පටිවිද්‌ධචතුසච්‌චස්‌ස. බොධිසත්‌තස්‌සෙව සතොති බුජ්‌ඣනකසත්‌තස්‌සෙව සතො, සම්‌මාසම්‌බොධිං අධිගන්‌තුං ආරභන්‌තස්‌සෙව සතො, සම්‌බොධියා වා සත්‌තස්‌සෙව ලග්‌ගස්‌සෙව සතො. දීපඞ්‌කරස්‌ස හි භගවතො පාදමූලෙ අට්‌ඨධම්‌මසමොධානෙන අභිනීහාරසමිද්‌ධිතො පභුති තථාගතො සම්‌මාසම්‌බොධිං සත්‌තො ලග්‌ගො ‘‘පත්‌තබ්‌බා මයා එසා’’ති තදධිගමාය පරක්‌කමං අමුඤ්‌චන්‌තොයෙව ආගතො, තස්‌මා බොධිසත්‌තොති වුච්‌චති. කො නු ඛොති කතමො නු ඛො. ලොකොති සඞ්‌ඛාරලොකො. අස්‌සාදොති මධුරාකාරො. ආදීනවොති අනභිනන්‌දිතබ්‌බාකාරො. තස්‌ස මය්‌හන්‌ති තස්‌ස එවං බොධිසත්‌තස්‌සෙව සතො මය්‌හං. ඡන්‌දරාගවිනයො ඡන්‌දරාගප්‌පහානන්‌ති නිබ්‌බානං ආගම්‌ම ආරබ්‌භ පටිච්‌ච ඡන්‌දරාගො විනයං ගච්‌ඡති පහීයති, තස්‌මා නිබ්‌බානං ‘‘ඡන්‌දරාගවිනයො ඡන්‌දරාගප්‌පහාන’’න්‌ති වුච්‌චති. ඉදං ලොකනිස්‌සරණන්‌ති ඉදං නිබ්‌බානං ලොකතො නිස්‌සටත්‌තා ලොකනිස්‌සරණන්‌ති වුච්‌චති. යාවකීවන්‌ති යත්‌තකං පමාණං කාලං. අබ්‌භඤ්‌ඤාසින්‌ති අභිවිසිට්‌ඨෙන අරියමග්‌ගඤාණෙන අඤ්‌ඤාසිං. ඤාණඤ්‌ච පන මෙ දස්‌සනන්‌ති ද්‌වීහිපි පදෙහි පච්‌චවෙක්‌ඛණඤාණං වුත්‌තං. සෙසමෙත්‌ථ උත්‌තානමෙවාති.
104. Tatiyassa paṭhame pubbeva sambodhāti sambodhito pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sato, sammāsambodhiṃ adhigantuṃ ārabhantasseva sato, sambodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato sammāsambodhiṃ satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Ko nu khoti katamo nu kho. Lokoti saṅkhāraloko. Assādoti madhurākāro. Ādīnavoti anabhinanditabbākāro. Tassa mayhanti tassa evaṃ bodhisattasseva sato mayhaṃ. Chandarāgavinayo chandarāgappahānanti nibbānaṃ āgamma ārabbha paṭicca chandarāgo vinayaṃ gacchati pahīyati, tasmā nibbānaṃ ‘‘chandarāgavinayo chandarāgappahāna’’nti vuccati. Idaṃ lokanissaraṇanti idaṃ nibbānaṃ lokato nissaṭattā lokanissaraṇanti vuccati. Yāvakīvanti yattakaṃ pamāṇaṃ kālaṃ. Abbhaññāsinti abhivisiṭṭhena ariyamaggañāṇena aññāsiṃ. Ñāṇañca pana me dassananti dvīhipi padehi paccavekkhaṇañāṇaṃ vuttaṃ. Sesamettha uttānamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. පුබ්‌බෙවසම්‌බොධසුත්‌තං • 1. Pubbevasambodhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-3. පුබ්‌බෙවසම්‌බොධසුත්‌තාදිවණ්‌ණනා • 1-3. Pubbevasambodhasuttādivaṇṇanā
