| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੩. ਤਤਿਯਪਣ੍ਣਾਸਕਂ
3. Tatiyapaṇṇāsakaṃ
(੧੧) ੧. ਸਮ੍ਬੋਧવਗ੍ਗੋ
(11) 1. Sambodhavaggo
੧. ਪੁਬ੍ਬੇવਸਮ੍ਬੋਧਸੁਤ੍ਤવਣ੍ਣਨਾ
1. Pubbevasambodhasuttavaṇṇanā
੧੦੪. ਤਤਿਯਸ੍ਸ ਪਠਮੇ ਪੁਬ੍ਬੇવ ਸਮ੍ਬੋਧਾਤਿ ਸਮ੍ਬੋਧਿਤੋ ਪੁਬ੍ਬੇવ, ਅਰਿਯਮਗ੍ਗਪ੍ਪਤ੍ਤਿਤੋ ਅਪਰਭਾਗੇਯੇવਾਤਿ વੁਤ੍ਤਂ ਹੋਤਿ। ਅਨਭਿਸਮ੍ਬੁਦ੍ਧਸ੍ਸਾਤਿ ਅਪ੍ਪਟਿવਿਦ੍ਧਚਤੁਸਚ੍ਚਸ੍ਸ। ਬੋਧਿਸਤ੍ਤਸ੍ਸੇવ ਸਤੋਤਿ ਬੁਜ੍ਝਨਕਸਤ੍ਤਸ੍ਸੇવ ਸਤੋ, ਸਮ੍ਮਾਸਮ੍ਬੋਧਿਂ ਅਧਿਗਨ੍ਤੁਂ ਆਰਭਨ੍ਤਸ੍ਸੇવ ਸਤੋ, ਸਮ੍ਬੋਧਿਯਾ વਾ ਸਤ੍ਤਸ੍ਸੇવ ਲਗ੍ਗਸ੍ਸੇવ ਸਤੋ। ਦੀਪਙ੍ਕਰਸ੍ਸ ਹਿ ਭਗવਤੋ ਪਾਦਮੂਲੇ ਅਟ੍ਠਧਮ੍ਮਸਮੋਧਾਨੇਨ ਅਭਿਨੀਹਾਰਸਮਿਦ੍ਧਿਤੋ ਪਭੁਤਿ ਤਥਾਗਤੋ ਸਮ੍ਮਾਸਮ੍ਬੋਧਿਂ ਸਤ੍ਤੋ ਲਗ੍ਗੋ ‘‘ਪਤ੍ਤਬ੍ਬਾ ਮਯਾ ਏਸਾ’’ਤਿ ਤਦਧਿਗਮਾਯ ਪਰਕ੍ਕਮਂ ਅਮੁਞ੍ਚਨ੍ਤੋਯੇવ ਆਗਤੋ, ਤਸ੍ਮਾ ਬੋਧਿਸਤ੍ਤੋਤਿ વੁਚ੍ਚਤਿ। ਕੋ ਨੁ ਖੋਤਿ ਕਤਮੋ ਨੁ ਖੋ। ਲੋਕੋਤਿ ਸਙ੍ਖਾਰਲੋਕੋ। ਅਸ੍ਸਾਦੋਤਿ ਮਧੁਰਾਕਾਰੋ। ਆਦੀਨવੋਤਿ ਅਨਭਿਨਨ੍ਦਿਤਬ੍ਬਾਕਾਰੋ। ਤਸ੍ਸ ਮਯ੍ਹਨ੍ਤਿ ਤਸ੍ਸ ਏવਂ ਬੋਧਿਸਤ੍ਤਸ੍ਸੇવ ਸਤੋ ਮਯ੍ਹਂ। ਛਨ੍ਦਰਾਗવਿਨਯੋ ਛਨ੍ਦਰਾਗਪ੍ਪਹਾਨਨ੍ਤਿ ਨਿਬ੍ਬਾਨਂ ਆਗਮ੍ਮ ਆਰਬ੍ਭ ਪਟਿਚ੍ਚ ਛਨ੍ਦਰਾਗੋ વਿਨਯਂ ਗਚ੍ਛਤਿ ਪਹੀਯਤਿ, ਤਸ੍ਮਾ ਨਿਬ੍ਬਾਨਂ ‘‘ਛਨ੍ਦਰਾਗવਿਨਯੋ ਛਨ੍ਦਰਾਗਪ੍ਪਹਾਨ’’ਨ੍ਤਿ વੁਚ੍ਚਤਿ। ਇਦਂ ਲੋਕਨਿਸ੍ਸਰਣਨ੍ਤਿ ਇਦਂ ਨਿਬ੍ਬਾਨਂ ਲੋਕਤੋ ਨਿਸ੍ਸਟਤ੍ਤਾ ਲੋਕਨਿਸ੍ਸਰਣਨ੍ਤਿ વੁਚ੍ਚਤਿ। ਯਾવਕੀવਨ੍ਤਿ ਯਤ੍ਤਕਂ ਪਮਾਣਂ ਕਾਲਂ। ਅਬ੍ਭਞ੍ਞਾਸਿਨ੍ਤਿ ਅਭਿવਿਸਿਟ੍ਠੇਨ ਅਰਿਯਮਗ੍ਗਞਾਣੇਨ ਅਞ੍ਞਾਸਿਂ। ਞਾਣਞ੍ਚ ਪਨ ਮੇ ਦਸ੍ਸਨਨ੍ਤਿ ਦ੍વੀਹਿਪਿ ਪਦੇਹਿ ਪਚ੍ਚવੇਕ੍ਖਣਞਾਣਂ વੁਤ੍ਤਂ। ਸੇਸਮੇਤ੍ਥ ਉਤ੍ਤਾਨਮੇવਾਤਿ।
104. Tatiyassa paṭhame pubbeva sambodhāti sambodhito pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sato, sammāsambodhiṃ adhigantuṃ ārabhantasseva sato, sambodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato sammāsambodhiṃ satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Ko nu khoti katamo nu kho. Lokoti saṅkhāraloko. Assādoti madhurākāro. Ādīnavoti anabhinanditabbākāro. Tassa mayhanti tassa evaṃ bodhisattasseva sato mayhaṃ. Chandarāgavinayo chandarāgappahānanti nibbānaṃ āgamma ārabbha paṭicca chandarāgo vinayaṃ gacchati pahīyati, tasmā nibbānaṃ ‘‘chandarāgavinayo chandarāgappahāna’’nti vuccati. Idaṃ lokanissaraṇanti idaṃ nibbānaṃ lokato nissaṭattā lokanissaraṇanti vuccati. Yāvakīvanti yattakaṃ pamāṇaṃ kālaṃ. Abbhaññāsinti abhivisiṭṭhena ariyamaggañāṇena aññāsiṃ. Ñāṇañca pana me dassananti dvīhipi padehi paccavekkhaṇañāṇaṃ vuttaṃ. Sesamettha uttānamevāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧. ਪੁਬ੍ਬੇવਸਮ੍ਬੋਧਸੁਤ੍ਤਂ • 1. Pubbevasambodhasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧-੩. ਪੁਬ੍ਬੇવਸਮ੍ਬੋਧਸੁਤ੍ਤਾਦਿવਣ੍ਣਨਾ • 1-3. Pubbevasambodhasuttādivaṇṇanā
