| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
7. புச்சா²விபா⁴கோ³
7. Pucchāvibhāgo
398. கிங் தே தி³ட்ட²ந்தி கதமா புச்சா²? கிந்தி தே தி³ட்ட²ந்தி கதமா புச்சா²? கதா³ தே தி³ட்ட²ந்தி கதமா புச்சா²? கத்த² தே தி³ட்ட²ந்தி கதமா புச்சா²?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
399. கிங் தே தி³ட்ட²ந்தி வத்து²புச்சா², விபத்திபுச்சா², ஆபத்திபுச்சா², அஜ்ஜா²சாரபுச்சா². வத்து²புச்சா²தி – அட்ட²பாராஜிகானங் வத்து²புச்சா², தேவீஸஸங்கா⁴தி³ஸேஸானங் வத்து²புச்சா², த்³வேஅனியதானங் வத்து²புச்சா², த்³வேசத்தாரீஸனிஸ்ஸக்³கி³யானங் வத்து²புச்சா², அட்டா²ஸீதிஸதபாசித்தியானங் வத்து²புச்சா², த்³வாத³ஸபாடிதே³ஸனீயானங் வத்து²புச்சா², து³க்கடானங் வத்து²புச்சா², து³ப்³பா⁴ஸிதானங் வத்து²புச்சா². விபத்திபுச்சா²தி – ஸீலவிபத்திபுச்சா², ஆசாரவிபத்திபுச்சா², தி³ட்டி²விபத்திபுச்சா² , ஆஜீவவிபத்திபுச்சா². ஆபத்திபுச்சா²தி – பாராஜிகாபத்திபுச்சா², ஸங்கா⁴தி³ஸேஸாபத்திபுச்சா², து²ல்லச்சயாபத்திபுச்சா², பாசித்தியாபத்திபுச்சா², பாடிதே³ஸனீயாபத்திபுச்சா², து³க்கடாபத்திபுச்சா², து³ப்³பா⁴ஸிதாபத்திபுச்சா². அஜ்ஜா²சாரபுச்சா²தி – த்³வயங்த்³வயஸமாபத்திபுச்சா².
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
400. கிந்தி தே தி³ட்ட²ந்தி லிங்க³புச்சா², இரியாபத²புச்சா², ஆகாரபுச்சா², விப்பகாரபுச்சா². லிங்க³புச்சா²தி – தீ³க⁴ங் வா ரஸ்ஸங் வா கண்ஹங் வா ஓதா³தங் வா. இரியாபத²புச்சா²தி க³ச்ச²ந்தங் வா டி²தங் வா நிஸின்னங் வா நிபன்னங் வா. ஆகாரபுச்சா²தி கி³ஹிலிங்கே³ வா தித்தி²யலிங்கே³ வா பப்³ப³ஜிதலிங்கே³ வா. விப்பகாரபுச்சா²தி க³ச்ச²ந்தங் வா டி²தங் வா நிஸின்னங் வா நிபன்னங் வா.
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
401. கதா³ தே தி³ட்ட²ந்தி காலபுச்சா², ஸமயபுச்சா², தி³வஸபுச்சா², உதுபுச்சா². காலபுச்சா²தி புப்³ப³ண்ஹகாலே வா மஜ்ஜ²ன்ஹிககாலே வா ஸாயன்ஹகாலே வா. ஸமயபுச்சா²தி புப்³ப³ண்ஹஸமயே வா மஜ்ஜ²ன்ஹிகஸமயே வா ஸாயன்ஹஸமயே வா. தி³வஸபுச்சா²தி புரேப⁴த்தங் வா பச்சா²ப⁴த்தங் வா ரத்திங் வா தி³வா வா காளே வா ஜுண்ஹே வா. உதுபுச்சா²தி ஹேமந்தே வா கி³ம்ஹே வா வஸ்ஸே வா 1.
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
402. கத்த² தே தி³ட்ட²ந்தி டா²னபுச்சா², பூ⁴மிபுச்சா², ஓகாஸபுச்சா², பதே³ஸபுச்சா². டா²னபுச்சா²தி பூ⁴மியா வா பத²வியா வா த⁴ரணியா வா ஜக³தியா வா. பூ⁴மிபுச்சா²தி பூ⁴மியா வா பத²வியா வா பப்³ப³தே வா பாஸாணே வா பாஸாதே³ வா. ஓகாஸபுச்சா²தி புரத்தி²மே வா ஓகாஸே பச்சி²மே வா ஓகாஸே உத்தரே வா ஓகாஸே த³க்கி²ணே வா ஓகாஸே. பதே³ஸபுச்சா²தி புரத்தி²மே வா பதே³ஸே பச்சி²மே வா பதே³ஸே உத்தரே வா பதே³ஸே த³க்கி²ணே வா பதே³ஸேதி.
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
மஹாஸங்கா³மோ நிட்டி²தோ.
Mahāsaṅgāmo niṭṭhito.
தஸ்ஸுத்³தா³னங் –
Tassuddānaṃ –
வத்து² நிதா³னங் ஆகாரோ, புப்³பா³பரங் கதாகதங்;
Vatthu nidānaṃ ākāro, pubbāparaṃ katākataṃ;
கம்மாதி⁴கரணஞ்சேவ, ஸமதோ² ச²ந்த³கா³மி ச.
Kammādhikaraṇañceva, samatho chandagāmi ca.
தோ³ஸா மோஹா ப⁴யா சேவ, ஸஞ்ஞா நிஜ்ஜா²பனேன ச;
Dosā mohā bhayā ceva, saññā nijjhāpanena ca;
பெக்கா² பஸாதே³ பக்கொ²ம்ஹி, ஸுததே²ரதரேன ச.
Pekkhā pasāde pakkhomhi, sutatheratarena ca.
அஸம்பத்தஞ்ச ஸம்பத்தங், த⁴ம்மேன வினயேன ச;
Asampattañca sampattaṃ, dhammena vinayena ca;
ஸத்து²ஸ்ஸ ஸாஸனேனாபி, மஹாஸங்கா³மஞாபனாதி.
Satthussa sāsanenāpi, mahāsaṅgāmañāpanāti.
Footnotes:
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வோஹரந்தேனஜானிதப்³பா³தி³வண்ணனா • Voharantenajānitabbādivaṇṇanā
