| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৭. পুচ্ছাৰিভাগো
7. Pucchāvibhāgo
৩৯৮. কিং তে দিট্ঠন্তি কতমা পুচ্ছা? কিন্তি তে দিট্ঠন্তি কতমা পুচ্ছা? কদা তে দিট্ঠন্তি কতমা পুচ্ছা? কত্থ তে দিট্ঠন্তি কতমা পুচ্ছা?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
৩৯৯. কিং তে দিট্ঠন্তি ৰত্থুপুচ্ছা, ৰিপত্তিপুচ্ছা, আপত্তিপুচ্ছা, অজ্ঝাচারপুচ্ছা। ৰত্থুপুচ্ছাতি – অট্ঠপারাজিকানং ৰত্থুপুচ্ছা, তেৰীসসঙ্ঘাদিসেসানং ৰত্থুপুচ্ছা, দ্ৰেঅনিযতানং ৰত্থুপুচ্ছা, দ্ৰেচত্তারীসনিস্সগ্গিযানং ৰত্থুপুচ্ছা, অট্ঠাসীতিসতপাচিত্তিযানং ৰত্থুপুচ্ছা, দ্ৰাদসপাটিদেসনীযানং ৰত্থুপুচ্ছা, দুক্কটানং ৰত্থুপুচ্ছা, দুব্ভাসিতানং ৰত্থুপুচ্ছা। ৰিপত্তিপুচ্ছাতি – সীলৰিপত্তিপুচ্ছা, আচারৰিপত্তিপুচ্ছা, দিট্ঠিৰিপত্তিপুচ্ছা , আজীৰৰিপত্তিপুচ্ছা। আপত্তিপুচ্ছাতি – পারাজিকাপত্তিপুচ্ছা, সঙ্ঘাদিসেসাপত্তিপুচ্ছা, থুল্লচ্চযাপত্তিপুচ্ছা, পাচিত্তিযাপত্তিপুচ্ছা, পাটিদেসনীযাপত্তিপুচ্ছা, দুক্কটাপত্তিপুচ্ছা, দুব্ভাসিতাপত্তিপুচ্ছা। অজ্ঝাচারপুচ্ছাতি – দ্ৰযংদ্ৰযসমাপত্তিপুচ্ছা।
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
৪০০. কিন্তি তে দিট্ঠন্তি লিঙ্গপুচ্ছা, ইরিযাপথপুচ্ছা, আকারপুচ্ছা, ৰিপ্পকারপুচ্ছা। লিঙ্গপুচ্ছাতি – দীঘং ৰা রস্সং ৰা কণ্হং ৰা ওদাতং ৰা। ইরিযাপথপুচ্ছাতি গচ্ছন্তং ৰা ঠিতং ৰা নিসিন্নং ৰা নিপন্নং ৰা। আকারপুচ্ছাতি গিহিলিঙ্গে ৰা তিত্থিযলিঙ্গে ৰা পব্বজিতলিঙ্গে ৰা। ৰিপ্পকারপুচ্ছাতি গচ্ছন্তং ৰা ঠিতং ৰা নিসিন্নং ৰা নিপন্নং ৰা।
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
৪০১. কদা তে দিট্ঠন্তি কালপুচ্ছা, সমযপুচ্ছা, দিৰসপুচ্ছা, উতুপুচ্ছা। কালপুচ্ছাতি পুব্বণ্হকালে ৰা মজ্ঝন্হিককালে ৰা সাযন্হকালে ৰা। সমযপুচ্ছাতি পুব্বণ্হসমযে ৰা মজ্ঝন্হিকসমযে ৰা সাযন্হসমযে ৰা। দিৰসপুচ্ছাতি পুরেভত্তং ৰা পচ্ছাভত্তং ৰা রত্তিং ৰা দিৰা ৰা কাল়ে ৰা জুণ্হে ৰা। উতুপুচ্ছাতি হেমন্তে ৰা গিম্হে ৰা ৰস্সে ৰা 1।
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
৪০২. কত্থ তে দিট্ঠন্তি ঠানপুচ্ছা, ভূমিপুচ্ছা, ওকাসপুচ্ছা, পদেসপুচ্ছা। ঠানপুচ্ছাতি ভূমিযা ৰা পথৰিযা ৰা ধরণিযা ৰা জগতিযা ৰা। ভূমিপুচ্ছাতি ভূমিযা ৰা পথৰিযা ৰা পব্বতে ৰা পাসাণে ৰা পাসাদে ৰা। ওকাসপুচ্ছাতি পুরত্থিমে ৰা ওকাসে পচ্ছিমে ৰা ওকাসে উত্তরে ৰা ওকাসে দক্খিণে ৰা ওকাসে। পদেসপুচ্ছাতি পুরত্থিমে ৰা পদেসে পচ্ছিমে ৰা পদেসে উত্তরে ৰা পদেসে দক্খিণে ৰা পদেসেতি।
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
মহাসঙ্গামো নিট্ঠিতো।
Mahāsaṅgāmo niṭṭhito.
তস্সুদ্দানং –
Tassuddānaṃ –
ৰত্থু নিদানং আকারো, পুব্বাপরং কতাকতং।
Vatthu nidānaṃ ākāro, pubbāparaṃ katākataṃ;
কম্মাধিকরণঞ্চেৰ, সমথো ছন্দগামি চ॥
Kammādhikaraṇañceva, samatho chandagāmi ca.
দোসা মোহা ভযা চেৰ, সঞ্ঞা নিজ্ঝাপনেন চ।
Dosā mohā bhayā ceva, saññā nijjhāpanena ca;
পেক্খা পসাদে পক্খোম্হি, সুতথেরতরেন চ॥
Pekkhā pasāde pakkhomhi, sutatheratarena ca.
অসম্পত্তঞ্চ সম্পত্তং, ধম্মেন ৰিনযেন চ।
Asampattañca sampattaṃ, dhammena vinayena ca;
সত্থুস্স সাসনেনাপি, মহাসঙ্গামঞাপনাতি॥
Satthussa sāsanenāpi, mahāsaṅgāmañāpanāti.
Footnotes:
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰোহরন্তেনজানিতব্বাদিৰণ্ণনা • Voharantenajānitabbādivaṇṇanā
