| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๗. ปุจฺฉาวิภาโค
7. Pucchāvibhāgo
๓๙๘. กิํ เต ทิฎฺฐนฺติ กตมา ปุจฺฉา? กินฺติ เต ทิฎฺฐนฺติ กตมา ปุจฺฉา? กทา เต ทิฎฺฐนฺติ กตมา ปุจฺฉา? กตฺถ เต ทิฎฺฐนฺติ กตมา ปุจฺฉา?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
๓๙๙. กิํ เต ทิฎฺฐนฺติ วตฺถุปุจฺฉา, วิปตฺติปุจฺฉา, อาปตฺติปุจฺฉา, อชฺฌาจารปุจฺฉาฯ วตฺถุปุจฺฉาติ – อฎฺฐปาราชิกานํ วตฺถุปุจฺฉา, เตวีสสงฺฆาทิเสสานํ วตฺถุปุจฺฉา, เทฺวอนิยตานํ วตฺถุปุจฺฉา, เทฺวจตฺตารีสนิสฺสคฺคิยานํ วตฺถุปุจฺฉา, อฎฺฐาสีติสตปาจิตฺติยานํ วตฺถุปุจฺฉา, ทฺวาทสปาฎิเทสนียานํ วตฺถุปุจฺฉา, ทุกฺกฎานํ วตฺถุปุจฺฉา, ทุพฺภาสิตานํ วตฺถุปุจฺฉาฯ วิปตฺติปุจฺฉาติ – สีลวิปตฺติปุจฺฉา, อาจารวิปตฺติปุจฺฉา, ทิฎฺฐิวิปตฺติปุจฺฉา , อาชีววิปตฺติปุจฺฉาฯ อาปตฺติปุจฺฉาติ – ปาราชิกาปตฺติปุจฺฉา, สงฺฆาทิเสสาปตฺติปุจฺฉา, ถุลฺลจฺจยาปตฺติปุจฺฉา, ปาจิตฺติยาปตฺติปุจฺฉา, ปาฎิเทสนียาปตฺติปุจฺฉา, ทุกฺกฎาปตฺติปุจฺฉา, ทุพฺภาสิตาปตฺติปุจฺฉาฯ อชฺฌาจารปุจฺฉาติ – ทฺวยํทฺวยสมาปตฺติปุจฺฉาฯ
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
๔๐๐. กินฺติ เต ทิฎฺฐนฺติ ลิงฺคปุจฺฉา, อิริยาปถปุจฺฉา, อาการปุจฺฉา, วิปฺปการปุจฺฉาฯ ลิงฺคปุจฺฉาติ – ทีฆํ วา รสฺสํ วา กณฺหํ วา โอทาตํ วาฯ อิริยาปถปุจฺฉาติ คจฺฉนฺตํ วา ฐิตํ วา นิสินฺนํ วา นิปนฺนํ วาฯ อาการปุจฺฉาติ คิหิลิเงฺค วา ติตฺถิยลิเงฺค วา ปพฺพชิตลิเงฺค วาฯ วิปฺปการปุจฺฉาติ คจฺฉนฺตํ วา ฐิตํ วา นิสินฺนํ วา นิปนฺนํ วาฯ
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
๔๐๑. กทา เต ทิฎฺฐนฺติ กาลปุจฺฉา, สมยปุจฺฉา, ทิวสปุจฺฉา, อุตุปุจฺฉาฯ กาลปุจฺฉาติ ปุพฺพณฺหกาเล วา มชฺฌนฺหิกกาเล วา สายนฺหกาเล วาฯ สมยปุจฺฉาติ ปุพฺพณฺหสมเย วา มชฺฌนฺหิกสมเย วา สายนฺหสมเย วาฯ ทิวสปุจฺฉาติ ปุเรภตฺตํ วา ปจฺฉาภตฺตํ วา รตฺติํ วา ทิวา วา กาเฬ วา ชุเณฺห วาฯ อุตุปุจฺฉาติ เหมเนฺต วา คิเมฺห วา วเสฺส วา 1ฯ
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
๔๐๒. กตฺถ เต ทิฎฺฐนฺติ ฐานปุจฺฉา, ภูมิปุจฺฉา, โอกาสปุจฺฉา, ปเทสปุจฺฉาฯ ฐานปุจฺฉาติ ภูมิยา วา ปถวิยา วา ธรณิยา วา ชคติยา วาฯ ภูมิปุจฺฉาติ ภูมิยา วา ปถวิยา วา ปพฺพเต วา ปาสาเณ วา ปาสาเท วาฯ โอกาสปุจฺฉาติ ปุรตฺถิเม วา โอกาเส ปจฺฉิเม วา โอกาเส อุตฺตเร วา โอกาเส ทกฺขิเณ วา โอกาเสฯ ปเทสปุจฺฉาติ ปุรตฺถิเม วา ปเทเส ปจฺฉิเม วา ปเทเส อุตฺตเร วา ปเทเส ทกฺขิเณ วา ปเทเสติฯ
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
มหาสงฺคาโม นิฎฺฐิโตฯ
Mahāsaṅgāmo niṭṭhito.
ตสฺสุทฺทานํ –
Tassuddānaṃ –
วตฺถุ นิทานํ อากาโร, ปุพฺพาปรํ กตากตํ;
Vatthu nidānaṃ ākāro, pubbāparaṃ katākataṃ;
กมฺมาธิกรณเญฺจว, สมโถ ฉนฺทคามิ จฯ
Kammādhikaraṇañceva, samatho chandagāmi ca.
โทสา โมหา ภยา เจว, สญฺญา นิชฺฌาปเนน จ;
Dosā mohā bhayā ceva, saññā nijjhāpanena ca;
เปกฺขา ปสาเท ปโกฺขมฺหิ, สุตเถรตเรน จฯ
Pekkhā pasāde pakkhomhi, sutatheratarena ca.
อสมฺปตฺตญฺจ สมฺปตฺตํ, ธเมฺมน วินเยน จ;
Asampattañca sampattaṃ, dhammena vinayena ca;
สตฺถุสฺส สาสเนนาปิ, มหาสงฺคามญาปนาติฯ
Satthussa sāsanenāpi, mahāsaṅgāmañāpanāti.
Footnotes:
Related texts:
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / โวหรเนฺตนชานิตพฺพาทิวณฺณนา • Voharantenajānitabbādivaṇṇanā
