| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၇. ပုစ္ဆာဝိဘာဂော
7. Pucchāvibhāgo
၃၉၈. ကိံ တေ ဒိဋ္ဌန္တိ ကတမာ ပုစ္ဆာ? ကိန္တိ တေ ဒိဋ္ဌန္တိ ကတမာ ပုစ္ဆာ? ကဒာ တေ ဒိဋ္ဌန္တိ ကတမာ ပုစ္ဆာ? ကတ္ထ တေ ဒိဋ္ဌန္တိ ကတမာ ပုစ္ဆာ?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
၃၉၉. ကိံ တေ ဒိဋ္ဌန္တိ ဝတ္ထုပုစ္ဆာ, ဝိပတ္တိပုစ္ဆာ, အာပတ္တိပုစ္ဆာ, အဇ္ဈာစာရပုစ္ဆာ။ ဝတ္ထုပုစ္ဆာတိ – အဋ္ဌပာရာဇိကာနံ ဝတ္ထုပုစ္ဆာ, တေဝီသသင္ဃာဒိသေသာနံ ဝတ္ထုပုစ္ဆာ, ဒ္ဝေအနိယတာနံ ဝတ္ထုပုစ္ဆာ, ဒ္ဝေစတ္တာရီသနိသ္သဂ္ဂိယာနံ ဝတ္ထုပုစ္ဆာ, အဋ္ဌာသီတိသတပာစိတ္တိယာနံ ဝတ္ထုပုစ္ဆာ, ဒ္ဝာဒသပာဋိဒေသနီယာနံ ဝတ္ထုပုစ္ဆာ, ဒုက္ကဋာနံ ဝတ္ထုပုစ္ဆာ, ဒုဗ္ဘာသိတာနံ ဝတ္ထုပုစ္ဆာ။ ဝိပတ္တိပုစ္ဆာတိ – သီလဝိပတ္တိပုစ္ဆာ, အာစာရဝိပတ္တိပုစ္ဆာ, ဒိဋ္ဌိဝိပတ္တိပုစ္ဆာ , အာဇီဝဝိပတ္တိပုစ္ဆာ။ အာပတ္တိပုစ္ဆာတိ – ပာရာဇိကာပတ္တိပုစ္ဆာ, သင္ဃာဒိသေသာပတ္တိပုစ္ဆာ, ထုလ္လစ္စယာပတ္တိပုစ္ဆာ, ပာစိတ္တိယာပတ္တိပုစ္ဆာ, ပာဋိဒေသနီယာပတ္တိပုစ္ဆာ, ဒုက္ကဋာပတ္တိပုစ္ဆာ, ဒုဗ္ဘာသိတာပတ္တိပုစ္ဆာ။ အဇ္ဈာစာရပုစ္ဆာတိ – ဒ္ဝယံဒ္ဝယသမာပတ္တိပုစ္ဆာ။
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
၄၀၀. ကိန္တိ တေ ဒိဋ္ဌန္တိ လိင္ဂပုစ္ဆာ, ဣရိယာပထပုစ္ဆာ, အာကာရပုစ္ဆာ, ဝိပ္ပကာရပုစ္ဆာ။ လိင္ဂပုစ္ဆာတိ – ဒီဃံ ဝာ ရသ္သံ ဝာ ကဏ္ဟံ ဝာ ဩဒာတံ ဝာ။ ဣရိယာပထပုစ္ဆာတိ ဂစ္ဆန္တံ ဝာ ဌိတံ ဝာ နိသိန္နံ ဝာ နိပန္နံ ဝာ။ အာကာရပုစ္ဆာတိ ဂိဟိလိင္ဂေ ဝာ တိတ္ထိယလိင္ဂေ ဝာ ပဗ္ဗဇိတလိင္ဂေ ဝာ။ ဝိပ္ပကာရပုစ္ဆာတိ ဂစ္ဆန္တံ ဝာ ဌိတံ ဝာ နိသိန္နံ ဝာ နိပန္နံ ဝာ။
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
၄၀၁. ကဒာ တေ ဒိဋ္ဌန္တိ ကာလပုစ္ဆာ, သမယပုစ္ဆာ, ဒိဝသပုစ္ဆာ, ဥတုပုစ္ဆာ။ ကာလပုစ္ဆာတိ ပုဗ္ဗဏ္ဟကာလေ ဝာ မဇ္ဈန္ဟိကကာလေ ဝာ သာယန္ဟကာလေ ဝာ။ သမယပုစ္ဆာတိ ပုဗ္ဗဏ္ဟသမယေ ဝာ မဇ္ဈန္ဟိကသမယေ ဝာ သာယန္ဟသမယေ ဝာ။ ဒိဝသပုစ္ဆာတိ ပုရေဘတ္တံ ဝာ ပစ္ဆာဘတ္တံ ဝာ ရတ္တိံ ဝာ ဒိဝာ ဝာ ကာဠေ ဝာ ဇုဏ္ဟေ ဝာ။ ဥတုပုစ္ဆာတိ ဟေမန္တေ ဝာ ဂိမ္ဟေ ဝာ ဝသ္သေ ဝာ 1။
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
၄၀၂. ကတ္ထ တေ ဒိဋ္ဌန္တိ ဌာနပုစ္ဆာ, ဘူမိပုစ္ဆာ, ဩကာသပုစ္ဆာ, ပဒေသပုစ္ဆာ။ ဌာနပုစ္ဆာတိ ဘူမိယာ ဝာ ပထဝိယာ ဝာ ဓရဏိယာ ဝာ ဇဂတိယာ ဝာ။ ဘူမိပုစ္ဆာတိ ဘူမိယာ ဝာ ပထဝိယာ ဝာ ပဗ္ဗတေ ဝာ ပာသာဏေ ဝာ ပာသာဒေ ဝာ။ ဩကာသပုစ္ဆာတိ ပုရတ္ထိမေ ဝာ ဩကာသေ ပစ္ဆိမေ ဝာ ဩကာသေ ဥတ္တရေ ဝာ ဩကာသေ ဒက္ခိဏေ ဝာ ဩကာသေ။ ပဒေသပုစ္ဆာတိ ပုရတ္ထိမေ ဝာ ပဒေသေ ပစ္ဆိမေ ဝာ ပဒေသေ ဥတ္တရေ ဝာ ပဒေသေ ဒက္ခိဏေ ဝာ ပဒေသေတိ။
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
မဟာသင္ဂာမော နိဋ္ဌိတော။
Mahāsaṅgāmo niṭṭhito.
တသ္သုဒ္ဒာနံ –
Tassuddānaṃ –
ဝတ္ထု နိဒာနံ အာကာရော၊ ပုဗ္ဗာပရံ ကတာကတံ။
Vatthu nidānaṃ ākāro, pubbāparaṃ katākataṃ;
ကမ္မာဓိကရဏဉ္စေဝ၊ သမထော ဆန္ဒဂာမိ စ။
Kammādhikaraṇañceva, samatho chandagāmi ca.
ဒောသာ မောဟာ ဘယာ စေဝ၊ သညာ နိဇ္ဈာပနေန စ။
Dosā mohā bhayā ceva, saññā nijjhāpanena ca;
ပေက္ခာ ပသာဒေ ပက္ခောမ္ဟိ၊ သုတထေရတရေန စ။
Pekkhā pasāde pakkhomhi, sutatheratarena ca.
အသမ္ပတ္တဉ္စ သမ္ပတ္တံ၊ ဓမ္မေန ဝိနယေန စ။
Asampattañca sampattaṃ, dhammena vinayena ca;
သတ္ထုသ္သ သာသနေနာပိ၊ မဟာသင္ဂာမဉာပနာတိ။
Satthussa sāsanenāpi, mahāsaṅgāmañāpanāti.
Footnotes:
Related texts:
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝောဟရန္တေနဇာနိတဗ္ဗာဒိဝဏ္ဏနာ • Voharantenajānitabbādivaṇṇanā
