| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೭. ಪುಚ್ಛಾವಿಭಾಗೋ
7. Pucchāvibhāgo
೩೯೮. ಕಿಂ ತೇ ದಿಟ್ಠನ್ತಿ ಕತಮಾ ಪುಚ್ಛಾ? ಕಿನ್ತಿ ತೇ ದಿಟ್ಠನ್ತಿ ಕತಮಾ ಪುಚ್ಛಾ? ಕದಾ ತೇ ದಿಟ್ಠನ್ತಿ ಕತಮಾ ಪುಚ್ಛಾ? ಕತ್ಥ ತೇ ದಿಟ್ಠನ್ತಿ ಕತಮಾ ಪುಚ್ಛಾ?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
೩೯೯. ಕಿಂ ತೇ ದಿಟ್ಠನ್ತಿ ವತ್ಥುಪುಚ್ಛಾ, ವಿಪತ್ತಿಪುಚ್ಛಾ, ಆಪತ್ತಿಪುಚ್ಛಾ, ಅಜ್ಝಾಚಾರಪುಚ್ಛಾ। ವತ್ಥುಪುಚ್ಛಾತಿ – ಅಟ್ಠಪಾರಾಜಿಕಾನಂ ವತ್ಥುಪುಚ್ಛಾ, ತೇವೀಸಸಙ್ಘಾದಿಸೇಸಾನಂ ವತ್ಥುಪುಚ್ಛಾ, ದ್ವೇಅನಿಯತಾನಂ ವತ್ಥುಪುಚ್ಛಾ, ದ್ವೇಚತ್ತಾರೀಸನಿಸ್ಸಗ್ಗಿಯಾನಂ ವತ್ಥುಪುಚ್ಛಾ, ಅಟ್ಠಾಸೀತಿಸತಪಾಚಿತ್ತಿಯಾನಂ ವತ್ಥುಪುಚ್ಛಾ, ದ್ವಾದಸಪಾಟಿದೇಸನೀಯಾನಂ ವತ್ಥುಪುಚ್ಛಾ, ದುಕ್ಕಟಾನಂ ವತ್ಥುಪುಚ್ಛಾ, ದುಬ್ಭಾಸಿತಾನಂ ವತ್ಥುಪುಚ್ಛಾ। ವಿಪತ್ತಿಪುಚ್ಛಾತಿ – ಸೀಲವಿಪತ್ತಿಪುಚ್ಛಾ, ಆಚಾರವಿಪತ್ತಿಪುಚ್ಛಾ, ದಿಟ್ಠಿವಿಪತ್ತಿಪುಚ್ಛಾ , ಆಜೀವವಿಪತ್ತಿಪುಚ್ಛಾ। ಆಪತ್ತಿಪುಚ್ಛಾತಿ – ಪಾರಾಜಿಕಾಪತ್ತಿಪುಚ್ಛಾ, ಸಙ್ಘಾದಿಸೇಸಾಪತ್ತಿಪುಚ್ಛಾ, ಥುಲ್ಲಚ್ಚಯಾಪತ್ತಿಪುಚ್ಛಾ, ಪಾಚಿತ್ತಿಯಾಪತ್ತಿಪುಚ್ಛಾ, ಪಾಟಿದೇಸನೀಯಾಪತ್ತಿಪುಚ್ಛಾ, ದುಕ್ಕಟಾಪತ್ತಿಪುಚ್ಛಾ, ದುಬ್ಭಾಸಿತಾಪತ್ತಿಪುಚ್ಛಾ। ಅಜ್ಝಾಚಾರಪುಚ್ಛಾತಿ – ದ್ವಯಂದ್ವಯಸಮಾಪತ್ತಿಪುಚ್ಛಾ।
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
೪೦೦. ಕಿನ್ತಿ ತೇ ದಿಟ್ಠನ್ತಿ ಲಿಙ್ಗಪುಚ್ಛಾ, ಇರಿಯಾಪಥಪುಚ್ಛಾ, ಆಕಾರಪುಚ್ಛಾ, ವಿಪ್ಪಕಾರಪುಚ್ಛಾ। ಲಿಙ್ಗಪುಚ್ಛಾತಿ – ದೀಘಂ ವಾ ರಸ್ಸಂ ವಾ ಕಣ್ಹಂ ವಾ ಓದಾತಂ ವಾ। ಇರಿಯಾಪಥಪುಚ್ಛಾತಿ ಗಚ್ಛನ್ತಂ ವಾ ಠಿತಂ ವಾ ನಿಸಿನ್ನಂ ವಾ ನಿಪನ್ನಂ ವಾ। ಆಕಾರಪುಚ್ಛಾತಿ ಗಿಹಿಲಿಙ್ಗೇ ವಾ ತಿತ್ಥಿಯಲಿಙ್ಗೇ ವಾ ಪಬ್ಬಜಿತಲಿಙ್ಗೇ ವಾ। ವಿಪ್ಪಕಾರಪುಚ್ಛಾತಿ ಗಚ್ಛನ್ತಂ ವಾ ಠಿತಂ ವಾ ನಿಸಿನ್ನಂ ವಾ ನಿಪನ್ನಂ ವಾ।
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
೪೦೧. ಕದಾ ತೇ ದಿಟ್ಠನ್ತಿ ಕಾಲಪುಚ್ಛಾ, ಸಮಯಪುಚ್ಛಾ, ದಿವಸಪುಚ್ಛಾ, ಉತುಪುಚ್ಛಾ। ಕಾಲಪುಚ್ಛಾತಿ ಪುಬ್ಬಣ್ಹಕಾಲೇ ವಾ ಮಜ್ಝನ್ಹಿಕಕಾಲೇ ವಾ ಸಾಯನ್ಹಕಾಲೇ ವಾ। ಸಮಯಪುಚ್ಛಾತಿ ಪುಬ್ಬಣ್ಹಸಮಯೇ ವಾ ಮಜ್ಝನ್ಹಿಕಸಮಯೇ ವಾ ಸಾಯನ್ಹಸಮಯೇ ವಾ। ದಿವಸಪುಚ್ಛಾತಿ ಪುರೇಭತ್ತಂ ವಾ ಪಚ್ಛಾಭತ್ತಂ ವಾ ರತ್ತಿಂ ವಾ ದಿವಾ ವಾ ಕಾಳೇ ವಾ ಜುಣ್ಹೇ ವಾ। ಉತುಪುಚ್ಛಾತಿ ಹೇಮನ್ತೇ ವಾ ಗಿಮ್ಹೇ ವಾ ವಸ್ಸೇ ವಾ 1।
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
೪೦೨. ಕತ್ಥ ತೇ ದಿಟ್ಠನ್ತಿ ಠಾನಪುಚ್ಛಾ, ಭೂಮಿಪುಚ್ಛಾ, ಓಕಾಸಪುಚ್ಛಾ, ಪದೇಸಪುಚ್ಛಾ। ಠಾನಪುಚ್ಛಾತಿ ಭೂಮಿಯಾ ವಾ ಪಥವಿಯಾ ವಾ ಧರಣಿಯಾ ವಾ ಜಗತಿಯಾ ವಾ। ಭೂಮಿಪುಚ್ಛಾತಿ ಭೂಮಿಯಾ ವಾ ಪಥವಿಯಾ ವಾ ಪಬ್ಬತೇ ವಾ ಪಾಸಾಣೇ ವಾ ಪಾಸಾದೇ ವಾ। ಓಕಾಸಪುಚ್ಛಾತಿ ಪುರತ್ಥಿಮೇ ವಾ ಓಕಾಸೇ ಪಚ್ಛಿಮೇ ವಾ ಓಕಾಸೇ ಉತ್ತರೇ ವಾ ಓಕಾಸೇ ದಕ್ಖಿಣೇ ವಾ ಓಕಾಸೇ। ಪದೇಸಪುಚ್ಛಾತಿ ಪುರತ್ಥಿಮೇ ವಾ ಪದೇಸೇ ಪಚ್ಛಿಮೇ ವಾ ಪದೇಸೇ ಉತ್ತರೇ ವಾ ಪದೇಸೇ ದಕ್ಖಿಣೇ ವಾ ಪದೇಸೇತಿ।
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
ಮಹಾಸಙ್ಗಾಮೋ ನಿಟ್ಠಿತೋ।
Mahāsaṅgāmo niṭṭhito.
ತಸ್ಸುದ್ದಾನಂ –
Tassuddānaṃ –
ವತ್ಥು ನಿದಾನಂ ಆಕಾರೋ, ಪುಬ್ಬಾಪರಂ ಕತಾಕತಂ।
Vatthu nidānaṃ ākāro, pubbāparaṃ katākataṃ;
ಕಮ್ಮಾಧಿಕರಣಞ್ಚೇವ, ಸಮಥೋ ಛನ್ದಗಾಮಿ ಚ॥
Kammādhikaraṇañceva, samatho chandagāmi ca.
ದೋಸಾ ಮೋಹಾ ಭಯಾ ಚೇವ, ಸಞ್ಞಾ ನಿಜ್ಝಾಪನೇನ ಚ।
Dosā mohā bhayā ceva, saññā nijjhāpanena ca;
ಪೇಕ್ಖಾ ಪಸಾದೇ ಪಕ್ಖೋಮ್ಹಿ, ಸುತಥೇರತರೇನ ಚ॥
Pekkhā pasāde pakkhomhi, sutatheratarena ca.
ಅಸಮ್ಪತ್ತಞ್ಚ ಸಮ್ಪತ್ತಂ, ಧಮ್ಮೇನ ವಿನಯೇನ ಚ।
Asampattañca sampattaṃ, dhammena vinayena ca;
ಸತ್ಥುಸ್ಸ ಸಾಸನೇನಾಪಿ, ಮಹಾಸಙ್ಗಾಮಞಾಪನಾತಿ॥
Satthussa sāsanenāpi, mahāsaṅgāmañāpanāti.
Footnotes:
Related texts:
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ವೋಹರನ್ತೇನಜಾನಿತಬ್ಬಾದಿವಣ್ಣನಾ • Voharantenajānitabbādivaṇṇanā
