| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
7. පුච්‌ඡාවිභාගො
7. Pucchāvibhāgo
398. කිං තෙ දිට්‌ඨන්‌ති කතමා පුච්‌ඡා? කින්‌ති තෙ දිට්‌ඨන්‌ති කතමා පුච්‌ඡා? කදා තෙ දිට්‌ඨන්‌ති කතමා පුච්‌ඡා? කත්‌ථ තෙ දිට්‌ඨන්‌ති කතමා පුච්‌ඡා?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
399. කිං තෙ දිට්‌ඨන්‌ති වත්‌ථුපුච්‌ඡා, විපත්‌තිපුච්‌ඡා, ආපත්‌තිපුච්‌ඡා, අජ්‌ඣාචාරපුච්‌ඡා. වත්‌ථුපුච්‌ඡාති – අට්‌ඨපාරාජිකානං වත්‌ථුපුච්‌ඡා, තෙවීසසඞ්‌ඝාදිසෙසානං වත්‌ථුපුච්‌ඡා, ද්‌වෙඅනියතානං වත්‌ථුපුච්‌ඡා, ද්‌වෙචත්‌තාරීසනිස්‌සග්‌ගියානං වත්‌ථුපුච්‌ඡා, අට්‌ඨාසීතිසතපාචිත්‌තියානං වත්‌ථුපුච්‌ඡා, ද්‌වාදසපාටිදෙසනීයානං වත්‌ථුපුච්‌ඡා, දුක්‌කටානං වත්‌ථුපුච්‌ඡා, දුබ්‌භාසිතානං වත්‌ථුපුච්‌ඡා. විපත්‌තිපුච්‌ඡාති – සීලවිපත්‌තිපුච්‌ඡා, ආචාරවිපත්‌තිපුච්‌ඡා, දිට්‌ඨිවිපත්‌තිපුච්‌ඡා , ආජීවවිපත්‌තිපුච්‌ඡා. ආපත්‌තිපුච්‌ඡාති – පාරාජිකාපත්‌තිපුච්‌ඡා, සඞ්‌ඝාදිසෙසාපත්‌තිපුච්‌ඡා, ථුල්‌ලච්‌චයාපත්‌තිපුච්‌ඡා, පාචිත්‌තියාපත්‌තිපුච්‌ඡා, පාටිදෙසනීයාපත්‌තිපුච්‌ඡා, දුක්‌කටාපත්‌තිපුච්‌ඡා, දුබ්‌භාසිතාපත්‌තිපුච්‌ඡා. අජ්‌ඣාචාරපුච්‌ඡාති – ද්‌වයංද්‌වයසමාපත්‌තිපුච්‌ඡා.
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
400. කින්‌ති තෙ දිට්‌ඨන්‌ති ලිඞ්‌ගපුච්‌ඡා, ඉරියාපථපුච්‌ඡා, ආකාරපුච්‌ඡා, විප්‌පකාරපුච්‌ඡා. ලිඞ්‌ගපුච්‌ඡාති – දීඝං වා රස්‌සං වා කණ්‌හං වා ඔදාතං වා. ඉරියාපථපුච්‌ඡාති ගච්‌ඡන්‌තං වා ඨිතං වා නිසින්‌නං වා නිපන්‌නං වා. ආකාරපුච්‌ඡාති ගිහිලිඞ්‌ගෙ වා තිත්‌ථියලිඞ්‌ගෙ වා පබ්‌බජිතලිඞ්‌ගෙ වා. විප්‌පකාරපුච්‌ඡාති ගච්‌ඡන්‌තං වා ඨිතං වා නිසින්‌නං වා නිපන්‌නං වා.
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
401. කදා තෙ දිට්‌ඨන්‌ති කාලපුච්‌ඡා, සමයපුච්‌ඡා, දිවසපුච්‌ඡා, උතුපුච්‌ඡා. කාලපුච්‌ඡාති පුබ්‌බණ්‌හකාලෙ වා මජ්‌ඣන්‌හිකකාලෙ වා සායන්‌හකාලෙ වා. සමයපුච්‌ඡාති පුබ්‌බණ්‌හසමයෙ වා මජ්‌ඣන්‌හිකසමයෙ වා සායන්‌හසමයෙ වා. දිවසපුච්‌ඡාති පුරෙභත්‌තං වා පච්‌ඡාභත්‌තං වා රත්‌තිං වා දිවා වා කාළෙ වා ජුණ්‌හෙ වා. උතුපුච්‌ඡාති හෙමන්‌තෙ වා ගිම්‌හෙ වා වස්‌සෙ වා 1.
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
402. කත්‌ථ තෙ දිට්‌ඨන්‌ති ඨානපුච්‌ඡා, භූමිපුච්‌ඡා, ඔකාසපුච්‌ඡා, පදෙසපුච්‌ඡා. ඨානපුච්‌ඡාති භූමියා වා පථවියා වා ධරණියා වා ජගතියා වා. භූමිපුච්‌ඡාති භූමියා වා පථවියා වා පබ්‌බතෙ වා පාසාණෙ වා පාසාදෙ වා. ඔකාසපුච්‌ඡාති පුරත්‌ථිමෙ වා ඔකාසෙ පච්‌ඡිමෙ වා ඔකාසෙ උත්‌තරෙ වා ඔකාසෙ දක්‌ඛිණෙ වා ඔකාසෙ. පදෙසපුච්‌ඡාති පුරත්‌ථිමෙ වා පදෙසෙ පච්‌ඡිමෙ වා පදෙසෙ උත්‌තරෙ වා පදෙසෙ දක්‌ඛිණෙ වා පදෙසෙති.
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
මහාසඞ්‌ගාමො නිට්‌ඨිතො.
Mahāsaṅgāmo niṭṭhito.
තස්‌සුද්‌දානං –
Tassuddānaṃ –
වත්‌ථු නිදානං ආකාරො, පුබ්‌බාපරං කතාකතං;
Vatthu nidānaṃ ākāro, pubbāparaṃ katākataṃ;
කම්‌මාධිකරණඤ්‌චෙව, සමථො ඡන්‌දගාමි ච.
Kammādhikaraṇañceva, samatho chandagāmi ca.
දොසා මොහා භයා චෙව, සඤ්‌ඤා නිජ්‌ඣාපනෙන ච;
Dosā mohā bhayā ceva, saññā nijjhāpanena ca;
පෙක්‌ඛා පසාදෙ පක්‌ඛොම්‌හි, සුතථෙරතරෙන ච.
Pekkhā pasāde pakkhomhi, sutatheratarena ca.
අසම්‌පත්‌තඤ්‌ච සම්‌පත්‌තං, ධම්‌මෙන විනයෙන ච;
Asampattañca sampattaṃ, dhammena vinayena ca;
සත්‌ථුස්‌ස සාසනෙනාපි, මහාසඞ්‌ගාමඤාපනාති.
Satthussa sāsanenāpi, mahāsaṅgāmañāpanāti.
Footnotes:
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වොහරන්‌තෙනජානිතබ්‌බාදිවණ්‌ණනා • Voharantenajānitabbādivaṇṇanā
