| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൭. പുച്ഛാവിഭാഗോ
7. Pucchāvibhāgo
൩൯൮. കിം തേ ദിട്ഠന്തി കതമാ പുച്ഛാ? കിന്തി തേ ദിട്ഠന്തി കതമാ പുച്ഛാ? കദാ തേ ദിട്ഠന്തി കതമാ പുച്ഛാ? കത്ഥ തേ ദിട്ഠന്തി കതമാ പുച്ഛാ?
398. Kiṃ te diṭṭhanti katamā pucchā? Kinti te diṭṭhanti katamā pucchā? Kadā te diṭṭhanti katamā pucchā? Kattha te diṭṭhanti katamā pucchā?
൩൯൯. കിം തേ ദിട്ഠന്തി വത്ഥുപുച്ഛാ, വിപത്തിപുച്ഛാ, ആപത്തിപുച്ഛാ, അജ്ഝാചാരപുച്ഛാ. വത്ഥുപുച്ഛാതി – അട്ഠപാരാജികാനം വത്ഥുപുച്ഛാ, തേവീസസങ്ഘാദിസേസാനം വത്ഥുപുച്ഛാ, ദ്വേഅനിയതാനം വത്ഥുപുച്ഛാ, ദ്വേചത്താരീസനിസ്സഗ്ഗിയാനം വത്ഥുപുച്ഛാ, അട്ഠാസീതിസതപാചിത്തിയാനം വത്ഥുപുച്ഛാ, ദ്വാദസപാടിദേസനീയാനം വത്ഥുപുച്ഛാ, ദുക്കടാനം വത്ഥുപുച്ഛാ, ദുബ്ഭാസിതാനം വത്ഥുപുച്ഛാ. വിപത്തിപുച്ഛാതി – സീലവിപത്തിപുച്ഛാ, ആചാരവിപത്തിപുച്ഛാ, ദിട്ഠിവിപത്തിപുച്ഛാ , ആജീവവിപത്തിപുച്ഛാ. ആപത്തിപുച്ഛാതി – പാരാജികാപത്തിപുച്ഛാ, സങ്ഘാദിസേസാപത്തിപുച്ഛാ, ഥുല്ലച്ചയാപത്തിപുച്ഛാ, പാചിത്തിയാപത്തിപുച്ഛാ, പാടിദേസനീയാപത്തിപുച്ഛാ, ദുക്കടാപത്തിപുച്ഛാ, ദുബ്ഭാസിതാപത്തിപുച്ഛാ. അജ്ഝാചാരപുച്ഛാതി – ദ്വയംദ്വയസമാപത്തിപുച്ഛാ.
399.Kiṃ te diṭṭhanti vatthupucchā, vipattipucchā, āpattipucchā, ajjhācārapucchā. Vatthupucchāti – aṭṭhapārājikānaṃ vatthupucchā, tevīsasaṅghādisesānaṃ vatthupucchā, dveaniyatānaṃ vatthupucchā, dvecattārīsanissaggiyānaṃ vatthupucchā, aṭṭhāsītisatapācittiyānaṃ vatthupucchā, dvādasapāṭidesanīyānaṃ vatthupucchā, dukkaṭānaṃ vatthupucchā, dubbhāsitānaṃ vatthupucchā. Vipattipucchāti – sīlavipattipucchā, ācāravipattipucchā, diṭṭhivipattipucchā , ājīvavipattipucchā. Āpattipucchāti – pārājikāpattipucchā, saṅghādisesāpattipucchā, thullaccayāpattipucchā, pācittiyāpattipucchā, pāṭidesanīyāpattipucchā, dukkaṭāpattipucchā, dubbhāsitāpattipucchā. Ajjhācārapucchāti – dvayaṃdvayasamāpattipucchā.
൪൦൦. കിന്തി തേ ദിട്ഠന്തി ലിങ്ഗപുച്ഛാ, ഇരിയാപഥപുച്ഛാ, ആകാരപുച്ഛാ, വിപ്പകാരപുച്ഛാ. ലിങ്ഗപുച്ഛാതി – ദീഘം വാ രസ്സം വാ കണ്ഹം വാ ഓദാതം വാ. ഇരിയാപഥപുച്ഛാതി ഗച്ഛന്തം വാ ഠിതം വാ നിസിന്നം വാ നിപന്നം വാ. ആകാരപുച്ഛാതി ഗിഹിലിങ്ഗേ വാ തിത്ഥിയലിങ്ഗേ വാ പബ്ബജിതലിങ്ഗേ വാ. വിപ്പകാരപുച്ഛാതി ഗച്ഛന്തം വാ ഠിതം വാ നിസിന്നം വാ നിപന്നം വാ.
400.Kinti te diṭṭhanti liṅgapucchā, iriyāpathapucchā, ākārapucchā, vippakārapucchā. Liṅgapucchāti – dīghaṃ vā rassaṃ vā kaṇhaṃ vā odātaṃ vā. Iriyāpathapucchāti gacchantaṃ vā ṭhitaṃ vā nisinnaṃ vā nipannaṃ vā. Ākārapucchāti gihiliṅge vā titthiyaliṅge vā pabbajitaliṅge vā. Vippakārapucchāti gacchantaṃ vā ṭhitaṃ vā nisinnaṃ vā nipannaṃ vā.
൪൦൧. കദാ തേ ദിട്ഠന്തി കാലപുച്ഛാ, സമയപുച്ഛാ, ദിവസപുച്ഛാ, ഉതുപുച്ഛാ. കാലപുച്ഛാതി പുബ്ബണ്ഹകാലേ വാ മജ്ഝന്ഹികകാലേ വാ സായന്ഹകാലേ വാ. സമയപുച്ഛാതി പുബ്ബണ്ഹസമയേ വാ മജ്ഝന്ഹികസമയേ വാ സായന്ഹസമയേ വാ. ദിവസപുച്ഛാതി പുരേഭത്തം വാ പച്ഛാഭത്തം വാ രത്തിം വാ ദിവാ വാ കാളേ വാ ജുണ്ഹേ വാ. ഉതുപുച്ഛാതി ഹേമന്തേ വാ ഗിമ്ഹേ വാ വസ്സേ വാ 1.
401.Kadāte diṭṭhanti kālapucchā, samayapucchā, divasapucchā, utupucchā. Kālapucchāti pubbaṇhakāle vā majjhanhikakāle vā sāyanhakāle vā. Samayapucchāti pubbaṇhasamaye vā majjhanhikasamaye vā sāyanhasamaye vā. Divasapucchāti purebhattaṃ vā pacchābhattaṃ vā rattiṃ vā divā vā kāḷe vā juṇhe vā. Utupucchāti hemante vā gimhe vā vasse vā 2.
൪൦൨. കത്ഥ തേ ദിട്ഠന്തി ഠാനപുച്ഛാ, ഭൂമിപുച്ഛാ, ഓകാസപുച്ഛാ, പദേസപുച്ഛാ. ഠാനപുച്ഛാതി ഭൂമിയാ വാ പഥവിയാ വാ ധരണിയാ വാ ജഗതിയാ വാ. ഭൂമിപുച്ഛാതി ഭൂമിയാ വാ പഥവിയാ വാ പബ്ബതേ വാ പാസാണേ വാ പാസാദേ വാ. ഓകാസപുച്ഛാതി പുരത്ഥിമേ വാ ഓകാസേ പച്ഛിമേ വാ ഓകാസേ ഉത്തരേ വാ ഓകാസേ ദക്ഖിണേ വാ ഓകാസേ. പദേസപുച്ഛാതി പുരത്ഥിമേ വാ പദേസേ പച്ഛിമേ വാ പദേസേ ഉത്തരേ വാ പദേസേ ദക്ഖിണേ വാ പദേസേതി.
402.Kattha te diṭṭhanti ṭhānapucchā, bhūmipucchā, okāsapucchā, padesapucchā. Ṭhānapucchāti bhūmiyā vā pathaviyā vā dharaṇiyā vā jagatiyā vā. Bhūmipucchāti bhūmiyā vā pathaviyā vā pabbate vā pāsāṇe vā pāsāde vā. Okāsapucchāti puratthime vā okāse pacchime vā okāse uttare vā okāse dakkhiṇe vā okāse. Padesapucchāti puratthime vā padese pacchime vā padese uttare vā padese dakkhiṇe vā padeseti.
മഹാസങ്ഗാമോ നിട്ഠിതോ.
Mahāsaṅgāmo niṭṭhito.
തസ്സുദ്ദാനം –
Tassuddānaṃ –
വത്ഥു നിദാനം ആകാരോ, പുബ്ബാപരം കതാകതം;
Vatthu nidānaṃ ākāro, pubbāparaṃ katākataṃ;
കമ്മാധികരണഞ്ചേവ, സമഥോ ഛന്ദഗാമി ച.
Kammādhikaraṇañceva, samatho chandagāmi ca.
ദോസാ മോഹാ ഭയാ ചേവ, സഞ്ഞാ നിജ്ഝാപനേന ച;
Dosā mohā bhayā ceva, saññā nijjhāpanena ca;
പേക്ഖാ പസാദേ പക്ഖോമ്ഹി, സുതഥേരതരേന ച.
Pekkhā pasāde pakkhomhi, sutatheratarena ca.
അസമ്പത്തഞ്ച സമ്പത്തം, ധമ്മേന വിനയേന ച;
Asampattañca sampattaṃ, dhammena vinayena ca;
സത്ഥുസ്സ സാസനേനാപി, മഹാസങ്ഗാമഞാപനാതി.
Satthussa sāsanenāpi, mahāsaṅgāmañāpanāti.
Footnotes:
Related texts:
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / വോഹരന്തേനജാനിതബ്ബാദിവണ്ണനാ • Voharantenajānitabbādivaṇṇanā
