க²ந்த⁴கபுச்சா²வாரோ

புச்சா²விஸ்ஸஜ்ஜனாவண்ணனா

320. உபஸம்பத³ங் புச்சி²ஸ்ஸந்தி உபஸம்பத³க்க²ந்த⁴கங் புச்சி²ஸ்ஸங். ஸனிதா³னங் ஸனித்³தே³ஸந்தி நிதா³னேன ச நித்³தே³ஸேன ச ஸத்³தி⁴ங் புச்சி²ஸ்ஸாமி. ஸமுக்கட்ட²பதா³னங் கதி ஆபத்தியோதி யானி தத்த² ஸமுக்கட்டா²னி உத்தமானி பதா³னி வுத்தானி, தேஸங் ஸமுக்கட்ட²பதா³னங் உத்தமபதா³னங் ஸங்கே²பதோ கதி ஆபத்தியோ ஹொந்தீதி. யேன யேன ஹி பதே³ன யா யா ஆபத்தி பஞ்ஞத்தா, ஸா ஸா தஸ்ஸ தஸ்ஸ பத³ஸ்ஸ ஆபத்தீதி வுச்சதி. தேன வுத்தங் ‘‘ஸமுக்கட்ட²பதா³னங் கதி ஆபத்தியோ’’தி. த்³வே ஆபத்தியோதி ஊனவீஸதிவஸ்ஸங் உபஸம்பாதெ³ந்தஸ்ஸ பாசித்தியங், ஸேஸேஸு ஸப்³ப³பதே³ஸு து³க்கடங்.

திஸ்ஸோதி ‘‘நஸ்ஸந்தேதே வினஸ்ஸந்தேதே, கோ தேஹி அத்தோ²’’தி பே⁴த³புரெக்கா²ரானங் உபோஸத²கரணே து²ல்லச்சயங், உக்கி²த்தகேன ஸத்³தி⁴ங் உபோஸத²கரணே பாசித்தியங், ஸேஸேஸு து³க்கடந்தி ஏவங் உபோஸத²க்க²ந்த⁴கே திஸ்ஸோ ஆபத்தியோ. ஏகாதி வஸ்ஸூபனாயிகக்க²ந்த⁴கே ஏகா து³க்கடாபத்தியேவ.

திஸ்ஸோதி பே⁴த³புரெக்கா²ரஸ்ஸ பவாரயதோ து²ல்லச்சயங், உக்கி²த்தகேன ஸத்³தி⁴ங் பாசித்தியங், ஸேஸேஸு து³க்கடந்தி ஏவங் பவாரணாக்க²ந்த⁴கேபி திஸ்ஸோ ஆபத்தியோ.

திஸ்ஸோதி வச்ச²தரிங் உக்³க³ஹெத்வா மாரெந்தானங் பாசித்தியங், ரத்தேன சித்தேன அங்க³ஜாதசு²பனே து²ல்லச்சயங், ஸேஸேஸு து³க்கடந்தி ஏவங் சம்மஸங்யுத்தேபி திஸ்ஸோ ஆபத்தியோ. பே⁴ஸஜ்ஜக்க²ந்த⁴கேபி ஸமந்தா த்³வங்கு³லே து²ல்லச்சயங், போ⁴ஜ்ஜயாகு³யா பாசித்தியங், ஸேஸேஸு து³க்கடந்தி ஏவங் திஸ்ஸோ ஆபத்தியோ.

கதி²னங் கேவலங் பஞ்ஞத்திமேவ, நத்தி² தத்த² ஆபத்தி. சீவரஸங்யுத்தே குஸசீரவாகசீரேஸு து²ல்லச்சயங், அதிரேகசீவரே நிஸ்ஸக்³கி³யங், ஸேஸேஸு து³க்கடந்தி இமா திஸ்ஸோ ஆபத்தியோ.

சம்பெய்யகே ஏகா து³க்கடாபத்தியேவ. கோஸம்ப³க-கம்மக்க²ந்த⁴க-பாரிவாஸிகஸமுச்சயக்க²ந்த⁴கேஸுபி ஏகா து³க்கடாபத்தியேவ.

ஸமத²க்க²ந்த⁴கே ச²ந்த³தா³யகோ கி²ய்யதி, கி²ய்யனகங் பாசித்தியங், ஸேஸேஸு து³க்கடந்தி இமா த்³வே ஆபத்தியோ. கு²த்³த³கவத்து²கே அத்தனோ அங்க³ஜாதங் சி²ந்த³தி, து²ல்லச்சயங், ரோமட்டே² பாசித்தியங், ஸேஸேஸு து³க்கடந்தி இமா திஸ்ஸோ ஆபத்தியோ. ஸேனாஸனக்க²ந்த⁴கே க³ருப⁴ண்ட³விஸ்ஸஜ்ஜனே து²ல்லச்சயங், ஸங்கி⁴கா விஹாரா நிக்கட்³ட⁴னே பாசித்தியங், ஸேஸேஸு து³க்கடந்தி இமா திஸ்ஸோ ஆபத்தியோ.

ஸங்க⁴பே⁴தே³பே⁴த³கானுவத்தகானங் து²ல்லச்சயங், க³ணபோ⁴ஜனே பாசித்தியந்தி இமா த்³வே ஆபத்தியோ. ஸமாசாரங் புச்சி²ஸ்ஸந்தி வுத்தே வத்தக்க²ந்த⁴கே ஏகா து³க்கடாபத்தியேவ. ஸா ஸப்³ப³வத்தேஸு அனாத³ரியேன ஹோதி. ததா² பாதிமொக்க²ட்ட²பனே. பி⁴க்கு²னிக்க²ந்த⁴கே அப்பவாரணாய பாசித்தியங், ஸேஸேஸு து³க்கடந்தி த்³வே ஆபத்தியோ. பஞ்சஸதிகஸத்தஸதிகேஸு கேவலங் த⁴ம்மோ ஸங்க³ஹங் ஆரோபிதோ, நத்தி² தத்த² ஆபத்தீதி.

க²ந்த⁴கபுச்சா²வாரவண்ணனா நிட்டி²தா.