| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
க²ந்த⁴கபுச்சா²வாரோ
Khandhakapucchāvāro
புச்சா²விஸ்ஸஜ்ஜனாவண்ணனா
Pucchāvissajjanāvaṇṇanā
320. உபஸம்பத³க்க²ந்த⁴கந்தி மஹாக²ந்த⁴கங். ‘‘நிதா³னேன ச நித்³தே³ஸேன ச ஸத்³தி⁴’’ந்தி இமினா ஸஹ நிதா³னேனாதி ஸனிதா³னங், ஸஹ நித்³தே³ஸேனாதி ஸனித்³தே³ஸந்தி வசனத்த²ங் த³ஸ்ஸேதி. எத்த² நிதா³னேனாதி ஸிக்கா²பத³பஞ்ஞத்திதே³ஸஸங்கா²தேன நிதா³னேன. நித்³தே³ஸேனாதி புக்³க³லாதி³னித்³தே³ஸேன. தத்தா²தி உபஸம்பத³க்க²ந்த⁴கே. ஸமுக்கட்ட²பதா³னந்தி எத்த² ஸமுக்கட்ட²ஸத்³தோ³ உத்தமபரியாயோதி ஆஹ ‘‘உத்தமானீ’’தி. பதா³னீதி ‘‘ந பி⁴க்க²வே ஊனவீஸதிவஸ்ஸோ புக்³க³லோ உபஸம்பாதே³தப்³போ³’’தி (பாசி॰ 402-403; மஹாவ॰ 124) ஆதி³னா நயேன வுத்தானி பதா³னி. இமேஹி பதே³ஹி ‘‘ஸமுக்கட்டா²னி பதா³னி ஸமுக்கட்ட²பதா³னீ’’தி வசனத்த²ங் த³ஸ்ஸேதி. இதீதி அயமத்தோ². கஸ்மா பனெத்த² ‘‘ஸமுக்கட்ட²பதா³னங் கதி ஆபத்தியோ’’தி பதா³னமேவ ஸாமிவஸேன நித்³தே³ஸோ கதோ, நனு ஆபத்தியோ நாம புக்³க³லானஞ்ஞேவ ஹொந்தீதி ஆஹ ‘‘யேன யேன ஹீ’’திஆதி³. ஹீதி யஸ்மா. யேன யேன பதே³ன பஞ்ஞத்தாதி ஸம்ப³ந்தோ⁴. ஸா ஸாதி ஆபத்தி. த்³வே ஆபத்தியோதி எத்த² த்³வின்னங் ஆபத்தீனங் ஸரூபங் த³ஸ்ஸெந்தோ ஆஹ ‘‘பாசித்தியங், து³க்கட’’ந்தி.
320.Upasampadakkhandhakanti mahākhandhakaṃ. ‘‘Nidānena ca niddesena ca saddhi’’nti iminā saha nidānenāti sanidānaṃ, saha niddesenāti saniddesanti vacanatthaṃ dasseti. Ettha nidānenāti sikkhāpadapaññattidesasaṅkhātena nidānena. Niddesenāti puggalādiniddesena. Tatthāti upasampadakkhandhake. Samukkaṭṭhapadānanti ettha samukkaṭṭhasaddo uttamapariyāyoti āha ‘‘uttamānī’’ti. Padānīti ‘‘na bhikkhave ūnavīsativasso puggalo upasampādetabbo’’ti (pāci. 402-403; mahāva. 124) ādinā nayena vuttāni padāni. Imehi padehi ‘‘samukkaṭṭhāni padāni samukkaṭṭhapadānī’’ti vacanatthaṃ dasseti. Itīti ayamattho. Kasmā panettha ‘‘samukkaṭṭhapadānaṃ kati āpattiyo’’ti padānameva sāmivasena niddeso kato, nanu āpattiyo nāma puggalānaññeva hontīti āha ‘‘yena yena hī’’tiādi. Hīti yasmā. Yena yena padena paññattāti sambandho. Sā sāti āpatti. Dve āpattiyoti ettha dvinnaṃ āpattīnaṃ sarūpaṃ dassento āha ‘‘pācittiyaṃ, dukkaṭa’’nti.
நஸ்ஸந்தேதேதி நஸ்ஸந்து ஏதே. வினஸ்ஸந்தேதேதி வினஸ்ஸந்து ஏதே பி⁴க்கூ²தி அத்தோ². தேஹீதி பி⁴க்கூ²ஹி. வத³தோதி வத³ந்தானங். ஸேஸேஸு உபோஸத²கரணேஸூதி ஸம்ப³ந்தோ⁴. ‘‘து³க்கடாபத்தியேவா’’தி இமினா ஏகா ஆபத்தீதி எத்த² அத்த²பகரணாதி³வஸேன து³க்கடாபத்தியேவாதி த³ஸ்ஸேதி.
Nassanteteti nassantu ete. Vinassanteteti vinassantu ete bhikkhūti attho. Tehīti bhikkhūhi. Vadatoti vadantānaṃ. Sesesu uposathakaraṇesūti sambandho. ‘‘Dukkaṭāpattiyevā’’ti iminā ekā āpattīti ettha atthapakaraṇādivasena dukkaṭāpattiyevāti dasseti.
பவாரணக்க²ந்த⁴கேபீதி பிஸத்³தோ³ உபோஸத²க்க²ந்த⁴கங் அபெக்க²தி.
Pavāraṇakkhandhakepīti pisaddo uposathakkhandhakaṃ apekkhati.
சம்மஸங்யுத்தேபீதி சம்மேன ஸங்யுத்தங் கத்வா தே³ஸிதே க²ந்த⁴கேபி, சம்மக்க²ந்த⁴கேபீதி அத்தோ². பிஸத்³தோ³ பவாரணக்க²ந்த⁴கங் அபெக்க²தி. பே⁴ஸஜ்ஜக்க²ந்த⁴கேபீதி பிஸத்³தோ³ சம்மக்க²ந்த⁴கங் அபெக்க²தி. ஸமந்தாதி அங்க³ஜாதஸ்ஸ ஸமந்ததோ.
Cammasaṃyuttepīti cammena saṃyuttaṃ katvā desite khandhakepi, cammakkhandhakepīti attho. Pisaddo pavāraṇakkhandhakaṃ apekkhati. Bhesajjakkhandhakepīti pisaddo cammakkhandhakaṃ apekkhati. Samantāti aṅgajātassa samantato.
தத்தா²தி கதி²னக்க²ந்த⁴கே. சீவரஸங்யுத்தேதி சீவரக்க²ந்த⁴கே.
Tatthāti kathinakkhandhake. Cīvarasaṃyutteti cīvarakkhandhake.
சம்பெய்யகேதி சம்பெய்யக்க²ந்த⁴கே. ஸமுச்சயக்க²ந்த⁴கேஸுபீதி பிஸத்³தோ³ சம்பெய்யக்க²ந்த⁴கங் அபெக்க²தி.
Campeyyaketi campeyyakkhandhake. Samuccayakkhandhakesupīti pisaddo campeyyakkhandhakaṃ apekkhati.
ஸமத²க்க²ந்த⁴கே இமா த்³வே ஆபத்தியோ ஹொந்தீதி யோஜனா. ஏஸேவ நயோ ஸேஸேஸுபி. கு²த்³த³கவத்து²கேதி கு²த்³த³கவத்து²க்க²ந்த⁴கே. க³ருப⁴ண்ட³விஸ்ஸஜ்ஜனேதி க³ருப⁴ண்ட³ஸ்ஸ விஸ்ஸஜ்ஜனே.
Samathakkhandhake imā dve āpattiyo hontīti yojanā. Eseva nayo sesesupi. Khuddakavatthuketi khuddakavatthukkhandhake. Garubhaṇḍavissajjaneti garubhaṇḍassa vissajjane.
ஸங்க⁴பே⁴தே³தி ஸங்க⁴பே⁴த³க்க²ந்த⁴கே. ‘‘ஸமாசாரங் புச்சி²ஸ்ஸந்தி வுத்தே வத்தக்க²ந்த⁴கே’’தி இமினா ஸமாசாரஸத்³தே³ன வத்தக்க²ந்த⁴கங் க³ஹேதப்³ப³ந்தி த³ஸ்ஸேதி. ஸாதி து³க்கடாபத்தி. ‘‘ததா²’’தி பதே³ன ‘‘ஏகா து³க்கடாபத்தியேவா’’தி பத³ங் அதிதி³ஸதி. ‘‘பாதிமொக்க²ட்ட²பனே’’தி இமினா பாளியங் ட²பனங் புச்சி²ஸ்ஸந்தி எத்த² ‘‘பாதிமொக்க²’’ந்திஆதி³பத³ஸ்ஸ லோபங் த³ஸ்ஸேதி. பஞ்சஸதிகஸத்தஸதிகேஸூதி பஞ்சஸதிகக்க²ந்த⁴கஸத்தஸதிகக்க²ந்த⁴கேஸு. ஆரோபிதோதி எத்த² ருபதா⁴துயா த்³விகம்மிகத்தா, ந்யாதி³க³ணத்தா ச ‘‘த⁴ம்மோ’’தி பதா⁴னகம்மமேவ வுத்தங், ந ‘‘ஸங்க³ஹ’’ந்தி அபதா⁴னகம்மங். தேன வுத்தங் ‘‘த⁴ம்மோ ஸங்க³ஹ’’ந்தி. தத்தா²தி பஞ்சஸதிகஸத்தஸதிகேஸு.
Saṅghabhedeti saṅghabhedakkhandhake. ‘‘Samācāraṃ pucchissanti vutte vattakkhandhake’’ti iminā samācārasaddena vattakkhandhakaṃ gahetabbanti dasseti. Sāti dukkaṭāpatti. ‘‘Tathā’’ti padena ‘‘ekā dukkaṭāpattiyevā’’ti padaṃ atidisati. ‘‘Pātimokkhaṭṭhapane’’ti iminā pāḷiyaṃ ṭhapanaṃ pucchissanti ettha ‘‘pātimokkha’’ntiādipadassa lopaṃ dasseti. Pañcasatikasattasatikesūti pañcasatikakkhandhakasattasatikakkhandhakesu. Āropitoti ettha rupadhātuyā dvikammikattā, nyādigaṇattā ca ‘‘dhammo’’ti padhānakammameva vuttaṃ, na ‘‘saṅgaha’’nti apadhānakammaṃ. Tena vuttaṃ ‘‘dhammo saṅgaha’’nti. Tatthāti pañcasatikasattasatikesu.
இதி க²ந்த⁴கபுச்சா²வண்ணனாய யோஜனா ஸமத்தா.
Iti khandhakapucchāvaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / க²ந்த⁴கபுச்சா²வாரோ • Khandhakapucchāvāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / புச்சா²விஸ்ஸஜ்ஜனாவண்ணனா • Pucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / புச்சா²விஸ்ஸஜ்ஜனாவண்ணனா • Pucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / புச்சா²விஸ்ஸஜ்ஜனாவண்ணனா • Pucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / புச்சா²விஸ்ஸஜ்ஜனாவண்ணனா • Pucchāvissajjanāvaṇṇanā
