| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
খন্ধকপুচ্ছাৰারো
Khandhakapucchāvāro
পুচ্ছাৰিস্সজ্জনাৰণ্ণনা
Pucchāvissajjanāvaṇṇanā
৩২০. উপসম্পদক্খন্ধকন্তি মহাখন্ধকং। ‘‘নিদানেন চ নিদ্দেসেন চ সদ্ধি’’ন্তি ইমিনা সহ নিদানেনাতি সনিদানং, সহ নিদ্দেসেনাতি সনিদ্দেসন্তি ৰচনত্থং দস্সেতি। এত্থ নিদানেনাতি সিক্খাপদপঞ্ঞত্তিদেসসঙ্খাতেন নিদানেন। নিদ্দেসেনাতি পুগ্গলাদিনিদ্দেসেন। তত্থাতি উপসম্পদক্খন্ধকে। সমুক্কট্ঠপদানন্তি এত্থ সমুক্কট্ঠসদ্দো উত্তমপরিযাযোতি আহ ‘‘উত্তমানী’’তি। পদানীতি ‘‘ন ভিক্খৰে ঊনৰীসতিৰস্সো পুগ্গলো উপসম্পাদেতব্বো’’তি (পাচি॰ ৪০২-৪০৩; মহাৰ॰ ১২৪) আদিনা নযেন ৰুত্তানি পদানি। ইমেহি পদেহি ‘‘সমুক্কট্ঠানি পদানি সমুক্কট্ঠপদানী’’তি ৰচনত্থং দস্সেতি। ইতীতি অযমত্থো। কস্মা পনেত্থ ‘‘সমুক্কট্ঠপদানং কতি আপত্তিযো’’তি পদানমেৰ সামিৰসেন নিদ্দেসো কতো, ননু আপত্তিযো নাম পুগ্গলানঞ্ঞেৰ হোন্তীতি আহ ‘‘যেন যেন হী’’তিআদি। হীতি যস্মা। যেন যেন পদেন পঞ্ঞত্তাতি সম্বন্ধো। সা সাতি আপত্তি। দ্ৰে আপত্তিযোতি এত্থ দ্ৰিন্নং আপত্তীনং সরূপং দস্সেন্তো আহ ‘‘পাচিত্তিযং, দুক্কট’’ন্তি।
320.Upasampadakkhandhakanti mahākhandhakaṃ. ‘‘Nidānena ca niddesena ca saddhi’’nti iminā saha nidānenāti sanidānaṃ, saha niddesenāti saniddesanti vacanatthaṃ dasseti. Ettha nidānenāti sikkhāpadapaññattidesasaṅkhātena nidānena. Niddesenāti puggalādiniddesena. Tatthāti upasampadakkhandhake. Samukkaṭṭhapadānanti ettha samukkaṭṭhasaddo uttamapariyāyoti āha ‘‘uttamānī’’ti. Padānīti ‘‘na bhikkhave ūnavīsativasso puggalo upasampādetabbo’’ti (pāci. 402-403; mahāva. 124) ādinā nayena vuttāni padāni. Imehi padehi ‘‘samukkaṭṭhāni padāni samukkaṭṭhapadānī’’ti vacanatthaṃ dasseti. Itīti ayamattho. Kasmā panettha ‘‘samukkaṭṭhapadānaṃ kati āpattiyo’’ti padānameva sāmivasena niddeso kato, nanu āpattiyo nāma puggalānaññeva hontīti āha ‘‘yena yena hī’’tiādi. Hīti yasmā. Yena yena padena paññattāti sambandho. Sā sāti āpatti. Dve āpattiyoti ettha dvinnaṃ āpattīnaṃ sarūpaṃ dassento āha ‘‘pācittiyaṃ, dukkaṭa’’nti.
নস্সন্তেতেতি নস্সন্তু এতে। ৰিনস্সন্তেতেতি ৰিনস্সন্তু এতে ভিক্খূতি অত্থো। তেহীতি ভিক্খূহি। ৰদতোতি ৰদন্তানং। সেসেসু উপোসথকরণেসূতি সম্বন্ধো। ‘‘দুক্কটাপত্তিযেৰা’’তি ইমিনা একা আপত্তীতি এত্থ অত্থপকরণাদিৰসেন দুক্কটাপত্তিযেৰাতি দস্সেতি।
Nassanteteti nassantu ete. Vinassanteteti vinassantu ete bhikkhūti attho. Tehīti bhikkhūhi. Vadatoti vadantānaṃ. Sesesu uposathakaraṇesūti sambandho. ‘‘Dukkaṭāpattiyevā’’ti iminā ekā āpattīti ettha atthapakaraṇādivasena dukkaṭāpattiyevāti dasseti.
পৰারণক্খন্ধকেপীতি পিসদ্দো উপোসথক্খন্ধকং অপেক্খতি।
Pavāraṇakkhandhakepīti pisaddo uposathakkhandhakaṃ apekkhati.
চম্মসংযুত্তেপীতি চম্মেন সংযুত্তং কত্ৰা দেসিতে খন্ধকেপি, চম্মক্খন্ধকেপীতি অত্থো। পিসদ্দো পৰারণক্খন্ধকং অপেক্খতি। ভেসজ্জক্খন্ধকেপীতি পিসদ্দো চম্মক্খন্ধকং অপেক্খতি। সমন্তাতি অঙ্গজাতস্স সমন্ততো।
Cammasaṃyuttepīti cammena saṃyuttaṃ katvā desite khandhakepi, cammakkhandhakepīti attho. Pisaddo pavāraṇakkhandhakaṃ apekkhati. Bhesajjakkhandhakepīti pisaddo cammakkhandhakaṃ apekkhati. Samantāti aṅgajātassa samantato.
তত্থাতি কথিনক্খন্ধকে। চীৰরসংযুত্তেতি চীৰরক্খন্ধকে।
Tatthāti kathinakkhandhake. Cīvarasaṃyutteti cīvarakkhandhake.
চম্পেয্যকেতি চম্পেয্যক্খন্ধকে। সমুচ্চযক্খন্ধকেসুপীতি পিসদ্দো চম্পেয্যক্খন্ধকং অপেক্খতি।
Campeyyaketi campeyyakkhandhake. Samuccayakkhandhakesupīti pisaddo campeyyakkhandhakaṃ apekkhati.
সমথক্খন্ধকে ইমা দ্ৰে আপত্তিযো হোন্তীতি যোজনা। এসেৰ নযো সেসেসুপি। খুদ্দকৰত্থুকেতি খুদ্দকৰত্থুক্খন্ধকে। গরুভণ্ডৰিস্সজ্জনেতি গরুভণ্ডস্স ৰিস্সজ্জনে।
Samathakkhandhake imā dve āpattiyo hontīti yojanā. Eseva nayo sesesupi. Khuddakavatthuketi khuddakavatthukkhandhake. Garubhaṇḍavissajjaneti garubhaṇḍassa vissajjane.
সঙ্ঘভেদেতি সঙ্ঘভেদক্খন্ধকে। ‘‘সমাচারং পুচ্ছিস্সন্তি ৰুত্তে ৰত্তক্খন্ধকে’’তি ইমিনা সমাচারসদ্দেন ৰত্তক্খন্ধকং গহেতব্বন্তি দস্সেতি। সাতি দুক্কটাপত্তি। ‘‘তথা’’তি পদেন ‘‘একা দুক্কটাপত্তিযেৰা’’তি পদং অতিদিসতি। ‘‘পাতিমোক্খট্ঠপনে’’তি ইমিনা পাল়িযং ঠপনং পুচ্ছিস্সন্তি এত্থ ‘‘পাতিমোক্খ’’ন্তিআদিপদস্স লোপং দস্সেতি। পঞ্চসতিকসত্তসতিকেসূতি পঞ্চসতিকক্খন্ধকসত্তসতিকক্খন্ধকেসু। আরোপিতোতি এত্থ রুপধাতুযা দ্ৰিকম্মিকত্তা, ন্যাদিগণত্তা চ ‘‘ধম্মো’’তি পধানকম্মমেৰ ৰুত্তং, ন ‘‘সঙ্গহ’’ন্তি অপধানকম্মং। তেন ৰুত্তং ‘‘ধম্মো সঙ্গহ’’ন্তি। তত্থাতি পঞ্চসতিকসত্তসতিকেসু।
Saṅghabhedeti saṅghabhedakkhandhake. ‘‘Samācāraṃ pucchissanti vutte vattakkhandhake’’ti iminā samācārasaddena vattakkhandhakaṃ gahetabbanti dasseti. Sāti dukkaṭāpatti. ‘‘Tathā’’ti padena ‘‘ekā dukkaṭāpattiyevā’’ti padaṃ atidisati. ‘‘Pātimokkhaṭṭhapane’’ti iminā pāḷiyaṃ ṭhapanaṃ pucchissanti ettha ‘‘pātimokkha’’ntiādipadassa lopaṃ dasseti. Pañcasatikasattasatikesūti pañcasatikakkhandhakasattasatikakkhandhakesu. Āropitoti ettha rupadhātuyā dvikammikattā, nyādigaṇattā ca ‘‘dhammo’’ti padhānakammameva vuttaṃ, na ‘‘saṅgaha’’nti apadhānakammaṃ. Tena vuttaṃ ‘‘dhammo saṅgaha’’nti. Tatthāti pañcasatikasattasatikesu.
ইতি খন্ধকপুচ্ছাৰণ্ণনায যোজনা সমত্তা।
Iti khandhakapucchāvaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / খন্ধকপুচ্ছাৰারো • Khandhakapucchāvāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / পুচ্ছাৰিস্সজ্জনাৰণ্ণনা • Pucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পুচ্ছাৰিস্সজ্জনাৰণ্ণনা • Pucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পুচ্ছাৰিস্সজ্জনাৰণ্ণনা • Pucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পুচ্ছাৰিস্সজ্জনাৰণ্ণনা • Pucchāvissajjanāvaṇṇanā
