| Library / Tipiṭaka / ติปิฎก • Tipiṭaka / ปริวาร-อฎฺฐกถา • Parivāra-aṭṭhakathā |
ขนฺธกปุจฺฉาวาโร
Khandhakapucchāvāro
ปุจฺฉาวิสฺสชฺชนาวณฺณนา
Pucchāvissajjanāvaṇṇanā
๓๒๐. อุปสมฺปทํ ปุจฺฉิสฺสนฺติ อุปสมฺปทกฺขนฺธกํ ปุจฺฉิสฺสํฯ สนิทานํ สนิเทฺทสนฺติ นิทาเนน จ นิเทฺทเสน จ สทฺธิํ ปุจฺฉิสฺสามิฯ สมุกฺกฎฺฐปทานํ กติ อาปตฺติโยติ ยานิ ตตฺถ สมุกฺกฎฺฐานิ อุตฺตมานิ ปทานิ วุตฺตานิ, เตสํ สมุกฺกฎฺฐปทานํ อุตฺตมปทานํ สเงฺขปโต กติ อาปตฺติโย โหนฺตีติฯ เยน เยน หิ ปเทน ยา ยา อาปตฺติ ปญฺญตฺตา, สา สา ตสฺส ตสฺส ปทสฺส อาปตฺตีติ วุจฺจติฯ เตน วุตฺตํ ‘‘สมุกฺกฎฺฐปทานํ กติ อาปตฺติโย’’ติฯ เทฺว อาปตฺติโยติ อูนวีสติวสฺสํ อุปสมฺปาเทนฺตสฺส ปาจิตฺติยํ, เสเสสุ สพฺพปเทสุ ทุกฺกฎํฯ
320.Upasampadaṃpucchissanti upasampadakkhandhakaṃ pucchissaṃ. Sanidānaṃ saniddesanti nidānena ca niddesena ca saddhiṃ pucchissāmi. Samukkaṭṭhapadānaṃ kati āpattiyoti yāni tattha samukkaṭṭhāni uttamāni padāni vuttāni, tesaṃ samukkaṭṭhapadānaṃ uttamapadānaṃ saṅkhepato kati āpattiyo hontīti. Yena yena hi padena yā yā āpatti paññattā, sā sā tassa tassa padassa āpattīti vuccati. Tena vuttaṃ ‘‘samukkaṭṭhapadānaṃ kati āpattiyo’’ti. Dve āpattiyoti ūnavīsativassaṃ upasampādentassa pācittiyaṃ, sesesu sabbapadesu dukkaṭaṃ.
ติโสฺสติ ‘‘นสฺสเนฺตเต วินสฺสเนฺตเต, โก เตหิ อโตฺถ’’ติ เภทปุเรกฺขารานํ อุโปสถกรเณ ถุลฺลจฺจยํ, อุกฺขิตฺตเกน สทฺธิํ อุโปสถกรเณ ปาจิตฺติยํ, เสเสสุ ทุกฺกฎนฺติ เอวํ อุโปสถกฺขนฺธเก ติโสฺส อาปตฺติโยฯ เอกาติ วสฺสูปนายิกกฺขนฺธเก เอกา ทุกฺกฎาปตฺติเยวฯ
Tissoti ‘‘nassantete vinassantete, ko tehi attho’’ti bhedapurekkhārānaṃ uposathakaraṇe thullaccayaṃ, ukkhittakena saddhiṃ uposathakaraṇe pācittiyaṃ, sesesu dukkaṭanti evaṃ uposathakkhandhake tisso āpattiyo. Ekāti vassūpanāyikakkhandhake ekā dukkaṭāpattiyeva.
ติโสฺสติ เภทปุเรกฺขารสฺส ปวารยโต ถุลฺลจฺจยํ, อุกฺขิตฺตเกน สทฺธิํ ปาจิตฺติยํ, เสเสสุ ทุกฺกฎนฺติ เอวํ ปวารณากฺขนฺธเกปิ ติโสฺส อาปตฺติโยฯ
Tissoti bhedapurekkhārassa pavārayato thullaccayaṃ, ukkhittakena saddhiṃ pācittiyaṃ, sesesu dukkaṭanti evaṃ pavāraṇākkhandhakepi tisso āpattiyo.
ติโสฺสติ วจฺฉตริํ อุคฺคเหตฺวา มาเรนฺตานํ ปาจิตฺติยํ, รเตฺตน จิเตฺตน องฺคชาตฉุปเน ถุลฺลจฺจยํ, เสเสสุ ทุกฺกฎนฺติ เอวํ จมฺมสํยุเตฺตปิ ติโสฺส อาปตฺติโยฯ เภสชฺชกฺขนฺธเกปิ สมนฺตา ทฺวงฺคุเล ถุลฺลจฺจยํ, โภชฺชยาคุยา ปาจิตฺติยํ, เสเสสุ ทุกฺกฎนฺติ เอวํ ติโสฺส อาปตฺติโยฯ
Tissoti vacchatariṃ uggahetvā mārentānaṃ pācittiyaṃ, rattena cittena aṅgajātachupane thullaccayaṃ, sesesu dukkaṭanti evaṃ cammasaṃyuttepi tisso āpattiyo. Bhesajjakkhandhakepi samantā dvaṅgule thullaccayaṃ, bhojjayāguyā pācittiyaṃ, sesesu dukkaṭanti evaṃ tisso āpattiyo.
กถินํ เกวลํ ปญฺญตฺติเมว, นตฺถิ ตตฺถ อาปตฺติฯ จีวรสํยุเตฺต กุสจีรวากจีเรสุ ถุลฺลจฺจยํ, อติเรกจีวเร นิสฺสคฺคิยํ, เสเสสุ ทุกฺกฎนฺติ อิมา ติโสฺส อาปตฺติโยฯ
Kathinaṃ kevalaṃ paññattimeva, natthi tattha āpatti. Cīvarasaṃyutte kusacīravākacīresu thullaccayaṃ, atirekacīvare nissaggiyaṃ, sesesu dukkaṭanti imā tisso āpattiyo.
จเมฺปยฺยเก เอกา ทุกฺกฎาปตฺติเยวฯ โกสมฺพก-กมฺมกฺขนฺธก-ปาริวาสิกสมุจฺจยกฺขนฺธเกสุปิ เอกา ทุกฺกฎาปตฺติเยวฯ
Campeyyake ekā dukkaṭāpattiyeva. Kosambaka-kammakkhandhaka-pārivāsikasamuccayakkhandhakesupi ekā dukkaṭāpattiyeva.
สมถกฺขนฺธเก ฉนฺททายโก ขิยฺยติ, ขิยฺยนกํ ปาจิตฺติยํ, เสเสสุ ทุกฺกฎนฺติ อิมา เทฺว อาปตฺติโยฯ ขุทฺทกวตฺถุเก อตฺตโน องฺคชาตํ ฉินฺทติ, ถุลฺลจฺจยํ, โรมเฎฺฐ ปาจิตฺติยํ, เสเสสุ ทุกฺกฎนฺติ อิมา ติโสฺส อาปตฺติโยฯ เสนาสนกฺขนฺธเก ครุภณฺฑวิสฺสชฺชเน ถุลฺลจฺจยํ, สงฺฆิกา วิหารา นิกฺกฑฺฒเน ปาจิตฺติยํ, เสเสสุ ทุกฺกฎนฺติ อิมา ติโสฺส อาปตฺติโยฯ
Samathakkhandhake chandadāyako khiyyati, khiyyanakaṃ pācittiyaṃ, sesesu dukkaṭanti imā dve āpattiyo. Khuddakavatthuke attano aṅgajātaṃ chindati, thullaccayaṃ, romaṭṭhe pācittiyaṃ, sesesu dukkaṭanti imā tisso āpattiyo. Senāsanakkhandhake garubhaṇḍavissajjane thullaccayaṃ, saṅghikā vihārā nikkaḍḍhane pācittiyaṃ, sesesu dukkaṭanti imā tisso āpattiyo.
สงฺฆเภเทเภทกานุวตฺตกานํ ถุลฺลจฺจยํ, คณโภชเน ปาจิตฺติยนฺติ อิมา เทฺว อาปตฺติโยฯ สมาจารํ ปุจฺฉิสฺสนฺติ วุเตฺต วตฺตกฺขนฺธเก เอกา ทุกฺกฎาปตฺติเยวฯ สา สพฺพวเตฺตสุ อนาทริเยน โหติฯ ตถา ปาติโมกฺขฎฺฐปเนฯ ภิกฺขุนิกฺขนฺธเก อปฺปวารณาย ปาจิตฺติยํ, เสเสสุ ทุกฺกฎนฺติ เทฺว อาปตฺติโยฯ ปญฺจสติกสตฺตสติเกสุ เกวลํ ธโมฺม สงฺคหํ อาโรปิโต, นตฺถิ ตตฺถ อาปตฺตีติฯ
Saṅghabhedebhedakānuvattakānaṃ thullaccayaṃ, gaṇabhojane pācittiyanti imā dve āpattiyo. Samācāraṃ pucchissanti vutte vattakkhandhake ekā dukkaṭāpattiyeva. Sā sabbavattesu anādariyena hoti. Tathā pātimokkhaṭṭhapane. Bhikkhunikkhandhake appavāraṇāya pācittiyaṃ, sesesu dukkaṭanti dve āpattiyo. Pañcasatikasattasatikesu kevalaṃ dhammo saṅgahaṃ āropito, natthi tattha āpattīti.
ขนฺธกปุจฺฉาวารวณฺณนา นิฎฺฐิตาฯ
Khandhakapucchāvāravaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / ขนฺธกปุจฺฉาวาโร • Khandhakapucchāvāro
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ปุจฺฉาวิสฺสชฺชนาวณฺณนา • Pucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ปุจฺฉาวิสฺสชฺชนาวณฺณนา • Pucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ปุจฺฉาวิสฺสชฺชนาวณฺณนา • Pucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ปุจฺฉาวิสฺสชฺชนาวณฺณนา • Pucchāvissajjanāvaṇṇanā
