| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ခန္ဓကပုစ္ဆာဝာရော
Khandhakapucchāvāro
ပုစ္ဆာဝိသ္သဇ္ဇနာဝဏ္ဏနာ
Pucchāvissajjanāvaṇṇanā
၃၂၀. ဥပသမ္ပဒံ ပုစ္ဆိသ္သန္တိ ဥပသမ္ပဒက္ခန္ဓကံ ပုစ္ဆိသ္သံ။ သနိဒာနံ သနိဒ္ဒေသန္တိ နိဒာနေန စ နိဒ္ဒေသေန စ သဒ္ဓိံ ပုစ္ဆိသ္သာမိ။ သမုက္ကဋ္ဌပဒာနံ ကတိ အာပတ္တိယောတိ ယာနိ တတ္ထ သမုက္ကဋ္ဌာနိ ဥတ္တမာနိ ပဒာနိ ဝုတ္တာနိ, တေသံ သမုက္ကဋ္ဌပဒာနံ ဥတ္တမပဒာနံ သင္ခေပတော ကတိ အာပတ္တိယော ဟောန္တီတိ။ ယေန ယေန ဟိ ပဒေန ယာ ယာ အာပတ္တိ ပညတ္တာ, သာ သာ တသ္သ တသ္သ ပဒသ္သ အာပတ္တီတိ ဝုစ္စတိ။ တေန ဝုတ္တံ ‘‘သမုက္ကဋ္ဌပဒာနံ ကတိ အာပတ္တိယော’’တိ။ ဒ္ဝေ အာပတ္တိယောတိ ဦနဝီသတိဝသ္သံ ဥပသမ္ပာဒေန္တသ္သ ပာစိတ္တိယံ, သေသေသု သဗ္ဗပဒေသု ဒုက္ကဋံ။
320.Upasampadaṃpucchissanti upasampadakkhandhakaṃ pucchissaṃ. Sanidānaṃ saniddesanti nidānena ca niddesena ca saddhiṃ pucchissāmi. Samukkaṭṭhapadānaṃ kati āpattiyoti yāni tattha samukkaṭṭhāni uttamāni padāni vuttāni, tesaṃ samukkaṭṭhapadānaṃ uttamapadānaṃ saṅkhepato kati āpattiyo hontīti. Yena yena hi padena yā yā āpatti paññattā, sā sā tassa tassa padassa āpattīti vuccati. Tena vuttaṃ ‘‘samukkaṭṭhapadānaṃ kati āpattiyo’’ti. Dve āpattiyoti ūnavīsativassaṃ upasampādentassa pācittiyaṃ, sesesu sabbapadesu dukkaṭaṃ.
တိသ္သောတိ ‘‘နသ္သန္တေတေ ဝိနသ္သန္တေတေ, ကော တေဟိ အတ္ထော’’တိ ဘေဒပုရေက္ခာရာနံ ဥပောသထကရဏေ ထုလ္လစ္စယံ, ဥက္ခိတ္တကေန သဒ္ဓိံ ဥပောသထကရဏေ ပာစိတ္တိယံ, သေသေသု ဒုက္ကဋန္တိ ဧဝံ ဥပောသထက္ခန္ဓကေ တိသ္သော အာပတ္တိယော။ ဧကာတိ ဝသ္သူပနာယိကက္ခန္ဓကေ ဧကာ ဒုက္ကဋာပတ္တိယေဝ။
Tissoti ‘‘nassantete vinassantete, ko tehi attho’’ti bhedapurekkhārānaṃ uposathakaraṇe thullaccayaṃ, ukkhittakena saddhiṃ uposathakaraṇe pācittiyaṃ, sesesu dukkaṭanti evaṃ uposathakkhandhake tisso āpattiyo. Ekāti vassūpanāyikakkhandhake ekā dukkaṭāpattiyeva.
တိသ္သောတိ ဘေဒပုရေက္ခာရသ္သ ပဝာရယတော ထုလ္လစ္စယံ, ဥက္ခိတ္တကေန သဒ္ဓိံ ပာစိတ္တိယံ, သေသေသု ဒုက္ကဋန္တိ ဧဝံ ပဝာရဏာက္ခန္ဓကေပိ တိသ္သော အာပတ္တိယော။
Tissoti bhedapurekkhārassa pavārayato thullaccayaṃ, ukkhittakena saddhiṃ pācittiyaṃ, sesesu dukkaṭanti evaṃ pavāraṇākkhandhakepi tisso āpattiyo.
တိသ္သောတိ ဝစ္ဆတရိံ ဥဂ္ဂဟေတ္ဝာ မာရေန္တာနံ ပာစိတ္တိယံ, ရတ္တေန စိတ္တေန အင္ဂဇာတဆုပနေ ထုလ္လစ္စယံ, သေသေသု ဒုက္ကဋန္တိ ဧဝံ စမ္မသံယုတ္တေပိ တိသ္သော အာပတ္တိယော။ ဘေသဇ္ဇက္ခန္ဓကေပိ သမန္တာ ဒ္ဝင္ဂုလေ ထုလ္လစ္စယံ, ဘောဇ္ဇယာဂုယာ ပာစိတ္တိယံ, သေသေသု ဒုက္ကဋန္တိ ဧဝံ တိသ္သော အာပတ္တိယော။
Tissoti vacchatariṃ uggahetvā mārentānaṃ pācittiyaṃ, rattena cittena aṅgajātachupane thullaccayaṃ, sesesu dukkaṭanti evaṃ cammasaṃyuttepi tisso āpattiyo. Bhesajjakkhandhakepi samantā dvaṅgule thullaccayaṃ, bhojjayāguyā pācittiyaṃ, sesesu dukkaṭanti evaṃ tisso āpattiyo.
ကထိနံ ကေဝလံ ပညတ္တိမေဝ, နတ္ထိ တတ္ထ အာပတ္တိ။ စီဝရသံယုတ္တေ ကုသစီရဝာကစီရေသု ထုလ္လစ္စယံ, အတိရေကစီဝရေ နိသ္သဂ္ဂိယံ, သေသေသု ဒုက္ကဋန္တိ ဣမာ တိသ္သော အာပတ္တိယော။
Kathinaṃ kevalaṃ paññattimeva, natthi tattha āpatti. Cīvarasaṃyutte kusacīravākacīresu thullaccayaṃ, atirekacīvare nissaggiyaṃ, sesesu dukkaṭanti imā tisso āpattiyo.
စမ္ပေယ္ယကေ ဧကာ ဒုက္ကဋာပတ္တိယေဝ။ ကောသမ္ဗက-ကမ္မက္ခန္ဓက-ပာရိဝာသိကသမုစ္စယက္ခန္ဓကေသုပိ ဧကာ ဒုက္ကဋာပတ္တိယေဝ။
Campeyyake ekā dukkaṭāpattiyeva. Kosambaka-kammakkhandhaka-pārivāsikasamuccayakkhandhakesupi ekā dukkaṭāpattiyeva.
သမထက္ခန္ဓကေ ဆန္ဒဒာယကော ခိယ္ယတိ, ခိယ္ယနကံ ပာစိတ္တိယံ, သေသေသု ဒုက္ကဋန္တိ ဣမာ ဒ္ဝေ အာပတ္တိယော။ ခုဒ္ဒကဝတ္ထုကေ အတ္တနော အင္ဂဇာတံ ဆိန္ဒတိ, ထုလ္လစ္စယံ, ရောမဋ္ဌေ ပာစိတ္တိယံ, သေသေသု ဒုက္ကဋန္တိ ဣမာ တိသ္သော အာပတ္တိယော။ သေနာသနက္ခန္ဓကေ ဂရုဘဏ္ဍဝိသ္သဇ္ဇနေ ထုလ္လစ္စယံ, သင္ဃိကာ ဝိဟာရာ နိက္ကဍ္ဎနေ ပာစိတ္တိယံ, သေသေသု ဒုက္ကဋန္တိ ဣမာ တိသ္သော အာပတ္တိယော။
Samathakkhandhake chandadāyako khiyyati, khiyyanakaṃ pācittiyaṃ, sesesu dukkaṭanti imā dve āpattiyo. Khuddakavatthuke attano aṅgajātaṃ chindati, thullaccayaṃ, romaṭṭhe pācittiyaṃ, sesesu dukkaṭanti imā tisso āpattiyo. Senāsanakkhandhake garubhaṇḍavissajjane thullaccayaṃ, saṅghikā vihārā nikkaḍḍhane pācittiyaṃ, sesesu dukkaṭanti imā tisso āpattiyo.
သင္ဃဘေဒေဘေဒကာနုဝတ္တကာနံ ထုလ္လစ္စယံ, ဂဏဘောဇနေ ပာစိတ္တိယန္တိ ဣမာ ဒ္ဝေ အာပတ္တိယော။ သမာစာရံ ပုစ္ဆိသ္သန္တိ ဝုတ္တေ ဝတ္တက္ခန္ဓကေ ဧကာ ဒုက္ကဋာပတ္တိယေဝ။ သာ သဗ္ဗဝတ္တေသု အနာဒရိယေန ဟောတိ။ တထာ ပာတိမောက္ခဋ္ဌပနေ။ ဘိက္ခုနိက္ခန္ဓကေ အပ္ပဝာရဏာယ ပာစိတ္တိယံ, သေသေသု ဒုက္ကဋန္တိ ဒ္ဝေ အာပတ္တိယော။ ပဉ္စသတိကသတ္တသတိကေသု ကေဝလံ ဓမ္မော သင္ဂဟံ အာရောပိတော, နတ္ထိ တတ္ထ အာပတ္တီတိ။
Saṅghabhedebhedakānuvattakānaṃ thullaccayaṃ, gaṇabhojane pācittiyanti imā dve āpattiyo. Samācāraṃ pucchissanti vutte vattakkhandhake ekā dukkaṭāpattiyeva. Sā sabbavattesu anādariyena hoti. Tathā pātimokkhaṭṭhapane. Bhikkhunikkhandhake appavāraṇāya pācittiyaṃ, sesesu dukkaṭanti dve āpattiyo. Pañcasatikasattasatikesu kevalaṃ dhammo saṅgahaṃ āropito, natthi tattha āpattīti.
ခန္ဓကပုစ္ဆာဝာရဝဏ္ဏနာ နိဋ္ဌိတာ။
Khandhakapucchāvāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ခန္ဓကပုစ္ဆာဝာရော • Khandhakapucchāvāro
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပုစ္ဆာဝိသ္သဇ္ဇနာဝဏ္ဏနာ • Pucchāvissajjanāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပုစ္ဆာဝိသ္သဇ္ဇနာဝဏ္ဏနာ • Pucchāvissajjanāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပုစ္ဆာဝိသ္သဇ္ဇနာဝဏ္ဏနာ • Pucchāvissajjanāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ပုစ္ဆာဝိသ္သဇ္ဇနာဝဏ္ဏနာ • Pucchāvissajjanāvaṇṇanā
