| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
ཁནྡྷཀཔུཙྪཱཝཱརོ
Khandhakapucchāvāro
པུཙྪཱཝིསྶཛྫནཱཝཎྞནཱ
Pucchāvissajjanāvaṇṇanā
༣༢༠. ཨུཔསམྤདཀྑནྡྷཀནྟི མཧཱཁནྡྷཀཾ། ‘‘ནིདཱནེན ཙ ནིདྡེསེན ཙ སདྡྷི’’ནྟི ཨིམིནཱ སཧ ནིདཱནེནཱཏི སནིདཱནཾ, སཧ ནིདྡེསེནཱཏི སནིདྡེསནྟི ཝཙནཏྠཾ དསྶེཏི། ཨེཏྠ ནིདཱནེནཱཏི སིཀྑཱཔདཔཉྙཏྟིདེསསངྑཱཏེན ནིདཱནེན། ནིདྡེསེནཱཏི པུགྒལཱདིནིདྡེསེན། ཏཏྠཱཏི ཨུཔསམྤདཀྑནྡྷཀེ། སམུཀྐཊྛཔདཱནནྟི ཨེཏྠ སམུཀྐཊྛསདྡོ ཨུཏྟམཔརིཡཱཡོཏི ཨཱཧ ‘‘ཨུཏྟམཱནཱི’’ཏི། པདཱནཱིཏི ‘‘ན བྷིཀྑཝེ ཨཱུནཝཱིསཏིཝསྶོ པུགྒལོ ཨུཔསམྤཱདེཏབྦོ’’ཏི (པཱཙི॰ ༤༠༢-༤༠༣; མཧཱཝ॰ ༡༢༤) ཨཱདིནཱ ནཡེན ཝུཏྟཱནི པདཱནི། ཨིམེཧི པདེཧི ‘‘སམུཀྐཊྛཱནི པདཱནི སམུཀྐཊྛཔདཱནཱི’’ཏི ཝཙནཏྠཾ དསྶེཏི། ཨིཏཱིཏི ཨཡམཏྠོ། ཀསྨཱ པནེཏྠ ‘‘སམུཀྐཊྛཔདཱནཾ ཀཏི ཨཱཔཏྟིཡོ’’ཏི པདཱནམེཝ སཱམིཝསེན ནིདྡེསོ ཀཏོ, ནནུ ཨཱཔཏྟིཡོ ནཱམ པུགྒལཱནཉྙེཝ ཧོནྟཱིཏི ཨཱཧ ‘‘ཡེན ཡེན ཧཱི’’ཏིཨཱདི། ཧཱིཏི ཡསྨཱ། ཡེན ཡེན པདེན པཉྙཏྟཱཏི སམྦནྡྷོ། སཱ སཱཏི ཨཱཔཏྟི། དྭེ ཨཱཔཏྟིཡོཏི ཨེཏྠ དྭིནྣཾ ཨཱཔཏྟཱིནཾ སརཱུཔཾ དསྶེནྟོ ཨཱཧ ‘‘པཱཙིཏྟིཡཾ, དུཀྐཊ’’ནྟི།
320.Upasampadakkhandhakanti mahākhandhakaṃ. ‘‘Nidānena ca niddesena ca saddhi’’nti iminā saha nidānenāti sanidānaṃ, saha niddesenāti saniddesanti vacanatthaṃ dasseti. Ettha nidānenāti sikkhāpadapaññattidesasaṅkhātena nidānena. Niddesenāti puggalādiniddesena. Tatthāti upasampadakkhandhake. Samukkaṭṭhapadānanti ettha samukkaṭṭhasaddo uttamapariyāyoti āha ‘‘uttamānī’’ti. Padānīti ‘‘na bhikkhave ūnavīsativasso puggalo upasampādetabbo’’ti (pāci. 402-403; mahāva. 124) ādinā nayena vuttāni padāni. Imehi padehi ‘‘samukkaṭṭhāni padāni samukkaṭṭhapadānī’’ti vacanatthaṃ dasseti. Itīti ayamattho. Kasmā panettha ‘‘samukkaṭṭhapadānaṃ kati āpattiyo’’ti padānameva sāmivasena niddeso kato, nanu āpattiyo nāma puggalānaññeva hontīti āha ‘‘yena yena hī’’tiādi. Hīti yasmā. Yena yena padena paññattāti sambandho. Sā sāti āpatti. Dve āpattiyoti ettha dvinnaṃ āpattīnaṃ sarūpaṃ dassento āha ‘‘pācittiyaṃ, dukkaṭa’’nti.
ནསྶནྟེཏེཏི ནསྶནྟུ ཨེཏེ། ཝིནསྶནྟེཏེཏི ཝིནསྶནྟུ ཨེཏེ བྷིཀྑཱུཏི ཨཏྠོ། ཏེཧཱིཏི བྷིཀྑཱུཧི། ཝདཏོཏི ཝདནྟཱནཾ། སེསེསུ ཨུཔོསཐཀརཎེསཱུཏི སམྦནྡྷོ། ‘‘དུཀྐཊཱཔཏྟིཡེཝཱ’’ཏི ཨིམིནཱ ཨེཀཱ ཨཱཔཏྟཱིཏི ཨེཏྠ ཨཏྠཔཀརཎཱདིཝསེན དུཀྐཊཱཔཏྟིཡེཝཱཏི དསྶེཏི།
Nassanteteti nassantu ete. Vinassanteteti vinassantu ete bhikkhūti attho. Tehīti bhikkhūhi. Vadatoti vadantānaṃ. Sesesu uposathakaraṇesūti sambandho. ‘‘Dukkaṭāpattiyevā’’ti iminā ekā āpattīti ettha atthapakaraṇādivasena dukkaṭāpattiyevāti dasseti.
པཝཱརཎཀྑནྡྷཀེཔཱིཏི པིསདྡོ ཨུཔོསཐཀྑནྡྷཀཾ ཨཔེཀྑཏི།
Pavāraṇakkhandhakepīti pisaddo uposathakkhandhakaṃ apekkhati.
ཙམྨསཾཡུཏྟེཔཱིཏི ཙམྨེན སཾཡུཏྟཾ ཀཏྭཱ དེསིཏེ ཁནྡྷཀེཔི, ཙམྨཀྑནྡྷཀེཔཱིཏི ཨཏྠོ། པིསདྡོ པཝཱརཎཀྑནྡྷཀཾ ཨཔེཀྑཏི། བྷེསཛྫཀྑནྡྷཀེཔཱིཏི པིསདྡོ ཙམྨཀྑནྡྷཀཾ ཨཔེཀྑཏི། སམནྟཱཏི ཨངྒཛཱཏསྶ སམནྟཏོ།
Cammasaṃyuttepīti cammena saṃyuttaṃ katvā desite khandhakepi, cammakkhandhakepīti attho. Pisaddo pavāraṇakkhandhakaṃ apekkhati. Bhesajjakkhandhakepīti pisaddo cammakkhandhakaṃ apekkhati. Samantāti aṅgajātassa samantato.
ཏཏྠཱཏི ཀཐིནཀྑནྡྷཀེ། ཙཱིཝརསཾཡུཏྟེཏི ཙཱིཝརཀྑནྡྷཀེ།
Tatthāti kathinakkhandhake. Cīvarasaṃyutteti cīvarakkhandhake.
ཙམྤེཡྻཀེཏི ཙམྤེཡྻཀྑནྡྷཀེ། སམུཙྩཡཀྑནྡྷཀེསུཔཱིཏི པིསདྡོ ཙམྤེཡྻཀྑནྡྷཀཾ ཨཔེཀྑཏི།
Campeyyaketi campeyyakkhandhake. Samuccayakkhandhakesupīti pisaddo campeyyakkhandhakaṃ apekkhati.
སམཐཀྑནྡྷཀེ ཨིམཱ དྭེ ཨཱཔཏྟིཡོ ཧོནྟཱིཏི ཡོཛནཱ། ཨེསེཝ ནཡོ སེསེསུཔི། ཁུདྡཀཝཏྠུཀེཏི ཁུདྡཀཝཏྠུཀྑནྡྷཀེ། གརུབྷཎྜཝིསྶཛྫནེཏི གརུབྷཎྜསྶ ཝིསྶཛྫནེ།
Samathakkhandhake imā dve āpattiyo hontīti yojanā. Eseva nayo sesesupi. Khuddakavatthuketi khuddakavatthukkhandhake. Garubhaṇḍavissajjaneti garubhaṇḍassa vissajjane.
སངྒྷབྷེདེཏི སངྒྷབྷེདཀྑནྡྷཀེ། ‘‘སམཱཙཱརཾ པུཙྪིསྶནྟི ཝུཏྟེ ཝཏྟཀྑནྡྷཀེ’’ཏི ཨིམིནཱ སམཱཙཱརསདྡེན ཝཏྟཀྑནྡྷཀཾ གཧེཏབྦནྟི དསྶེཏི། སཱཏི དུཀྐཊཱཔཏྟི། ‘‘ཏཐཱ’’ཏི པདེན ‘‘ཨེཀཱ དུཀྐཊཱཔཏྟིཡེཝཱ’’ཏི པདཾ ཨཏིདིསཏི། ‘‘པཱཏིམོཀྑཊྛཔནེ’’ཏི ཨིམིནཱ པཱལི༹ཡཾ ཋཔནཾ པུཙྪིསྶནྟི ཨེཏྠ ‘‘པཱཏིམོཀྑ’’ནྟིཨཱདིཔདསྶ ལོཔཾ དསྶེཏི། པཉྩསཏིཀསཏྟསཏིཀེསཱུཏི པཉྩསཏིཀཀྑནྡྷཀསཏྟསཏིཀཀྑནྡྷཀེསུ། ཨཱརོཔིཏོཏི ཨེཏྠ རུཔདྷཱཏུཡཱ དྭིཀམྨིཀཏྟཱ, ནྱཱདིགཎཏྟཱ ཙ ‘‘དྷམྨོ’’ཏི པདྷཱནཀམྨམེཝ ཝུཏྟཾ, ན ‘‘སངྒཧ’’ནྟི ཨཔདྷཱནཀམྨཾ། ཏེན ཝུཏྟཾ ‘‘དྷམྨོ སངྒཧ’’ནྟི། ཏཏྠཱཏི པཉྩསཏིཀསཏྟསཏིཀེསུ།
Saṅghabhedeti saṅghabhedakkhandhake. ‘‘Samācāraṃ pucchissanti vutte vattakkhandhake’’ti iminā samācārasaddena vattakkhandhakaṃ gahetabbanti dasseti. Sāti dukkaṭāpatti. ‘‘Tathā’’ti padena ‘‘ekā dukkaṭāpattiyevā’’ti padaṃ atidisati. ‘‘Pātimokkhaṭṭhapane’’ti iminā pāḷiyaṃ ṭhapanaṃ pucchissanti ettha ‘‘pātimokkha’’ntiādipadassa lopaṃ dasseti. Pañcasatikasattasatikesūti pañcasatikakkhandhakasattasatikakkhandhakesu. Āropitoti ettha rupadhātuyā dvikammikattā, nyādigaṇattā ca ‘‘dhammo’’ti padhānakammameva vuttaṃ, na ‘‘saṅgaha’’nti apadhānakammaṃ. Tena vuttaṃ ‘‘dhammo saṅgaha’’nti. Tatthāti pañcasatikasattasatikesu.
ཨིཏི ཁནྡྷཀཔུཙྪཱཝཎྞནཱཡ ཡོཛནཱ སམཏྟཱ།
Iti khandhakapucchāvaṇṇanāya yojanā samattā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ཁནྡྷཀཔུཙྪཱཝཱརོ • Khandhakapucchāvāro
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / པུཙྪཱཝིསྶཛྫནཱཝཎྞནཱ • Pucchāvissajjanāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པུཙྪཱཝིསྶཛྫནཱཝཎྞནཱ • Pucchāvissajjanāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པུཙྪཱཝིསྶཛྫནཱཝཎྞནཱ • Pucchāvissajjanāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པུཙྪཱཝིསྶཛྫནཱཝཎྞནཱ • Pucchāvissajjanāvaṇṇanā
