Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā

    মহাৰগ্গো

    Mahāvaggo

    ১. পুগ্গলকথা

    1. Puggalakathā

    ১. সুদ্ধসচ্চিকট্ঠো

    1. Suddhasaccikaṭṭho

    ১. অনুলোমপচ্চনীকৰণ্ণনা

    1. Anulomapaccanīkavaṇṇanā

    ১. তত্থ পুগ্গলো উপলব্ভতি সচ্চিকট্ঠপরমত্থেনাতি অযং পুচ্ছা। আমন্তাতি অযং পটিজাননা। কস্স পনাযং পুচ্ছা, কস্স পটিজাননাতি? অসুকস্সাতি ন ৰত্তব্বা। ভগৰতা হি ইমস্মিং পকরণে নানপ্পকারানং লদ্ধীনং ৰিসোধনত্থং তন্তিৰসেন মাতিকা ঠপিতা। সা থেরেন সত্থারা দিন্ননযে ঠত্ৰা তন্তিৰসেন ৰিভত্তা। ন হি থেরো যত্তকা এত্থ ৰাদমগ্গা দস্সিতা, তত্তকেহি ৰাদীহি সদ্ধিং ৰাদেন ৰিগ্গাহিককথং কথেসি। এৰং সন্তেপি পন তাসং তাসং কথানং অত্থস্স সুখাৰধারণত্থং সকৰাদীপুচ্ছা, পরৰাদীপুচ্ছা, সকৰাদীপটিঞ্ঞা, পরৰাদীপটিঞ্ঞাতি এৰং ৰিভাগং দস্সেত্ৰাৰ অত্থৰণ্ণনং করিস্সাম।

    1. Tattha puggalo upalabbhati saccikaṭṭhaparamatthenāti ayaṃ pucchā. Āmantāti ayaṃ paṭijānanā. Kassa panāyaṃ pucchā, kassa paṭijānanāti? Asukassāti na vattabbā. Bhagavatā hi imasmiṃ pakaraṇe nānappakārānaṃ laddhīnaṃ visodhanatthaṃ tantivasena mātikā ṭhapitā. Sā therena satthārā dinnanaye ṭhatvā tantivasena vibhattā. Na hi thero yattakā ettha vādamaggā dassitā, tattakehi vādīhi saddhiṃ vādena viggāhikakathaṃ kathesi. Evaṃ santepi pana tāsaṃ tāsaṃ kathānaṃ atthassa sukhāvadhāraṇatthaṃ sakavādīpucchā, paravādīpucchā, sakavādīpaṭiññā, paravādīpaṭiññāti evaṃ vibhāgaṃ dassetvāva atthavaṇṇanaṃ karissāma.

    পুগ্গলো উপলব্ভতি সচ্চিকট্ঠপরমত্থেনাতি হি অযং সকৰাদীপুচ্ছা। তায ‘‘যে অত্থি পুগ্গলোতি এৰংলদ্ধিকা পুগ্গলৰাদিনো, তে এৰং পুচ্ছিতব্বা’’তি দীপেতি। কে পন পুগ্গলৰাদিনোতি? সাসনে ৰজ্জিপুত্তকা চেৰ সমিতিযা চ বহিদ্ধা চ বহূ অঞ্ঞতিত্থিযা। তত্থ পুগ্গলোতি অত্তা, সত্তো জীৰো। উপলব্ভতীতি পঞ্ঞায উপগন্ত্ৰা লব্ভতি, ঞাযতীতি অত্থো। সচ্চিকট্ঠপরমত্থেনাতি এত্থ সচ্চিকট্ঠোতি মাযামরীচিআদযো ৰিয অভূতাকারেন অগ্গহেতব্বো ভূতট্ঠো। পরমত্থোতি অনুস্সৰাদিৰসেন অগ্গহেতব্বো উত্তমত্থো। উভযেনাপি যো পরতো ‘‘পুগ্গলো উপলব্ভতি সচ্চিকট্ঠপরমত্থেন, রূপঞ্চ উপলব্ভতী’’তিআদিনা খন্ধাযতনধাতুইন্দ্রিযৰসেন সত্তপঞ্ঞাসৰিধো ধম্মপ্পভেদো দস্সিতো । যথা সো ভূতেন সভাৰট্ঠেন উপলব্ভতি, এৰং তৰ পুগ্গলো উপলব্ভতীতি পুচ্ছতি। পরৰাদী আমন্তাতি পটিজানাতি। পটিজাননঞ্হি কত্থচি ‘‘আম, ভন্তে’’তি আগচ্ছতি, কত্থচি ‘‘আমো’’তি পটিজাননং আগচ্ছতি। ইধ পন ‘‘আমন্তা’’তি আগতং। তত্রাযং অধিপ্পাযো – সো হি যং তং পরতো ৰুত্তং ভগৰতা – ‘‘অত্থি পুগ্গলো অত্তহিতায পটিপন্নো’’তি সুত্তং আগতং, তং গহেত্ৰা যস্মা পন ভগৰা সচ্চৰাদী ন ৰিসংৰাদনপুরেক্খারো ৰাচং ভাসতি, নাপি অনুস্সৰাদিৰসেন ধম্মং দেসেতি, সদেৰকং পন লোকং সযং অভিঞ্ঞা সচ্ছিকত্ৰা পৰেদেতি, তস্মা যো তেন ৰুত্তো ‘‘অত্থি পুগ্গলো অত্তহিতায পটিপন্নো’’তি, সো সচ্চিকট্ঠপরমত্থেনেৰ অত্থীতি লদ্ধিং গহেত্ৰা ‘‘আমন্তা’’তি পটিজানাতি।

    Puggalo upalabbhati saccikaṭṭhaparamatthenāti hi ayaṃ sakavādīpucchā. Tāya ‘‘ye atthi puggaloti evaṃladdhikā puggalavādino, te evaṃ pucchitabbā’’ti dīpeti. Ke pana puggalavādinoti? Sāsane vajjiputtakā ceva samitiyā ca bahiddhā ca bahū aññatitthiyā. Tattha puggaloti attā, satto jīvo. Upalabbhatīti paññāya upagantvā labbhati, ñāyatīti attho. Saccikaṭṭhaparamatthenāti ettha saccikaṭṭhoti māyāmarīciādayo viya abhūtākārena aggahetabbo bhūtaṭṭho. Paramatthoti anussavādivasena aggahetabbo uttamattho. Ubhayenāpi yo parato ‘‘puggalo upalabbhati saccikaṭṭhaparamatthena, rūpañca upalabbhatī’’tiādinā khandhāyatanadhātuindriyavasena sattapaññāsavidho dhammappabhedo dassito . Yathā so bhūtena sabhāvaṭṭhena upalabbhati, evaṃ tava puggalo upalabbhatīti pucchati. Paravādī āmantāti paṭijānāti. Paṭijānanañhi katthaci ‘‘āma, bhante’’ti āgacchati, katthaci ‘‘āmo’’ti paṭijānanaṃ āgacchati. Idha pana ‘‘āmantā’’ti āgataṃ. Tatrāyaṃ adhippāyo – so hi yaṃ taṃ parato vuttaṃ bhagavatā – ‘‘atthi puggalo attahitāya paṭipanno’’ti suttaṃ āgataṃ, taṃ gahetvā yasmā pana bhagavā saccavādī na visaṃvādanapurekkhāro vācaṃ bhāsati, nāpi anussavādivasena dhammaṃ deseti, sadevakaṃ pana lokaṃ sayaṃ abhiññā sacchikatvā pavedeti, tasmā yo tena vutto ‘‘atthi puggalo attahitāya paṭipanno’’ti, so saccikaṭṭhaparamattheneva atthīti laddhiṃ gahetvā ‘‘āmantā’’ti paṭijānāti.

    অথস্স তাদিসস্স লেসৰচনস্স ছলৰাদস্স ওকাসং অদদমানো সকৰাদী যো সচ্চিকট্ঠোতিআদিমাহ। তত্রাযং অধিপ্পাযো – য্ৰাযং পরতো ‘‘সপ্পচ্চযো অপ্পচ্চযো, সঙ্খতো অসঙ্খতো, সস্সতো, অসস্সতো সনিমিত্তো অনিমিত্তো’’তি এৰং পরিদীপিতো রূপাদিসত্তপঞ্ঞাসৰিধো ধম্মপ্পভেদো আগতো; ন সম্মুতিসচ্চৰসেন, নাপি অনুস্সৰাদিৰসেন গহেতব্বো। অত্তনো পন ভূততায এৰ সচ্চিকট্ঠো, অত্তপচ্চক্খতায চ পরমত্থো। তং সন্ধাযাহ – ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি।

    Athassa tādisassa lesavacanassa chalavādassa okāsaṃ adadamāno sakavādī yo saccikaṭṭhotiādimāha. Tatrāyaṃ adhippāyo – yvāyaṃ parato ‘‘sappaccayo appaccayo, saṅkhato asaṅkhato, sassato, asassato sanimitto animitto’’ti evaṃ paridīpito rūpādisattapaññāsavidho dhammappabhedo āgato; na sammutisaccavasena, nāpi anussavādivasena gahetabbo. Attano pana bhūtatāya eva saccikaṭṭho, attapaccakkhatāya ca paramattho. Taṃ sandhāyāha – ‘‘yo saccikaṭṭho paramattho, tato so puggalo upalabbhati saccikaṭṭhaparamatthenā’’ti.

    ততোতি করণৰচনমেতং, তস্মা তেন সচ্চিকট্ঠপরমত্থেন সো পুগ্গলো উপলব্ভতীতি অযমেত্থ অত্থো। ইদং ৰুত্তং হোতি – রুপ্পনাদিভেদেন ৰা সপ্পচ্চযাদিভেদেন ৰা আকারেন যো সচ্চিকট্ঠপরমত্থো উপলব্ভতি, কিং তে পুগ্গলোপি তেনাকারেন উপলব্ভতীতি? ন হেৰং ৰত্তব্বেতি অৰজাননা পরৰাদিস্স। সো হি তথারূপং পুগ্গলং অনিচ্ছন্তো অৰজানাতি। তত্রাযং পদচ্ছেদো – ‘ন হি এৰং ৰত্তব্বে’তি, ন হি এৰন্তিপি ৰট্টতি। দ্ৰিন্নম্পি এৰং ন ৰত্তব্বোতি অত্থো।

    Tatoti karaṇavacanametaṃ, tasmā tena saccikaṭṭhaparamatthena so puggalo upalabbhatīti ayamettha attho. Idaṃ vuttaṃ hoti – ruppanādibhedena vā sappaccayādibhedena vā ākārena yo saccikaṭṭhaparamattho upalabbhati, kiṃ te puggalopi tenākārena upalabbhatīti? Na hevaṃ vattabbeti avajānanā paravādissa. So hi tathārūpaṃ puggalaṃ anicchanto avajānāti. Tatrāyaṃ padacchedo – ‘na hi evaṃ vattabbe’ti, na hi evantipi vaṭṭati. Dvinnampi evaṃ na vattabboti attho.

    আজানাহি নিগ্গহন্তি সকৰাদিৰচনং। যস্মা তে পুরিমায ৰত্তব্বপটিঞ্ঞায পচ্ছিমা নৰত্তব্বপটিঞ্ঞা, পচ্ছিমায চ পুরিমা ন সন্ধিযতি, তস্মাপি নিগ্গহং পত্তো। তং নিগ্গহং দোসং অপরাধং সম্পটিচ্ছাহীতি অত্থো। এৰং নিগ্গহং আজানাপেত্ৰা ইদানি তং ঠপনায চেৰ অনুলোমপটিলোমতো পাপনারোপনানঞ্চ ৰসেন পাকটং করোন্তো হঞ্চি পুগ্গলোতিআদিমাহ। তত্থ হঞ্চি পুগ্গলো উপলব্ভতীতি যদি পুগ্গলো উপলব্ভতি, সচে পুগ্গলো উপলব্ভতি সচ্চিকট্ঠপরমত্থেনাতি অত্থো। অযং তাৰ পরৰাদীপক্খস্স ঠপনতো নিগ্গহপাপনারোপনানং লক্খণভূতা অনুলোমঠপনা নাম। তেন ৰত রেতিআদি অনুলোমপক্খে নিগ্গহস্স পাপিতত্তা অনুলোমপাপনা নাম। তত্থ তেনাতি কারণৰচনং। ৰতাতি ওকপ্পনৰচনং। রেতি আমন্তনৰচনং। ইদং ৰুত্তং হোতি – তেন, রে ৰত্তব্বে ৰত, রে হম্ভো, ভদ্রমুখ, তেন কারণেন ৰত্তব্বোযেৰাতি। যং তত্থ ৰদেসীতিআদি অনুলোমপক্খে নিগ্গহস্স আরোপিতত্তা অনুলোমরোপনা নাম। যং তস্স পরিযোসানে মিচ্ছাতিপদং তস্স পুরতো ইদং তে’তি আহরিতব্বং। ইদং তে মিচ্ছাতি অযঞ্হেত্থ অত্থো। পরতো চ পাল়িযং এতং আগতমেৰ।

    Ājānāhi niggahanti sakavādivacanaṃ. Yasmā te purimāya vattabbapaṭiññāya pacchimā navattabbapaṭiññā, pacchimāya ca purimā na sandhiyati, tasmāpi niggahaṃ patto. Taṃ niggahaṃ dosaṃ aparādhaṃ sampaṭicchāhīti attho. Evaṃ niggahaṃ ājānāpetvā idāni taṃ ṭhapanāya ceva anulomapaṭilomato pāpanāropanānañca vasena pākaṭaṃ karonto hañci puggalotiādimāha. Tattha hañci puggalo upalabbhatīti yadi puggalo upalabbhati, sace puggalo upalabbhati saccikaṭṭhaparamatthenāti attho. Ayaṃ tāva paravādīpakkhassa ṭhapanato niggahapāpanāropanānaṃ lakkhaṇabhūtā anulomaṭhapanā nāma. Tena vata retiādi anulomapakkhe niggahassa pāpitattā anulomapāpanā nāma. Tattha tenāti kāraṇavacanaṃ. Vatāti okappanavacanaṃ. Reti āmantanavacanaṃ. Idaṃ vuttaṃ hoti – tena, re vattabbe vata, re hambho, bhadramukha, tena kāraṇena vattabboyevāti. Yaṃ tattha vadesītiādi anulomapakkhe niggahassa āropitattā anulomaropanā nāma. Yaṃ tassa pariyosāne micchātipadaṃ tassa purato idaṃ te’ti āharitabbaṃ. Idaṃ te micchāti ayañhettha attho. Parato ca pāḷiyaṃ etaṃ āgatameva.

    নো চে পন ৰত্তব্বেতিআদি ‘‘ন হেৰং ৰত্তব্বে’’তি পটিক্খিত্তপক্খস্স ঠপিতত্তা পটিলোমতো নিগ্গহপাপনারোপনানং লক্খণভূতা পটিলোমঠপনা নাম। নো চ ৰত রেতিআদি পটিলোমপক্খে নিগ্গহস্স পাপিতত্তা পটিলোমপাপনা নাম। পুন যং তত্থ ৰদেসীতিআদি পটিলোমপক্খে নিগ্গহস্স আরোপিতত্তা পটিলোমরোপনা নাম। ইধাপি পরিযোসানে মিচ্ছাতিপদস্স পুরতো ইদং তেতি আহরিতব্বমেৰ। পরতোপি এৰরূপেসু ঠানেসু এসেৰ নযো।

    No ce pana vattabbetiādi ‘‘na hevaṃ vattabbe’’ti paṭikkhittapakkhassa ṭhapitattā paṭilomato niggahapāpanāropanānaṃ lakkhaṇabhūtā paṭilomaṭhapanā nāma. No ca vata retiādi paṭilomapakkhe niggahassa pāpitattā paṭilomapāpanā nāma. Puna yaṃ tattha vadesītiādi paṭilomapakkhe niggahassa āropitattā paṭilomaropanā nāma. Idhāpi pariyosāne micchātipadassa purato idaṃ teti āharitabbameva. Paratopi evarūpesu ṭhānesu eseva nayo.

    তত্রাযং আদিতো পট্ঠায সঙ্খেপত্থো – যদি পুগ্গলো উপলব্ভতি সচ্চিকট্ঠপরমত্থেন, তেন ৰত ভো সো উপলব্ভতীতি ৰত্তব্বো। যং পন তত্থ ৰদেসি ‘‘ৰত্তব্বো খো পুরিমপঞ্হে ‘সচ্চিকট্ঠপরমত্থেন উপলব্ভতী’তি, নো চ ৰত্তব্বো দুতিযপঞ্হে ‘ততো সো পুগ্গলো উপলব্ভতী’’’তি, ইদং তে মিচ্ছাতি এৰং তাৰ অনুলোমতো ঠপনাপাপনারোপনা হোন্তি। অথ ন ৰত্তব্বো দুতিযপঞ্হে ‘‘ততো সো উপলব্ভতী’’তি, পুরিমপঞ্হেপি ন ৰত্তব্বোৰ। যং পনেত্থ ৰদেসি ‘‘ৰত্তব্বো খো পুরিমপঞ্হে ‘সচ্চিকট্ঠপরমত্থেন উপলব্ভতী’তি, নো চ ৰত্তব্বো দুতিযপঞ্হে ‘ততো সো পুগ্গলো উপলব্ভতী’’’তি, ইদং তে মিচ্ছাতি এৰং পটিলোমতো ঠপনাপাপনারোপনা হোন্তি। এৰমেতং নিগ্গহস্স চ অনুলোমপটিলোমতো চতুন্নং পাপনারোপনানঞ্চ ৰুত্তত্তা উপলব্ভতীতিআদিকং অনুলোমপঞ্চকং নাম। এত্থ চ কিঞ্চাপি অনুলোমতো পাপনারোপনাহি একো, পটিলোমতো পাপনারোপনাহি একোতি দ্ৰে নিগ্গহা কতা। ‘আজানাহি নিগ্গহ’ন্তি এতস্সেৰ পনেত্থ পুগ্গলো উপলব্ভতীতি পঠমং ৰাদং নিস্সায পঠমস্স নিগ্গহস্স দ্ৰীহাকারেহি আরোপিতত্তা একোৰাযং নিগ্গহোতি পঠমো নিগ্গহো।

    Tatrāyaṃ ādito paṭṭhāya saṅkhepattho – yadi puggalo upalabbhati saccikaṭṭhaparamatthena, tena vata bho so upalabbhatīti vattabbo. Yaṃ pana tattha vadesi ‘‘vattabbo kho purimapañhe ‘saccikaṭṭhaparamatthena upalabbhatī’ti, no ca vattabbo dutiyapañhe ‘tato so puggalo upalabbhatī’’’ti, idaṃ te micchāti evaṃ tāva anulomato ṭhapanāpāpanāropanā honti. Atha na vattabbo dutiyapañhe ‘‘tato so upalabbhatī’’ti, purimapañhepi na vattabbova. Yaṃ panettha vadesi ‘‘vattabbo kho purimapañhe ‘saccikaṭṭhaparamatthena upalabbhatī’ti, no ca vattabbo dutiyapañhe ‘tato so puggalo upalabbhatī’’’ti, idaṃ te micchāti evaṃ paṭilomato ṭhapanāpāpanāropanā honti. Evametaṃ niggahassa ca anulomapaṭilomato catunnaṃ pāpanāropanānañca vuttattā upalabbhatītiādikaṃ anulomapañcakaṃ nāma. Ettha ca kiñcāpi anulomato pāpanāropanāhi eko, paṭilomato pāpanāropanāhi ekoti dve niggahā katā. ‘Ājānāhi niggaha’nti etasseva panettha puggalo upalabbhatīti paṭhamaṃ vādaṃ nissāya paṭhamassa niggahassa dvīhākārehi āropitattā ekovāyaṃ niggahoti paṭhamo niggaho.

    ২. ইদানি পচ্চনীকনযো হোতি। তত্থ পুচ্ছা পরৰাদিস্স। সো হি ‘‘অত্থি পুগ্গলো অত্তহিতায পটিপন্নো’’তি গহিতত্তা ‘‘নুপলব্ভতী’’তি অসম্পটিচ্ছন্তো এৰং পুচ্ছতি। সকৰাদী যথা রূপাদিধম্মা উপলব্ভন্তি, এৰং অনুপলব্ভনীযতো আমন্তাতি পটিজানাতি। পুন ইতরো অত্তনা অধিপ্পেতং সচ্চিকট্ঠংযেৰ সন্ধায যো সচ্চিকট্ঠোতিআদিমাহ। সম্মুতিসচ্চপরমত্থসচ্চানি ৰা একতো কত্ৰাপি এৰমাহ। সকৰাদী ‘পুগ্গলো’তি উপাদাপঞ্ঞত্তিসব্ভাৰতোপি দ্ৰিন্নং সচ্চানং একতো কত্ৰা পুচ্ছিতত্তাপি ন হেৰন্তি পটিক্খিপতি।

    2. Idāni paccanīkanayo hoti. Tattha pucchā paravādissa. So hi ‘‘atthi puggalo attahitāya paṭipanno’’ti gahitattā ‘‘nupalabbhatī’’ti asampaṭicchanto evaṃ pucchati. Sakavādī yathā rūpādidhammā upalabbhanti, evaṃ anupalabbhanīyato āmantāti paṭijānāti. Puna itaro attanā adhippetaṃ saccikaṭṭhaṃyeva sandhāya yo saccikaṭṭhotiādimāha. Sammutisaccaparamatthasaccāni vā ekato katvāpi evamāha. Sakavādī ‘puggalo’ti upādāpaññattisabbhāvatopi dvinnaṃ saccānaṃ ekato katvā pucchitattāpi na hevanti paṭikkhipati.

    ইদানি কিঞ্চাপি তেন পঠমং পরমত্থসচ্চৰসেন নুপলব্ভনীযতা সম্পটিচ্ছিতা, পচ্ছা সম্মুতিসচ্চৰসেন ৰোমিস্সকৰসেন ৰা পটিক্খিত্তা। পরৰাদী পন ‘নুপলব্ভতী’তি ৰচনসামঞ্ঞমত্তং ছলৰাদং নিস্সায যং তযা পঠমং পটিঞ্ঞাতং, তং পচ্ছা পটিক্খিত্তন্তি ভণ্ডনস্স পটিভণ্ডনং ৰিয অত্তনো কতস্স নিগ্গহকম্মস্স পটিকম্মং করোন্তো আজানাহি পটিকম্মন্তি আহ। ইদানি যথাস্স অনুলোমপঞ্চকে সকৰাদিনা ৰাদট্ঠপনং কত্ৰা অনুলোমপটিলোমতো পাপনারোপনাহি নিগ্গহো পাকটো কতো, এৰং পটিকম্মং পাকটং করোন্তো হঞ্চি পুগ্গলোতিআদিমাহ। তং হেট্ঠা ৰুত্তনযেনেৰ অত্থতো ৰেদিতব্বং। যস্মা পনেত্থ ঠপনা নাম পরৰাদীপক্খস্স ঠপনতো ‘‘অযং তৰ দোসো’’তি দস্সেতুং ঠপনমত্তমেৰ হোতি, ন নিগ্গহস্স ৰা পটিকম্মস্স ৰা পাকটভাৰকরণং, পাপনারোপনাহি পনস্স পাকটকরণং হোতি। তস্মা ইদং অনুলোমপটিলোমতো পাপনারোপনানং ৰসেন চতূহাকারেহি। পটিকম্মস্স কতত্তা পটিকম্মচতুক্কং নামাতি একং চতুক্কং ৰেদিতব্বং।

    Idāni kiñcāpi tena paṭhamaṃ paramatthasaccavasena nupalabbhanīyatā sampaṭicchitā, pacchā sammutisaccavasena vomissakavasena vā paṭikkhittā. Paravādī pana ‘nupalabbhatī’ti vacanasāmaññamattaṃ chalavādaṃ nissāya yaṃ tayā paṭhamaṃ paṭiññātaṃ, taṃ pacchā paṭikkhittanti bhaṇḍanassa paṭibhaṇḍanaṃ viya attano katassa niggahakammassa paṭikammaṃ karonto ājānāhi paṭikammanti āha. Idāni yathāssa anulomapañcake sakavādinā vādaṭṭhapanaṃ katvā anulomapaṭilomato pāpanāropanāhi niggaho pākaṭo kato, evaṃ paṭikammaṃ pākaṭaṃ karonto hañci puggalotiādimāha. Taṃ heṭṭhā vuttanayeneva atthato veditabbaṃ. Yasmā panettha ṭhapanā nāma paravādīpakkhassa ṭhapanato ‘‘ayaṃ tava doso’’ti dassetuṃ ṭhapanamattameva hoti, na niggahassa vā paṭikammassa vā pākaṭabhāvakaraṇaṃ, pāpanāropanāhi panassa pākaṭakaraṇaṃ hoti. Tasmā idaṃ anulomapaṭilomato pāpanāropanānaṃ vasena catūhākārehi. Paṭikammassa katattā paṭikammacatukkaṃ nāmāti ekaṃ catukkaṃ veditabbaṃ.

    ৩. এৰং পটিকম্মং কত্ৰা ইদানি য্ৰাস্স অনুলোমপঞ্চকে সকৰাদিনা নিগ্গহো কতো, তস্স তমেৰ ছলৰাদং নিস্সায দুক্কটভাৰং দস্সেন্তো ত্ৰঞ্চে পন মঞ্ঞসীতিআদিমাহ। তত্থ ত্ৰং চে পন মঞ্ঞসীতি যদি ত্ৰং মঞ্ঞসি। ৰত্তব্বে খোতি ইদং পচ্চনীকে আমন্তাতি পটিঞ্ঞং সন্ধায ৰুত্তং । নো চ ৰত্তব্বেতি ইদং পন ন হেৰাতি অৰজাননং সন্ধায ৰুত্তং। তেন তৰ তত্থাতি তেন কারণেন ত্ৰংযেৰ তস্মিং নুপলব্ভতীতি পক্খে – ‘‘হেৰং পটিজানন্তন্তি আমন্তা’’তি এৰং পটিজানন্তো। হেৰং নিগ্গহেতব্বেতি পুন ন হেৰাতি অৰজানন্তো এৰং নিগ্গহেতব্বো। অথ তং নিগ্গণ্হামাতি অথেৰং নিগ্গহারহং তং নিগ্গণ্হাম। সুনিগ্গহিতো চ হোসীতি সকেন মতেন নিগ্গহিতত্তা সুনিগ্গহিতো চ ভৰসি।

    3. Evaṃ paṭikammaṃ katvā idāni yvāssa anulomapañcake sakavādinā niggaho kato, tassa tameva chalavādaṃ nissāya dukkaṭabhāvaṃ dassento tvañce pana maññasītiādimāha. Tattha tvaṃ ce pana maññasīti yadi tvaṃ maññasi. Vattabbe khoti idaṃ paccanīke āmantāti paṭiññaṃ sandhāya vuttaṃ . No ca vattabbeti idaṃ pana na hevāti avajānanaṃ sandhāya vuttaṃ. Tena tava tatthāti tena kāraṇena tvaṃyeva tasmiṃ nupalabbhatīti pakkhe – ‘‘hevaṃ paṭijānantanti āmantā’’ti evaṃ paṭijānanto. Hevaṃ niggahetabbeti puna na hevāti avajānanto evaṃ niggahetabbo. Atha taṃ niggaṇhāmāti athevaṃ niggahārahaṃ taṃ niggaṇhāma. Suniggahito ca hosīti sakena matena niggahitattā suniggahito ca bhavasi.

    এৰমস্স নিগ্গহেতব্বভাৰং দস্সেত্ৰা ইদানি তং নিগ্গণ্হন্তো হঞ্চীতিআদিমাহ। তত্থ ঠপনাপাপনারোপনা হেট্ঠা ৰুত্তনযেনেৰ ৰেদিতব্বা। পরিযোসানে পন ইদং তে মিচ্ছাতি ইদং তৰ ৰচনং মিচ্ছা হোতীতি অত্থো। ইদং ছলৰাদেন চতূহি আকারেহি নিগ্গহস্স কতত্তা নিগ্গহচতুক্কং নাম।

    Evamassa niggahetabbabhāvaṃ dassetvā idāni taṃ niggaṇhanto hañcītiādimāha. Tattha ṭhapanāpāpanāropanā heṭṭhā vuttanayeneva veditabbā. Pariyosāne pana idaṃ te micchāti idaṃ tava vacanaṃ micchā hotīti attho. Idaṃ chalavādena catūhi ākārehi niggahassa katattā niggahacatukkaṃ nāma.

    ৪. এৰং নিগ্গহং কত্ৰাপি ইদানি ‘‘যদি অযং মযা তৰ মতেন কতো নিগ্গহো দুন্নিগ্গহো, যো মম তযা হেট্ঠা অনুলোমপঞ্চকে কতো নিগ্গহো, সোপি দুন্নিগ্গহো’’তি দস্সেন্তো এসে চে দুন্নিগ্গহিতেতিআদিমাহ। তত্থ এসে চে দুন্নিগ্গহিতেতি এসো চে তৰ ৰাদো মযা দুন্নিগ্গহিতো। অথ ৰা এসো চে তৰ মযা কতো নিগ্গহো দুন্নিগ্গহো। হেৰমেৰং তত্থ দক্খাতি তত্থাপি তযা মম হেট্ঠা কতে নিগ্গহে এৰমেৰং পস্স। ইদানি য্ৰাস্স হেট্ঠা সকৰাদিনা নিগ্গহো কতো, তং ‘‘ৰত্তব্বে খো’’তিআদিৰচনেন দস্সেত্ৰা পুন তং নিগ্গহং অনিগ্গহভাৰং উপনেন্তো নো চ মযং তযাতিআদিমাহ। তত্থ নো চ মযং তযা তত্থ হেতায পটিঞ্ঞাযাতিআদীসু অযমত্থো – যস্মা সো তযা মম কতো নিগ্গহো দুন্নিগ্গহো, তস্মা মযং তযা তত্থ অনুলোমপঞ্চকে আমন্তাতি এতায পটিঞ্ঞায এৰং পটিজানন্তা পুন ন হেৰাতি পটিক্খেপে কতেপি ‘‘আজানাহি নিগ্গহ’’ন্তি এৰং ন নিগ্গহেতব্বোযেৰ। এৰং অনিগ্গহেতব্বম্পি মং নিগ্গণ্হাসি, ঈদিসেন পন নিগ্গহেন দুন্নিগ্গহিতা মযং হোম।

    4. Evaṃ niggahaṃ katvāpi idāni ‘‘yadi ayaṃ mayā tava matena kato niggaho dunniggaho, yo mama tayā heṭṭhā anulomapañcake kato niggaho, sopi dunniggaho’’ti dassento ese ce dunniggahitetiādimāha. Tattha ese ce dunniggahiteti eso ce tava vādo mayā dunniggahito. Atha vā eso ce tava mayā kato niggaho dunniggaho. Hevamevaṃ tattha dakkhāti tatthāpi tayā mama heṭṭhā kate niggahe evamevaṃ passa. Idāni yvāssa heṭṭhā sakavādinā niggaho kato, taṃ ‘‘vattabbe kho’’tiādivacanena dassetvā puna taṃ niggahaṃ aniggahabhāvaṃ upanento no ca mayaṃ tayātiādimāha. Tattha no ca mayaṃ tayā tattha hetāya paṭiññāyātiādīsu ayamattho – yasmā so tayā mama kato niggaho dunniggaho, tasmā mayaṃ tayā tattha anulomapañcake āmantāti etāya paṭiññāya evaṃ paṭijānantā puna na hevāti paṭikkhepe katepi ‘‘ājānāhi niggaha’’nti evaṃ na niggahetabboyeva. Evaṃ aniggahetabbampi maṃ niggaṇhāsi, īdisena pana niggahena dunniggahitā mayaṃ homa.

    ইদানি যং নিগ্গহং সন্ধায ‘‘দুন্নিগ্গহিতা চ হোমা’’তি অৰোচ, তং দস্সেতুং হঞ্চি পুগ্গলো…পে॰… ইদং তে মিচ্ছাতিআহ। এৰমিদং অনুলোমপটিলোমতো চতূহি পাপনারোপনাহি নিগ্গহস্স উপনীতত্তা উপনযনচতুক্কং নাম হোতি।

    Idāni yaṃ niggahaṃ sandhāya ‘‘dunniggahitā ca homā’’ti avoca, taṃ dassetuṃ hañci puggalo…pe… idaṃ te micchātiāha. Evamidaṃ anulomapaṭilomato catūhi pāpanāropanāhi niggahassa upanītattā upanayanacatukkaṃ nāma hoti.

    ৫. ইদানি ‘‘ন হেৰং নিগ্গহেতব্বে’’তিআদিকং নিগ্গমনচতুক্কং নাম হোতি। তত্থ ন হেৰং নিগ্গহেতব্বেতি যথাহং তযা নিগ্গহিতো, ন হি এৰং নিগ্গহেতব্বো। এতস্স হি নিগ্গহস্স দুন্নিগ্গহভাৰো মযা সাধিতো। তেন হীতি তেন কারণেন, যস্মা এস নিগ্গহো দুন্নিগ্গহো, তস্মা যং মং নিগ্গণ্হাসি হঞ্চি পুগ্গলো…পে॰… ইদং তে মিচ্ছাতি, ইদং নিগ্গণ্হনং তৰ মিচ্ছাতি অত্থো। তেন হি যে কতে নিগ্গহেতি যেন কারণেন ইদং মিচ্ছা, তেন কারণেন যো তযা নিগ্গহো কতো, সো দুক্কটো। যং মযা পটিকম্মং কতং, তদেৰ সুকতং। যাপি চেসা পটিকম্মচতুক্কাদিৰসেন কথামগ্গসম্পটিপাদনা কতা, সাপি সুকতা। এৰমেতং পুগ্গলো উপলব্ভতীতিআদিকস্স অনুলোমপঞ্চকস্স নুপলব্ভতীতিআদিকানং পটিকম্মনিগ্গহোপনযননিগ্গমনচতুক্কানং ৰসেন অনুলোমপচ্চনীকপঞ্চকং নাম নিদ্দিট্ঠন্তি ৰেদিতব্বং। এত্তাৰতা সকৰাদিনো পুব্বপক্খে সতি পরৰাদিনো ৰচনসামঞ্ঞমত্তেন ছলৰাদেন জযো হোতি।

    5. Idāni ‘‘na hevaṃ niggahetabbe’’tiādikaṃ niggamanacatukkaṃ nāma hoti. Tattha na hevaṃ niggahetabbeti yathāhaṃ tayā niggahito, na hi evaṃ niggahetabbo. Etassa hi niggahassa dunniggahabhāvo mayā sādhito. Tena hīti tena kāraṇena, yasmā esa niggaho dunniggaho, tasmā yaṃ maṃ niggaṇhāsi hañci puggalo…pe… idaṃ te micchāti, idaṃ niggaṇhanaṃ tava micchāti attho. Tena hi ye kate niggaheti yena kāraṇena idaṃ micchā, tena kāraṇena yo tayā niggaho kato, so dukkaṭo. Yaṃ mayā paṭikammaṃ kataṃ, tadeva sukataṃ. Yāpi cesā paṭikammacatukkādivasena kathāmaggasampaṭipādanā katā, sāpi sukatā. Evametaṃ puggalo upalabbhatītiādikassa anulomapañcakassa nupalabbhatītiādikānaṃ paṭikammaniggahopanayananiggamanacatukkānaṃ vasena anulomapaccanīkapañcakaṃ nāma niddiṭṭhanti veditabbaṃ. Ettāvatā sakavādino pubbapakkhe sati paravādino vacanasāmaññamattena chalavādena jayo hoti.

    ২. পচ্চনীকানুলোমৰণ্ণনা

    2. Paccanīkānulomavaṇṇanā

    ৬. ইদানি যথা পরৰাদিনো পুব্বপক্খে সতি সকৰাদিনো ধম্মেনেৰ তথেন সুজযো হোতি, তথা ৰাদুপ্পত্তিং দস্সেতুং পুগ্গলো নুপলব্ভতীতি পচ্চনীকানুলোমপঞ্চকং আরদ্ধং। তত্থ পচ্চনীকে পুচ্ছা পরৰাদিস্স, রূপাদিভেদং সচ্চিকট্ঠপরমত্থং সন্ধায পটিঞ্ঞা সকৰাদিস্স। সুদ্ধসম্মুতিসচ্চং ৰা পরমত্থমিস্সকং ৰা সম্মুতিসচ্চং সন্ধায যো সচ্চিকট্ঠোতি পুন অনুযোগো পরৰাদিস্স, সম্মুতিৰসেন নুপলব্ভতীতি নৰত্তব্বত্তা মিস্সকৰসেন ৰা অনুযোগস্স সংকিণ্ণত্তা ন হেৰন্তি পটিক্খেপো সকৰাদিস্স। পটিঞ্ঞাতং পটিক্খিপতীতি ৰচনসামঞ্ঞমত্তেন আজানাহি নিগ্গহন্তিআদিৰচনং পরৰাদিস্স। এৰমযং পুগ্গলো নুপলব্ভতীতি দুতিযৰাদং নিস্সায দুতিযো নিগ্গহো হোতীতি ৰেদিতব্বো। এৰং তেন ছলেন নিগ্গহো আরোপিতো।

    6. Idāni yathā paravādino pubbapakkhe sati sakavādino dhammeneva tathena sujayo hoti, tathā vāduppattiṃ dassetuṃ puggalo nupalabbhatīti paccanīkānulomapañcakaṃ āraddhaṃ. Tattha paccanīke pucchā paravādissa, rūpādibhedaṃ saccikaṭṭhaparamatthaṃ sandhāya paṭiññā sakavādissa. Suddhasammutisaccaṃ vā paramatthamissakaṃ vā sammutisaccaṃ sandhāya yo saccikaṭṭhoti puna anuyogo paravādissa, sammutivasena nupalabbhatīti navattabbattā missakavasena vā anuyogassa saṃkiṇṇattā na hevanti paṭikkhepo sakavādissa. Paṭiññātaṃ paṭikkhipatīti vacanasāmaññamattena ājānāhi niggahantiādivacanaṃ paravādissa. Evamayaṃ puggalo nupalabbhatīti dutiyavādaṃ nissāya dutiyo niggaho hotīti veditabbo. Evaṃ tena chalena niggaho āropito.

    ৭-১০. ইদানি ধম্মেন সমেন অত্তনো ৰাদে জযং দস্সেতুং অনুলোমনযে পুচ্ছা সকৰাদিস্স, অত্তনো লদ্ধিং নিস্সায পটিঞ্ঞা পরৰাদিস্স। লদ্ধিযা ওকাসং অদত্ৰা পরমত্থৰসেন পুন অনুযোগো সকৰাদিস্স, পরমত্থৰসেন পুগ্গলস্স অভাৰতো পটিক্খেপো পরৰাদিস্স। ততো পরং ধম্মেন সমেন অত্তনো জযদস্সনত্থং আজানাহি পটিকম্মন্তিআদি সব্বং সকৰাদীৰচনমেৰ হোতি। তত্থ সব্বেসং পটিকম্মনিগ্গহোপনযননিগ্গমনচতুক্কানং হেট্ঠা ৰুত্তনযেনেৰ অত্থো ৰেদিতব্বো। এৰমিদং পুগ্গলো নুপলব্ভতীতিআদিকস্স পচ্চনীকপঞ্চকস্স উপলব্ভতীতিআদীনং পটিকম্মনিগ্গহোপনযননিগ্গমনচতুক্কানঞ্চ ৰসেন পচ্চনীকানুলোমপঞ্চকং নাম নিদ্দিট্ঠং হোতি। এৰমেতানি পঠমসচ্চিকট্ঠে দ্ৰে পঞ্চকানি নিদ্দিট্ঠানি। তত্থ পুরিমপঞ্চকে পরৰাদিস্স সকৰাদিনা কতো নিগ্গহো সুনিগ্গহো। সকৰাদিস্স পন পরৰাদিনা ছলৰাদং নিস্সায পটিকম্মং কত্ৰা অত্তনা সাধিতো জযো দুজ্জযো। দুতিযপঞ্চকে সকৰাদিস্স পরৰাদিনা কতো নিগ্গহো দুন্নিগ্গহো। পরৰাদিস্স পন সকৰাদিনা ধম্মৰাদং নিস্সায পটিকম্মং কত্ৰা অত্তনা সাধিতো জযো সুজযোতি পঠমসচ্চিকট্ঠো। তত্থেতং ৰুচ্চতি –

    7-10. Idāni dhammena samena attano vāde jayaṃ dassetuṃ anulomanaye pucchā sakavādissa, attano laddhiṃ nissāya paṭiññā paravādissa. Laddhiyā okāsaṃ adatvā paramatthavasena puna anuyogo sakavādissa, paramatthavasena puggalassa abhāvato paṭikkhepo paravādissa. Tato paraṃ dhammena samena attano jayadassanatthaṃ ājānāhi paṭikammantiādi sabbaṃ sakavādīvacanameva hoti. Tattha sabbesaṃ paṭikammaniggahopanayananiggamanacatukkānaṃ heṭṭhā vuttanayeneva attho veditabbo. Evamidaṃ puggalo nupalabbhatītiādikassa paccanīkapañcakassa upalabbhatītiādīnaṃ paṭikammaniggahopanayananiggamanacatukkānañca vasena paccanīkānulomapañcakaṃ nāma niddiṭṭhaṃ hoti. Evametāni paṭhamasaccikaṭṭhe dve pañcakāni niddiṭṭhāni. Tattha purimapañcake paravādissa sakavādinā kato niggaho suniggaho. Sakavādissa pana paravādinā chalavādaṃ nissāya paṭikammaṃ katvā attanā sādhito jayo dujjayo. Dutiyapañcake sakavādissa paravādinā kato niggaho dunniggaho. Paravādissa pana sakavādinā dhammavādaṃ nissāya paṭikammaṃ katvā attanā sādhito jayo sujayoti paṭhamasaccikaṭṭho. Tatthetaṃ vuccati –

    ‘‘নিগ্গহো পরৰাদিস্স, সুদ্ধো পঠমপঞ্চকে।

    ‘‘Niggaho paravādissa, suddho paṭhamapañcake;

    অসুদ্ধো পন তস্সেৰ, পটিকম্মজযো তহিং॥

    Asuddho pana tasseva, paṭikammajayo tahiṃ.

    ‘‘নিগ্গহো সকৰাদিস্স, অসুদ্ধো দুতিযপঞ্চকে।

    ‘‘Niggaho sakavādissa, asuddho dutiyapañcake;

    ৰিসুদ্ধো পন তস্সেৰ, পটিকম্মজযো তহিং॥

    Visuddho pana tasseva, paṭikammajayo tahiṃ.

    ‘‘তস্মা দ্ৰীসুপি ঠানেসু, জযোৰ সকৰাদিনো।

    ‘‘Tasmā dvīsupi ṭhānesu, jayova sakavādino;

    ধম্মেন হি জযো নাম, অধম্মেন কুতো জযো॥

    Dhammena hi jayo nāma, adhammena kuto jayo.

    ‘‘সচ্চিকট্ঠে যথা চেত্থ, পঞ্চকদ্ৰযমণ্ডিতে।

    ‘‘Saccikaṭṭhe yathā cettha, pañcakadvayamaṇḍite;

    ধম্মাধম্মৰসেনেৰ, ৰুত্তো জযপরাজযো॥

    Dhammādhammavaseneva, vutto jayaparājayo.

    ‘‘ইতো পরেসু সব্বেসু, সচ্চিকট্ঠেসু পণ্ডিতো।

    ‘‘Ito paresu sabbesu, saccikaṭṭhesu paṇḍito;

    এৰমেৰ ৰিভাৰেয্য, উভো জযপরাজযে’’তি॥

    Evameva vibhāveyya, ubho jayaparājaye’’ti.

    ২. ওকাসসচ্চিকট্ঠো

    2. Okāsasaccikaṭṭho

    ১. অনুলোমপচ্চনীকৰণ্ণনা

    1. Anulomapaccanīkavaṇṇanā

    ১১. এৰং সুদ্ধিকসচ্চিকট্ঠং ৰিত্থারেত্ৰা ইদানি তমেৰ অপরেহি ওকাসাদীহি নযেহি ৰিত্থারেতুং পুন পুগ্গলো উপলব্ভতীতিআদি আরদ্ধং। তত্থ পুচ্ছা সকৰাদিস্স, পটিঞ্ঞা পরৰাদিস্স। পুন সব্বত্থাতি সরীরং সন্ধায অনুযোগো সকৰাদিস্স, রূপস্মিং অত্তানং সমনুপস্সনাদোসঞ্চ ‘অঞ্ঞং জীৰং অঞ্ঞং সরীর’ন্তি আপজ্জনদোসঞ্চ দিস্ৰা পটিক্খেপো পরৰাদিস্স। সেসমেত্থ অনুলোমপচ্চনীকপঞ্চকে হেট্ঠা ৰুত্তনযেনেৰ ৰেদিতব্বং। পাঠো পন সঙ্খিত্তো । তত্থ যস্মা সরীরং সন্ধায ‘‘সব্বত্থ ন উপলব্ভতী’’তি ৰুত্তে সরীরতো বহি উপলব্ভতীতি আপজ্জতি। তস্মা পচ্চনীকে পটিক্খেপো সকৰাদিস্স, পঠমং অনুজানিত্ৰা পচ্ছা অৰজানাতীতি ছলৰাদস্স ৰসেন পটিকম্মং পরৰাদিস্স। সেসং পাকটমেৰ।

    11. Evaṃ suddhikasaccikaṭṭhaṃ vitthāretvā idāni tameva aparehi okāsādīhi nayehi vitthāretuṃ puna puggalo upalabbhatītiādi āraddhaṃ. Tattha pucchā sakavādissa, paṭiññā paravādissa. Puna sabbatthāti sarīraṃ sandhāya anuyogo sakavādissa, rūpasmiṃ attānaṃ samanupassanādosañca ‘aññaṃ jīvaṃ aññaṃ sarīra’nti āpajjanadosañca disvā paṭikkhepo paravādissa. Sesamettha anulomapaccanīkapañcake heṭṭhā vuttanayeneva veditabbaṃ. Pāṭho pana saṅkhitto . Tattha yasmā sarīraṃ sandhāya ‘‘sabbattha na upalabbhatī’’ti vutte sarīrato bahi upalabbhatīti āpajjati. Tasmā paccanīke paṭikkhepo sakavādissa, paṭhamaṃ anujānitvā pacchā avajānātīti chalavādassa vasena paṭikammaṃ paravādissa. Sesaṃ pākaṭameva.

    ৩. কালসচ্চিকট্ঠো

    3. Kālasaccikaṭṭho

    ১. অনুলোমপচ্চনীকৰণ্ণনা

    1. Anulomapaccanīkavaṇṇanā

    ১২. দুতিযনযে সব্বদাতি পুরিমপচ্ছিমজাতিকালঞ্চ ধরমানপরিনিব্বুতকালঞ্চ সন্ধায অনুযোগো সকৰাদিস্স, স্ৰেৰ খত্তিযো সো ব্রাহ্মণোতিআদীনং আপত্তিদোসঞ্চ ধরমানপরিনিব্বুতানং ৰিসেসাভাৰদোসঞ্চ দিস্ৰা পটিক্খেপো পরৰাদিস্স। সেসং পঠমনযে ৰুত্তসদিসমেৰ।

    12. Dutiyanaye sabbadāti purimapacchimajātikālañca dharamānaparinibbutakālañca sandhāya anuyogo sakavādissa, sveva khattiyo so brāhmaṇotiādīnaṃ āpattidosañca dharamānaparinibbutānaṃ visesābhāvadosañca disvā paṭikkhepo paravādissa. Sesaṃ paṭhamanaye vuttasadisameva.

    ৪. অৰযৰসচ্চিকট্ঠো

    4. Avayavasaccikaṭṭho

    ১. অনুলোমপচ্চনীকৰণ্ণনা

    1. Anulomapaccanīkavaṇṇanā

    ১৩. ততিযনযে সব্বেসূতি খন্ধাযতনাদীনি সন্ধায অনুযোগো সকৰাদিস্স, রূপস্মিং অত্তা, চক্খুস্মিং অত্তাতিআদিদোসভযেন পটিক্খেপো পরৰাদিস্স। সেসং তাদিসমেৰাতি।

    13. Tatiyanaye sabbesūti khandhāyatanādīni sandhāya anuyogo sakavādissa, rūpasmiṃ attā, cakkhusmiṃ attātiādidosabhayena paṭikkhepo paravādissa. Sesaṃ tādisamevāti.

    ওকাসদিসচ্চিকট্ঠাদি

    Okāsadisaccikaṭṭhādi

    ২. পচ্চনীকানুলোমৰণ্ণনা

    2. Paccanīkānulomavaṇṇanā

    ১৪. এৰমেতানি তীণি অনুলোমপচ্চনীকপঞ্চকে অনুলোমমত্তৰসেনেৰ তাৰ পটিপাটিযা ভাজেত্ৰা পুন পচ্চনীকানুলোমপঞ্চকে পচ্চনীকমত্তৰসেনেৰ ভাজেতুং পুগ্গলো নুপলব্ভতীতিআদি আরদ্ধং। তত্থ অনুলোমপঞ্চকস্স পাল়িযং সঙ্খিপিত্ৰা আগতে পচ্চনীকে ৰুত্তনযেনেৰ পচ্চনীকস্স চ পাল়িযং সঙ্খিপিত্ৰা আগতে অনুলোমে ৰুত্তনযেনেৰ অত্থো ৰেদিতব্বো। এত্তাৰতা সুদ্ধিকস্স চেৰ ইমেসঞ্চ তিণ্ণন্তি চতুন্নং সচ্চিকট্ঠানং একেকস্মিং সচ্চিকট্ঠে অনুলোমপচ্চনীকস্স পচ্চনীকানুলোমস্স চাতি দ্ৰিন্নং দ্ৰিন্নং পচ্চনীকানং ৰসেন অযং অট্ঠমুখা নাম ৰাদযুত্তি নিদ্দিট্ঠা হোতীতি ৰেদিতব্বা। যা একেকস্মিং মুখে একেকস্স নিগ্গহস্স ৰসেন অট্ঠকনিগ্গহোতি পাল়িযং লিখিযতি। তত্থেতং ৰুচ্চতি –

    14. Evametāni tīṇi anulomapaccanīkapañcake anulomamattavaseneva tāva paṭipāṭiyā bhājetvā puna paccanīkānulomapañcake paccanīkamattavaseneva bhājetuṃ puggalo nupalabbhatītiādi āraddhaṃ. Tattha anulomapañcakassa pāḷiyaṃ saṅkhipitvā āgate paccanīke vuttanayeneva paccanīkassa ca pāḷiyaṃ saṅkhipitvā āgate anulome vuttanayeneva attho veditabbo. Ettāvatā suddhikassa ceva imesañca tiṇṇanti catunnaṃ saccikaṭṭhānaṃ ekekasmiṃ saccikaṭṭhe anulomapaccanīkassa paccanīkānulomassa cāti dvinnaṃ dvinnaṃ paccanīkānaṃ vasena ayaṃ aṭṭhamukhā nāma vādayutti niddiṭṭhā hotīti veditabbā. Yā ekekasmiṃ mukhe ekekassa niggahassa vasena aṭṭhakaniggahoti pāḷiyaṃ likhiyati. Tatthetaṃ vuccati –

    ‘‘এৰং চতুব্বিধে পঞ্হে, পঞ্চকদ্ৰযভেদতো।

    ‘‘Evaṃ catubbidhe pañhe, pañcakadvayabhedato;

    এসা অট্ঠমুখা নাম, ৰাদযুত্তি পকাসিতা॥

    Esā aṭṭhamukhā nāma, vādayutti pakāsitā.

    ‘‘অট্ঠেৰ নিগ্গহা তত্থ, চত্তারো তেসু ধম্মিকা।

    ‘‘Aṭṭheva niggahā tattha, cattāro tesu dhammikā;

    অধম্মিকা চ চত্তারো, সব্বত্থ সকৰাদিনো।

    Adhammikā ca cattāro, sabbattha sakavādino;

    জযো পরাজযো চেৰ, সব্বত্থ পরৰাদিনো’’তি॥

    Jayo parājayo ceva, sabbattha paravādino’’ti.

    সচ্চিকট্ঠৰণ্ণনা নিট্ঠিতা।

    Saccikaṭṭhavaṇṇanā niṭṭhitā.

    ৫. সুদ্ধিকসংসন্দনৰণ্ণনা

    5. Suddhikasaṃsandanavaṇṇanā

    ১৭-২৭. ইদানি রূপাদীহি সদ্ধিং সচ্চিকট্ঠসংসন্দনং হোতি। তত্থ রূপঞ্চাতি যথা রূপং পরমত্থতো উপলব্ভতি, কিং তে পুগ্গলোপি তথেৰ উপলব্ভতীতি সন্ধায পুচ্ছা সকৰাদিস্স, অত্থি পুগ্গলোতি ৰচনমত্তং গহেত্ৰা পটিঞ্ঞা পরৰাদিস্স। যদি তে রূপং ৰিয পরমত্থতো পুগ্গলো অত্থি, রূপতো ৰেদনাদীনং ৰিয পুগ্গলস্সাপি অঞ্ঞত্তং আপজ্জতীতি অনুযোগো সকৰাদিস্স, সমযসুত্তৰিরোধং দিস্ৰা পটিক্খেপো পরৰাদিস্স। সেসং অত্থতো পাকটমেৰ। ধম্মতো পনেত্থ সত্তপঞ্ঞাসভেদস্স সচ্চিকট্ঠপরমত্থস্স ৰসেন সকৰাদীপক্খমূলকে অনুলোমপচ্চনীকে সত্তপঞ্ঞাস অনুলোমপঞ্চকানি দস্সিতানি। পটিকম্মচতুক্কাদীনি সঙ্খিত্তানি। পরৰাদীপক্খমূলকেপি পচ্চনীকানুলোমে সত্তপঞ্ঞাস পটিলোমপঞ্চকানি দস্সিতানি। পটিকম্মচতুক্কাদীনি সঙ্খিত্তানি। তত্থ ‘‘ৰুত্তং ভগৰতা’’তি ৰচনমত্তেন পুগ্গলস্স অত্থিতং রূপস্স চ সচ্চিকট্ঠপরমত্থৰসেন উপলব্ভনীযতং দস্সেত্ৰা উভিন্নং অঞ্ঞত্তং পটিজানাপনত্থং ৰুত্তং ভগৰতাতি অনুযোগো পরৰাদিস্স, সম্মুতিপরমত্থানং একত্তনানত্তপঞ্হস্স ঠপনীযত্তা পটিক্খেপো সকৰাদিস্স। সেসমিধাপি অত্থতো পাকটমেৰাতি।

    17-27. Idāni rūpādīhi saddhiṃ saccikaṭṭhasaṃsandanaṃ hoti. Tattha rūpañcāti yathā rūpaṃ paramatthato upalabbhati, kiṃ te puggalopi tatheva upalabbhatīti sandhāya pucchā sakavādissa, atthi puggaloti vacanamattaṃ gahetvā paṭiññā paravādissa. Yadi te rūpaṃ viya paramatthato puggalo atthi, rūpato vedanādīnaṃ viya puggalassāpi aññattaṃ āpajjatīti anuyogo sakavādissa, samayasuttavirodhaṃ disvā paṭikkhepo paravādissa. Sesaṃ atthato pākaṭameva. Dhammato panettha sattapaññāsabhedassa saccikaṭṭhaparamatthassa vasena sakavādīpakkhamūlake anulomapaccanīke sattapaññāsa anulomapañcakāni dassitāni. Paṭikammacatukkādīni saṅkhittāni. Paravādīpakkhamūlakepi paccanīkānulome sattapaññāsa paṭilomapañcakāni dassitāni. Paṭikammacatukkādīni saṅkhittāni. Tattha ‘‘vuttaṃ bhagavatā’’ti vacanamattena puggalassa atthitaṃ rūpassa ca saccikaṭṭhaparamatthavasena upalabbhanīyataṃ dassetvā ubhinnaṃ aññattaṃ paṭijānāpanatthaṃ vuttaṃ bhagavatāti anuyogo paravādissa, sammutiparamatthānaṃ ekattanānattapañhassa ṭhapanīyattā paṭikkhepo sakavādissa. Sesamidhāpi atthato pākaṭamevāti.

    সুদ্ধিকসংসন্দনৰণ্ণনা।

    Suddhikasaṃsandanavaṇṇanā.

    ৬. ওপম্মসংসন্দনৰণ্ণনা

    6. Opammasaṃsandanavaṇṇanā

    ২৮-৩৬. ইদানি রূপাদীহেৰ সদ্ধিং ওপম্মৰসেন সচ্চিকট্ঠসংসন্দনং হোতি। তত্থ রূপৰেদনানং উপলদ্ধিসামঞ্ঞেন অঞ্ঞত্তপুচ্ছা চ পুগ্গলরূপানং উপলদ্ধিসামঞ্ঞপুচ্ছা চাতি পুচ্ছাদ্ৰযম্পি সকৰাদিস্স, উভোপি পটিঞ্ঞা পরৰাদিস্স। পরৰাদিনা অনুঞ্ঞাতেন উপলদ্ধিসামঞ্ঞেন রূপৰেদনানং ৰিয রূপপুগ্গলানং অঞ্ঞত্তানুযোগো সকৰাদিস্স, পটিক্খেপো ইতরস্স। সেসমিধাপি অত্থতো পাকটমেৰ। ধম্মতো পনেত্থ রূপমূলকাদীনং চক্কানঞ্চ ৰসেন সকৰাদীপক্খে ৰীসাধিকানি নৰ নিগ্গহপঞ্চকসতানি দস্সিতানি। কথং? খন্ধেসু তাৰ রূপমূলকে চক্কে চত্তারি, তথা ৰেদনাদিমূলকেসূতি ৰীসতি। আযতনেসু চক্খাযতনমূলকে চক্কে একাদস, তথা সেসেসূতি দ্ৰত্তিংসসতং। ধাতূসু চক্খুধাতুমূলকে চক্কে সত্তরস, তথা সেসেসূতি ছাধিকানি তীণি সতানি। ইন্দ্রিযেসু চক্খুন্দ্রিযমূলকে চক্কে একৰীসতি, তথা সেসেসূতি দ্ৰাসট্ঠাধিকানি চত্তারি সতানি। এৰং সব্বানিপি ৰীসাধিকানি নৰ নিগ্গহপঞ্চকসতানি হোন্তি।

    28-36. Idāni rūpādīheva saddhiṃ opammavasena saccikaṭṭhasaṃsandanaṃ hoti. Tattha rūpavedanānaṃ upaladdhisāmaññena aññattapucchā ca puggalarūpānaṃ upaladdhisāmaññapucchā cāti pucchādvayampi sakavādissa, ubhopi paṭiññā paravādissa. Paravādinā anuññātena upaladdhisāmaññena rūpavedanānaṃ viya rūpapuggalānaṃ aññattānuyogo sakavādissa, paṭikkhepo itarassa. Sesamidhāpi atthato pākaṭameva. Dhammato panettha rūpamūlakādīnaṃ cakkānañca vasena sakavādīpakkhe vīsādhikāni nava niggahapañcakasatāni dassitāni. Kathaṃ? Khandhesu tāva rūpamūlake cakke cattāri, tathā vedanādimūlakesūti vīsati. Āyatanesu cakkhāyatanamūlake cakke ekādasa, tathā sesesūti dvattiṃsasataṃ. Dhātūsu cakkhudhātumūlake cakke sattarasa, tathā sesesūti chādhikāni tīṇi satāni. Indriyesu cakkhundriyamūlake cakke ekavīsati, tathā sesesūti dvāsaṭṭhādhikāni cattāri satāni. Evaṃ sabbānipi vīsādhikāni nava niggahapañcakasatāni honti.

    ৩৭-৪৫. পরৰাদীপক্খেপি রূপং উপলব্ভতীতি অনুলোমৰসেনেৰ রূপৰেদনাদীনং অঞ্ঞত্তপটিঞ্ঞং কারেত্ৰা পুন অত্থি পুগ্গলোতি সুত্তং নিস্সায ছলৰসেন পুগ্গলস্স রূপাদীহি উপলদ্ধিসামঞ্ঞং আরোপেত্ৰা অঞ্ঞত্তানুযোগো কতো। সেসমিধাপি অত্থতো উত্তানমেৰ। ধম্মতোপি সকৰাদীপক্খে ৰুত্তনযেন ৰীসাধিকানি নৰ পটিকম্মপঞ্চকসতানি দস্সিতানি।

    37-45. Paravādīpakkhepi rūpaṃ upalabbhatīti anulomavaseneva rūpavedanādīnaṃ aññattapaṭiññaṃ kāretvā puna atthi puggaloti suttaṃ nissāya chalavasena puggalassa rūpādīhi upaladdhisāmaññaṃ āropetvā aññattānuyogo kato. Sesamidhāpi atthato uttānameva. Dhammatopi sakavādīpakkhe vuttanayena vīsādhikāni nava paṭikammapañcakasatāni dassitāni.

    রূপাদীহি সদ্ধিং ওপম্মৰসেন সচ্চিকট্ঠসংসন্দনং।

    Rūpādīhi saddhiṃ opammavasena saccikaṭṭhasaṃsandanaṃ.

    ৭. চতুক্কনযসংসন্দনৰণ্ণনা

    7. Catukkanayasaṃsandanavaṇṇanā

    ৪৬-৫২. ইদানি যং সচ্চিকট্ঠপরমত্থেন উপলব্ভতি, তেন যস্মা রূপাদীসু সত্তপঞ্ঞাসায সচ্চিকট্ঠপরমত্থেসু অঞ্ঞতরেন ভৰিতব্বং; রূপাদিনিস্সিতেন ৰা, অঞ্ঞত্র ৰা রূপাদীহি, রূপাদীনং ৰা নিস্সযেন, তস্মা ইমিনা চতুক্কনযেন সচ্চিকট্ঠসংসন্দনং আরদ্ধং। তত্থ রূপং পুগ্গলোতি অনুযোগো সকৰাদিস্স, উচ্ছেদদিট্ঠিভযেন ন হেৰাতি পটিক্খেপো পরৰাদিস্স, নিগ্গহারোপনং সকৰাদিস্স। কিং পনেতং যুত্তং, ননু রূপং ৰেদনাতি ৰুত্তম্পি পটিক্খিপিতব্বমেৰাতি? আম পটিক্খিপিতব্বং। তং পন রূপতো ৰেদনায অঞ্ঞসভাৰসব্ভাৰতো, ন অঞ্ঞত্তাভাৰতো। অযঞ্চ রূপাদীসু একধম্মতোপি পুগ্গলস্স অঞ্ঞত্তং ন ইচ্ছতি, তস্মা যুত্তং। অযঞ্চ অনুযোগো রূপং পুগ্গলো…পে॰… অঞ্ঞাতাৰিন্দ্রিযং পুগ্গলোতি সকলং পরমত্থসচ্চং সন্ধায আরদ্ধো। সকলং পন পচ্চত্তলক্খণৰসেন একতো ৰত্তুং ন সক্কাতি তন্তিৰসেন অনুযোগলক্খণমত্তমেতং ঠপিতং। তেন ৰিঞ্ঞূ অত্থং ৰিভাৰেন্তি। ৰাদকামেন পন ইমং লক্খণং গহেত্ৰা যথা যথা পরৰাদিস্স ওকাসো ন হোতি, তথা তথা ৰত্তব্বং। ইতি তন্তিৰসেন অনুযোগলক্খণস্স ঠপিতত্তাপি যুত্তমেৰ। ইমিনা নযেন সব্বানুযোগেসু অত্থো ৰেদিতব্বো।

    46-52. Idāni yaṃ saccikaṭṭhaparamatthena upalabbhati, tena yasmā rūpādīsu sattapaññāsāya saccikaṭṭhaparamatthesu aññatarena bhavitabbaṃ; rūpādinissitena vā, aññatra vā rūpādīhi, rūpādīnaṃ vā nissayena, tasmā iminā catukkanayena saccikaṭṭhasaṃsandanaṃ āraddhaṃ. Tattha rūpaṃ puggaloti anuyogo sakavādissa, ucchedadiṭṭhibhayena na hevāti paṭikkhepo paravādissa, niggahāropanaṃ sakavādissa. Kiṃ panetaṃ yuttaṃ, nanu rūpaṃ vedanāti vuttampi paṭikkhipitabbamevāti? Āma paṭikkhipitabbaṃ. Taṃ pana rūpato vedanāya aññasabhāvasabbhāvato, na aññattābhāvato. Ayañca rūpādīsu ekadhammatopi puggalassa aññattaṃ na icchati, tasmā yuttaṃ. Ayañca anuyogo rūpaṃ puggalo…pe… aññātāvindriyaṃ puggaloti sakalaṃ paramatthasaccaṃ sandhāya āraddho. Sakalaṃ pana paccattalakkhaṇavasena ekato vattuṃ na sakkāti tantivasena anuyogalakkhaṇamattametaṃ ṭhapitaṃ. Tena viññū atthaṃ vibhāventi. Vādakāmena pana imaṃ lakkhaṇaṃ gahetvā yathā yathā paravādissa okāso na hoti, tathā tathā vattabbaṃ. Iti tantivasena anuyogalakkhaṇassa ṭhapitattāpi yuttameva. Iminā nayena sabbānuyogesu attho veditabbo.

    অযং পন ৰিসেসো – রূপস্মিং পুগ্গলোতিআদীসু যথা একং মহাভূতং নিস্সায তযো মহাভূতা, ৰত্থুরূপং নিস্সায ৰিঞ্ঞাণং রূপস্মিন্তি ৰত্তুং ৰট্টতি, কিং তে এৰং রূপস্মিং পুগ্গলো? যথা চ সভাগৰিনিব্ভোগতো ৰেদনাদযো সব্বধম্মা, অরূপা ৰা পন চত্তারো খন্ধা, নিব্বানমেৰ ৰা ‘‘অঞ্ঞত্র রূপা’’তি ৰত্তুং ৰট্টতি, কিং তে এৰং পুগ্গলো? যথা চ চিত্তসমুট্ঠানানং রূপানং নিস্সযৰসেন ‘‘ৰেদনায রূপং…পে॰… ৰিঞ্ঞাণস্মিং রূপ’’ন্তি ৰত্তুং ৰট্টতি, কিং তে এৰং পুগ্গলোতি? সব্বানুযোগেসু পন উচ্ছেদদিট্ঠিভযেন চেৰ সমযৰিরোধেন চ পটিক্খেপো পরৰাদিস্স। সেসমেত্থ অত্থতো পাকটমেৰ। ধম্মতো পনেত্থ সত্তপঞ্ঞাসায সচ্চিকট্ঠেসু একেকস্মিং চত্তারি চত্তারি কত্ৰা নিগ্গহৰসেন অট্ঠৰীসাধিকানি দ্ৰে পঞ্চকসতানি দস্সিতানি। পরৰাদীপক্খেপি পটিকম্মৰসেন তত্তকানেৰ। যা পনেত্থ অত্থি পুগ্গলোতি ৰুত্তে সকৰাদিস্স পটিঞ্ঞা, সা সুত্তে আগতেন সম্মুতিৰসেন। যো রূপং পুগ্গলোতিআদীসু পটিক্খেপো, সো সক্কাযদিট্ঠিপঞ্হস্স ঠপনীযত্তা। পরৰাদিস্স পটিকম্মং ছলৰসেনেৰাতি।

    Ayaṃ pana viseso – rūpasmiṃ puggalotiādīsu yathā ekaṃ mahābhūtaṃ nissāya tayo mahābhūtā, vatthurūpaṃ nissāya viññāṇaṃ rūpasminti vattuṃ vaṭṭati, kiṃ te evaṃ rūpasmiṃ puggalo? Yathā ca sabhāgavinibbhogato vedanādayo sabbadhammā, arūpā vā pana cattāro khandhā, nibbānameva vā ‘‘aññatra rūpā’’ti vattuṃ vaṭṭati, kiṃ te evaṃ puggalo? Yathā ca cittasamuṭṭhānānaṃ rūpānaṃ nissayavasena ‘‘vedanāya rūpaṃ…pe… viññāṇasmiṃ rūpa’’nti vattuṃ vaṭṭati, kiṃ te evaṃ puggaloti? Sabbānuyogesu pana ucchedadiṭṭhibhayena ceva samayavirodhena ca paṭikkhepo paravādissa. Sesamettha atthato pākaṭameva. Dhammato panettha sattapaññāsāya saccikaṭṭhesu ekekasmiṃ cattāri cattāri katvā niggahavasena aṭṭhavīsādhikāni dve pañcakasatāni dassitāni. Paravādīpakkhepi paṭikammavasena tattakāneva. Yā panettha atthi puggaloti vutte sakavādissa paṭiññā, sā sutte āgatena sammutivasena. Yo rūpaṃ puggalotiādīsu paṭikkhepo, so sakkāyadiṭṭhipañhassa ṭhapanīyattā. Paravādissa paṭikammaṃ chalavasenevāti.

    চতুক্কনযসংসন্দনং।

    Catukkanayasaṃsandanaṃ.

    নিট্ঠিতা চ সংসন্দনকথা।

    Niṭṭhitā ca saṃsandanakathā.

    ৮. লক্খণযুত্তিৰণ্ণনা

    8. Lakkhaṇayuttivaṇṇanā

    ৫৩. ইদানি লক্খণযুত্তি নাম হোতি। তত্থ যস্মা ঠপেত্ৰা নিব্বানং সেসো সচ্চিকট্ঠপরমত্থো পচ্চযপটিবদ্ধতায সপ্পচ্চযো, পচ্চযেহি সমাগম্ম কতত্তা সঙ্খতো, উপ্পজ্জিত্ৰা নিরুজ্ঝনতো সদা অভাৰতো অসস্সতো, উপ্পত্তিকারণসঙ্খাতস্স নিমিত্তস্স অত্থিতায সনিমিত্তো, নিব্বানং ৰুত্তপ্পকারাভাৰতো অপ্পচ্চযং অসঙ্খতং সস্সতং অনিমিত্তন্তি ইদং সচ্চিকট্ঠস্স লক্খণং। তস্মা যদি পুগ্গলোপি সচ্চিকট্ঠপরমত্থোৰ তস্সাপি ইমিনা লক্খণেন ভৰিতব্বন্তি সন্ধায পুগ্গলো সপ্পচ্চযোতিআদযো অট্ঠপি অনুযোগা সকৰাদিস্স , পটিক্খেপো পরৰাদিস্স। আজানাহি নিগ্গহন্তিআদি পনেত্থ সঙ্খিত্তং। এৰমেতানি সকৰাদীপক্খে অনুলোমপচ্চনীকে অনুলোমমত্তৰসেন অট্ঠ পঞ্চকানি ৰেদিতব্বানি।

    53. Idāni lakkhaṇayutti nāma hoti. Tattha yasmā ṭhapetvā nibbānaṃ seso saccikaṭṭhaparamattho paccayapaṭibaddhatāya sappaccayo, paccayehi samāgamma katattā saṅkhato, uppajjitvā nirujjhanato sadā abhāvato asassato, uppattikāraṇasaṅkhātassa nimittassa atthitāya sanimitto, nibbānaṃ vuttappakārābhāvato appaccayaṃ asaṅkhataṃ sassataṃ animittanti idaṃ saccikaṭṭhassa lakkhaṇaṃ. Tasmā yadi puggalopi saccikaṭṭhaparamatthova tassāpi iminā lakkhaṇena bhavitabbanti sandhāya puggalo sappaccayotiādayo aṭṭhapi anuyogā sakavādissa , paṭikkhepo paravādissa. Ājānāhi niggahantiādi panettha saṅkhittaṃ. Evametāni sakavādīpakkhe anulomapaccanīke anulomamattavasena aṭṭha pañcakāni veditabbāni.

    ৫৪. পরৰাদীপক্খেপি পচ্চনীকানুলোমে পচ্চনীকমত্তৰসেন অট্ঠেৰ। তত্থ যস্মা পরৰাদিনা সুত্তৰসেন সম্মুতিসচ্চং সাধিতং, সম্মুতিযা চ সপ্পচ্চযাদিভাৰো নত্থি, তস্মা যাথাৰতো চ পটিক্খেপো সকৰাদিস্স। ছলৰসেন পন ৰত্তব্বং ‘‘আজানাহি পটিকম্ম’’ন্তিআদি সব্বং ইধাপি সঙ্খিত্তমেৰ।

    54. Paravādīpakkhepi paccanīkānulome paccanīkamattavasena aṭṭheva. Tattha yasmā paravādinā suttavasena sammutisaccaṃ sādhitaṃ, sammutiyā ca sappaccayādibhāvo natthi, tasmā yāthāvato ca paṭikkhepo sakavādissa. Chalavasena pana vattabbaṃ ‘‘ājānāhi paṭikamma’’ntiādi sabbaṃ idhāpi saṅkhittameva.

    লক্খণযুত্তিকথাৰণ্ণনা নিট্ঠিতা।

    Lakkhaṇayuttikathāvaṇṇanā niṭṭhitā.

    ৯. ৰচনসোধনৰণ্ণনা

    9. Vacanasodhanavaṇṇanā

    ৫৫-৫৯. ইদানি ৰচনসোধনং হোতি। তত্থ যদেতং পুগ্গলো উপলব্ভতীতি ৰচনং, তং সোধেতুং পুগ্গলো উপলব্ভতি, উপলব্ভতি পুগ্গলোতি। পুচ্ছা সকৰাদিস্স। তস্সত্থো – যদেতং পুগ্গলো উপলব্ভতীতি পদদ্ৰযং, তং একত্থং ৰা ভৰেয্য নানত্থং ৰা। যদি তাৰ নানত্থং, যথা অঞ্ঞং রূপং, অঞ্ঞা ৰেদনা, এৰং অঞ্ঞো পুগ্গলো, অঞ্ঞো উপলব্ভতীতি আপজ্জতি। অথেকত্থং, যথা যং চিত্তং তং মনো, এৰং স্ৰেৰ পুগ্গলো, সো উপলব্ভতীতি আপজ্জতি। তেন তং ৰদামি ‘‘যদি তে যো পুগ্গলো, সো উপলব্ভতি, এৰং সন্তে যো যো উপলব্ভতি, সো সো পুগ্গলোতি আপজ্জতি, কিং সম্পটিচ্ছসি এত’’ন্তি? ততো পুগ্গলৰাদী যস্মা পুগ্গলস্স উপলব্ভতং ইচ্ছতি, ন উপলব্ভমানানম্পি রূপাদীনং পুগ্গলভাৰং, তস্মা পুগ্গলো উপলব্ভতি, উপলব্ভতি কে হি চি পুগ্গলো কে হি চি ন পুগ্গলোতিআদিমাহ। তস্সত্থো – মম পুগ্গলো অত্থি পুগ্গলোতি সত্থু ৰচনতো উপলব্ভতি। যো পন উপলব্ভতি, ন সো সব্বো পুগ্গলো, অথ খো কে হি চি পুগ্গলো কে হি চি ন পুগ্গলোতি। তত্থ কো-কারত্থে কে-কারো, হি-কারো চ নিপাতমত্তো। কোচি পুগ্গলো, কোচি ন পুগ্গলোতি অযং পনেত্থ অত্থো। ইদং ৰুত্তং হোতি – পুগ্গলোপি হি রূপাদীসুপি যো কোচি ধম্মো উপলব্ভতিযেৰ, তত্থ পুগ্গলোৰ পুগ্গলো। রূপাদীসু পন কোচিপি ন পুগ্গলোতি। ততো তং সকৰাদী আহ – পুগ্গলো কে হি চি উপলব্ভতি কে হি চি ন উপলব্ভতীতি। তস্সত্থো – পুগ্গলো উপলব্ভতীতি পদদ্ৰযস্স অত্থতো একত্তে যদি উপলব্ভতীতি অনুঞ্ঞাতো ধম্মো পুগ্গলতো অনঞ্ঞোপি কোচি পুগ্গলো কোচি ন পুগ্গলো, পুগ্গলোপি তে কোচি উপলব্ভতি, কোচি ন উপলব্ভতীতি আপজ্জতি, কিং সম্পটিচ্ছসি এতন্তি? সো পুগ্গলস্স অনুপলদ্ধিং অনিচ্ছন্তো ন হেৰন্তি পটিক্খিপতি। ইতো পরং ‘‘আজানাহি নিগ্গহ’’ন্তিআদি সব্বং সঙ্খিত্তং। ৰিত্থারতো পন ৰেদিতব্বং। পুগ্গলো সচ্চিকট্ঠোতিআদীসুপি এসেৰ নযো। সব্বানি হেতানি উপলব্ভতিৰেৰচনানেৰ, অপিচ যস্মা ‘‘পুগ্গলো উপলব্ভতিসচ্চিকট্ঠপরমত্থেনা’’তি অযং পুগ্গলৰাদিনো পটিঞ্ঞা, তস্মাস্স যথেৰ পুগ্গলো উপলব্ভতীতি লদ্ধি, এৰমেৰং পুগ্গলো সচ্চিকট্ঠোতিপি আপজ্জতি। যা পনস্স পুগ্গলো অত্থীতি লদ্ধি, তস্সা ৰিজ্জমানোতিৰেৰচনমেৰ, তস্মা সব্বানিপেতানি ৰচনানি সোধিতানি।

    55-59. Idāni vacanasodhanaṃ hoti. Tattha yadetaṃ puggalo upalabbhatīti vacanaṃ, taṃ sodhetuṃ puggalo upalabbhati, upalabbhati puggaloti. Pucchā sakavādissa. Tassattho – yadetaṃ puggalo upalabbhatīti padadvayaṃ, taṃ ekatthaṃ vā bhaveyya nānatthaṃ vā. Yadi tāva nānatthaṃ, yathā aññaṃ rūpaṃ, aññā vedanā, evaṃ añño puggalo, añño upalabbhatīti āpajjati. Athekatthaṃ, yathā yaṃ cittaṃ taṃ mano, evaṃ sveva puggalo, so upalabbhatīti āpajjati. Tena taṃ vadāmi ‘‘yadi te yo puggalo, so upalabbhati, evaṃ sante yo yo upalabbhati, so so puggaloti āpajjati, kiṃ sampaṭicchasi eta’’nti? Tato puggalavādī yasmā puggalassa upalabbhataṃ icchati, na upalabbhamānānampi rūpādīnaṃ puggalabhāvaṃ, tasmā puggalo upalabbhati, upalabbhati ke hi ci puggalo ke hi ci na puggalotiādimāha. Tassattho – mama puggalo atthi puggaloti satthu vacanato upalabbhati. Yo pana upalabbhati, na so sabbo puggalo, atha kho ke hi ci puggalo ke hi ci na puggaloti. Tattha ko-kāratthe ke-kāro, hi-kāro ca nipātamatto. Koci puggalo, koci na puggaloti ayaṃ panettha attho. Idaṃ vuttaṃ hoti – puggalopi hi rūpādīsupi yo koci dhammo upalabbhatiyeva, tattha puggalova puggalo. Rūpādīsu pana kocipi na puggaloti. Tato taṃ sakavādī āha – puggalo ke hi ci upalabbhati ke hi ci na upalabbhatīti. Tassattho – puggalo upalabbhatīti padadvayassa atthato ekatte yadi upalabbhatīti anuññāto dhammo puggalato anaññopi koci puggalo koci na puggalo, puggalopi te koci upalabbhati, koci na upalabbhatīti āpajjati, kiṃ sampaṭicchasi etanti? So puggalassa anupaladdhiṃ anicchanto na hevanti paṭikkhipati. Ito paraṃ ‘‘ājānāhi niggaha’’ntiādi sabbaṃ saṅkhittaṃ. Vitthārato pana veditabbaṃ. Puggalo saccikaṭṭhotiādīsupi eseva nayo. Sabbāni hetāni upalabbhativevacanāneva, apica yasmā ‘‘puggalo upalabbhatisaccikaṭṭhaparamatthenā’’ti ayaṃ puggalavādino paṭiññā, tasmāssa yatheva puggalo upalabbhatīti laddhi, evamevaṃ puggalo saccikaṭṭhotipi āpajjati. Yā panassa puggalo atthīti laddhi, tassā vijjamānotivevacanameva, tasmā sabbānipetāni vacanāni sodhitāni.

    ৬০. তত্থ যং অৰসানে ‘‘পুগ্গলো অত্থি, অত্থি ন সব্বো পুগ্গলো’’তিআদি ৰুত্তং, তত্রাযমধিপ্পাযো – যঞ্হেতং পরৰাদিনা ‘‘পুগ্গলো অত্থি, অত্থি কেহিচি পুগ্গলো, কেহিচি ন পুগ্গলো’’তি ৰুত্তং, তং যস্মা অত্থতো পুগ্গলো অত্থি, অত্থি ন সব্বো পুগ্গলোতি এত্তকং হোতি, তস্মা নং সকৰাদী সম্পটিচ্ছাপেত্ৰা ইদানি নং এৰং অনুযুঞ্জতি। তযা হি ‘‘অত্থি পুগ্গলো অত্তহিতায পটিপন্নো’’তি ৰচনমত্তং নিস্সায ‘‘পুগ্গলো অত্থী’’তি লদ্ধি গহিতা, যথা চ ভগৰতা এতং ৰুত্তং, তথা ‘‘সুঞ্ঞতো লোকং অৰেক্খস্সু, মোঘরাজা, সদা সতো’’তিআদিনা (সু॰ নি॰ ১১২৫) নযেন ‘‘নত্থী’’তিপি ৰুত্তং, তস্মা যথেৰ তে ‘‘পুগ্গলো অত্থি, অত্থি ন সব্বো পুগ্গলো’’তি লদ্ধি, তথা পুগ্গলো নত্থি, নত্থি ন সব্বো পুগ্গলোতিপি আপজ্জতি, কিং এতং সম্পটিচ্ছসীতি? অথ নং অসম্পটিচ্ছন্তো ন হেৰাতি পটিক্খিপতি। সেসমেত্থ নিগ্গহাদিৰিধানং ৰুত্তনযেনেৰ ৰেদিতব্বন্তি।

    60. Tattha yaṃ avasāne ‘‘puggalo atthi, atthi na sabbo puggalo’’tiādi vuttaṃ, tatrāyamadhippāyo – yañhetaṃ paravādinā ‘‘puggalo atthi, atthi kehici puggalo, kehici na puggalo’’ti vuttaṃ, taṃ yasmā atthato puggalo atthi, atthi na sabbo puggaloti ettakaṃ hoti, tasmā naṃ sakavādī sampaṭicchāpetvā idāni naṃ evaṃ anuyuñjati. Tayā hi ‘‘atthi puggalo attahitāya paṭipanno’’ti vacanamattaṃ nissāya ‘‘puggalo atthī’’ti laddhi gahitā, yathā ca bhagavatā etaṃ vuttaṃ, tathā ‘‘suññato lokaṃ avekkhassu, mogharājā, sadā sato’’tiādinā (su. ni. 1125) nayena ‘‘natthī’’tipi vuttaṃ, tasmā yatheva te ‘‘puggalo atthi, atthi na sabbo puggalo’’ti laddhi, tathā puggalo natthi, natthi na sabbo puggalotipi āpajjati, kiṃ etaṃ sampaṭicchasīti? Atha naṃ asampaṭicchanto na hevāti paṭikkhipati. Sesamettha niggahādividhānaṃ vuttanayeneva veditabbanti.

    ৰচনসোধনৰণ্ণনা নিট্ঠিতা।

    Vacanasodhanavaṇṇanā niṭṭhitā.

    ১০. পঞ্ঞত্তানুযোগৰণ্ণনা

    10. Paññattānuyogavaṇṇanā

    ৬১-৬৬. ইদানি পঞ্ঞত্তানুযোগো নাম হোতি। রূপধাতুযা হি পুগ্গলৰাদী রূপিং পুগ্গলং পঞ্ঞপেতি, তথা অরূপধাতুযা অরূপিং। তস্স তং লদ্ধিং ভিন্দিতুং সব্বাপি পুচ্ছা সকৰাদিস্স, পটিঞ্ঞা চ পটিক্খেপো চ ইতরস্স । সো হি রূপীতি ৰুত্তে রূপকাযসব্ভাৰতো চেৰ তথারূপায চ পঞ্ঞত্তিযা অত্থিতায পটিজানাতি। কামীতি ৰুত্তে ৰীতরাগসব্ভাৰতো চেৰ তথারূপায চ পঞ্ঞত্তিযা নত্থিতায পটিক্খিপতি। অরূপীতি ৰুত্তেপি অরূপক্খন্ধসব্ভাৰতো চেৰ তথারূপায চ পঞ্ঞত্তিযা অত্থিতায পটিজানাতি। দ্ৰীসুপি নযেসু সত্তোতি পুগ্গলস্স ৰেৰচনৰসেন ৰুত্তং।

    61-66. Idāni paññattānuyogo nāma hoti. Rūpadhātuyā hi puggalavādī rūpiṃ puggalaṃ paññapeti, tathā arūpadhātuyā arūpiṃ. Tassa taṃ laddhiṃ bhindituṃ sabbāpi pucchā sakavādissa, paṭiññā ca paṭikkhepo ca itarassa . So hi rūpīti vutte rūpakāyasabbhāvato ceva tathārūpāya ca paññattiyā atthitāya paṭijānāti. Kāmīti vutte vītarāgasabbhāvato ceva tathārūpāya ca paññattiyā natthitāya paṭikkhipati. Arūpīti vuttepi arūpakkhandhasabbhāvato ceva tathārūpāya ca paññattiyā atthitāya paṭijānāti. Dvīsupi nayesu sattoti puggalassa vevacanavasena vuttaṃ.

    ৬৭. ইদানি যস্মা সো ‘‘কাযে কাযানুপস্সী’’তি আগতট্ঠানে অঞ্ঞো কাযো অঞ্ঞো পুগ্গলোতি ইচ্ছতি, তস্মা তং লদ্ধিং ভিন্দিতুং কাযোতি ৰা সরীরন্তি ৰাতিআদি সকৰাদীপুচ্ছা হোতি। তত্থ কাযং অপ্পিযং করিত্ৰাতি কাযং অপ্পেতব্বং অল্লীযাপেতব্বং একীভাৰং উপনেতব্বং অৰিভজিতব্বং কত্ৰা পুচ্ছামীতি অত্থো। এসেসেতি এসো সোযেৰ। এসে এসেতিপি পাঠো। এসো এসোযেৰাতি অত্থো। একট্ঠেতি একট্ঠো। সমে সমভাগে তজ্জাতেতি সমো সমভাগো তজ্জাতিকো। ৰচনমত্তেযেৰেত্থ ভেদো। অত্থতো পন কাযোৰ এসোতি পুচ্ছতি। পরৰাদী নানত্তং অপস্সন্তো আমন্তাতি পটিজানাতি। পুগ্গলোতি ৰা জীৰোতি ৰাতি পুচ্ছাযপি এসেৰ নযো। অঞ্ঞো কাযোতি পুট্ঠো পন কাযানুপস্সনায এৰংলদ্ধিকত্তা পটিজানাতি। অঞ্ঞং জীৰন্তি পুট্ঠো পন আহচ্চ ভাসিতং সুত্তং পটিক্খিপিতুং অসক্কোন্তো অৰজানাতি। ততো পরং ‘‘আজানাহি নিগ্গহ’’ন্তিআদি উত্তানত্থমেৰ।

    67. Idāni yasmā so ‘‘kāye kāyānupassī’’ti āgataṭṭhāne añño kāyo añño puggaloti icchati, tasmā taṃ laddhiṃ bhindituṃ kāyoti vā sarīranti vātiādi sakavādīpucchā hoti. Tattha kāyaṃ appiyaṃ karitvāti kāyaṃ appetabbaṃ allīyāpetabbaṃ ekībhāvaṃ upanetabbaṃ avibhajitabbaṃ katvā pucchāmīti attho. Eseseti eso soyeva. Ese esetipi pāṭho. Eso esoyevāti attho. Ekaṭṭheti ekaṭṭho. Same samabhāge tajjāteti samo samabhāgo tajjātiko. Vacanamatteyevettha bhedo. Atthato pana kāyova esoti pucchati. Paravādī nānattaṃ apassanto āmantāti paṭijānāti. Puggaloti vā jīvoti vāti pucchāyapi eseva nayo. Añño kāyoti puṭṭho pana kāyānupassanāya evaṃladdhikattā paṭijānāti. Aññaṃ jīvanti puṭṭho pana āhacca bhāsitaṃ suttaṃ paṭikkhipituṃ asakkonto avajānāti. Tato paraṃ ‘‘ājānāhi niggaha’’ntiādi uttānatthameva.

    ৬৮. পরৰাদীপক্খে পন অঞ্ঞো কাযো অঞ্ঞো পুগ্গলোতি পুট্ঠো সকৰাদী ঠপনীযপঞ্হত্তা পটিক্খিপতি, পরৰাদী ছলৰসেন পটিকম্মং করোতি। তম্পি উত্তানত্থমেৰাতি।

    68. Paravādīpakkhe pana añño kāyo añño puggaloti puṭṭho sakavādī ṭhapanīyapañhattā paṭikkhipati, paravādī chalavasena paṭikammaṃ karoti. Tampi uttānatthamevāti.

    পঞ্ঞত্তানুযোগৰণ্ণনা নিট্ঠিতা।

    Paññattānuyogavaṇṇanā niṭṭhitā.

    ১১. গতিঅনুযোগৰণ্ণনা

    11. Gatianuyogavaṇṇanā

    ৬৯-৭২. ইদানি গতিপরিৰত্তনমুখেন চুতিপটিসন্ধিঅনুযোগো হোতি। তত্থ যস্মা পুগ্গলৰাদী ‘‘স সত্তক্খত্তুপরমং সন্ধাৰিত্ৰান পুগ্গলো’’তিআদীনি (সং॰ নি॰ ২.১৩৩; ইতিৰু॰ ২৪) সুত্তানি নিস্সায পুগ্গলো সন্ধাৰতীতি লদ্ধিং গহেত্ৰা ৰোহরতি , তস্মাস্স তং লদ্ধিং ভিন্দিতুং সন্ধাৰতীতি পুচ্ছা সকৰাদিস্স। তত্থ সন্ধাৰতীতি সংসরতি গমনাগমনং করোতি। অত্তনো লদ্ধিৰসেন পটিঞ্ঞা পরৰাদিস্স। সো পুগ্গলোতিআদযো অনুযোগোপি সকৰাদিস্স, পটিক্খেপো ইতরস্স। তত্থ সোতি সোযেৰাতি অত্থো। এৰং পন অনুযুত্তো সস্সতদিট্ঠিভযেন পটিক্খিপতি। অঞ্ঞোতি পুট্ঠো উচ্ছেদদিট্ঠিভযেন। সো চ অঞ্ঞো চাতি পুট্ঠো একচ্চসস্সতদিট্ঠিভযেন। নেৰ সো ন অঞ্ঞোতি পুট্ঠো অমরাৰিক্খেপদিট্ঠিভযেন। পুন চত্তারোপি পঞ্হে একতো পুট্ঠো চতুন্নম্পি দিট্ঠীনং ভযেন পটিক্খিপিত্ৰা পুন যানিস্স সুত্তানি নিস্সায লদ্ধি উপ্পন্না তানি দস্সেন্তো তেন হি পুগ্গলো সন্ধাৰতীতিআদিমাহ।

    69-72. Idāni gatiparivattanamukhena cutipaṭisandhianuyogo hoti. Tattha yasmā puggalavādī ‘‘sa sattakkhattuparamaṃ sandhāvitvāna puggalo’’tiādīni (saṃ. ni. 2.133; itivu. 24) suttāni nissāya puggalo sandhāvatīti laddhiṃ gahetvā voharati , tasmāssa taṃ laddhiṃ bhindituṃ sandhāvatīti pucchā sakavādissa. Tattha sandhāvatīti saṃsarati gamanāgamanaṃ karoti. Attano laddhivasena paṭiññā paravādissa. So puggalotiādayo anuyogopi sakavādissa, paṭikkhepo itarassa. Tattha soti soyevāti attho. Evaṃ pana anuyutto sassatadiṭṭhibhayena paṭikkhipati. Aññoti puṭṭho ucchedadiṭṭhibhayena. So ca añño cāti puṭṭho ekaccasassatadiṭṭhibhayena. Neva so na aññoti puṭṭho amarāvikkhepadiṭṭhibhayena. Puna cattāropi pañhe ekato puṭṭho catunnampi diṭṭhīnaṃ bhayena paṭikkhipitvā puna yānissa suttāni nissāya laddhi uppannā tāni dassento tena hi puggalosandhāvatītiādimāha.

    ৭৬. পুন সকৰাদিনা ‘‘য্ৰাযং তৰ লদ্ধিযা সন্ধাৰতি, কিং সো অস্মিঞ্চ পরস্মিঞ্চ লোকে একোযেৰা’’তি অধিপ্পাযেন স্ৰেৰাতি নিযমেত্ৰা পুট্ঠো সস্সতভযা পটিক্খিপিত্ৰা পুন দল়্হং কত্ৰা তথেৰ পুট্ঠো যস্মা সো পুগ্গলোৰ ন অঞ্ঞো ভাৰো, ‘‘সো ততো চুতো ইধূপপন্নো’’তিআদিসুত্তম্পি (পারা॰ ১২; দী॰ নি॰ ১.২৪৫) অত্থি, তস্মা পটিজানাতি। স্ৰেৰ মনুস্সোতি পুট্ঠো মনুস্সস্সেৰ দেৰত্তাভাৰতো পটিক্খিপতি।

    76. Puna sakavādinā ‘‘yvāyaṃ tava laddhiyā sandhāvati, kiṃ so asmiñca parasmiñca loke ekoyevā’’ti adhippāyena svevāti niyametvā puṭṭho sassatabhayā paṭikkhipitvā puna daḷhaṃ katvā tatheva puṭṭho yasmā so puggalova na añño bhāvo, ‘‘so tato cuto idhūpapanno’’tiādisuttampi (pārā. 12; dī. ni. 1.245) atthi, tasmā paṭijānāti. Sveva manussoti puṭṭho manussasseva devattābhāvato paṭikkhipati.

    ৭৭. পুন পুট্ঠো ‘‘অহং তেন সমযেন সুনেত্তো নাম সত্থা অহোসি’’ন্তিআদিসুত্তৰসেন (অ॰ নি॰ ৭.৬৬ অত্থতো সমানং) পটিজানাতি। অথস্স সকৰাদী দেৰমনুস্সুপপত্তীনং নানত্ততো ৰচনং মিচ্ছাতি পকাসেন্তো মনুস্সো হুত্ৰাতিআদিমাহ।

    77. Puna puṭṭho ‘‘ahaṃ tena samayena sunetto nāma satthā ahosi’’ntiādisuttavasena (a. ni. 7.66 atthato samānaṃ) paṭijānāti. Athassa sakavādī devamanussupapattīnaṃ nānattato vacanaṃ micchāti pakāsento manusso hutvātiādimāha.

    ৭৮. তত্থ হেৰং মরণং ন হেহিতীতি এৰং সন্তে মরণং ন ভৰিস্সতীতি অত্থো। ইতো পরং যক্খো পেতোতি অত্তভাৰনানত্তৰসেন অনুযোগনানত্তং ৰেদিতব্বং।

    78. Tattha hevaṃ maraṇaṃ na hehitīti evaṃ sante maraṇaṃ na bhavissatīti attho. Ito paraṃ yakkho petoti attabhāvanānattavasena anuyoganānattaṃ veditabbaṃ.

    ৮২. খত্তিযোতিআদীনি জাতিৰসেন চেৰ অঙ্গৰেকল্লাদিৰসেন চ ৰুত্তানি।

    82. Khattiyotiādīni jātivasena ceva aṅgavekallādivasena ca vuttāni.

    ৮৭. পুন ন ৰত্তব্বন্তি পরৰাদিনা পুট্ঠো ইধট্ঠকস্স উপপত্তিৰসেন পরলোকস্স গমনাভাৰতো পটিঞ্ঞা সকৰাদিস্স পুন সোতাপন্নস্স ভৰন্তরেপি সোতাপন্নভাৰাৰিজহনতো দুতিযপটিঞ্ঞাপি তস্সেৰ। হঞ্চীতিআদিৰচনং পরৰাদিস্স।

    87. Puna na vattabbanti paravādinā puṭṭho idhaṭṭhakassa upapattivasena paralokassa gamanābhāvato paṭiññā sakavādissa puna sotāpannassa bhavantarepi sotāpannabhāvāvijahanato dutiyapaṭiññāpi tasseva. Hañcītiādivacanaṃ paravādissa.

    ৮৮. পুন দেৰলোকে উপপন্নস্স মনুস্সত্তাভাৰদস্সনেন অনুযোগো সকৰাদিস্স।

    88. Puna devaloke upapannassa manussattābhāvadassanena anuyogo sakavādissa.

    ৮৯. ততো পরং অনঞ্ঞো অৰিগতোতি এত্থ অনঞ্ঞোতি সব্বাকারেন একসদিসো। অৰিগতোতি একেনাপি আকারেন অৰিগতোতি অত্থো। ন হেৰন্তি দেৰলোকে উপপন্নস্স মনুস্সভাৰাভাৰতো এৰমাহ।

    89. Tato paraṃ anañño avigatoti ettha anaññoti sabbākārena ekasadiso. Avigatoti ekenāpi ākārena avigatoti attho. Na hevanti devaloke upapannassa manussabhāvābhāvato evamāha.

    ৯০. পুন দল়্হং কত্ৰা অনুযুত্তো ‘‘স্ৰেৰ পুগ্গলো সন্ধাৰতী’’তি লদ্ধিযা অনুজানাতি। হত্থচ্ছিন্নোতিআদি আকারৰিগমনদস্সনেন অৰিগতো সন্ধাৰতীতি লদ্ধিভিন্দনত্থং ৰুত্তং। তত্থ অল়চ্ছিন্নোতি যস্স অঙ্গুট্ঠকা ছিন্না। কণ্ডরচ্ছিন্নোতি যস্স মহান্হারূ ছিন্না।

    90. Puna daḷhaṃ katvā anuyutto ‘‘sveva puggalo sandhāvatī’’ti laddhiyā anujānāti. Hatthacchinnotiādi ākāravigamanadassanena avigato sandhāvatīti laddhibhindanatthaṃ vuttaṃ. Tattha aḷacchinnoti yassa aṅguṭṭhakā chinnā. Kaṇḍaracchinnoti yassa mahānhārū chinnā.

    ৯১. সরূপোতিআদীসু পঠমে পঞ্হে ইমিনা রূপকাযেন সদ্ধিং অগমনং সন্ধায পটিক্খিপতি। দুতিযে অন্তরাভৰপুগ্গলং সন্ধায পটিজানাতি। সো হি তস্স লদ্ধিযা সরূপোৰ গন্ত্ৰা মাতুকুচ্ছিং পৰিসতি। অথস্স তং রূপং ভিজ্জতি। তং জীৰন্তি যেন রূপসঙ্খাতেন সরীরেন সদ্ধিং গচ্ছতি, কিমস্স তদেৰ জীৰং তং সরীরন্তি পুচ্ছতি। পরৰাদী ইধ সরীরনিক্খেপা সুত্তৰিরোধা চ পটিক্খিপতি।

    91. Sarūpotiādīsu paṭhame pañhe iminā rūpakāyena saddhiṃ agamanaṃ sandhāya paṭikkhipati. Dutiye antarābhavapuggalaṃ sandhāya paṭijānāti. So hi tassa laddhiyā sarūpova gantvā mātukucchiṃ pavisati. Athassa taṃ rūpaṃ bhijjati. Taṃ jīvanti yena rūpasaṅkhātena sarīrena saddhiṃ gacchati, kimassa tadeva jīvaṃ taṃ sarīranti pucchati. Paravādī idha sarīranikkhepā suttavirodhā ca paṭikkhipati.

    সৰেদনোতিআদীসু অসঞ্ঞূপপত্তিং সন্ধায পটিক্খিপতি, তদঞ্ঞং উপপত্তিং সন্ধায পটিজানাতি। তং জীৰন্তি যেন ৰেদনাদিসঙ্খাতেন সরীরেন সদ্ধিং গচ্ছতি। কিমস্স তদেৰ জীৰং তং সরীরন্তি পুচ্ছতি। তং জীৰং তং সরীরং, অঞ্ঞং জীৰং অঞ্ঞং সরীরন্তি এতিস্সা হি লদ্ধিযা পঞ্চপি খন্ধা সরীরন্তি অধিপ্পেতা। পরৰাদী সুত্তৰিরোধা পটিক্খিপতি।

    Savedanotiādīsu asaññūpapattiṃ sandhāya paṭikkhipati, tadaññaṃ upapattiṃ sandhāya paṭijānāti. Taṃ jīvanti yena vedanādisaṅkhātena sarīrena saddhiṃ gacchati. Kimassa tadeva jīvaṃ taṃ sarīranti pucchati. Taṃ jīvaṃ taṃ sarīraṃ, aññaṃ jīvaṃ aññaṃ sarīranti etissā hi laddhiyā pañcapi khandhā sarīranti adhippetā. Paravādī suttavirodhā paṭikkhipati.

    ৯২. অরূপোতিআদীসু পঠমে পঞ্হে অন্তরাভৰং সন্ধায পটিক্খিপতি। দুতিযে অরূপা রূপং উপপজ্জমানং সন্ধায পটিজানাতি। অঞ্ঞং, জীৰন্তি যং রূপসঙ্খাতং সরীরং পহায অরূপো সন্ধাৰতি, কিং তে তং সরীরং অঞ্ঞং, অঞ্ঞং জীৰন্তি পুচ্ছতি। ইতরো সুত্তৰিরোধা পটিক্খিপতি।

    92. Arūpotiādīsu paṭhame pañhe antarābhavaṃ sandhāya paṭikkhipati. Dutiye arūpā rūpaṃ upapajjamānaṃ sandhāya paṭijānāti. Aññaṃ, jīvanti yaṃ rūpasaṅkhātaṃ sarīraṃ pahāya arūpo sandhāvati, kiṃ te taṃ sarīraṃ aññaṃ, aññaṃ jīvanti pucchati. Itaro suttavirodhā paṭikkhipati.

    অৰেদনোতিআদীসু সঞ্ঞীভৰং সন্ধায পটিক্খিপতি, তদঞ্ঞং উপপত্তিং সন্ধায পটিজানাতি। অঞ্ঞং জীৰন্তি যং ৰেদনাদিসঙ্খাতং সরীরং পহায অৰেদনো অৰিঞ্ঞাণো সন্ধাৰতি, কিং তে তং অঞ্ঞং সরীরং, অঞ্ঞং জীৰন্তি পুচ্ছতি। ইতরো সুত্তৰিরোধা পটিক্খিপতি।

    Avedanotiādīsu saññībhavaṃ sandhāya paṭikkhipati, tadaññaṃ upapattiṃ sandhāya paṭijānāti. Aññaṃ jīvanti yaṃ vedanādisaṅkhātaṃ sarīraṃ pahāya avedano aviññāṇo sandhāvati, kiṃ te taṃ aññaṃ sarīraṃ, aññaṃ jīvanti pucchati. Itaro suttavirodhā paṭikkhipati.

    ৯৩. রূপং সন্ধাৰতীতিআদীসু যে রূপাদযো খন্ধে উপাদায পুগ্গলং পঞ্ঞপেতি, কিং তে তস্মিং পুগ্গলে সন্ধাৰন্তে তম্পি রূপং সন্ধাৰতীতি পুচ্ছতি। পরৰাদী ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি সত্তস্সেৰ সন্ধাৰনৰচনতো পটিক্খিপতি। পুন পুট্ঠো যস্মা রূপাদিধম্মে ৰিনা পুগ্গলো নত্থি, তস্মা তস্মিং সন্ধাৰন্তে তেনপি রূপেন সন্ধাৰিতব্বন্তি সঞ্ঞায পটিজানাতি। ৰেদনাদীসুপি এসেৰ নযো।

    93. Rūpaṃ sandhāvatītiādīsu ye rūpādayo khandhe upādāya puggalaṃ paññapeti, kiṃ te tasmiṃ puggale sandhāvante tampi rūpaṃ sandhāvatīti pucchati. Paravādī ‘‘avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarata’’nti sattasseva sandhāvanavacanato paṭikkhipati. Puna puṭṭho yasmā rūpādidhamme vinā puggalo natthi, tasmā tasmiṃ sandhāvante tenapi rūpena sandhāvitabbanti saññāya paṭijānāti. Vedanādīsupi eseva nayo.

    ৯৪. রূপং ন সন্ধাৰতীতিআদীসু যস্মা তে রূপং পুগ্গলো ন হোতি, স্ৰেৰ চ সন্ধাৰতীতি ৰদেসি, তস্মা তং পুচ্ছামি, কিং তে রূপং ন সন্ধাৰতীতি অত্থো। ইতরো পুগ্গলে সন্ধাৰন্তে ন সক্কা তস্স উপাদানভূতেন রূপেন সন্ধাৰিতুন্তি সঞ্ঞায পটিক্খিপতি। পুন পুট্ঠো সত্তানঞ্ঞেৰ সন্ধাৰনৰচনতো পটিজানাতি। সেসমেত্থ উত্তানমেৰ।

    94. Rūpaṃ na sandhāvatītiādīsu yasmā te rūpaṃ puggalo na hoti, sveva ca sandhāvatīti vadesi, tasmā taṃ pucchāmi, kiṃ te rūpaṃ na sandhāvatīti attho. Itaro puggale sandhāvante na sakkā tassa upādānabhūtena rūpena sandhāvitunti saññāya paṭikkhipati. Puna puṭṭho sattānaññeva sandhāvanavacanato paṭijānāti. Sesamettha uttānameva.

    গাথানং পন অযমত্থো – আযস্মতো মতেন রুক্খং উপাদায ছাযা ৰিয, ইন্ধনং উপাদায অগ্গি ৰিয চ, খন্ধে উপাদায পুগ্গলো; রূপাদীনং সন্ধাৰনে অসতি তেসু খন্ধেসু ভিজ্জমানেসু সো তৰ পুগ্গলো ভিজ্জতি চে, এৰং সন্তে উচ্ছেদা ভৰতি দিট্ঠি, উচ্ছেদদিট্ঠি তে আপজ্জতি। কতরা যা বুদ্ধেন ৰিৰজ্জিতা অকুসলদিট্ঠি। যা পন ‘‘উচ্ছেদৰাদী সমণো গোতমো’’তি পরিযাযভাসিতা, ন তং ৰদামাতি দস্সেতি। অথাপি তেসু খন্ধেসু ভিজ্জমানেসু সো পুগ্গলো ন ভিজ্জতি, এৰং সন্তে সস্সতো পুগ্গলো হোতি। ততো সো নিব্বানেন সমসমো আপজ্জতি । সমসমোতি অতিৰিয সমো, সমেন ৰা সমো, সমভাৰেনেৰ সমো। যথেৰ নিব্বানং নুপ্পজ্জতি ন ভিজ্জতি, এৰং তে পুগ্গলোপি তেন সমসমোতি।

    Gāthānaṃ pana ayamattho – āyasmato matena rukkhaṃ upādāya chāyā viya, indhanaṃ upādāya aggi viya ca, khandhe upādāya puggalo; rūpādīnaṃ sandhāvane asati tesu khandhesu bhijjamānesu so tava puggalo bhijjati ce, evaṃ sante ucchedā bhavati diṭṭhi, ucchedadiṭṭhi te āpajjati. Katarā yā buddhena vivajjitā akusaladiṭṭhi. Yā pana ‘‘ucchedavādī samaṇo gotamo’’ti pariyāyabhāsitā, na taṃ vadāmāti dasseti. Athāpi tesu khandhesu bhijjamānesu so puggalo na bhijjati, evaṃ sante sassato puggalo hoti. Tato so nibbānena samasamo āpajjati . Samasamoti ativiya samo, samena vā samo, samabhāveneva samo. Yatheva nibbānaṃ nuppajjati na bhijjati, evaṃ te puggalopi tena samasamoti.

    গতিপরিৰত্তনমুখেন চুতিপটিসন্ধানুযোগো নিট্ঠিতো।

    Gatiparivattanamukhena cutipaṭisandhānuyogo niṭṭhito.

    অনুযোগৰণ্ণনা।

    Anuyogavaṇṇanā.

    ১২. উপাদাপঞ্ঞত্তানুযোগৰণ্ণনা

    12. Upādāpaññattānuyogavaṇṇanā

    ৯৫. ইদানি উপাদাপঞ্ঞত্তানুযোগো হোতি। তত্থ পুচ্ছা সকৰাদিস্স, পটিঞ্ঞাপটিক্খেপো পরৰাদিস্স। সো হি রুক্খং উপাদায ছাযায ৰিয, ইন্ধনং উপাদায অগ্গিস্স ৰিয চ, রূপাদীনি উপাদায পুগ্গলস্স পঞ্ঞত্তিং পঞ্ঞাপনং অৰবোধনং ইচ্ছতি, তস্মা ‘‘রূপং উপাদাযা’’তি পুট্ঠো পটিজানাতি। পুন যথা রুক্খুপাদানা ছাযা রুক্খো ৰিয, ইন্ধনুপাদানো চ অগ্গি ইন্ধনং ৰিয অনিচ্চাদিধম্মো, এৰং তে রূপাদিউপাদানো পুগ্গলো রূপাদযো ৰিয অনিচ্চোতি ইমমত্থং পুট্ঠো অত্তনো লদ্ধিযং ঠত্ৰা পটিক্খিপতি।

    95. Idāni upādāpaññattānuyogo hoti. Tattha pucchā sakavādissa, paṭiññāpaṭikkhepo paravādissa. So hi rukkhaṃ upādāya chāyāya viya, indhanaṃ upādāya aggissa viya ca, rūpādīni upādāya puggalassa paññattiṃ paññāpanaṃ avabodhanaṃ icchati, tasmā ‘‘rūpaṃ upādāyā’’ti puṭṭho paṭijānāti. Puna yathā rukkhupādānā chāyā rukkho viya, indhanupādāno ca aggi indhanaṃ viya aniccādidhammo, evaṃ te rūpādiupādāno puggalo rūpādayo viya aniccoti imamatthaṃ puṭṭho attano laddhiyaṃ ṭhatvā paṭikkhipati.

    ৯৭. নীলং রূপং উপাদায নীলোতিআদীসু নীলরূপেন সদ্ধিং পুগ্গলস্স একত্তং, একসরীরে নীলাদীনং বহূনং ৰসেন বহুভাৰঞ্চ অনিচ্ছন্তো পটিক্খিপতি।

    97. Nīlaṃ rūpaṃ upādāya nīlotiādīsu nīlarūpena saddhiṃ puggalassa ekattaṃ, ekasarīre nīlādīnaṃ bahūnaṃ vasena bahubhāvañca anicchanto paṭikkhipati.

    ৯৮. কুসলং ৰেদনন্তি এত্থাপি ৰেদনায সদ্ধিং একত্তং একসন্তানে বহূনং কুসলৰেদনানং ৰসেন বহুভাৰঞ্চ অনিচ্ছন্তো পটিক্খিপতি। দুতিযনযে মগ্গকুসলোতিআদিৰচনসব্ভাৰতো ছেকট্ঠং সন্ধায পটিজানাতি। সফলোতিআদীনি পুট্ঠো তথারূপস্স ৰোহারস্স অভাৰতো পটিক্খিপতি।

    98. Kusalaṃ vedananti etthāpi vedanāya saddhiṃ ekattaṃ ekasantāne bahūnaṃ kusalavedanānaṃ vasena bahubhāvañca anicchanto paṭikkhipati. Dutiyanaye maggakusalotiādivacanasabbhāvato chekaṭṭhaṃ sandhāya paṭijānāti. Saphalotiādīni puṭṭho tathārūpassa vohārassa abhāvato paṭikkhipati.

    ৯৯. অকুসলপক্খে অছেকট্ঠং সন্ধায পটিজানাতি।

    99. Akusalapakkhe achekaṭṭhaṃ sandhāya paṭijānāti.

    ১০০. অব্যাকতপক্খে সস্সতাদিৰসেন অব্যাকতভাৰং সন্ধায পটিজানাতি। সেসমেত্থ হেট্ঠা ৰুত্তনযেনেৰ ৰেদিতব্বং।

    100. Abyākatapakkhe sassatādivasena abyākatabhāvaṃ sandhāya paṭijānāti. Sesamettha heṭṭhā vuttanayeneva veditabbaṃ.

    ১০৪. চক্খুং উপাদাযাতিআদীসু ‘‘চক্খুমা ৰিসমানীৰ…পে॰… পাপানি পরিৰজ্জযে’’তি(উদা॰ ৪৩) আদিৰোহারসব্ভাৰতো পটিজানাতি। চক্খুমত্তাদিনিরোধেন পুগ্গলনিরোধং অনিচ্ছন্তো পটিক্খিপতি।

    104. Cakkhuṃupādāyātiādīsu ‘‘cakkhumā visamānīva…pe… pāpāni parivajjaye’’ti(udā. 43) ādivohārasabbhāvato paṭijānāti. Cakkhumattādinirodhena puggalanirodhaṃ anicchanto paṭikkhipati.

    ১০৭. রূপং উপাদায ৰেদনং উপাদাযাতি এত্থ অঞ্ঞেপি রূপমূলকা দুকতিকচতুক্কা ৰেদিতব্বা। যস্মা পন খন্ধে উপাদায পুগ্গলস্স পঞ্ঞত্তি, তস্মা দ্ৰেপি তযোপি চত্তারোপি পঞ্চপি উপাদায পঞ্ঞত্তিং পটিজানাতি। একসন্তানে পন দ্ৰিন্নং পঞ্চন্নং ৰা অভাৰা পটিক্খিপতি। আযতনাদীসুপি এসেৰ নযো।

    107. Rūpaṃ upādāya vedanaṃ upādāyāti ettha aññepi rūpamūlakā dukatikacatukkā veditabbā. Yasmā pana khandhe upādāya puggalassa paññatti, tasmā dvepi tayopi cattāropi pañcapi upādāya paññattiṃ paṭijānāti. Ekasantāne pana dvinnaṃ pañcannaṃ vā abhāvā paṭikkhipati. Āyatanādīsupi eseva nayo.

    ১১২. ইদানি যং উপাদায যস্স পঞ্ঞত্তি, যথা তস্স অনিচ্চতায তস্সাপি অনিচ্চতা, ততো চ অঞ্ঞত্তং সিদ্ধং, এৰং তস্স পুগ্গলস্সাপি আপজ্জতীতি দস্সেতুং যথা রুক্খন্তিআদিমাহ। তত্থ উপাদাযাতি পটিচ্চ আগম্ম, ন ৰিনা তন্তি অত্থো। পরৰাদী পন তথা অনিচ্ছন্তো লদ্ধিযং ঠত্ৰা পটিক্খিপতি।

    112. Idāni yaṃ upādāya yassa paññatti, yathā tassa aniccatāya tassāpi aniccatā, tato ca aññattaṃ siddhaṃ, evaṃ tassa puggalassāpi āpajjatīti dassetuṃ yathā rukkhantiādimāha. Tattha upādāyāti paṭicca āgamma, na vinā tanti attho. Paravādī pana tathā anicchanto laddhiyaṃ ṭhatvā paṭikkhipati.

    ১১৫. নিগল়োতি সঙ্খলিকবন্ধনং। নেগল়িকোতি তেন বন্ধকো যস্স রূপং সো রূপৰাতি যস্মা যস্স রূপং সো রূপৰা হোতি, তস্মা যথা ন নিগল়ো …পে॰… অঞ্ঞো রূপৰাতি অত্থো।

    115. Nigaḷoti saṅkhalikabandhanaṃ. Negaḷikoti tena bandhako yassa rūpaṃ so rūpavāti yasmā yassa rūpaṃ so rūpavā hoti, tasmā yathā na nigaḷo …pe… añño rūpavāti attho.

    ১১৬. চিত্তে চিত্তেতিআদীসু সরাগাদিচিত্তৰসেন সরাগাদিতং সন্ধায চিত্তানুপস্সনাৰসেন পটিজানাতি। জাযতীতিআদিনা নযেন পুট্ঠো পুগ্গলস্স খণিকভাৰং অনিচ্ছন্তো পটিক্খিপতি। ‘‘সো’’তি ৰা ‘‘অঞ্ঞো’’তি ৰা পুট্ঠো সস্সতুচ্ছেদভযেন পটিক্খিপতি। পুন ন ৰত্তব্বং ‘‘কুমারকো’’তি ৰা ‘‘কুমারিকা’’তি ৰা পুট্ঠো লোকৰোহারসমুচ্ছেদভযেন ৰত্তব্বন্তি পটিজানাতি। সেসমেত্থ পাকটমেৰ।

    116. Citte cittetiādīsu sarāgādicittavasena sarāgāditaṃ sandhāya cittānupassanāvasena paṭijānāti. Jāyatītiādinā nayena puṭṭho puggalassa khaṇikabhāvaṃ anicchanto paṭikkhipati. ‘‘So’’ti vā ‘‘añño’’ti vā puṭṭho sassatucchedabhayena paṭikkhipati. Puna na vattabbaṃ ‘‘kumārako’’ti vā ‘‘kumārikā’’ti vā puṭṭho lokavohārasamucchedabhayena vattabbanti paṭijānāti. Sesamettha pākaṭameva.

    ১১৮. ইদানি পরৰাদী অঞ্ঞেনাকারেন লদ্ধিং পতিট্ঠাপেতুকামো ন ৰত্তব্বং পুগ্গলো উপলব্ভতীতিআদিমাহ। তত্থ ন ৰত্তব্বন্তি কিং তে ইমিনা এৰং বহুনা উপাদাপঞ্ঞত্তানুযোগেন, ইদং তাৰ ৰদেহি, কিং ন ৰত্তব্বং ‘‘পুগ্গলো উপলব্ভতি সচ্চিকট্ঠপরমত্থেনা’’তি। ততো সকৰাদিনা আমন্তাতি ৰুত্তে ননু যো পস্সতীতিআদিমাহ। তত্থ যোতি পুগ্গলো । যন্তি রূপং। যেনাতি চক্খুনা। সোতি পুগ্গলো। তন্তি রূপং। তেনাতি চক্খুনা। ইদং ৰুত্তং হোতি – ননু যো যং রূপং যেন চক্খুনা পস্সতি, সো তং রূপং তেন চক্খুনা পস্সন্তো পুগ্গলোতি। সকৰাদী কিঞ্চাপি চক্খুৰিঞ্ঞাণস্স নিস্সযভাৰং গচ্ছন্তং চক্খুমেৰ রূপং পস্সতি, তথা সোতমেৰ সদ্দং সুণাতি…পে॰… ৰিঞ্ঞাণমেৰ ধম্মং ৰিজানাতি, ‘‘অত্থি অরহতো চক্খু, পস্সতি অরহা চক্খুনা রূপ’’ন্তিআদিসম্মুতিৰসেন পন আমন্তাতি পটিজানাতি।

    118. Idāni paravādī aññenākārena laddhiṃ patiṭṭhāpetukāmo na vattabbaṃ puggalo upalabbhatītiādimāha. Tattha na vattabbanti kiṃ te iminā evaṃ bahunā upādāpaññattānuyogena, idaṃ tāva vadehi, kiṃ na vattabbaṃ ‘‘puggalo upalabbhati saccikaṭṭhaparamatthenā’’ti. Tato sakavādinā āmantāti vutte nanu yo passatītiādimāha. Tattha yoti puggalo . Yanti rūpaṃ. Yenāti cakkhunā. Soti puggalo. Tanti rūpaṃ. Tenāti cakkhunā. Idaṃ vuttaṃ hoti – nanu yo yaṃ rūpaṃ yena cakkhunā passati, so taṃ rūpaṃ tena cakkhunā passanto puggaloti. Sakavādī kiñcāpi cakkhuviññāṇassa nissayabhāvaṃ gacchantaṃ cakkhumeva rūpaṃ passati, tathā sotameva saddaṃ suṇāti…pe… viññāṇameva dhammaṃ vijānāti, ‘‘atthi arahato cakkhu, passati arahā cakkhunā rūpa’’ntiādisammutivasena pana āmantāti paṭijānāti.

    ১২০. ততো ছলৰাদং নিস্সায পরৰাদিনা পুগ্গলস্স ৰত্তব্বতায সাধিতায তমেৰ ৰাদং পরিৰত্তেত্ৰা পুগ্গলো উপলব্ভতীতিআদিমাহ। তত্থ যো ন পস্সতীতি অন্ধো অসঞ্ঞসত্তো অরূপং উপপন্নো নিরোধং সমাপন্নো, অনন্ধোপি চ অঞ্ঞত্র দস্সনসমযা ন পস্সতি নাম। সেসৰারেসুপি এসেৰ নযো। সেসং পাল়িৰসেনেৰ অত্থতো ৰেদিতব্বং।

    120. Tato chalavādaṃ nissāya paravādinā puggalassa vattabbatāya sādhitāya tameva vādaṃ parivattetvā puggalo upalabbhatītiādimāha. Tattha yo na passatīti andho asaññasatto arūpaṃ upapanno nirodhaṃ samāpanno, anandhopi ca aññatra dassanasamayā na passati nāma. Sesavāresupi eseva nayo. Sesaṃ pāḷivaseneva atthato veditabbaṃ.

    ১২২. সুত্তসংসন্দনাযং দিব্বস্স চক্খুনো রূপগোচরত্তা রূপং পস্সতীতি আহ। দুতিযৰারে ‘‘সত্তে পস্সামী’’তিৰচনতো পুগ্গলং পস্সতীতি আহ। ততিযৰারে ‘‘রূপং দিস্ৰা পুগ্গলং ৰিভাৰেতী’’তি লদ্ধিতো উভো পস্সতীতি আহ। যস্মা পন পস্সিতব্বং নাম দিট্ঠং সুতং মুতং ৰিঞ্ঞাতন্তি চতুব্বিধে রূপসঙ্গহে রূপাযতনমেৰ সঙ্গহিতং, তস্মা সকৰাদী ‘‘রূপং পুগ্গলো, পুগ্গলো রূপং, উভো রূপ’’ন্তি অনুযোগং করোতি। তস্সত্থো পাকটোযেৰাতি।

    122. Suttasaṃsandanāyaṃ dibbassa cakkhuno rūpagocarattā rūpaṃ passatīti āha. Dutiyavāre ‘‘satte passāmī’’tivacanato puggalaṃ passatīti āha. Tatiyavāre ‘‘rūpaṃ disvā puggalaṃ vibhāvetī’’ti laddhito ubho passatīti āha. Yasmā pana passitabbaṃ nāma diṭṭhaṃ sutaṃ mutaṃ viññātanti catubbidhe rūpasaṅgahe rūpāyatanameva saṅgahitaṃ, tasmā sakavādī ‘‘rūpaṃ puggalo, puggalo rūpaṃ, ubho rūpa’’nti anuyogaṃ karoti. Tassattho pākaṭoyevāti.

    উপাদাপঞ্ঞত্তানুযোগৰণ্ণনা।

    Upādāpaññattānuyogavaṇṇanā.

    ১৩. পুরিসকারানুযোগৰণ্ণনা

    13. Purisakārānuyogavaṇṇanā

    ১২৩. ইদানি পুরিসকারানুযোগো হোতি। তত্থ কম্মে সতি নিযমতো তস্স কারকেনপি ভৰিতব্বন্তি লদ্ধিযা পুচ্ছা পরৰাদিস্স, তথারূপানং কম্মানং অত্থিতায পটিঞ্ঞা সকৰাদিস্স। পুন কত্তা কারেতাতি পুচ্ছা পরৰাদিস্স। তত্থ কত্তাতি তেসং কম্মানং কারকো। কারেতাতি আণত্তিদেসনাদীহি উপাযেহি কারাপকো। ইদানি যস্মা পরৰাদী পুগ্গলং সন্ধায কত্তাতি পুচ্ছতি, ন করণমত্তং, তস্মা পটিক্খেপো সকৰাদিস্স।

    123. Idāni purisakārānuyogo hoti. Tattha kamme sati niyamato tassa kārakenapi bhavitabbanti laddhiyā pucchā paravādissa, tathārūpānaṃ kammānaṃ atthitāya paṭiññā sakavādissa. Puna kattā kāretāti pucchā paravādissa. Tattha kattāti tesaṃ kammānaṃ kārako. Kāretāti āṇattidesanādīhi upāyehi kārāpako. Idāni yasmā paravādī puggalaṃ sandhāya kattāti pucchati, na karaṇamattaṃ, tasmā paṭikkhepo sakavādissa.

    ১২৪. তস্স কত্তা কারেতাতি এত্থ যদি যং যং উপলব্ভতি, তস্স তস্স কত্তা পুগ্গলো তে উপলব্ভতি, কিং তস্সাপি কারকো চ কারাপকো চ অঞ্ঞো পুগ্গলো উপলব্ভতীতি অত্থো। পরৰাদী তথা অনিচ্ছন্তো ইস্সরনিম্মানৰাদভযেন পটিক্খিপতি। পুন পুট্ঠো যস্মা পুগ্গলং মাতাপিতরো জনেন্তি নামং করোন্তি পোসেন্তি, তস্মাস্স তে কারকা। যে চ পন তং কল্যাণমিত্তা ৰা আচরিযা ৰা তানি তানি ৰিজ্জাট্ঠানসিপ্পাযতনানি সিক্খাপেন্তি , তে কারাপকা নামাতি ইমমত্থং সন্ধায পটিজানাতি। পুরিমকম্মমেৰ তস্স কত্তা চেৰ কারাপেতা চাতি অধিপ্পেতং।

    124. Tassa kattā kāretāti ettha yadi yaṃ yaṃ upalabbhati, tassa tassa kattā puggalo te upalabbhati, kiṃ tassāpi kārako ca kārāpako ca añño puggalo upalabbhatīti attho. Paravādī tathā anicchanto issaranimmānavādabhayena paṭikkhipati. Puna puṭṭho yasmā puggalaṃ mātāpitaro janenti nāmaṃ karonti posenti, tasmāssa te kārakā. Ye ca pana taṃ kalyāṇamittā vā ācariyā vā tāni tāni vijjāṭṭhānasippāyatanāni sikkhāpenti , te kārāpakā nāmāti imamatthaṃ sandhāya paṭijānāti. Purimakammameva tassa kattā ceva kārāpetā cāti adhippetaṃ.

    ১২৫. তস্স তস্সেৰাতি ইমিনা ইদং পুচ্ছতি – যদি কম্মানং কারকস্স কত্তা তস্সাপি কত্তা তস্সাপি কত্তা অত্থেৰ, এৰং সন্তে পুরিমেন পুরিমেন অৰস্সং পচ্ছা পচ্ছা পুগ্গলো কাতব্বোতি ইমিনাপি তে কম্মানং কারকেন পুগ্গলেন আযতিং অঞ্ঞো পুগ্গলো কাতব্বো, তেনাপি অঞ্ঞোতি নত্থি দুক্খস্স অন্তকিরিযা, নত্থি ৰট্টস্স উপচ্ছেদো, নত্থি অপ্পচ্চযপরিনিব্বানং। পচ্চযাভাৰেন পচ্চযপটিবদ্ধস্স দুক্খস্স অভাৰা যং নিব্বানং ৰুত্তং, নত্থি তে তন্তি। অথ ৰা তস্স তস্সেৰাতি যদি কম্মং কম্মমত্তং ন হোতি, তস্স পন কারকো পুগ্গলো, তস্সাপি কারকো, তস্সাপি কারকোতি এৰং পুগ্গলপরম্পরা অত্থি। এৰং সন্তে যা এসা কম্মৰট্টস্স অপ্পৰত্তিকরণেন দুক্খস্স অন্তকিরিযা ৰুত্তা, সা নত্থীতি অত্থো। পরৰাদী তং অনিচ্ছন্তো পটিক্খিপতি। ইতো অপরাসুপি উপলব্ভতি সামঞ্ঞেন কারকপুচ্ছাসু পুগ্গলংযেৰ সন্ধায ‘‘কত্তা কারেতা’’তি ৰুত্তং, ন পচ্চযে। ন হি মহাপথৰীআদীনং পচ্চযা নত্থি।

    125. Tassa tassevāti iminā idaṃ pucchati – yadi kammānaṃ kārakassa kattā tassāpi kattā tassāpi kattā attheva, evaṃ sante purimena purimena avassaṃ pacchā pacchā puggalo kātabboti imināpi te kammānaṃ kārakena puggalena āyatiṃ añño puggalo kātabbo, tenāpi aññoti natthi dukkhassa antakiriyā, natthi vaṭṭassa upacchedo, natthi appaccayaparinibbānaṃ. Paccayābhāvena paccayapaṭibaddhassa dukkhassa abhāvā yaṃ nibbānaṃ vuttaṃ, natthi te tanti. Atha vā tassa tassevāti yadi kammaṃ kammamattaṃ na hoti, tassa pana kārako puggalo, tassāpi kārako, tassāpi kārakoti evaṃ puggalaparamparā atthi. Evaṃ sante yā esā kammavaṭṭassa appavattikaraṇena dukkhassa antakiriyā vuttā, sā natthīti attho. Paravādī taṃ anicchanto paṭikkhipati. Ito aparāsupi upalabbhati sāmaññena kārakapucchāsu puggalaṃyeva sandhāya ‘‘kattā kāretā’’ti vuttaṃ, na paccaye. Na hi mahāpathavīādīnaṃ paccayā natthi.

    ১৩৫. অঞ্ঞো কল্যাণপাপকানং কম্মানং কত্তাতি পঞ্হো ‘‘সঙ্খারৰন্তং ৰা অত্তান’’ন্তিআদিদিট্ঠিভযা পটিক্খিত্তো।

    135. Añño kalyāṇapāpakānaṃ kammānaṃ kattāti pañho ‘‘saṅkhāravantaṃ vā attāna’’ntiādidiṭṭhibhayā paṭikkhitto.

    ১৩৬. ৰিপাকো উপলব্ভতীতিআদি ৰিপাকপটিসংৰেদীৰসেন পুগ্গলং দস্সেন্তস্স লদ্ধিভিন্দনত্থং ৰুত্তং। তত্থ ৰিপাকপটিসংৰেদীতি অনুযোগো পরৰাদিস্স , ৰিপাকপৰত্তিতো অঞ্ঞস্স ৰেদকস্স অভাৰা পটিক্খেপো সকৰাদিস্স। পুন পুচ্ছা সকৰাদিস্স, পটিঞ্ঞা ইতরস্স।

    136. Vipāko upalabbhatītiādi vipākapaṭisaṃvedīvasena puggalaṃ dassentassa laddhibhindanatthaṃ vuttaṃ. Tattha vipākapaṭisaṃvedīti anuyogo paravādissa , vipākapavattito aññassa vedakassa abhāvā paṭikkhepo sakavādissa. Puna pucchā sakavādissa, paṭiññā itarassa.

    ১৩৮. তস্স পটিসংৰেদীতি তস্স ৰিপাকপটিসংৰেদকস্স পটিসংৰেদী যস্মা পন পটিসংৰেদিতব্বো নাম ৰিপাকো, ন চ পুগ্গলো ৰিপাকো, তস্মা পটিক্খেপো পরৰাদিস্স। পুন পুট্ঠো যস্মা পুঞ্ঞৰিপাকে ঠিতত্তা ৰিপাকপটিসংৰেদী পুত্তং ৰা পতিং ৰা মাতা ৰা জাযা ৰা পরিচুম্বতি পরিসজ্জতি, তস্মা তথারূপং পটিসংৰেদিতং সন্ধায পটিজানাতি পরৰাদী।

    138. Tassa paṭisaṃvedīti tassa vipākapaṭisaṃvedakassa paṭisaṃvedī yasmā pana paṭisaṃveditabbo nāma vipāko, na ca puggalo vipāko, tasmā paṭikkhepo paravādissa. Puna puṭṭho yasmā puññavipāke ṭhitattā vipākapaṭisaṃvedī puttaṃ vā patiṃ vā mātā vā jāyā vā paricumbati parisajjati, tasmā tathārūpaṃ paṭisaṃveditaṃ sandhāya paṭijānāti paravādī.

    তস্স তস্সেৰাতি যদি ৰিপাকো ৰিপাকমত্তং ন হোতি, তস্স পন পটিসংৰেদী পুগ্গলো, তস্সাপি পটিসংৰেদী তস্সাপি পটিসংৰেদীতি এৰং পুগ্গলপরম্পরা অত্থি। এৰং সন্তে যা এসা ৰিপাকৰট্টস্স অপ্পৰত্তিকরণেন দুক্খস্স অন্তকিরিযা ৰুত্তা, সা নত্থীতি অত্থো। ইতো পরং উপলব্ভতিসামঞ্ঞেন পটিসংৰেদীপুচ্ছাসু হেট্ঠা ৰুত্তনযেনেৰ অত্থো ৰেদিতব্বো।

    Tassatassevāti yadi vipāko vipākamattaṃ na hoti, tassa pana paṭisaṃvedī puggalo, tassāpi paṭisaṃvedī tassāpi paṭisaṃvedīti evaṃ puggalaparamparā atthi. Evaṃ sante yā esā vipākavaṭṭassa appavattikaraṇena dukkhassa antakiriyā vuttā, sā natthīti attho. Ito paraṃ upalabbhatisāmaññena paṭisaṃvedīpucchāsu heṭṭhā vuttanayeneva attho veditabbo.

    ১৪২. অঞ্ঞো কল্যাণপাপকানং কম্মানং ৰিপাকপটিসংৰেদীতি পঞ্হো ‘‘ৰেদনৰন্তং ৰা অত্তান’’ন্তিআদিদিট্ঠিভযা পটিক্খিত্তো।

    142. Añño kalyāṇapāpakānaṃ kammānaṃ vipākapaṭisaṃvedīti pañho ‘‘vedanavantaṃ vā attāna’’ntiādidiṭṭhibhayā paṭikkhitto.

    ১৪৩. দিব্বং সুখন্তিআদি কল্যাণপাপকানং কম্মানং ৰিপাকং ভাজেত্ৰা দস্সনৰসেন আরদ্ধং। তং সব্বং হেট্ঠা ৰুত্তনযেনেৰ ৰেদিতব্বং। সকৰাদিনো চেত্থ পুগ্গলৰসেনেৰ পটিসংৰেদীপটিক্খেপো ৰেদিতব্বো, ন ৰেদযিতৰসেন।

    143. Dibbaṃ sukhantiādi kalyāṇapāpakānaṃ kammānaṃ vipākaṃ bhājetvā dassanavasena āraddhaṃ. Taṃ sabbaṃ heṭṭhā vuttanayeneva veditabbaṃ. Sakavādino cettha puggalavaseneva paṭisaṃvedīpaṭikkhepo veditabbo, na vedayitavasena.

    ১৪৮. মহাপথৰীআদীনি হি আরম্মণং কত্ৰা ৰেদযিতানং উপ্পত্তি অপ্পটিসিদ্ধা।

    148. Mahāpathavīādīni hi ārammaṇaṃ katvā vedayitānaṃ uppatti appaṭisiddhā.

    ১৭০. কত্তা কারেতা ৰিপাকপটিসংৰেদীতিআদি ৰোমিস্সকনযৰসেন আরদ্ধং। তত্থ সো করোতীতি যং ত্ৰং কত্তাতি চ পটিসংৰেদীতি চ ৰদেসি, কিং সোযেৰ করোতি, সো পটিসংৰেদেতি। অযমনুযোগো সকৰাদিস্স, সুত্তৰিরোধভযেন পটিক্খেপো পরৰাদিস্স।

    170. Kattā kāretā vipākapaṭisaṃvedītiādi vomissakanayavasena āraddhaṃ. Tattha so karotīti yaṃ tvaṃ kattāti ca paṭisaṃvedīti ca vadesi, kiṃ soyeva karoti, so paṭisaṃvedeti. Ayamanuyogo sakavādissa, suttavirodhabhayena paṭikkhepo paravādissa.

    ১৭১. পুন পুট্ঠো ‘‘ইধ নন্দতি পেচ্চ নন্দতী’’তিআদিসুত্তৰসেন (ধ॰ প॰ ১৮) পটিঞ্ঞা তস্সেৰ। অথস্স ৰচনোকাসং পটিবাহন্তো সকৰাদী সযংকতং সুখদুক্খন্তি আহ।

    171. Puna puṭṭho ‘‘idha nandati pecca nandatī’’tiādisuttavasena (dha. pa. 18) paṭiññā tasseva. Athassa vacanokāsaṃ paṭibāhanto sakavādī sayaṃkataṃ sukhadukkhanti āha.

    ১৭২. তত্থ অঞ্ঞো করোতীতি কারকৰেদকানং অঞ্ঞত্তপুচ্ছাৰসেন ৰুত্তং। ততো পরৰাদী সুত্তৰিরোধভযেন পটিক্খিপিত্ৰা পুন পুট্ঠো ‘‘মনুস্সভূতো কত্ৰা দেৰভূতো পটিসংৰেদেতী’’তি মঞ্ঞমানো পটিজানাতি । এৰংৰাদিনো পন পরংকতং সুখদুক্খং আপজ্জতীতি তস্স ৰসেন পুট্ঠো পুন পটিক্খিপতি।

    172. Tattha añño karotīti kārakavedakānaṃ aññattapucchāvasena vuttaṃ. Tato paravādī suttavirodhabhayena paṭikkhipitvā puna puṭṭho ‘‘manussabhūto katvā devabhūto paṭisaṃvedetī’’ti maññamāno paṭijānāti . Evaṃvādino pana paraṃkataṃ sukhadukkhaṃ āpajjatīti tassa vasena puṭṭho puna paṭikkhipati.

    ১৭৪. সো চ অঞ্ঞো চাতি কারকৰেদকানং একত্তঅঞ্ঞত্তপুচ্ছাৰসেন ৰুত্তং। ততো পরৰাদী সুত্তৰিরোধভযেনেৰ পটিক্খিপিত্ৰা পুন পুট্ঠো পুরিমে দ্ৰেপি নযে একতো কত্ৰা পটিজানাতি। এৰংৰাদিনো পন সযংকতঞ্চ পরংকতঞ্চ সুখদুক্খং আপজ্জতীতি তস্স ৰসেন পুট্ঠো পুন পটিক্খিপতি।

    174. So ca añño cāti kārakavedakānaṃ ekattaaññattapucchāvasena vuttaṃ. Tato paravādī suttavirodhabhayeneva paṭikkhipitvā puna puṭṭho purime dvepi naye ekato katvā paṭijānāti. Evaṃvādino pana sayaṃkatañca paraṃkatañca sukhadukkhaṃ āpajjatīti tassa vasena puṭṭho puna paṭikkhipati.

    ১৭৬. নেৰ সো করোতীতি কারকৰেদকানং একত্তঅঞ্ঞত্তপটিক্খেপৰসেন ৰুত্তং। ততো পরৰাদী সুত্তৰিরোধৰসেনেৰ পটিক্খিপিত্ৰা পুন পুট্ঠো যস্মা মনুস্সো দেৰলোকূপপত্তিযা কম্মং কত্ৰা ন মনুস্সভূতোৰ পটিসংৰেদেতি, নাপি যেন কম্মং কতং, ততো অঞ্ঞোৰ পটিসংৰেদেতি, তস্মা কারকতো ৰেদকো নেৰ সো হোতি, ন অঞ্ঞোতি মঞ্ঞমানো পটিজানাতি। লদ্ধিমত্তমেৰেতং? এৰংৰাদিনো পন অসযংকারং অপরংকারং অধিচ্চসমুপ্পন্নং সুখদুক্খং আপজ্জতীতি তস্স ৰসেন পুট্ঠো পুন পটিক্খিপতি। অপিচ ইমস্মিং ৰোমিস্সকনযে আদিতো পট্ঠায ইমিনাপি নযেন অত্থো ৰেদিতব্বো। যস্মা হি অযং পুগ্গলৰাদী কম্মানং কারকঞ্চেৰ ৰেদকঞ্চ ইচ্ছতি, তস্মাস্স যো কারকো, তেনেৰ ৰা ৰেদকেন ভৰিতব্বং, অঞ্ঞেন ৰা উভোহি ৰা ভৰিতব্বং, উভোহি ৰাপি ন ভৰিতব্বন্তি ইদমাপন্নং হোতি। এৰমাপন্নমেৰ অনুযোগং অনুযুঞ্জন্তো সকৰাদী ‘‘সো করোতী’’তিআদযো চত্তারোপি ৰিকপ্পে আহ। সেসং ৰুত্তপ্পকারমেৰ।

    176. Neva so karotīti kārakavedakānaṃ ekattaaññattapaṭikkhepavasena vuttaṃ. Tato paravādī suttavirodhavaseneva paṭikkhipitvā puna puṭṭho yasmā manusso devalokūpapattiyā kammaṃ katvā na manussabhūtova paṭisaṃvedeti, nāpi yena kammaṃ kataṃ, tato aññova paṭisaṃvedeti, tasmā kārakato vedako neva so hoti, na aññoti maññamāno paṭijānāti. Laddhimattamevetaṃ? Evaṃvādino pana asayaṃkāraṃ aparaṃkāraṃ adhiccasamuppannaṃ sukhadukkhaṃ āpajjatīti tassa vasena puṭṭho puna paṭikkhipati. Apica imasmiṃ vomissakanaye ādito paṭṭhāya imināpi nayena attho veditabbo. Yasmā hi ayaṃ puggalavādī kammānaṃ kārakañceva vedakañca icchati, tasmāssa yo kārako, teneva vā vedakena bhavitabbaṃ, aññena vā ubhohi vā bhavitabbaṃ, ubhohi vāpi na bhavitabbanti idamāpannaṃ hoti. Evamāpannameva anuyogaṃ anuyuñjanto sakavādī ‘‘so karotī’’tiādayo cattāropi vikappe āha. Sesaṃ vuttappakārameva.

    পরিযোসানে পন চত্তারোপি পঞ্হা একতো পুট্ঠা। তত্থ পটিক্খেপো চ পটিজাননা চ সযংকতাদিদোসপ্পত্তি চ পুরিমনযেনেৰ ৰেদিতব্বা। ইতো পরং ‘‘কল্যাণপাপকানী’’তি অৰত্ৰা হেট্ঠা ৰুত্তনযা এৰ ‘‘কম্মং অত্থী’’তিআদিনা ৰিকপ্পেন দস্সিতা। তেসম্পি হেট্ঠা ৰুত্তনযেনেৰ অত্থো ৰেদিতব্বো।

    Pariyosāne pana cattāropi pañhā ekato puṭṭhā. Tattha paṭikkhepo ca paṭijānanā ca sayaṃkatādidosappatti ca purimanayeneva veditabbā. Ito paraṃ ‘‘kalyāṇapāpakānī’’ti avatvā heṭṭhā vuttanayā eva ‘‘kammaṃ atthī’’tiādinā vikappena dassitā. Tesampi heṭṭhā vuttanayeneva attho veditabbo.

    পুরিসকারানুযোগৰণ্ণনা।

    Purisakārānuyogavaṇṇanā.

    কল্যাণৰগ্গোতিপি এতস্সেৰ নামং।

    Kalyāṇavaggotipi etasseva nāmaṃ.

    ১৪. অভিঞ্ঞানুযোগৰণ্ণনা

    14. Abhiññānuyogavaṇṇanā

    ১৯৩. ইতো পরং অভিঞ্ঞানুযোগাদিৰসেন অরহত্তসাধনা হোতি। তত্থ আমন্তাতি সকৰাদিনা পটিঞ্ঞাতে পরৰাদী ‘‘বহিদ্ধা অনিন্দ্রিযবদ্ধরূপে ইদ্ধিৰিধাদিৰিসেসাধিগমো নত্থি, অজ্ঝত্তং অত্থি, তস্মা ইদ্ধাদিনিব্বত্তকেন পুগ্গলেন ভৰিতব্ব’’ন্তি মঞ্ঞমানো ননু অত্থি কোচি ইদ্ধিং ৰিকুব্বতীতিআদিমাহ। তং সব্বং উত্তানত্থমেৰ।

    193. Ito paraṃ abhiññānuyogādivasena arahattasādhanā hoti. Tattha āmantāti sakavādinā paṭiññāte paravādī ‘‘bahiddhā anindriyabaddharūpe iddhividhādivisesādhigamo natthi, ajjhattaṃ atthi, tasmā iddhādinibbattakena puggalena bhavitabba’’nti maññamāno nanu atthi koci iddhiṃ vikubbatītiādimāha. Taṃ sabbaṃ uttānatthameva.

    অভিঞ্ঞানুযোগৰণ্ণনা।

    Abhiññānuyogavaṇṇanā.

    ১৫-১৮. ঞাতকানুযোগাদিৰণ্ণনা

    15-18. Ñātakānuyogādivaṇṇanā

    ১৯৭. ইদানি মাতাতিআদিকো ঞাতকানুযোগো। খত্তিযোতিআদিকো জাতিঅনুযোগো। গহট্ঠো পব্বজিতোতি পটিপত্তিঅনুযোগো। দেৰো মনুস্সোতি উপপত্তিঅনুযোগো। সোতাপন্নোতিআদিকো পটিৰেধানুযোগো, অরিযানুযোগোতিপি ৰুচ্চতি। তে সব্বে উত্তানত্থাযেৰ। ‘‘অরহা হুত্ৰা ন অরহা’’তি পনেত্থ মোঘপঞ্হত্তা ন ৰুত্তং।

    197. Idāni mātātiādiko ñātakānuyogo. Khattiyotiādiko jātianuyogo. Gahaṭṭho pabbajitoti paṭipattianuyogo. Devo manussoti upapattianuyogo. Sotāpannotiādiko paṭivedhānuyogo, ariyānuyogotipi vuccati. Te sabbe uttānatthāyeva. ‘‘Arahā hutvā na arahā’’ti panettha moghapañhattā na vuttaṃ.

    ২০৬. চত্তারো পুরিসযুগাতিআদি সংঘানুযোগো, সোপি উত্তানত্থোযেৰ।

    206. Cattāro purisayugātiādi saṃghānuyogo, sopi uttānatthoyeva.

    ২০৯. সঙ্খতোতিআদি সচ্চিকট্ঠসভাৰানুযোগো। তত্থ ততিযা কোটীতি পুচ্ছা সকৰাদিস্স। তথারূপস্স সচ্চিকট্ঠস্স অভাৰতো পটিক্খেপো পরৰাদিস্স। পুন পুট্ঠো পুগ্গলং সন্ধায পটিঞ্ঞা তস্সেৰ।

    209. Saṅkhatotiādi saccikaṭṭhasabhāvānuyogo. Tattha tatiyā koṭīti pucchā sakavādissa. Tathārūpassa saccikaṭṭhassa abhāvato paṭikkhepo paravādissa. Puna puṭṭho puggalaṃ sandhāya paṭiññā tasseva.

    ২১১. অঞ্ঞো পুগ্গলোতিপঞ্হেপি সঙ্খতেহি খন্ধেহি অঞ্ঞত্তং অনিচ্ছন্তো পটিক্খেপো তস্সেৰ।

    211. Aññopuggalotipañhepi saṅkhatehi khandhehi aññattaṃ anicchanto paṭikkhepo tasseva.

    ২১২. খন্ধা সঙ্খতাতিআদি সঙ্খতাসঙ্খতানি সরূপেন দস্সেত্ৰা অঞ্ঞত্তপুচ্ছনত্থং ৰুত্তং।

    212. Khandhā saṅkhatātiādi saṅkhatāsaṅkhatāni sarūpena dassetvā aññattapucchanatthaṃ vuttaṃ.

    ২১৩. রূপং সঙ্খতন্তিআদি খন্ধে ৰিভাগতো দস্সেত্ৰা অঞ্ঞত্তপুচ্ছনত্থং ৰুত্তং।

    213. Rūpaṃ saṅkhatantiādi khandhe vibhāgato dassetvā aññattapucchanatthaṃ vuttaṃ.

    ২১৪. পুগ্গলস্স উপ্পাদোতি পুচ্ছা সকৰাদিস্স, ‘‘জাতিধম্মা জরাধম্মা, অথো মরণধম্মিনো’’তিআদিসুত্তৰসেন পটিঞ্ঞা পরৰাদিস্স। সঙ্খতভাৰং পনস্স সো ন ইচ্ছতি, তস্মা পটিক্খিপতি।

    214. Puggalassa uppādoti pucchā sakavādissa, ‘‘jātidhammā jarādhammā, atho maraṇadhammino’’tiādisuttavasena paṭiññā paravādissa. Saṅkhatabhāvaṃ panassa so na icchati, tasmā paṭikkhipati.

    ২১৫. পুন ন উপ্পাদো পঞ্ঞাযতীতিআদিনা নযেন পুট্ঠো ‘‘দুক্খমেৰ হি সম্ভোতি , দুক্খং তিট্ঠতি ৰেতি চা’’তিআদিৰচনতো (সং॰ নি॰ ১.১৭১) পুগ্গলস্স উপ্পাদাদযো নাম ন যুজ্জন্তীতি পটিজানাতি।

    215. Puna na uppādo paññāyatītiādinā nayena puṭṭho ‘‘dukkhameva hi sambhoti , dukkhaṃ tiṭṭhati veti cā’’tiādivacanato (saṃ. ni. 1.171) puggalassa uppādādayo nāma na yujjantīti paṭijānāti.

    ২১৬. অত্থত্থম্হীতি অত্থং ৰুচ্চতি নিব্বানং। তত্থ অত্থীতি পুচ্ছতি। তস্স অত্থিতায সস্সতং, নত্থিতায। উচ্ছেদো আপজ্জতি। তদুভযম্পি অনিচ্ছন্তো পচ্ছা পটিক্খিপতি।

    216. Atthatthamhīti atthaṃ vuccati nibbānaṃ. Tattha atthīti pucchati. Tassa atthitāya sassataṃ, natthitāya. Ucchedo āpajjati. Tadubhayampi anicchanto pacchā paṭikkhipati.

    ঞাতকানুযোগাদিৰণ্ণনা।

    Ñātakānuyogādivaṇṇanā.

    ১৯. পটিৰেধানুযোগাদিৰণ্ণনা

    19. Paṭivedhānuyogādivaṇṇanā

    ২১৭. ভৰং নিস্সায পঞ্হে ভৰন্তি উপপত্তিভৰং।

    217. Bhavaṃ nissāya pañhe bhavanti upapattibhavaṃ.

    ২১৮. ৰেদনং ৰেদিযমানপঞ্হে ৰেদনং ৰেদিযমানো পরিগ্গহিতৰেদনো যোগাৰচরোৰ পজানাতি, বালপুথুজ্জনো নপ্পজানাতি।

    218. Vedanaṃ vediyamānapañhe vedanaṃ vediyamāno pariggahitavedano yogāvacarova pajānāti, bālaputhujjano nappajānāti.

    ২২৪. কাযানুপস্সনাদিপঞ্হা উত্তানত্থাযেৰ।

    224. Kāyānupassanādipañhā uttānatthāyeva.

    ২২৬. পারাযনগাথায সুঞ্ঞতো লোকং অৰেক্খস্সূতি সত্তসুঞ্ঞতৰসেন খন্ধলোকং ওলোকেহীতি অত্থো।

    226. Pārāyanagāthāya suññato lokaṃ avekkhassūti sattasuññatavasena khandhalokaṃ olokehīti attho.

    ২২৮. পুগ্গলো অৰেক্খতীতি সকৰাদিপুচ্ছা। পরৰাদিস্স হি ‘‘সুঞ্ঞতো লোকং অৰেক্খস্সূ’’তি গাথায যো অৰেক্খতি, সো পুগ্গলোতি লদ্ধি, তস্মা নং এৰং পুচ্ছতি। সহ রূপেনাতি রূপকাযেন সদ্ধিং। ততো অনিস্সটো হুত্ৰাতি অত্থো। ইদং পঞ্চৰোকারৰসেন অনুজানিত্ৰা পুন তং জীৰন্তি পুট্ঠো সুত্তৰিরোধভযেন পটিক্খিপতি। ৰিনা রূপেনাতি ইদং চতুৰোকারৰসেন অনুজানিত্ৰা পুন অঞ্ঞং জীৰন্তি পুট্ঠো সুত্তৰিরোধভযেনেৰ পটিক্খিপতি। ‘‘অব্ভন্তরগতো’’তি চ ‘‘বহিদ্ধা নিক্খমিত্ৰা’’তি চ ইদং ‘‘সহ রূপেন ৰিনা রূপেনা’’তি হেট্ঠা ৰুত্তস্স লক্খণৰচনং। তত্থ অব্ভন্তরগতোতি রূপস্স অন্তোগতো, ইতো ৰা এত্তো ৰা অনিক্খমিত্ৰা রূপপরিচ্ছেদৰসেনেৰ ঠিতো হুত্ৰাতি অত্থো। নিক্খমিত্ৰাতি রূপপরিচ্ছেদং অতিক্কমিত্ৰা। রূপং অনিস্সিতো হুত্ৰাতি অত্থো।

    228. Puggalo avekkhatīti sakavādipucchā. Paravādissa hi ‘‘suññato lokaṃ avekkhassū’’ti gāthāya yo avekkhati, so puggaloti laddhi, tasmā naṃ evaṃ pucchati. Saha rūpenāti rūpakāyena saddhiṃ. Tato anissaṭo hutvāti attho. Idaṃ pañcavokāravasena anujānitvā puna taṃ jīvanti puṭṭho suttavirodhabhayena paṭikkhipati. Vinā rūpenāti idaṃ catuvokāravasena anujānitvā puna aññaṃ jīvanti puṭṭho suttavirodhabhayeneva paṭikkhipati. ‘‘Abbhantaragato’’ti ca ‘‘bahiddhā nikkhamitvā’’ti ca idaṃ ‘‘saha rūpena vinā rūpenā’’ti heṭṭhā vuttassa lakkhaṇavacanaṃ. Tattha abbhantaragatoti rūpassa antogato, ito vā etto vā anikkhamitvā rūpaparicchedavaseneva ṭhito hutvāti attho. Nikkhamitvāti rūpaparicchedaṃ atikkamitvā. Rūpaṃ anissito hutvāti attho.

    ২৩১. অনত্তাতি অত্তনা জীৰেন পুগ্গলেন রহিতো। একধম্মেপি পুগ্গলো নত্থীতি অত্থো। এৰং সব্বসুত্তানং আগমট্ঠকথাসু ৰুত্তনযেনেৰ অত্থো ৰেদিতব্বো। ইধ পন সন্ধাযভাসিতমত্তমেৰ ৰক্খাম।

    231. Anattāti attanā jīvena puggalena rahito. Ekadhammepi puggalo natthīti attho. Evaṃ sabbasuttānaṃ āgamaṭṭhakathāsu vuttanayeneva attho veditabbo. Idha pana sandhāyabhāsitamattameva vakkhāma.

    ২৩৭. ৰুত্তং ভগৰতা সপ্পিকুম্ভোতিআদি ‘‘সব্বাৰ দেসনা যথারুতৰসেনেৰ অত্থতো ন গহেতব্বা’’তি দস্সনত্থং আভতং। যথা হি সুৰণ্ণং গহেত্ৰা কতো সুৰণ্ণৰিকারো কুম্ভো সুৰণ্ণকুম্ভোতি ৰুচ্চতি, ন এৰং সপ্পিং গহেত্ৰা কতো সপ্পিস্স ৰিকারো সপ্পিকুম্ভো নাম অত্থি। যস্মিং পন কুম্ভে সপ্পি পক্খিত্তং, সো সপ্পিকুম্ভো নামাতি অযমেত্থ অত্থো। তেলকুম্ভাদীসুপি এসেৰ নযো। যথা চ নিব্বানং নিচ্চং ধুৰং, ন এৰং ভত্তং ৰা যাগু ৰা অত্থি। কালপরিচ্ছেদং পন অকত্ৰা দিৰসে দিৰসে দস্সামাতি পঞ্ঞত্তৰসেন ‘‘নিচ্চভত্তং ধুৰযাগূ’’তি ৰুচ্চতীতি অযমেত্থ অত্থো।

    237. Vuttaṃ bhagavatā sappikumbhotiādi ‘‘sabbāva desanā yathārutavaseneva atthato na gahetabbā’’ti dassanatthaṃ ābhataṃ. Yathā hi suvaṇṇaṃ gahetvā kato suvaṇṇavikāro kumbho suvaṇṇakumbhoti vuccati, na evaṃ sappiṃ gahetvā kato sappissa vikāro sappikumbho nāma atthi. Yasmiṃ pana kumbhe sappi pakkhittaṃ, so sappikumbho nāmāti ayamettha attho. Telakumbhādīsupi eseva nayo. Yathā ca nibbānaṃ niccaṃ dhuvaṃ, na evaṃ bhattaṃ vā yāgu vā atthi. Kālaparicchedaṃ pana akatvā divase divase dassāmāti paññattavasena ‘‘niccabhattaṃ dhuvayāgū’’ti vuccatīti ayamettha attho.

    ‘‘অত্থি পুগ্গলো অত্তহিতায পটিপন্নো’’তিআদীসুপি যথা রূপাদযো ধম্মা পচ্চত্তলক্খণসামঞ্ঞলক্খণৰসেন অত্থি, ন এৰং পুগ্গলো । রূপাদীসু পন সতি ‘এৰংনামো’‘এৰংগোত্তো’তি ৰোহারো হোতি। ইতি ইমিনা লোকৰোহারেন লোকসম্মুতিযা লোকনিরুত্তিযা অত্থি পুগ্গলোতি অযমেত্থ অত্থো। ৰুত্তম্পি চেতং ভগৰতা – ‘‘ইমা খো চিত্ত, লোকসমঞ্ঞা লোকনিরুত্তিযো লোকৰোহারা লোকপঞ্ঞত্তিযো’’তি (দী॰ নি॰ ১.৪৪০)। রূপাদিধম্মা পন ৰিনাপি লোকসম্মুতিং পচ্চত্তসামঞ্ঞলক্খণৰসেন পঞ্ঞাপনতো অত্থীতি অযমেত্থ অত্থো।

    ‘‘Atthi puggalo attahitāya paṭipanno’’tiādīsupi yathā rūpādayo dhammā paccattalakkhaṇasāmaññalakkhaṇavasena atthi, na evaṃ puggalo . Rūpādīsu pana sati ‘evaṃnāmo’‘evaṃgotto’ti vohāro hoti. Iti iminā lokavohārena lokasammutiyā lokaniruttiyā atthi puggaloti ayamettha attho. Vuttampi cetaṃ bhagavatā – ‘‘imā kho citta, lokasamaññā lokaniruttiyo lokavohārā lokapaññattiyo’’ti (dī. ni. 1.440). Rūpādidhammā pana vināpi lokasammutiṃ paccattasāmaññalakkhaṇavasena paññāpanato atthīti ayamettha attho.

    বুদ্ধানং পন দ্ৰে কথা সম্মুতিকথা চ পরমত্থকথা চ। তত্থ সত্তো, পুগ্গলো, দেৰো, ব্রহ্মাতিআদিকা সম্মুতিকথা নাম। অনিচ্চং, দুক্খং, অনত্তা, খন্ধা, ধাতুযো, আযতনানি, সতিপট্ঠানা, সম্মপ্পধানাতিআদিকা পরমত্থকথা নাম।

    Buddhānaṃ pana dve kathā sammutikathā ca paramatthakathā ca. Tattha satto, puggalo, devo, brahmātiādikā sammutikathā nāma. Aniccaṃ, dukkhaṃ, anattā, khandhā, dhātuyo, āyatanāni, satipaṭṭhānā, sammappadhānātiādikā paramatthakathā nāma.

    তত্থ যো সম্মুতিদেসনায সত্তোতি ৰা…পে॰… ব্রহ্মাতি ৰাতি ৰুত্তে জানিতুং পটিৰিজ্ঝিতুং নিয্যাতুং অরহত্তজযগ্গাহং গহেতুং সক্কোতি, তস্স ভগৰা আদিতোৰ সত্তোতি ৰা পুগ্গলোতি ৰা পোসোতি ৰা দেৰোতি ৰা ব্রহ্মাতি ৰা কথেতি। যো পরমত্থদেসনায অনিচ্চন্তি ৰা দুক্খন্তি ৰাতিআদীসু অঞ্ঞতরং সুত্ৰাৰ জানিতুং পটিৰিজ্ঝিতুং নিয্যাতুং অরহত্তজযগ্গাহং গহেতুং সক্কোতি। তস্স অনিচ্চন্তিআদীসু অঞ্ঞতরং কথেতি। তথা সম্মুতিকথায বুজ্ঝনকসত্তস্স ন পঠমং পরমত্থকথং কথেতি। সম্মুতিকথায পন বোধেত্ৰা পচ্ছা পরমত্থকথং কথেতি । পরমত্থকথায বুজ্ঝনকসত্তস্সাপি ন পঠমং সম্মুতিকথং কথেতি। পরমত্থকথায পন বোধেত্ৰা পচ্ছা সম্মুতিকথং কথেতি। পকতিযা পন পঠমমেৰ পরমত্থকথং কথেন্তস্স দেসনা লূখাকারা হোতি। তস্মা বুদ্ধা পঠমং সম্মুতিকথং কথেত্ৰা পচ্ছা পরমত্থকথং কথেন্তি। তে সম্মুতিকথং কথেন্তাপি সচ্চমেৰ সভাৰমেৰ অমুসাৰ কথেন্তি। পরমত্থকথং কথেন্তাপি সচ্চমেৰ সভাৰমেৰ অমুসাৰ কথেন্তি। অযঞ্হি –

    Tattha yo sammutidesanāya sattoti vā…pe… brahmāti vāti vutte jānituṃ paṭivijjhituṃ niyyātuṃ arahattajayaggāhaṃ gahetuṃ sakkoti, tassa bhagavā āditova sattoti vā puggaloti vā posoti vā devoti vā brahmāti vā katheti. Yo paramatthadesanāya aniccanti vā dukkhanti vātiādīsu aññataraṃ sutvāva jānituṃ paṭivijjhituṃ niyyātuṃ arahattajayaggāhaṃ gahetuṃ sakkoti. Tassa aniccantiādīsu aññataraṃ katheti. Tathā sammutikathāya bujjhanakasattassa na paṭhamaṃ paramatthakathaṃ katheti. Sammutikathāya pana bodhetvā pacchā paramatthakathaṃ katheti . Paramatthakathāya bujjhanakasattassāpi na paṭhamaṃ sammutikathaṃ katheti. Paramatthakathāya pana bodhetvā pacchā sammutikathaṃ katheti. Pakatiyā pana paṭhamameva paramatthakathaṃ kathentassa desanā lūkhākārā hoti. Tasmā buddhā paṭhamaṃ sammutikathaṃ kathetvā pacchā paramatthakathaṃ kathenti. Te sammutikathaṃ kathentāpi saccameva sabhāvameva amusāva kathenti. Paramatthakathaṃ kathentāpi saccameva sabhāvameva amusāva kathenti. Ayañhi –

    ‘‘দুৰে সচ্চানি অক্খাসি, সম্বুদ্ধো ৰদতং ৰরো।

    ‘‘Duve saccāni akkhāsi, sambuddho vadataṃ varo;

    সম্মুতিং পরমত্থঞ্চ, ততিযং নুপলব্ভতি’’॥

    Sammutiṃ paramatthañca, tatiyaṃ nupalabbhati’’.

    তত্থ –

    Tattha –

    ‘‘সঙ্কেতৰচনং সচ্চং, লোকসম্মুতিকারণং।

    ‘‘Saṅketavacanaṃ saccaṃ, lokasammutikāraṇaṃ;

    পরমত্থৰচনং সচ্চং, ধম্মানং তথলক্খণ’’ন্তি॥

    Paramatthavacanaṃ saccaṃ, dhammānaṃ tathalakkhaṇa’’nti.

    অপরো নযো – দ্ৰে ভগৰতো দেসনা পরমত্থদেসনা চ খন্ধাদিৰসেন, সম্মুতিদেসনা চ সপ্পিকুম্ভাদিৰসেন। ন হি ভগৰা সমঞ্ঞং অতিধাৰতি। তস্মা ‘‘অত্থি পুগ্গলো’’তি ৰচনমত্ততো অভিনিৰেসো ন কাতব্বো। সত্থারা হি –

    Aparo nayo – dve bhagavato desanā paramatthadesanā ca khandhādivasena, sammutidesanā ca sappikumbhādivasena. Na hi bhagavā samaññaṃ atidhāvati. Tasmā ‘‘atthi puggalo’’ti vacanamattato abhiniveso na kātabbo. Satthārā hi –

    ‘‘পঞ্ঞত্তিং অনতিক্কম্ম, পরমত্থো পকাসিতো।

    ‘‘Paññattiṃ anatikkamma, paramattho pakāsito;

    সমঞ্ঞং নাতিধাৰেয্য, তস্মা অঞ্ঞোপি পণ্ডিতো।

    Samaññaṃ nātidhāveyya, tasmā aññopi paṇḍito;

    পরমত্থং পকাসেন্তো, সমঞ্ঞং নাতিধাৰযে’’॥

    Paramatthaṃ pakāsento, samaññaṃ nātidhāvaye’’.

    সেসং সব্বত্থ উত্তানত্থমেৰাতি।

    Sesaṃ sabbattha uttānatthamevāti.

    পুগ্গলকথা নিট্ঠিতা।

    Puggalakathā niṭṭhitā.




    Next: ২. পরিহানিকথা • 2. Parihānikathā




    Related texts:



    তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ১. পুগ্গলকথা • 1. Puggalakathā

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. পুগ্গলকথা • 1. Puggalakathā

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. পুগ্গলকথা • 1. Puggalakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact