| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. পুগ্গলপ্পসাদসুত্তং
10. Puggalappasādasuttaṃ
২৫০. ‘‘পঞ্চিমে , ভিক্খৰে, আদীনৰা পুগ্গলপ্পসাদে। কতমে পঞ্চ? যস্মিং, ভিক্খৰে, পুগ্গলে পুগ্গলো অভিপ্পসন্নো হোতি, সো তথারূপং আপত্তিং আপন্নো হোতি যথারূপায আপত্তিযা সঙ্ঘো উক্খিপতি। তস্স এৰং হোতি – ‘যো খো ম্যাযং পুগ্গলো পিযো মনাপো সো সঙ্ঘেন উক্খিত্তো’তি। ভিক্খূসু অপ্পসাদবহুলো হোতি। ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি। অঞ্ঞে ভিক্খূ অভজন্তো সদ্ধম্মং ন সুণাতি। সদ্ধম্মং অসুণন্তো সদ্ধম্মা পরিহাযতি। অযং, ভিক্খৰে, পঠমো আদীনৰো পুগ্গলপ্পসাদে।
250. ‘‘Pañcime , bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ukkhipati. Tassa evaṃ hoti – ‘yo kho myāyaṃ puggalo piyo manāpo so saṅghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.
‘‘পুন চপরং, ভিক্খৰে, যস্মিং পুগ্গলে পুগ্গলো অভিপ্পসন্নো হোতি, সো তথারূপং আপত্তিং আপন্নো হোতি যথারূপায আপত্তিযা সঙ্ঘো অন্তে নিসীদাপেতি । তস্স এৰং হোতি – ‘যো খো ম্যাযং পুগ্গলো পিযো মনাপো সো সঙ্ঘেন অন্তে নিসীদাপিতো’তি। ভিক্খূসু অপ্পসাদবহুলো হোতি। ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি। অঞ্ঞে ভিক্খূ অভজন্তো সদ্ধম্মং ন সুণাতি। সদ্ধম্মং অসুণন্তো সদ্ধম্মা পরিহাযতি। অযং, ভিক্খৰে, দুতিযো আদীনৰো পুগ্গলপ্পসাদে।
‘‘Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ante nisīdāpeti . Tassa evaṃ hoti – ‘yo kho myāyaṃ puggalo piyo manāpo so saṅghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.
‘‘পুন চপরং, ভিক্খৰে, যস্মিং পুগ্গলে পুগ্গলো অভিপ্পসন্নো হোতি, সো দিসাপক্কন্তো হোতি…পে॰… সো ৰিব্ভন্তো হোতি…পে॰… সো কালঙ্কতো হোতি। তস্স এৰং হোতি – ‘যো খো ম্যাযং পুগ্গলো পিযো মনাপো সো কালঙ্কতো’তি। অঞ্ঞে ভিক্খূ ন ভজতি। অঞ্ঞে ভিক্খূ অভজন্তো সদ্ধম্মং ন সুণাতি। সদ্ধম্মং অসুণন্তো সদ্ধম্মা পরিহাযতি। অযং, ভিক্খৰে, পঞ্চমো আদীনৰো পুগ্গলপ্পসাদে। ইমে খো, ভিক্খৰে, পঞ্চ আদীনৰা পুগ্গলপ্পসাদে’’তি। দসমং।
‘‘Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti…pe… so vibbhanto hoti…pe… so kālaṅkato hoti. Tassa evaṃ hoti – ‘yo kho myāyaṃ puggalo piyo manāpo so kālaṅkato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde’’ti. Dasamaṃ.
দুচ্চরিতৰগ্গো পঞ্চমো।
Duccaritavaggo pañcamo.
তস্সুদ্দানং –
Tassuddānaṃ –
দুচ্চরিতং কাযদুচ্চরিতং, ৰচীদুচ্চরিতং মনোদুচ্চরিতং।
Duccaritaṃ kāyaduccaritaṃ, vacīduccaritaṃ manoduccaritaṃ;
চতূহি পরে দ্ৰে সিৰথিকা, পুগ্গলপ্পসাদেন চাতি॥
Catūhi pare dve sivathikā, puggalappasādena cāti.
পঞ্চমপণ্ণাসকং সমত্তং।
Pañcamapaṇṇāsakaṃ samattaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. পুগ্গলপ্পসাদসুত্তৰণ্ণনা • 10. Puggalappasādasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. পঠমদীঘচারিকসুত্তাদিৰণ্ণনা • 1-10. Paṭhamadīghacārikasuttādivaṇṇanā
