| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๑๐. ปุคฺคลปฺปสาทสุตฺตํ
10. Puggalappasādasuttaṃ
๒๕๐. ‘‘ปญฺจิเม , ภิกฺขเว, อาทีนวา ปุคฺคลปฺปสาเทฯ กตเม ปญฺจ? ยสฺมิํ, ภิกฺขเว, ปุคฺคเล ปุคฺคโล อภิปฺปสโนฺน โหติ, โส ตถารูปํ อาปตฺติํ อาปโนฺน โหติ ยถารูปาย อาปตฺติยา สโงฺฆ อุกฺขิปติฯ ตสฺส เอวํ โหติ – ‘โย โข มฺยายํ ปุคฺคโล ปิโย มนาโป โส สเงฺฆน อุกฺขิโตฺต’ติฯ ภิกฺขูสุ อปฺปสาทพหุโล โหติฯ ภิกฺขูสุ อปฺปสาทพหุโล สมาโน อเญฺญ ภิกฺขู น ภชติฯ อเญฺญ ภิกฺขู อภชโนฺต สทฺธมฺมํ น สุณาติฯ สทฺธมฺมํ อสุณโนฺต สทฺธมฺมา ปริหายติฯ อยํ, ภิกฺขเว, ปฐโม อาทีนโว ปุคฺคลปฺปสาเทฯ
250. ‘‘Pañcime , bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ukkhipati. Tassa evaṃ hoti – ‘yo kho myāyaṃ puggalo piyo manāpo so saṅghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.
‘‘ปุน จปรํ, ภิกฺขเว, ยสฺมิํ ปุคฺคเล ปุคฺคโล อภิปฺปสโนฺน โหติ, โส ตถารูปํ อาปตฺติํ อาปโนฺน โหติ ยถารูปาย อาปตฺติยา สโงฺฆ อเนฺต นิสีทาเปติ ฯ ตสฺส เอวํ โหติ – ‘โย โข มฺยายํ ปุคฺคโล ปิโย มนาโป โส สเงฺฆน อเนฺต นิสีทาปิโต’ติฯ ภิกฺขูสุ อปฺปสาทพหุโล โหติฯ ภิกฺขูสุ อปฺปสาทพหุโล สมาโน อเญฺญ ภิกฺขู น ภชติฯ อเญฺญ ภิกฺขู อภชโนฺต สทฺธมฺมํ น สุณาติฯ สทฺธมฺมํ อสุณโนฺต สทฺธมฺมา ปริหายติฯ อยํ, ภิกฺขเว, ทุติโย อาทีนโว ปุคฺคลปฺปสาเทฯ
‘‘Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ante nisīdāpeti . Tassa evaṃ hoti – ‘yo kho myāyaṃ puggalo piyo manāpo so saṅghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.
‘‘ปุน จปรํ, ภิกฺขเว, ยสฺมิํ ปุคฺคเล ปุคฺคโล อภิปฺปสโนฺน โหติ, โส ทิสาปกฺกโนฺต โหติ…เป.… โส วิพฺภโนฺต โหติ…เป.… โส กาลงฺกโต โหติฯ ตสฺส เอวํ โหติ – ‘โย โข มฺยายํ ปุคฺคโล ปิโย มนาโป โส กาลงฺกโต’ติฯ อเญฺญ ภิกฺขู น ภชติฯ อเญฺญ ภิกฺขู อภชโนฺต สทฺธมฺมํ น สุณาติฯ สทฺธมฺมํ อสุณโนฺต สทฺธมฺมา ปริหายติฯ อยํ, ภิกฺขเว, ปญฺจโม อาทีนโว ปุคฺคลปฺปสาเทฯ อิเม โข, ภิกฺขเว, ปญฺจ อาทีนวา ปุคฺคลปฺปสาเท’’ติฯ ทสมํฯ
‘‘Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti…pe… so vibbhanto hoti…pe… so kālaṅkato hoti. Tassa evaṃ hoti – ‘yo kho myāyaṃ puggalo piyo manāpo so kālaṅkato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde’’ti. Dasamaṃ.
ทุจฺจริตวโคฺค ปญฺจโมฯ
Duccaritavaggo pañcamo.
ตสฺสุทฺทานํ –
Tassuddānaṃ –
ทุจฺจริตํ กายทุจฺจริตํ, วจีทุจฺจริตํ มโนทุจฺจริตํ;
Duccaritaṃ kāyaduccaritaṃ, vacīduccaritaṃ manoduccaritaṃ;
จตูหิ ปเร เทฺว สิวถิกา, ปุคฺคลปฺปสาเทน จาติฯ
Catūhi pare dve sivathikā, puggalappasādena cāti.
ปญฺจมปณฺณาสกํ สมตฺตํฯ
Pañcamapaṇṇāsakaṃ samattaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๑๐. ปุคฺคลปฺปสาทสุตฺตวณฺณนา • 10. Puggalappasādasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๑๐. ปฐมทีฆจาริกสุตฺตาทิวณฺณนา • 1-10. Paṭhamadīghacārikasuttādivaṇṇanā
